Eaha to roto?

Tapura tumu parau

“Na te pohe e faataa ê ia tâua”

“Na te pohe e faataa ê ia tâua”

 “Na te pohe e faataa ê ia tâua”

EHIA rahiraa hoa faaipoipo tei faahiti ma te oaoa i teie mau parau a faaipoipo ai ratou, ma te ore paha e feruri e e tupu iho â te reira i te hoê mahana? E pohe paha te hoa herehia no te matahiti rahi, te ma‘i, aore ra te ati. E tupuraa matauhia hoi o te vaiiho mai i te apiti i roto i te moemoe e te oto.—Koheleta 9:11; Roma 5:12.

Ia au i te mau numera, fatata te afaraa o te mau vahine e 65 matahiti aore ra hau atu, e vahine ivi ïa. I te mea e ua tataitoru te mau vahine ivi i te mau tane ivi, te mana‘o ra te rahiraa o te taata e no te vahine noa tera parau. E ere râ te auraa e aita te mau tane e mauiui atoa ra. E mirioni hoi taata tei faaruru i teie tupuraa hepohepo. O oe atoa anei?

Tane aore ra vahine, mai te peu e tera to oe tupuraa, e nafea ïa oe? E tauturu anei te Bibilia ia faaruru i teie mauiui? Ua nafea vetahi mau tane e vahine ivi? Noa ’tu e aita e ravea e tano no te mau tupuraa atoa, te vai nei te mau faaueraa tumu e mana‘o tauturu.

I mua i te ereraa

Te mana‘o ra vetahi e e tapao o te paruparu aore ra e mea ino atoa te ta‘iraa. Te taai ra râ te taote manava ra o Joyce Brothers, e vahine ivi hoi, i te roimata i te utuuturaa matamua o te aau. E tuhaa iho â te ta‘iraa o te hevaraa e e tamǎrû te reira i te mauiui. Eiaha e haama i te ta‘i. E hi‘oraa maitai hoi to roto i te Bibilia. E faaroo faahiahia to Aberahama, e ua haamaitaihia oia ei taua no te Atua. I te poheraa râ ta ’na vahine herehia, “ua haere maira . . . Aberahama i te otohaa ia Sara e oto ia ’na.”—Genese 23:2.

I te tahi taime, e hinaaro iho â tatou e vai o tatou ana‘e, eiaha râ e faataa ê. Te faaara maira te Maseli 18:1: “O tei faataa ê ia ’na ihora, te imi ra ïa i to ’na  ihora hinaaro.” Teie râ, a imi i te turu a te fetii e hoa aumauiui. E faanahoraa faahiahia ïa te amuiraa, e pûpû mai hoi te mau taeae feruriraa paari i te pae varua i te turu e te a‘oraa e hinaarohia.—Isaia 32:1, 2.

Ua tauturu te pahonoraa i te mau poroi tapao aroha ia vetahi. Ua riro te reira ei ravea no te papai i te mau mea maitatai ta oe e haamana‘o ra no nia i to oe hoa e te mau taime ta orua i ora. E tauturu atoa te haaputuraa i te mau hoho‘a, rata, e tapaopaoraa i roto i te hoê buka ia maitai mai.

E painu e e moemoe iho â te hoê taata no pohe noa ’tura te apiti, na te pee-maite-raa râ i ta oe porotarama e ohipa matauhia e tauturu ia oe. E hora taa maitai paha ta oe no te taoto, no te ara mai, no te tamaa, aore ra no te rave i te ohipa fare, eiaha e vaiiho i te reira. A faanaho atea i ta oe e rave i te mau hopea hebedoma e i te mau mahana taa ê mai to orua mahana faaipoiporaa, taime e teimaha roa ’i te moeraa. E mea faufaa roa râ ia tapea noa oe i ta oe porotarama pae varua.—Korinetia 1, 15:58.

Ia hepohepo rahi roa te hoê taata, e ohie oia i te rave i te mau faaotiraa tano ore. E nehenehe te taata mana‘o ino e punu ia oe. Eiaha ïa e rave ru noa i te faaotiraa mai te hooraa i to oe fare, te tuuraa i te tino moni rahi, te tauiraa i te nohoraa, aore ra te faaipoipo-faahou-raa. Te na ô ra te hoê parau paari: “Te imiraa o te feia faaitoito ra, tei nia ïa i te tao‘a rahi; area te imiraa o te feia ru noa ra, tei te veve ïa.” (Maseli 21:5) Ia faataimehia teie mau tauiraa rahi e ia maitai roa mai oe.

E mea fifi roa atoa ia faanaho i te mau ohipa a to oe apiti, mai te peu iho â râ e e rave rahi matahiti orua i te faaearaa. E tuhaa râ hoi te reira o te hevaraa. E haamaoro faufaa ore atu â te faataimeraa i te hepohepo. (Salamo 6:6) Mea au a‘e na vetahi ia rave i te reira o ratou ana‘e; no vetahi atu e mea au na ratou te tauturu a te hoê hoa piri no te haamana‘o i te tahi mau ohipa o ta te reira e faatupu mai. E hinaaro atoa paha oe i te tauturu a te hoê hoa aore ra fetii no te haapao i te mau papie, mai te tiiraa i te parau poheraa; te faaararaa i te mau pu a te Hau, te mau fare moni; te tauiraa i te mau parau faturaa; te fana‘oraa i te tuhaa moni parururaa; e te aufauraa i te taote.

A haamana‘o e te ora nei tatou i roto i te hoê ao morare ore. O oe ana‘e i teie nei, e tamatahia ïa ta oe mau tutavaraa e vai viivii ore noa. E tano maitai roa teie mau parau a te aposetolo Paulo no teie tau: “Ia ite to outou atoa e ati noa ’‘e i te vaiiho i to ’na iho tino ma te maitai e te tura; eiaha ia tuua-noa-hia i te hinaaro tia ore, mai to te Etene tei ore i ite i te Atua.” (Tesalonia 1, 4:4, 5) E haerea paari ïa ia ape i te mau hoho‘a teata, buka, e himene herehere aore ra taaihia i te taatiraa.

Hau atu â, a taa e e titauhia te taime no te maitai mai. Te faaite ra te hoê vea (USA Today) e ia au i te mau titorotororaa a te pu maimiraa totiare a te fare haapiiraa tuatoru no Michigan, e titauhia 18 a‘e ava‘e i te hoê taata ua pohe to ’na apiti ia maitai mai i te pae tino e feruriraa. A ani i te Atua na roto i te pure i te faaoromai tamau, haapuaihia e te hotu a to ’na varua. (Galatia 5:22, 23) Eita  paha oe e mana‘o mai te reira i teie nei, e maitai mai râ oe a mairi ai te tau.

Ua nafea vetahi?

Ua paruparu roa Anna, tei oaoa i roto i ta ’na faaipoiporaa e 40 matahiti, i te poheraa ta ’na tane. “Ua pohe to ’u mama i te 13raa o to ’u matahiti, i muri iho to ’u papa, to ’u na tuaane, e to ’u teina. E nehenehe râ vau e parau ma te haavare ore e aita hoê a‘e o taua mau ereraa ra i haamauiui roa ia ’u mai te poheraa o ta ’u tane. Mai te huru ra e ua tâpûhia vau na ropu. Aita e faaauraa to ’u oto.” Na te aha i tauturu ia ’na? “Ua faaî au i te hoê buka rahi i te mau poroi roro uira e te mau tareta e faaite ra i te mau tapao o te here e te mauruuru no to Darryl mau huru maitatai, o te faahiti taitahi ra hoi i te tahi mea taa ê no nia ia ’na. Ua papu ia ’u e e haamana‘o atoa e e faatia faahou mai Iehova ia ’na.”

Te faataa ra Esther, 88 matahiti, i te mea i turu ia ’na: “I muri a‘e e 46 matahiti faaipoiporaa, te fifi rahi roa ’‘e o te moemoe ïa. Ua tauturu rahi mai râ te haa-rahi-raa i te pae varua. Aita vau i faaea i te apiti i te mau putuputuraa, i te poro i te poroi o te Bibilia e o vetahi ê, e i te taio i te Parau a te Atua. Aita atoa vau i faaatea ê ia ’u, ua imi râ vau i te auhoaraa o te mau hoa e faaroo mai ia ’u. Aita paha ta ratou e parau tamahanahana i te tahi taime, te mauruuru roa nei râ vau no to ratou horoaraa mai i to ratou taime e te faarooraa mai ia ’u.”

Te faatia ra Robert, ua pohe ta ’na vahine i te mariri ai taata i muri a‘e e 48 matahiti faaipoiporaa: “Ua matau oe i te paraparau e to oe apiti, i te rave amui i te mau faaotiraa, i te revareva e i te faafaaea, e i te rave i te mau ohipa o te mau mahana atoa. I teie nei, ua moe oia, e mea fifi roa ïa ia faaruru i to ’na pohe. E tautooraa te reira, ua faaoti râ vau  eiaha e tuu e e haere i mua. Ua tauturu te ohipa-noa-raa i te pae tino e i te pae feruriraa ia ’u. Ua tamahanahana rahi atoa mai te pure.”

Te hoê oraraa anaanatae i muri a‘e i te ereraa

Noa ’tu e o te ereraa i te hoa faaipoipo herehia te hoê o te mau tupuraa mauiui roa ’‘e ta te hoê taata e faaruru, e ere te reira i te hopea. Ma te feruriraa tano, e nehenehe oe i teie nei e apiti i te mau ohipa aita to oe e taime rahi i mutaa ihora, mai te mau faaanaanataeraa e te tere-haere-raa. E iti mai ïa te moemoe. E nehenehe vetahi i teie nei e apiti rahi atu â i te taviniraa. Mea na roto i te tautururaa ia vetahi ê mai te reira e itehia ’i te oaoa e te mauruuru, ua parau hoi Iesu: “E mea maitai i te horoa ’tu i te rave mai.”—Ohipa 20:35.

Eiaha e mana‘o e eita roa ’tu oe e oaoa faahou. Ia papu ia oe e ia turui oe i nia i te Atua ra o Iehova e aupuru mai oia ia oe. Ua na ô te papai salamo ra o Davida: ‘Te tauturu nei Iehova i te vahine ivi.’ (Salamo 146:9) E mea mahanahana ia ite e aita noa te Bibilia e faataa ra ia Iehova mai ‘te tumu o te aroha e te Atua no ’na ana‘e te mahanahana,’ te parau-atoa-hia ra râ: “Te heheu nei oe i to rima, e te haamâha nei i te hiaai o te mau mea ora atoa nei.” (Korinetia 2, 1:3; Salamo 145:16) Oia mau, e nehenehe, e hinaaro, e ua ineine te Atua î i te here ra o Iehova i te tauturu i te feia e imi mau ra ia ’na. Ia hoê â to oe huru aau e to te mau Iseraela i tahito, o tei himene: “E hi‘o anei tau mata i te mau aivi? e noaa anei te tauturu ia ’u i reira? No ǒ ia Iehova ra te tauturu ia ’u, o tei hamani i te mau ra‘i e te fenua.”—Salamo 121:1, 2.

[Parau iti faaôhia i te api 30]

E mirioni taata tei faaruru i te mauiui e te moemoe i te poheraa to ratou apiti. O oe atoa anei?

[Tumu parau tarenihia i te api 32]

E te faaipoipo-faahou-raa?

Te faaite ra te Bibilia e na te pohe e faahope i te faaipoiporaa, a nehenehe atu ai te apiti e ora noa ra e faaipoipo faahou. (Korinetia 1, 7:39) Na ’na iho e rave i tera faaotiraa. E mea faufaa râ ia ite te mau tamarii i te faaotiraa a to ratou metua e ia turu ia ’na ia nehenehe. (Philipi 2:4) Ei hi‘oraa, i te omuaraa, ua patoi Andrés ia faaipoipo faahou to ’na papa. E here rahi hoi to Andrés no to ’na mama e no ’na aita hoê a‘e vahine e nehenehe e mono ia ’na. “Ua ite oioi râ vau e ua rave to ’u papa i te hoê faaotiraa maitai,” ta ’na e parau ra. “Ua faaitoito faahou te faaipoiporaa ia ’na. Ua rave a‘era oia i te mau mea ta ’na i faaea i te rave tau taime, mai te revarevaraa. E ua mauruuru iho â vau i ta ’na vahine apî no te aupuru-maitai-raa ia ’na i te pae tino e aau.”

[Hoho‘a i te mau api 31, 32]

Na te haa-rahi-raa e te aniraa i te Atua na roto i te pure i te faaoromai tamau e tauturu ia maitai mai