Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Tiurai 2013

 RAVEA E OAOA ’I TE UTUAFARE

A faaore i te fifi e te taata no rapae i to oe utuafare

A faaore i te fifi e te taata no rapae i to oe utuafare

MARGARET, * TE TAHI METUA VAHINE I AUTERALIA: “Ua parau te vahine matamua a ta ’u tane i te tamarii eiaha e faaroo ia ’u, noa ’tu e no te tahi mea haihai mai teie ‘A haamana‘o e haere e purumu to oe niho.’” No Margaret, te fifi ra to ’na faaipoiporaa no taua peu ra.

Ia faaea te tahi hoa faaipoipo i te apiti apî, e pinepine e tupu te fifi i rotopu i te melo o taua utuafare apî e vetahi ê. * No te rahiraa, o te farereiraa te metua i te tamarii, te a‘oraa e te haamâu‘araa te fifi. E huru ê atoa paha te fetii e te mau hoa i te melo apî o te utuafare. A hi‘o na e nafea te a‘oraa Bibilia e tauturu atu ai.

1. TE TAAIRAA E TE TAMARII A TE APITI MATAMUA

Te na ô ra Judith no Namibie: “E parau te vahine matamua a ta ’u tane, e vahine apî noa vau na to ratou papa. Mai te peu e e tamariihia mâua, e ere i te taeae aore ra tuahine no ratou.  Ua mauiui roa vau no ta ’na mau parau. Mea here roa hoi na ’u ia ratou mai te huru ra e na ’u iho tera mau tamarii.”

Te fa‘i nei te mau taata hi‘opoa e e tupu iho â te amahamaha i roto i te utuafare apî no te apiti matamua. E pinepine e peapea te mama o te tamarii e te vahine apî. Eaha râ te tauturu?

Te tahi ravea: A haamau i te mau otia tano. E fifihia paha te tamarii ia ore outou e farii ia farerei oia i to ’na metua. * No te tamarii, mea faufaa roa iho â ‘tei fanau ia ’na,’ to ’na ïa na metua. (Maseli 23:22, 25) I te tahi a‘e pae, ia farii hanoa oe i ta te vahine matamua e parau, e inoino aore ra e riri atu paha to hoa faaipoipo apî. Mea maitai ia haamau i te mau otia tano no te paruru i to faaipoiporaa. I te hoê â taime e ia nehenehe, a ohipa amui e te metua o te tamarii.

NO TE MAU METUA

  • Ia tauaparau noa oe no te tamarii e to apiti matamua. Ei hi‘oraa, ma te mǎrû, a ani atu ia taniuniu mai i te tamarii i te taime tano eiaha râ mai ta ’na e hinaaro aore ra i te maororaa po.

  • Mai te peu e e ere na oe e haapao i te tamarii, ia piri noa to taairaa e o ’na, e nehenehe e taniuniu, papai i te rata, te e-mail e e hapono atu i te poroi. (Deuteronomi 6:6, 7) Mai vetahi, e faaohipa atoa paha oe i te Internet no te ite e no te aparau atu. Ma tera mau ravea e taa ’i ia oe i te huru e mana‘o o to tamarii a nehenehe atu ai e tauturu ia ’na.

NO TE VAHINE APÎ

  • A ‘aroha’ i te mama o te tamarii ma te haapapu atu e eita oe e mono ia ’na. (Petero 1, 3:8) Mai te peu e tei to fare te tamarii, a faaite tamau atu i to ’na huru, te mau parau maitai iho â râ. (Maseli 16:24) A ani i to ’na mama ia horoa mai oia i te tahi mana‘o tauturu e a haamauruuru atu.

  • Eiaha te tamarii e piri noa ia oe i reira ana‘e te mama. Te na ô ra Beverly no Marite: “Ua hinaaro te mau tamarii a ta ’u tane e pii mai ia ’u mama. Ua farii mâua ia na reira noa i te fare eiaha râ to reira ana‘e to ratou mama aore ra fetii. Ua maitai atura to mâua Jane taairaa e i muri a‘e, ua haa amui i roto i te mau faaanaanataeraa e te mau tere a te fare haapiiraa.”

E haapao te tamarii i to hi‘oraa

TAUTURU IA MAITAI TE TAAIRAA O NA METUA E TE APITI APÎ

    E tupu te hau te vai ra ana‘e te faatura

  • Noa ’tu e aita te metua aore ra te apiti apî i reira, eiaha e faaino i mua i te tamarii. Mea ohie ia haamoe e e nehenehe oia e huru ê i tera mau parau. Aita atoa oe i ite e nafea aore ra afea e faaitehia ’i ta oe mau faainoraa. (Koheleta 10:20) Ia faatia mai te tamarii i tei parauhia, a tauaparau noa i nia i to ’na mau mana‘o  hohonu. E parau atu paha oe: “Ee, ua peapea roa vau no ta oe i faaroo. Ua riri paha mama ia ’u. I te tahi taime, e na ô iho â te taata ua riri ana‘e ratou.”

  • A haamau i te faatureraa tano e a a‘o i te tamarii tei ǒ oe aore ra i ǒ te mama ana‘e oia. Aita ana‘e e nehenehe, a faataa i te taa-ê-raa ma te ore e faahapa i te metua. A hi‘o na i to muri nei tupuraa:

    Te vahine apî: Tim, a haere na tarai to oe tauera.

    Tim: I ǒ mama, e vaiiho noa matou na ’na e tarai.

    Te vahine apî (ma te riri): No reira iho â ïa oe i te hupehupe.

    E ere anei to muri nei pahonoraa i te mea maitai a‘e?

    Te vahine apî (ma te mǎrǔ): I ǒ nei, mea taa ê. Na te taata iho e tarai i to ’na tauera.

  • Eiaha e faanaho i te tahi mea tei te mama ana‘e te tamarii. (Mataio 7:12) E mai te peu e eita e nehenehe e taui i te mahana o tera ohipa, a ani na mua ’tu i te parau faatia hou a faaite ai i te tamarii.

TA OE E RAVE: A pee na i to muri nei mau mana‘o ia farerei oe i te vahine faaipoipo apî aore ra matamua a to tane:

  1. A hi‘o atu ma te mata ataata e eiaha e faaite atu i te au ore.

  2. A aroha ’tu ma te faahiti i to ’na i‘oa. E na ô paha oe: “Iaorana Jane.”

  3. Mea rahi ana‘e te taata, a pii atu ia ’na ia tapiri mai.

2. TE TAAIRAA E TE TAMARII PAARI

Ua papai te buka Step Wars i ta te tahi vahine i parau no ta ’na tane. E paruru noa oia i ta ’na mau tamarii paari. Eita atoa oia e farii e mea ino ratou i nia ia ’na. Te na ô ra tera vahine: “Ua riri taue atura vau. E nafea oe e nehenehe ai e vaiiho i te tamarii paari e tuino i to oe faaipoiporaa?”

Te tahi ravea: Ia taa ia oe i to vetahi ê mana‘o. Te na ô ra te Bibilia: “Eiaha roa ei taata e imi i to ’na ana‘e iho maitai, e imi râ te taata atoa i te maitai o vetahi ê atoa.” (Korinetia 1, 10:24) A feruri eaha e no te aha te tamarii e mana‘o ai mai tera. Peneia‘e no ’na, aita te metua e here faahou ra ia ratou. Aore ra, te haafaufaa ore ra oia i to ’na utuafare ia farii oia i te vahine apî. E mana‘o atoa paha na metua e eita te tamarii e piri faahou mai ia faahapa ’tu ratou.

A vaiiho e na te tau e haamaitai i to outou mau taairaa. Eiaha e faahepo ia vetahi ê ia here ia outou. (Sire a Solomona 8:4) A faaite i te mana‘o maitai. A farii atoa e e ere i te mea ohie ia piri oe e te tamarii a to hoa faaipoipo.

Noa ’tu e mea ino vetahi, eiaha e parau hanoa i te parau aore ra e faaite i to oe mana‘o. (Maseli 29:11) Mea fifi ana‘e ia na reira, a pure mai te arii Iseraela ra Davida: “E tuu mai oe, e Iehova, i te tiai i to ’u nei vaha: ei tiai i te uputa ra o to ’u nei utu.”—Salamo 141:3.

 Te ora ra anei outou i roto i te fare i paari ai te tamarii? Ua ite paha ïa oe e eita ratou e au ia hautihia te tahi mea i roto. No reira, eiaha e taui noa i te faanahoraa o te fare, i roto iho â râ i to ratou piha taotoraa. No te aha e ore ai e feruri e haere i roto i te hoê fare apî?

TA OE E RAVE: Mai te peu e mea ino e faatura ore noâ te tamarii paari a to hoa faaipoipo, a faaite atu ia ’na i to mana‘o e a faaroo atu i to ’na. Eiaha e faahepo atu ia a‘o i te tamarii. A tutava i te tâu‘a i to te tahi mana‘o. Ia ‘hoê â to orua aau’ e nehenehe ïa e haa amui no te maitai o te utuafare.—Korinetia 2, 13:11.

A faaite i to here i nia i te taatoaraa o te tamarii

3. TE TAAIRAA E TE FETII E HOA

Te na ô ra Marion, te tahi vahine i Kanada: “E tao‘a horoa noa ta to ’u na metua na ta ’u tamaiti eiaha râ na te mau tamarii a ta ’u tane. Ia ore ratou e huru ê, e hinaaro mâua e hoo mai i te tao‘a, i te tahi râ taime eita e nehenehe.”

Te tahi ravea: A haapao i to oe utuafare apî. A faaite i te fetii e hoa i ta oe e hinaaro ra no te utuafare apî. (Timoteo 1, 5:8) Noa ’tu e eita te fetii e hoa e au i te melo apî, a ani ia faatura ’tu. A faataa i te mau fifi e tupu ia ore te tamarii e tâu‘ahia e e herehia.

A vaiiho atoa i te tamarii ia haere i te metua o to hoa faaipoipo matamua. Te faatia ra Susan, te tahi mama i Beretane: “Ua faaipoipo faahou vau 18 ava‘e i muri a‘e i te poheraa ta ’u tane. Mea fifi roa no to ’na na metua ia farii i te reira. Ua maitai mai râ te taairaa a vaiiho ai mâua i te tamarii ia taniuniu atu. Ua tutava atoa i te haamauruuru atu no ta raua tauturu.”

TA OE E RAVE: A tauaparau e to hoa faaipoipo e nafea ia maitai noa te taairaa e te hoa aore ra fetii e au ore ra i te melo apî o te utuafare.

E nehenehe te taata no rapae e haafifi i to oraraa. E haamaitaihia râ to utuafare ia faaohipa oe i te a‘oraa Bibilia: “E patuhia te fare i te paari e oti atu: e e papu hoi taua fare ra i te ite.”—Maseli 24:3.

^ par. 3 Ua tauihia te tahi mau i‘oa.

^ par. 4 No te mau haamaramaramaraa hau e nafea ia faaruru i te tahi atu fifi, a hi‘o i te taatoaraa o te tumu parau “Des familles recomposées épanouies,” o te Réveillez-vous! no Eperera 2012 piahia e te mau Ite no Iehova.

^ par. 8 Ia faaino aore ra ia hamani ino atu râ te tahi metua o te tamarii, e titauhia paha ia etaeta ’tu â oe no te maitai o to utuafare.

A UIUI IA OE . . .

  • E nafea ia maitai te taairaa e te hoa faaipoipo matamua a ta ’u tane?

  • E nafea ia tauturu i te fetii e hoa ia ore e haamauiui i to ’u utuafare?