Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TIURAI 2013

Te mau faautuaraa a te Atua—Mea ino anei?

Te mau faautuaraa a te Atua—Mea ino anei?

NO TE ite, e hi‘opoa ana‘e e piti faautuaraa a te Atua i roto i te Bibilia. Te diluvi i te tau o Noa e te haamouraa o te ati Kanaana.

TE DILUVI I TE TAU O NOA

TA TE TAATA E PARAU RA: “Mea ino mau te Atua a faatupu ai i te diluvi. Ua haamou-roa-hia te taata atoa. O Noa e to ’na ana‘e utuafare tei ora mai.”

TA TE BIBILIA E PARAU RA: Ua na ô te Atua: “Aore roa o ’u e mauruururaa i te pohe o te taata ino; ia fariu mairâ te taata i ta ’na parau ino ia ora.” (Ezekiela 33:11) Aita ïa te haamouraa o te feia iino i te tau o Noa i faaoaoa i te Atua. No te aha râ oia i na reira ’i?

Ia au i te Bibilia, ia riro te reira “ei hi‘oraa na te feia e mau i te paieti ore a muri atura.” (Petero 2, 2:5, 6) Eaha ïa te haapii mai?

Na mua roa, te ite ra iho â te Atua i te mau mauiui e ohipa iino. Noa ’tu e e faaoto te pohe o te taata ia ’na, e haamou oia i te feia iino e te mauiui.

Te piti, ei Atua aroha, e faaara oia i te taata hou a faautua ’i. Ei taata poro i te parau-tia, ua na reira Noa. Aita râ te taata i haapao a‘e. Te na ô ra te Bibilia: “Aore roa i ite [aore ra haapao], e roohia noa ihora ratou e te diluvi, pau roa ’tura ratou.”—Mataio 24:39.

Ua na reira noa iho â anei te Atua? E. Ua faaara oia i to Iseraela e faaea i te rave i te ino mai te mau nunaa e haaati ra. Ia ore, e haru e e haamou te enemi ia Ierusalema e e riro ratou ei tîtî. Aita Iseraela i faaroo, ua tamau râ i te tutui i te tamarii i te auahi ei tusia. Ua nafea Iehova? Ua tono oia e rave rahi taime i te mau peropheta no te a‘o i to ’na nunaa ia taui. Na ô atura: “Aita a te Fatu ra a Iehova e peu i rave, maori râ ia faaite i ta ’na parau i moe i tana ra mau tavini i te mau peropheta.”—Amosa 3:7.

E NAFEA OE E FAUFAAHIA ’I? Te faaite maira ta Iehova mau faautuaraa i tahito e te vai ra te tiaturiraa. Te tiai ru nei tatou i ta Iehova haavaraa i te feia iino. Te na ô ra te Bibilia: “E riro hoi te feia hamani ino ra i te tâpû-ê-hia . . . area te  feia mǎrû ra, e parahi ïa i te fenua, e oaoa ratou i te rahi o te hau.” (Salamo 37:9-11) No oe, mea ino anei te hoê haavaraa o te faaore i te mauiui o te huitaata? E ere anei te tahi faaiteraa o te aroha mau?

TE HAAMOURAA O TE ATI KANAANA

TA TE TAATA E PARAU RA: “Mea ino roa ’tu â te haamouraa o to Kanaana i te tama‘i o teie tau.”

TA TE BIBILIA E PARAU RA: “O tei au atoa to [te Atua] ra mau haerea; e Atua parau mau [oia], e te ino ore ra.” (Deuteronomi 32:4) Aita ta te Atua faautuaraa e au i te tama‘i a te taata. No te aha? E ite te Atua i te aau, te huru mau o te taata.

Ei hi‘oraa, a haava ’i te Atua i na oire e piti o Sodoma e Gomora, ua faaoti oia e haamou atu. Ua haapeapea te taata taiva ore ra o Aberahama e mea tia anei ia na reira. Aita oia i mana‘o noa ’‘e e e haamou to ’na Atua tia i te feia iino. Ma te faaoromai, ua faaite atu te Atua e ore oia e haamou i to Sodoma ia itea ia ’na hoê ahuru taata parau-tia i reira. (Genese 18:20-33) A hi‘opoa ’i râ oia i te aau o te taata o reira, o te ino ana‘e ta ’na i ite.—Paraleipomeno 1, 28:9.

Ua haava atoa te Atua i to Kanaana e ua faaue ia haamouhia ratou. Mea ino mau to reira mau taata i te mea e e tutui na ratou i te tamarii i te auahi ei tusia. * (Te mau arii 2, 16:3) Ua ite to Kanaana e ua faaue Iehova i to Iseraela ia haru i te taatoaraa o te fenua. Ua onoono râ vetahi e faaea i reira. Aita ïa ratou i patoi noa i to Iseraela ia Iehova atoa râ, tei haapapu i ta ’na turu i to ’na nunaa.

Hau atu â, ua tae roa ta Iehova hamani maitai i te mau taata o Kanaana o te faarue i te ino a pee atu ai i ta ’na mau aratairaa teitei. Ua faaorahia te vahine Kanaana taiata o Rahaba ra e to ’na utuafare. Oia atoa no vetahi o te ati Kanaana e noho ra i te oire Gibeona tei taparu ia ore e taparahihia ’tu.—Iosua 6:25; 9:3, 24-26.

E NAFEA OE E FAUFAAHIA ’I? Mea faufaa mau te haapii mai i te faautuaraa a Iehova i to Kanaana. Te piri atu ra tatou i “te mahana haavaraa, i te poheraa o te feia paieti ore.” (Petero 2, 3:7) Ua here ana‘e tatou ia Iehova, e oaoa ïa tatou ia faaore oia i te mauiui ma te haamou i te feia e patoi ra i ta ’na faatereraa tia.

Mea ino mau te taata o Kanaana, aita ratou i patoi noa i to Iseraela ia Iehova atoa râ

Ma te here, te haamana‘o maira Iehova e e faahopearaa te faaotiraa a te mau metua i nia i ta ratou tamarii. Te na ô ra te Bibilia: “E tena na, a rave i te ora ia ora oe e to oe atoa ra huaai: ia hinaaro hoi oe i to Atua ra ia Iehova, e ia faaroo oe i to ’na reo, e ia ati atu oe ia ’na.” (Deuteronomi 30:19, 20) Mai tera anei te mau parau a te hoê Atua ino? Aore ra a tei here i te taata e tei hinaaro ia rave oia i te faaotiraa maitai?

^ par. 15 Ua itea mai i te mau ihipǎpǎ te mau haapapuraa e tutui na to Kanaana i te mau aiû i te auahi ei tusia.