Eaha to roto?

Tapura tumu parau

Ia hiaai maite outou te feia apî e tavini ia Iehova

Ia hiaai maite outou te feia apî e tavini ia Iehova

 Ia hiaai maite outou te feia apî e tavini ia Iehova

“E tena na, e haamana‘o i tei Hamani ia oe i to apîraa.”—KOH. 12:1.

1. Ua titauhia ia aha te mau tamarii Iseraela?

FATATA e 3 500 matahiti i teie nei, ua faaue Mose te peropheta a Iehova i te mau tahu‘a e te feia paari o Iseraela: “E haaputuputu atoa mai i te taata atoa, i te tane, e te vahine, e te tamarii; . . . ia ite ratou, ia haapii, e ia mǎta‘u i to outou Atua ra ia Iehova, ia haapao, e ia rave hoi i te mau parau atoa o teie nei ture.” (Deut. 31:12) A tapao o vai ma tei faauehia e haaputuputu no te haamoriraa: te tane, te vahine e te tamarii. O te feia apî atoa tei titauhia ia faaroo, ia haapii, e ia pee i te aratairaa a Iehova.

2. Mea nafea to Iehova faaiteraa i to ’na anaanatae i te feia apî o te amuiraa Kerisetiano matamua?

2 I te senekele matamua, ua faaite noa Iehova i to ’na anaanatae i te feia apî o to ’na nunaa. Ei hi‘oraa, ua turai oia i te aposetolo Paulo ia papai i roto i te tahi mau rata na te mau amuiraa i te mau a‘oraa no te feia apî iho â râ. (A taio i te Ephesia 6:1; Kolosa 3:20.) Ua mauruuru atu â te mau Kerisetiano apî faaroo i to ratou Metua î i te here i te ra‘i e ua haamaitaihia ratou.

3. E nafea te feia apî i teie mahana e faaite ai e te hiaai ra ratou e tavini i te Atua?

3 Te titauhia ra anei te feia apî i teie mahana ia putuputu no te haamori ia Iehova? E! E oaoaraa mau no te nunaa taatoa o te Atua ia ite e rave rahi roa tavini apî a te Atua i te ao nei i te peeraa i ta Paulo faaitoitoraa: “E haapao maite â tatou te tahi i te tahi, a faaaraara ’tu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, mai ta te tahi pae ra peu, e faaitoito râ; e ia rahi atu â te faaitoito, no te mea te hi‘o na outou i taua mahana ra i te fatataraa mai.” (Heb. 10:24, 25) Mea rahi atoa te tamarii e poro ra e to ratou mau metua i te evanelia o te Basileia o te Atua. (Mat. 24:14) E no te faaite i to ratou here mau ia Iehova, e rave rahi tausani taata apî te bapetizo ia ratou i te mau matahiti atoa e te fana‘o i te mau haamaitairaa ei pǐpǐ a te Mesia.—Mat. 16:24; Mar. 10:29, 30.

A farii i teie nei i te titau-manihini-raa

4. E matahiti anei no te farii i te titau-manihini-raa a te Atua e tavini ia ’na?

4 Te na ô ra te Koheleta 12:1: “E tena na, e haamana‘o i tei Hamani ia oe i to apîraa.” Eaha te matahiti e nehenehe ai outou te feia apî e farii i teie titau-manihini-raa mahanahana e haamori e e tavini ia Iehova? Aita te mau Papai e faataa ra i te reira. Eiaha ïa e haamarirau i te faaroo e te tavini ia Iehova ma te mana‘o e mea apî roa outou. Noa ’tu eaha to outou matahiti, te faaitoitohia ra outou ia farii ma te ore e tiai.

5. E nafea te mau metua e tauturu ai i ta ratou mau tamarii ia haere i mua i te pae varua?

 5 Te tauturu nei to outou metua hoê aore ra toopiti ia outou ia haere i mua i te pae varua. E au outou ia Timoteo i tahito ra. E aiû â oia i to ’na haapiiraahia i te mau papai mo‘a e to ’na metua vahine o Eunike e to ’na metua tupuna o Loidi. (Tim. 2, 3:14, 15) Te faaineine atoa ra to oe na metua ia oe ma te haapii i te Bibilia, te pure e te afai ia oe i te mau putuputuraa a te amuiraa e te mau tairururaa a te nunaa o te Atua, e ma te poro e oe. E hopoia faufaa roa no ǒ mai ia Iehova ra ia haapii to oe na metua ia oe i to ’na mau e‘a. Te mauruuru ra anei oe no to raua here e anaanatae ia oe?—Mas. 23:22.

6. (a) Ia au i te Salamo 110:3, e mauruuru Iehova i teihea haamoriraa? (b) Eaha ta tatou e hi‘opoa i teie nei?

6 Ia paari mai râ outou te feia apî, te hinaaro noa nei Iehova ia ‘ite outou i to ’na hinaaro tia, te au, e te maitai,’ mai ia Timoteo ra. (Roma 12:2) Ia na reira outou e apiti ai outou i te mau ohipa a te amuiraa, no te mea te hiaai mau ra outou e rave i te hinaaro o te Atua, eiaha râ te hinaaro o to outou mau metua. Ia tavini outou ia Iehova ma te aau tia, aore ra tae, e mauruuru oia. (Sal. 110:3) E nafea ïa outou e faaite ai e te hiaai maite ra outou e faaroo ia Iehova e e pee i ta ’na aratairaa? E hi‘opoa hoê hoê tatou e toru ravea faufaa: te haapiiraa, te pure, e te haerea.

Ia ite e e Ihotaata Iehova

7. Eaha te hi‘oraa maitai ta Iesu i horoa i to ’na haapiiraa i te mau Papai, e eaha tei tauturu ia ’na?

7 Te ravea matamua e faaite ai oe e te hiaai maite ra oe e tavini ia Iehova, o te taioraa ïa i te Bibilia i te mahana hoê. E mâha to oe hiaai i te pae varua e e noaa ia oe te ite faufaa roa i te Bibilia ma te taio tamau i te Parau a te Atua. Ua horoa Iesu i te hi‘oraa. I te 12raa o to ’na matahiti, ua ite to ’na na metua ia ’na i roto i te hiero, “te parahi ra i ropu i te mau orometua, te faaroo atura e te ui atura ia ratou.” (Luka 2:44-46) Ei tamarii, ua hiaai ê na Iesu i te mau Papai e ua rahi atu â to ’na ite i te reira. Eaha tei tauturu ia ’na? Mea papu e e tuhaa faufaa roa ta to ’na metua vahine o Maria e to ’na metua tane faaamu o Iosepha. E tavini hoi raua na Iehova tei haapii ia Iesu no nia i te Atua mai to ’na aiûraa.—Mat. 1:18-20; Luka 2:41, 51.

8. (a) Mai teihea taime e haapii ai te mau metua i ta ratou mau tamarii ia hiaai i te Parau a te Atua? (b) A faatia i te hoê tupuraa o te haapapu ra i te faufaaraa ia haapii i te mau tamarii mai to ratou aiûraa.

8 Ua ite atoa te mau metua mǎta‘u i te Atua i teie mahana i te faufaaraa ia haapii i ta ratou mau tamarii ia hiaai i te parau mau Bibilia mai to ratou aiûraa. (Deut. 6:6-9) Ta Rubi ïa, te hoê tuahine, i rave i muri noa ’‘e i te fanauraa o ta ’na matahiapo o Joseph. I te mau mahana atoa, ua taio oia i Ta ’u Buka Aamu Bibilia ia ’na. I muri a‘e, ua tauturu oia ia ’na ia tamau aau e rave rau irava. Ua faufaahia anei Joseph i te reira? No ite noa ’tura oia i te paraparau, e faatia oia e rave rahi aamu Bibilia na roto i ta ’na iho mau parau. E pae matahiti to ’na a horoa ’i oia i ta ’na tumu parau matamua i te Haapiiraa no te taviniraa Kerisetiano.

9. No te aha mea faufaa ’i ia taio e ia feruriruri i te Bibilia?

9 Ia haere atu â outou te feia apî i mua i te pae varua, ia riro ïa te taioraa i te Bibilia i te mahana hoê ei peu na outou mai to outou taurearearaa e paari noa ’tu ai. (Sal. 71:17) No te aha te taioraa Bibilia e tauturu ai ia oe ia haere i mua? A tapao i ta Iesu i parau i roto i ta ’na pure i to ’na Metua: “Teie hoi te ora mure ore, ia ite ratou ia oe i te Atua  mau.” (Ioa. 17:3) A ite atu â ’i oe ia Iehova, e riro mai ïa oia ei Ihotaata mau no oe e e here atu â oe ia ’na. (Heb. 11:27) No reira, ia taio oe i te hoê tuhaa o te Bibilia, a faaohipa i teie taime no te haapii atu â no nia ia Iehova. A uiui: ‘Eaha ta teie faatiaraa e haapii maira no nia ia Iehova ei Ihotaata? E nafea teie irava Bibilia e faaite ai i te here e te anaanatae o te Atua ia ’u?’ E tauturu te raveraa i te taime no te feruriruri i teie nau uiraa ia oe ia ite i to Iehova mana‘o e huru aau e i ta ’na e titau ra ia oe. (A taio i te Maseli 2:1-5.) Mai ia Timoteo, e faaitoitohia oe ia tiaturi i ta oe e haapii ra i roto i te mau Papai, a hiaai atu ai oe e tavini ia Iehova ma te aau tae.—Tim. 2, 3:14.

E tauturu te pure ia here atu â ia Iehova

10, 11. E nafea te pure e tauturu ai ia oe ia hiaai maite e tavini i te Atua?

10 Te piti o te ravea e hiaai maite ai oe e tavini ia Iehova ma to aau atoa, o ta oe ïa mau pure. Te taio ra tatou i roto i te Salamo 65:2: “E tei faaroo i te pure ra, e tae atoa mai te taata atoa ia oe.” I te tau i faaau ai te Atua i te faufaa ia Iseraela, ua nehenehe te taata ê tei haere i te hiero o Iehova e haafatata ’tu ia ’na na roto i te pure. (Arii 1, 8:41, 42) Eita te Atua e haapao i te huru o te taata. E faaroo iho â oia i te feia e haapao ra i ta ’na mau faaueraa. (Mas. 15:8) O outou atoa ïa te feia apî.

11 Ua ite oe e o te tauaparauraa maitai te niu o te auhoaraa mau. Mea au paha na oe e faaite i te hoê hoa rahi i to oe mau mana‘o, tapitapi, e huru aau. E tauaparau atoa oe e tei Hamani ia oe ia pure oe ia ’na ma te aau tae. (Phil. 4:6, 7) A paraparau ia Iehova mai te huru ra e te haamahorahora ra oe i to aau i te hoê metua î i te here aore ra i te hoê hoa rahi. Ua taaihia ta oe pure i to oe huru aau no Iehova. E ite oe e ia piri atu â oe ia Iehova, e hohonu atu â ïa ta oe mau pure.

12. (a) No te aha i hau atu ai te pure hohonu i te mau parau noa? (b) Eaha te tauturu ia oe ia taa e mea fatata Iehova ia oe?

12 A haamana‘o râ e ua hau atu te pure hohonu i te mau parau noa. Ua taai-atoa-hia te reira i to oe iho huru aau. A faaite i to oe here, faatura rahi e tiaturi taatoa ia Iehova ia pure oe. A ite ai oe e nafea Iehova e pahono ai i ta oe mau pure, e taa roa ia oe e “te fatata maira Iehova i te feia e tiaoro atu ia ’na.” (Sal. 145:18) E haafatata iho â Iehova ia oe, ma te faaitoito ia oe ia patoi i te Diabolo e ia rave i te mau faaotiraa maitatai i roto i to oe oraraa.—A taio i te Iakobo 4:7, 8.

13. (a) Mea nafea te auhoaraa e te Atua i tauturu ai i te hoê tuahine? (b) E nafea te auhoaraa e te Atua e tauturu ai ia oe ia faaruru i te faaheporaa a te hoa?

13 A hi‘o na mea nafea to Cherie itoitoraa no to ’na taairaa piri e o Iehova. I te haapiiraa tuarua, o ’na te piahi maitai roa ’‘e i te  pae haapiiraa e tuaro. I te otiraa ta ’na tau haapiiraa, ua pûpûhia te tahi moni tauturu na ’na no te haere i te haapiiraa teitei. Te na ô ra Cherie: “E hinaaro iho â oe i tera moni e ua faahepo te feia faaineine tuaro e te mau hoa haapiiraa ia ’u ia farii atu.” Ua taa râ ia ’na e e pau rahi te taime ia haere i te haapiiraa teitei e ia faaineine ia ’na no te mau ohipa tuaro, e mea iti roa no te tavini ia Iehova. Eaha ta Cherie i rave? Te parau ra oia: “Ua pure au ia Iehova e aita vau i farii i te moni tauturu e ua haamata vau i te taviniraa pionie tamau.” Ua tavini oia e pae matahiti i teie nei. Te na ô ra oia: “Aita roa vau i tatarahapa. Oaoa roa vau i te raveraa i te faaotiraa e mauruuru ai Iehova. Ia tuu oe i te Basileia o te Atua i te parahiraa matamua, e amuihia mai te mau mea atoa.”—Mat. 6:33.

E faaite te haerea maitai e e ‘aau mâ’ to oe

14. No te aha mea faufaa ’i to oe haerea maitai no Iehova?

14 Te toru o te ravea e faaite ai oe e te tavini ra oe ia Iehova ma te aau tae, o to oe ïa haerea. E haamaitai Iehova i te feia apî e vai mâ noa i te pae morare. (A taio i te Salamo 24:3-5.) I to ’na apîraa, aita Samuela i pee i te haerea taiata o na tamaiti a te tahu‘a rahi o Eli. Ua itehia te haerea maitai o Samuela. Te faatia ra te Bibilia: “Tupu atura taua tamaiti ra o Samuela, e i herehia mai e Iehova e te taata atoa.”—Sam. 1, 2:26.

15. Eaha te tahi mau tumu e tapea ’i oe i te haerea maitai?

15 Te ora nei tatou i roto i te hoê ao mea miimii te taata, teoteo, faaroo ore i te metua, mauruuru ore, taiva, iria, faateitei, hinaaro i te mau mea e navenave ai ra aore hinaaro i te Atua, e te vai ra ’tu â ia au i ta Paulo i parau. (Tim. 2, 3:1-5) E mea fifi iho â ia tapea i te hoê haerea maitai i roto i teie nei ao ino. I te mau taime atoa râ e rave ai oe i te maitai e e haapae ai i te ino, te haapapu ra ïa oe i to oe tiaraa i te pae o Iehova i roto i te tumu parau o te mana arii o te ao taatoa. (Ioba 2:3, 4) Te oaoa atoa ra oe i te iteraa e te farii ra oe i ta Iehova titau-manihini-raa mahanahana: “E tau tamaiti, ia paari hoi oe, ia oaoa tau aau, ia tia ia ’u ia patoi atu i tei faaino mai ia ’u nei.” (Mas. 27:11) Hau atu â, e hiaai maite oe e tavini ia Iehova no te mea ua farii oia ia oe.

16. Mea nafea to te hoê tuahine faaoaoaraa i to Iehova aau?

16 I to ’na apîraa, ua tapea te hoê tuahine o Carol te i‘oa i te mau faaueraa tumu Bibilia i te fare haapiiraa, e ua itehia to ’na haerea maitai. Eaha tei tupu? Ua faaooohia Carol e to ’na mau hoa haapiiraa no te mea aita oia i apiti i te mau mahana oroa e oroa here ai‘a no to ’na mana‘o haava haapiihia i te Bibilia. I taua mau taime ra, ua faataa oia i ta ’na mau tiaturiraa ia vetahi ê. E rave rahi matahiti i muri a‘e, ua tae mai ta Carol tareta na te hoê hoa haapiiraa, tei papai: “Ua hinaaro noa iho â vau e farerei ia oe no te haamauruuru ia oe. Ua ite au i to oe haerea e hi‘oraa maitai ei Kerisetiano apî, e to oe atoa tiaraa itoito i te mau mahana oroa. O oe te Ite no Iehova matamua  ta ’u i farerei.” Ua haamata oia i te haapii i te Bibilia no to ’na putapû i te hi‘oraa o Carol. Ua papai oia ia Carol e ua bapetizohia o ’na ei Ite e 40 tiahapa matahiti i teie nei! No te mea e te haapao mau nei outou te feia apî i te mau faaueraa tumu Bibilia, mai ia Carol, e hinaaro ai te feia aau haavare ore e ite ia Iehova.

Te arue nei te feia apî ia Iehova

17, 18. (a) Eaha to outou huru aau no te feia apî i roto i ta outou amuiraa? (b) Eaha te tiai maira i te feia apî mǎta‘u i te Atua?

17 Mea oaoa roa na tatou pauroa i roto i te faanahonahoraa a Iehova i te ao nei ia ite e rave rahi tausani taata apî itoito roa e haa ra i roto i te haamoriraa mau! Te hiaai maite nei teie feia apî e haamori ia Iehova ma te taio i te Bibilia i te mahana hoê, te pure, e te ora ia au i te hinaaro o te Atua. E tamahanahanaraa mau â ratou no to ratou mau metua e no te nunaa taatoa o Iehova.—Mas. 23:24, 25.

18 I te tau a muri a‘e, to rotopu atoa te mau taata apî haapao maitai i te feia e ora ’tu i roto i te ao apî fafauhia e te Atua. (Apo. 7:9, 14) I reira ratou e fana‘o ai i te mau haamaitairaa maere mau, a rahi atu â ’i to ratou mauruuru ia Iehova. E arue ratou ia ’na e a tau a hiti noa ’tu.—Sal. 148:12, 13.

E nehenehe anei outou e faataa?

• E nafea te feia apî e haa ’i i roto i te haamoriraa mau i teie mahana?

• Ia faufaahia outou i te taioraa Bibilia, no te aha mea tia ’i ia feruriruri?

• E nafea te pure e tauturu ai ia outou ia haafatata ’tu ia Iehova?

• Eaha te faahopearaa o te haerea maitai o te hoê Kerisetiano?

[Uiraa haapiiraa]

[Hoho‘a i te api 13]

Ua matau anei oe i te taio i te Bibilia i te mahana hoê?