Eaha to roto?

Tapura tumu parau

Te Bibilia, o te Parau a te Atua anei?

Te Bibilia, o te Parau a te Atua anei?

 Te Bibilia, o te Parau a te Atua anei?

“Te mau parau mo‘a atoa i papaihia ra e mea faaurua mai ïa e te Atua, e e mea maitai ei haapiiraa, ei a‘oraa, ei faaiteraa hapa, ei faaite mai i te parau-tia ra; ia au roa te taata no te Atua i te mau ohipa maitatai atoa.”—TIMOTEO 2, 3:16, 17.

AUÊ i te faahiahia teie mau parau a te aposetolo Paulo no nia i te faufaaraa rahi o te Bibilia! Te mana‘o taa ê ra o ’na i te tuhaa o te Bibilia i vai na i to ’na tau, ta te taata e parau ra te Faufaa Tahito. E au maite râ ta ’na mau parau i te taatoaraa o na buka Bibilia e 66, oia atoa tei papaihia e ta Iesu mau pǐpǐ haapao maitai i te senekele matamua.

Mai to Paulo atoa anei to oe mana‘o? No oe, ua faaurua mau anei te Atua i te mau taata papai Bibilia? No te mau Kerisetiano o te senekele matamua, e. E tera noâ te mana‘o o te mau Kerisetiano mau. No John Wycliffe, ekalesiatiko Beretane o te senekele 14, o te Bibilia “te ture aveia tia roa o te parau mau.” Te faataa ra te hoê titionare (The New Bible Dictionary) no ta Paulo mau parau i nia nei e e “haapapu te mea e e mea faaurua [e te Atua] e e parau mau ana‘e to roto i te Bibilia.”

Te tauiraa te mana‘o no nia i te Bibilia

I teie nei râ, aita te taata e tiaturi rahi ra i te mana o te Bibilia. “I te parauraa,” ia au i te hoê buka (The World’s Religions), “e farii [noâ] te mau Kerisetiano i te Bibilia ei parau mana o te aratai ia ratou i roto i ta ratou mau haaraa e o te haapapu i ta ratou mau tiaturiraa.” I te mea mau râ, e ere mai te reira faahou! Mea  rahi te hi‘o noa nei i te Bibilia ei “tutuu taata eita e nehenehe e tiaturihia.” Noa ’tu e te farii ra ratou e e faaroo puai to te mau taata papai Bibilia, e feia hapa noâ ratou o tei tamata i te faataa i te pue parau mau hohonu pae varua e o tei ere i te ite e te maramarama o to tatou tau.

Mea iti roa te taata e vaiiho mau nei i te Bibilia ia aratai i to ratou mau mana‘o e ta ratou mau haaraa. Ehia taime to oe faarooraa i te taata ia parau no nia i te mau ture aveia morare Bibilia e ua hope te tau e e mea tano ore? Te haapii nei e rave rahi i te mau ture e faaueraa tumu Bibilia noa ta te taata e hinaaro e faaroo, aore ra te haapao noa nei ratou i tei au ia ratou. Area vetahi mau faahua Kerisetiano, te tâu‘a ore roa ra ïa i ta te Bibilia e parau ra no nia i te taiata, te faaturi, te haerea tia ore, e te taero ava.—Korinetia 1, 6:9, 10.

No te aha hoi? I te omuaraa o te senekele 20, ua ite te ihipǎpǎ ra o Charles Marston i te tahi tumu. I roto i ta ’na buka (The Bible Is True), te parau ra oia e ua ‘farii oioi noa te taata i te mana‘o oti noa e rave rahi o te mau taata papai o teie tau’ tei patoi i te parau mau o te Bibilia. E i teie mahana? E nafea oe i mua i te mau mana‘o e haapiiraa niu ore a te mau aivanaa Bibilia e tuino ra i to tatou tiaturi i te Bibilia? A hi‘o ïa i ta to muri nei tumu parau e faataa ra.