Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

TE PARE TIAIRAA 2010-12-01

 Ravea faufaa e oaoa ’i te utuafare

A tauaparau no nia i te taatiraa pae tino i ta outou mau tamarii

A tauaparau no nia i te taatiraa pae tino i ta outou mau tamarii

Te na ô ra Alicia, * te hoê tamahine: “I te tahi taime, e hinaaro noa vau e ite no nia i te taatiraa pae tino, te mana‘o nei au e ia uiui au i to ’u na metua, e mana‘o ïa raua e te rave nei au i te tahi ohipa ino.”

Te na ô ra Inez, to Alicia mama: “E hinaaro hoi au e parahi e ta ’u tamahine no te paraparau no nia i te taatiraa pae tino, no te rahi râ o ta ’na ohipa aita ’tura to mâua e taime no te tauaparau.”

I TEIE mahana, tei te mau vahi atoa te mau hoho‘a e haamaramaramaraa no nia i te taatiraa pae tino, i roto i te afata teata, hoho‘a teata e te mau parau tiani. E ere râ i te mea ohie no te mau metua e te mau tamarii ia tauaparau no nia i te reira. Te na ô ra Michael, te hoê taurearea no Kanada: “Te hinaaro nei au ia ite to ’u na metua e mea fifi e te haama no ’u ia aparau e o ratou no nia i te taatiraa pae tino. E mea ohie râ ia aparau i te hoê hoa.”

E pinepine e taiâ atoa te mau metua i te haamata i te aparau no nia i te taatiraa pae tino i ta ratou tamarii. Te parau ra Debra Haffner, orometua i te pae haapiiraa aupuruora, i roto i ta ’na buka (Beyond the Big Talk): “E rave rahi metua o tei parau mai e ua hoo ratou i te hoê buka no nia i te taatiraa pae tino e te taurearearaa no ta ratou tamarii, e ua vaiiho atu i roto i to ’na piha ma te ore roa e paraparau faahou atu.” Te na ô ra Haffner e tera ïa ta te tamarii e taa: “Te hinaaro nei mâua ia ite oe no nia i to oe tino e te taatiraa pae tino; aita râ mâua e hinaaro nei e tauaparau atu.”

Ei metua, eiaha e na reira. Mea faufaa roa ia aparau oe i ta oe mau tamarii no nia i te taatiraa pae tino. Teie e toru tumu:

  1. Ua taui te mana‘o no nia i te taatiraa pae tino. Te parau ra James 20 matahiti: “Aita te taata e mana‘o faahou ra i te taatiraa te hoê tane faaipoipo i ta ’na vahine. I teie nei, te vai ra te ai mero taatiraa, te taatiraa na te tiho, te mau poroi e te mau hoho‘a taatiraa atoa maoti te roro uira, te niuniu afaifai e te tahi atu mau ravea.”

  2. E faaroo iho â te tamarii i te mau parau tano ore i to ratou nainairaa. Te na ô ra Sheila te hoê mama: “E faaroo ratou i te parau o te taatiraa pae tino i te fare haapiiraa, eiaha râ mai ta outou e hinaaro ra.”

  3.   E uiraa ta te tamarii no nia i te taatiraa pae tino e taiâ râ ratou i te aparau atu. Te na ô ra Ana 15 matahiti no Beresilia: “Aita roa ’tu vau i ite e nafea ia haamata i te aparau i to ’u na metua no nia i te taatiraa pae tino.”

Ei metua, e hopoia no ǒ mai i te Atua ra ia paraparau oe no nia i te taatiraa pae tino i ta oe mau tamarii. (Ephesia 6:4) E ere iho â i te mea ohie no oe e no ratou atoa. Te vahi maitai râ, e rave rahi taurearea e farii nei i te parau a Danielle 14 matahiti e na ô ra: “Te hinaaro nei matou e na to matou metua e haapii mai no nia i te taatiraa pae tino eiaha râ na te tahi orometua haapii aore ra porotarama afata teata.” E nafea ïa oe e nehenehe ai e aparau i ta oe mau tamarii no nia i tera mea fifi, faufaa râ? *

Ia au i to ratou matahiti

Te ora nei hoi te tamarii i te vahi taata ma te faaroo iho â i te parau o te taatiraa pae tino mai to ratou nainairaa. Ma te peapea, i teie “anotau hopea” e ‘rahi atu â te ino’ o te mau taata iino. (Timoteo 2, 3:1, 13) Hau atu â, e rave rahi tamarii tei hamani-ino-hia e te mau taata paari no te mau opuaraa faufau.

E mea faufaa roa ia haapii oe i ta oe mau tamarii mai to ratou nainairaa mai. Te na ô ra Renate te hoê mama no Heremani: “Ia tiai oe ia taurearea mai ratou, eita paha ratou e paraparau no to ratou mamahu.” Ia haamaramarama ïa te metua i ta ratou mau tamarii ia au i to ratou matahiti.

Tei te fare haapiiraa tamahou:

A haapii atu i te mau i‘oa tano o te mau mero taatiraa. A faaara eiaha roa te hoê taata ia hauti i te reira. Te na ô ra Julia te hoê mama no Mehiko: “Ua haamata vau i te haapii i ta ’u tamaiti i te toruraa o to ’na matahiti. Ua peapea roa vau i te mana‘oraa e e nehenehe te mau orometua haapii, haapao tamarii, aore ra tamarii paari e hamani ino ia ’na. Ia ite ïa oia e nafea ia paruru ia ’na.”

A TAMATA NA: A faaineine i ta oe tamarii i te patoi papu i te taata o te hauti i to ’na mero taatiraa. Ei hi‘oraa, a haapii ia ’na i te parau atu: “Eiaha! E faaite au!” A haapapu atu e mea tano ia faaite i te mau taime atoa, noa ’tu e e parau mai teie taata e e horoa oia i te mau tao‘a aore ra e faariaria ’tu. *

Tei te fare haapiiraa tuatahi:

A haafaufaa i teie mau matahiti no te haapii maite atu â i ta oe tamarii. Te faaitoito ra Peter te hoê papa: “A fafa i to te tamarii mana‘o hou e paraparau ai. A feruri i ta ratou i ite a‘ena e ta ratou e hinaaro ra e ite atu â. Eiaha e faahepo. E paraparau mai iho â ratou mai te peu e e horoa tamau oe i te taime.”

A TAMATA NA: A paraparau pinepine ma te poto râ, eiaha e faaite i te mau mea atoa i te hoê â taime. (Deuteronomi 6:6-9) Eita ïa ta oe mau tamarii e taahoa. Hau atu â, ia paari mai ratou e fana‘o ratou i te haamaramaramaraa hinaarohia ia au i to ratou faito matahiti.

No te mau taurearea:

Teie te taime no te haapapu e mea navai anei to ’na ite no nia i te mau tuhaa rau, to te tino, to te aau e to te pae morare o te taatiraa. Te parau ra Ana tei faahitihia na: “I ta ’u fare haapiiraa, ua matau te tamaroa i te taoto i te tamahine hoê noa taime e taui atu ai i te apiti. Te mana‘o nei au ei Kerisetiano, ia maramarama maitai au no nia i teie tumu parau. Mea huru haama ia tauaparau no nia i te taatiraa pae tino, ia ite râ vau i te reira.” *

Faaararaa: Eita paha te mau taurearea e  uiui mai no to ratou taiâ ia mana‘o ino to ratou mau metua ia ratou. Tera ta Steven te hoê papa i ite. Te na ô ra oia: “Ua taiâ ta mâua tamaiti i te paraparau no nia i te taatiraa pae tino. I muri iho to mâua iteraa i to ’na mana‘o, oia hoi te feaa ra mâua i to ’na haerea. Ua haapapu râ mâua e aita roa ’tu, te hinaaro noa nei mâua e ite e ua ineine oia i te patoi i te mau faahemaraa.”

A TAMATA NA: A ui i ta oe taurearea eaha te mana‘o o to ’na mau hoa haapiiraa no nia i te taatiraa pae tino, eiaha râ to ’na. Ei hi‘oraa, a parau atu: “I teie mahana, te mana‘o ra e rave rahi taata e e ere te ai mero taatiraa i te taatiraa pae tino. Tera anei te mana‘o o to oe mau hoa haapiiraa?” Maoti teie mau huru uiraa e ohie ai oia i te paraparau mai e i te faaite i to ’na mau mana‘o.

Te faarururaa i te haama

Mea haama no te mau metua ia paraparau i ta ratou mau tamarii no nia i te taatiraa pae tino. E hoona râ ta ratou tutavaraa. Te na ô ra Diane te hoê mama: “I te roaraa o te taime, e pee rii tera haama e ia tauaparau oe i ta oe tamarii no nia i te taatiraa pae tino e piri atu â ’i to orua taairaa.” Tera atoa te mana‘o o Steven, tei faahitihia na. Te na ô ra oia: “Ia matau te utuafare i te paraparau no nia i te mau mea atoa, e ohie ïa no te taatiraa pae tino. Eita te haama e moe roa, mea faufaa râ ia aparau noa te utuafare Kerisetiano no to ratou maitai.”

 

^ par. 3 Ua tauihia te mau i‘oa i roto i teie tumu parau.

^ par. 11 Te hi‘opoa nei teie tumu parau i te faufaaraa ia paraparau i ta oe mau tamarii no nia i te taatiraa pae tino no te paruru ia ratou i te mau haamaramaramaraa tano ore.

^ par. 16 No roto mai teie mana‘o i te buka Écoute le grand Enseignant i te api 171, piahia e te mau Ite no Iehova.

^ par. 19 A faaohipa i te mau pene 1-5, 28, 29 e te 33 o te buka Les jeunes s’interrogent—Réponses pratiques, buka 2, piahia e te mau Ite no Iehova no te tauaparau no nia i te taatiraa pae tino i ta oe taurearea.

E NAFEA OE E PAHONO AI?

A taio i te mau mana‘o o te feia apî na te ara, e a feruri e nafea oe e pahono ai i te mau uiraa i muri nei.

“Ua parau to ’u na metua ia taio vau i te mau tumu parau no nia i te taatiraa pae tino, i muri iho e haere mai ai e tauaparau ia raua mai te peu e e uiraa ta ’u.”—Ana, Beresilia.

I to oe mana‘o, no te aha e mea faufaa ’i eiaha e horoa noa i te mau papai no nia i te taatiraa pae tino?

“Ua faaroo vau e rave rahi mea no nia i te mau peu taatiraa faufau, ta to ’u papa i ore i ite i to ’u mana‘o. E huru ê roa oia ia ui atu vau.”—Ken, Kanada.

Te taiâ ra anei ta oe tamarii i te tauaparau no nia i te mea e haapeapea ra ia ’na?

“I to ’u ui-roa-raa ’tu i to ’u na metua no nia i te taatiraa pae tino, ua pahono mai raua ma te faahapa mai, ‘Eaha oe e ui mai ai? E ohipa tei tupu?’”—Masami, Tapone.

Ia ui atu ta oe tamarii no nia i te taatiraa pae tino, e nafea oe e faaohie ai aore ra e haafifi atu â ’i i te tauaparauraa?

“E tauturu rahi mai ia faaite mai to ’u na metua e i ui atoa na raua i te hoê â mau uiraa i to raua apîraa. E mea tano iho â ia ui atoa ’tu vau.”—Lisette, Farani.

E nafea oe e tauturu ai i ta oe tamarii ia ohie te aparauraa no nia i te taatiraa pae tino?

“E ui mai to ’u mama no nia i te taatiraa pae tino ma te reo mǎrû. Mea faufaa hoi, ia mana‘o te hoê tamarii e aita o ’na e faahapahia ra.”—Gerald, Farani.

Mai te aha ta oe huru paraparau i ta oe tamarii no nia i te taatiraa pae tino? Ia tauihia anei?