Eaha to roto?

Tapura tumu parau

Ia fariu ê to mata i te mea faufaa ore!

Ia fariu ê to mata i te mea faufaa ore!

 Ia fariu ê to mata i te mea faufaa ore!

“E faafariu ê i tau mata ia ore ia hi‘o i te mea faufaa ore; e faaitoito oe ia ’u i to oe ra e‘a.”—SAL. 119:37.

1. Eaha te faufaa o te mata?

E Ô FAUFAA mau â to tatou mata! E nehenehe hoi tatou e hi‘o i te atearaa e te û o te mau mea e haaati ra ia tatou. E ite i te hoa maitai aore ra i te fifi atâta. E mataitai i te nehenehe e te maere o te poieteraa e e taa i te vairaa mau e te hanahana o te Atua. (Sal. 8:3, 4; 19:1, 2; 104:24; Roma 1:20) I te mea e maoti te mata e tae ai te mau mea atoa i te feruriraa, e tuhaa faufaa ïa to te reira no te ite ia Iehova e no te faatupu i te faaroo ia ’na.—Ios. 1:8; Sal. 1:2, 3.

2. No te aha tatou e ara ’i i ta tatou e hi‘o, e eaha ta te tiaoro a te papai salamo e haapii maira?

2 E nehenehe atoa râ tatou e fifi no ta tatou e hi‘o. No te mea ua taai-roa-hia to tatou mata i to tatou feruriraa, e nehenehe te mea ta tatou e hi‘o e faaara aore ra e faarahi i te mau hinaaro tia ore o to tatou aau. Te ora nei tatou i roto i te hoê ao ino o te faanavenave i te taata, faaterehia e Satani te Diabolo. Mea rahi roa ino te hoho‘a e mana‘o hape o te faatopa ohie ia tatou, noa ’tu e e ite e e faaroo oioi noa tatou i te reira. (Ioa. 1, 5:19) No reira te papai salamo i tiaoro ai i te Atua: “E faafariu ê i tau mata ia ore ia hi‘o i te mea faufaa ore; e faaitoito oe ia ’u i to oe ra e‘a.”—Sal. 119:37.

E nehenehe tatou e hema i to tatou mata

3-5. Eaha te mau faatiaraa Bibilia e faataa ra i te fifi atâta ia hema i to tatou mata?

3 A hi‘o i te ohipa i tupu i nia ia Eva, te vahine matamua. Ua parau Satani e e “araara” to ’na mata ia amu oia i to “te raau e ite ai i te maitai e te ino.” Ua maere Eva i teie mana‘o. Ua hiaai atu â oia e amu i te maa opanihia i to ’na ‘iteraa e e raau maitai ei maa, e te au hoi i te mata ia hi‘o atu.’ No to ’na hi‘oraa i te raau ma te nounou, ua faaroo ore Eva e ta ’na atoa tane o Adamu i te faaueraa a te Atua. Mea ino roa te faahopearaa no te huitaata.—Gen. 2:17; 3:2-6; Roma 5:12; Iak. 1:14, 15.

4 I te tau o Noa, ua hema atoa te tahi mau melahi i ta ratou i ite. Te faatia ra te Genese 6:2: “Ua hi‘o a‘era te tamarii a te Atua ra i te mau tamahine a te taata nei, e te maitai ra; ua rave ihora ratou i ta ratou i hinaaro ra ei vahine.” Ua hi‘o faahinaaro teie mau melahi orure hau i te mau vahine, e ua hinaaro atura ratou ma te tia ore e taati atu, e fanau maira ta ratou te mau tamaroa haavî u‘ana. No te ino o te taata i taua tau ra, ua haamouhia te huitaata, aita râ o Noa e to ’na utuafare.—Gen. 6:4-7, 11, 12.

5 E senekele i muri a‘e, ua hema Akana ati Iseraela i to ’na mata e ua eiâ i te tahi mau taihaa o te oire Ieriko tei haruhia. I faaue na hoi te Atua e haamou i te mau taihaa atoa o taua oire ra, eiaha râ te tahi mau mea o te tuuhia i roto i ta ’Na pueraa tao‘a. Ua faaarahia te mau ati Iseraela: “E ara ia outou i tei anatemahia ra, o te rave outou i tei anatemahia,” oia hoi te tahi mau taihaa  o te oire. I to Akana faaroo-ore-raa, ua pau Iseraela i te oire o Ai, e e rave rahi tei pohe. Aita oia i fa‘i i ta ’na eiâraa e tae roa ’tu i te taime i itehia ’i te reira. Ua parau oia: “Hi‘o ihora vau [i te mau taihaa], nounou a‘era vau i te reira e ua rave ihora vau.” No to ’na mata nounou, ua haamouhia oia e “te mau tao‘a atoa na ’na.” (Ios. 6:18, 19; 7:1-26) Ua nounou te aau o Akana i tei opanihia.

E titauhia te haavîraa ia tatou

6, 7. Teihea “ravea” a Satani e faahema pinepine ia tatou, e e nafea te feia tiani tapihoo e faaohipa ’i i te reira?

6 I teie mahana, hoê â huru faahemaraa i te huitaata e tei tupu i nia ia Eva, i te mau melahi orure hau, e ia Akana. I rotopu i te mau “ravea” a Satani no te faahema i te huitaata, o “te hinaaro tia ore o te mata” te mea puai roa ’‘e. (Kor. 2, 2:11; Ioa. 1, 2:16) Ua ite maitai te feia tiani o teie tau i te umeraa mai tahito mai â o te mata. Te na ô ra te hoê taata aravihi i te pae tapihoo i Europa: “E ravea umeraa puai roa te mata. E pinepine, e mana rahi a‘e to ’na i to te tahi atu mau tumu ite,” mai te faaroo, hau‘a, fafa, tamata, “a rave atu ai tatou i te mea tano ore.”

7 No reira te feia tiani e haapine ai i te faaite mai i te mau hoho‘a tei opua-maite-hia ia puta te reira, a hiaai atu ai tatou i ta ratou mau taihaa aore ra ohipa! Ia au i te hoê taata maimi i Marite tei tuatapapa i te ohiparaa a te faatianiraa i nia i te taata, “ua faanahohia te reira eiaha noa no te horoa i te mau haamaramaramaraa, no te faatupu iho â râ i te mau huru aau, a ohipa ’tu ai te taata mataitai.” E ite-pinepine-hia te mau hoho‘a o te faatupu i te mana‘o e taati. Mea faufaa mau â ia haavî ia tatou i ta tatou e hi‘o e e faaô i roto i to tatou feruriraa e aau!

8. E nafea te Bibilia e haapapu ai i te faufaaraa ia ara i to tatou mata?

8 E fifi atoa te mau Kerisetiano mau i te hinaaro tia ore o te mata e o te tino. No reira te Parau a te Atua e faaitoito mai ai ia haavî ia tatou i ta tatou e hi‘o e e nounou. (Kor. 1, 9:25, 27; a taio i te Ioane 1, 2:15-17.) Ua ite Ioba taata parau-tia i te taairaa puai i rotopu i te mata e te aau. Ua na ô oia: “Ua faaau vau i te faufaa i o ’u nei pue mata; e eiaha vau e tiatonu i te paretenia.” (Ioba 31:1) Aita Ioba i tapea i te hoê vahine ma te faahinaaro ia ’na e aita atoa i mana‘ona‘o noa ’‘e i te reira. Ua haapapu Iesu e eiaha roa e mana‘o tia ore i to ’na parauraa: “O te hi‘o noa ’tu i t[a] vetahi ê ra vahine ei faatupu i te hinaaro, ua faaturi ïa ia ’na i to ’na ihora aau.”—Mat. 5:28.

Te mea faufaa ore e ape

9. (a) No te aha e ara ’i ia faaohipa tatou i te Internet? (b) Eaha te faahopearaa ia ite maa taime noa i te hoho‘a faufau?

9 I roto i teie nei ao, e peu matau-roa-hia ia “hi‘o noa ’tu” i te hoho‘a faufau, i nia iho â râ i te Internet. Noa ’tu e eita tatou e haere i nia i tera mau afata poroi, e nehenehe tera mau hoho‘a e fa mai. E nafea? E fa taue mai te hoê hoho‘a tiani faatupu i te hinaaro tia ore i nia i te roro uira. Aore ra e taui taue te hoê poroi maitai e taiohia ra ei hoho‘a faufau e mea fifi roa ia tupohe. Noa ’tu e maa taime noa to te hoê taata iteraa i tera hoho‘a hou a faaore atu ai, ua mau roa te reira i roto i to ’na feruriraa. Mea ino roa te faahopearaa. E nehenehe to ’na mana‘o haava e faahapa ia ’na e mea fifi roa ia ore e mana‘o faahou i tera mau hoho‘a faufau. Mea ino roa ’tu râ no te hoê taata e “hi‘o noa ’tu” ma te opua, aitâ ïa oia i haavî atura  i te mau hinaaro tia ore o to ’na aau.—A taio i te Ephesia 5:3, 4, 12; Kol. 3:5, 6.

10. No te aha te mau tamarii e hema ohie ai i te hoho‘a faufau, e eaha te mau faahopearaa ia mataitai ratou i te reira?

10 E nehenehe te mau tamarii e hema i te hoho‘a faufau no to ratou hinaaro natura e ite i te mau mea. Ia tupu te reira, e huru ê ta ratou hi‘oraa i te taatiraa. Ia au i te hoê parau faataa, eita ratou e mana‘o maitai faahou i te mau ture aveia i te pae taatiraa e “e fifi ratou i te atuatu i te hoê taairaa maitai î i te here; e ruri ê ta ratou hi‘oraa i te vahine; e peneia‘e, e hinaaro noa ratou i te hoho‘a faufau, o te haafifi i ta ratou haapiiraa e to ratou taairaa e te hoa e te fetii.” Mea ino roa ’tu ia faaipoipo ratou.

11. A horoa i te hoê hi‘oraa o te faataa maitai ra i te fifi atâta ia mataitai i te hoho‘a faufau.

11 Ua papai te hoê taeae: “I roto i ta ’u mau peu ino atoa hou vau a riro ai ei Ite, o te peu faufau te mea fifi roa ia faaore. E puta mai tera mau hoho‘a i te tahi mau taime no te hoê hau‘a, upaupa, te tahi mea ta ’u e ite aore ra e mana‘o. E aroraa tamau i te mau mahana atoa.” I to ’na tamarii-rii-raa, i hi‘o na te tahi atu taeae i te mau vea faufau a to ’na metua tane e ere i te Ite aita ana‘e te metua i te fare. Ua papai oia: “Mea riaria mau â te faahopearaa o tera mau hoho‘a i nia i to ’u roro apî! I teie nei â, e 25 matahiti i muri a‘e, ua mau roa te reira. Noa ’tu ta ’u aroraa puai, eita e moe. E faahapa noa vau ia ’u, noa ’tu e aita vau e mana‘ona‘o ra i te reira.” Mea paari mau â ia ape i tera huru aau teimaha ma te ore e mataitai i te mau mea faufaa ore! E nafea ïa? Ma te tutava i te ‘faatîtî i te mau mana‘o atoa ia faaroo i te Mesia.’—Kor. 2, 10:5.

12, 13. Eiaha te mau Kerisetiano e mataitai i teihea mau mea faufaa ore, e no te aha?

12 Te tahi atu mea “ino,” aore ra faufaa ore, e ape, o te faaanaanataeraa ïa e faaitoito ra i te nounou tao‘a, te peu tahutahu, te haavîraa u‘ana, te haamaniiraa toto, e te pohe. (A taio i te Salamo 101:3.) I mua ia Iehova, e hopoia na te mau metua Kerisetiano ia maiti i ta ratou e mataitai i te fare. Eita iho â te hoê Kerisetiano mau e rave i te peu tahutahu. E titauhia râ ia ara te mau metua i te mau hoho‘a teata, hoho‘a afata teata, hauti video, e aamu e buka na te tamarii e peu hi‘ohi‘o to roto.—Mas. 22:5.

13 Ei feia apî aore ra paari, eiaha roa to tatou mata e au ia mataitai i te mau hauti video ino, aore ra haavî u‘ana, taparahi taata e manii rahi te toto. (A taio i te Salamo 11:5.) Eiaha roa tatou e mana‘ona‘o i te mau ohipa ta Iehova e opani. E haamana‘o ana‘e e o te haaviiviiraa ia tatou te fa a Satani. (Kor. 2, 11:3) E pau rahi te taime ia mataitai i te mau mea e ere i te mea ino, aita ’tura e taime no te haamoriraa utuafare, taioraa Bibilia i te mau mahana atoa, e faaineineraa i te mau putuputuraa.—Phil. 1:9, 10.

E pee ana‘e i te hi‘oraa o Iesu

14, 15. Eaha ta tatou e tapao no nia i te faahemaraa hopea a Satani i te Mesia, e mea nafea Iesu i upootia ’i?

14 E ite iho â tatou i te tahi mau mea faufaa ore i roto i teie nei ao ino. Ua ite atoa Iesu i te reira. I roto i ta Satani faahemaraa hopea ia ore Iesu e rave i te hinaaro o te Atua, “ua aratai . . . te diabolo ia ’na i nia i te hoê mou‘a teitei roa, e ua faaite maira ia ’na i te mau basileia atoa i te ao nei e to ratou hinuhinu.” (Mat. 4:8) No te aha Satani i na reira ’i? Ua hinaaro oia e faaohipa i te umeraa puai o te mata. Peneia‘e e hinaaro Iesu i te tiaraa teitei ia ite oia i te hanahana o te mau basileia atoa o teie nei ao. Ua nafea oia?

 15 Aita Iesu i mana‘ona‘o i teie pûpûraa faahema. Aita to ’na aau i atuatu i te mau hinaaro tano ore. E aita oia i feruriruri i te pûpûraa a te Diabolo no te patoi atu. Ua pahono oioi Iesu: “E haere ê atu oe, e Satani.” (Mat. 4:10) Ua tiatonu Iesu i to ’na taairaa e o Iehova e ua pahono ia au i ta ’na fa i roto i te oraraa, e rave i te hinaaro o te Atua. (Heb. 10:7) Ua upootia ’tura Iesu i mua i te tamataraa a Satani.

16. Eaha ta te patoiraa a Iesu i te mau faahemaraa a Satani e haapii maira?

16 E rave rahi haapiiraa ta tatou e huti mai i te hi‘oraa o Iesu. A tahi, e faahema Satani i te taata atoa. (Mat. 24:24) Te piti, e nehenehe te mea ta to tatou mata e hi‘o e faarahi i te mau hinaaro o to tatou aau, no te maitai aore ra no te ino. Te toru, e faaohipa Satani i “te hinaaro tia ore o te mata” no te faatopa ia tatou. (Pet. 1, 5:8) E te maha, e nehenehe atoa tatou e patoi ia Satani, ia ohipa oioi râ.—Iak. 4:7; Pet. 1, 2:21.

Ei mata “maitai”

17. No te aha ia ineine ai tatou hou te faahemaraa?

17 I to tatou pûpûraa ia tatou ia Iehova, ua fafau tatou e fariu ê i te mea faufaa ore. I to tatou euheraa e rave i te hinaaro o te Atua, ua parau tatou mai te papai salamo: “Te tapea nei au i o ’u pue avae i te mau e‘a iino atoa ra, ia haapao vau i ta oe parau.” (Sal. 119:101) Ia ineine tatou hou te faahemaraa. Ua maramarama maitai tatou i te mau mea ta te mau Papai e opani e te mau ravea a Satani. Eaha te taime i faahema ’i Satani ia Iesu ia taui i te mau ofai ei pane? I muri a‘e ïa i to Iesu haapaeraa i te maa e 40 mahana e ua “poia” ihora oia. (Mat. 4:1-4) E ite Satani ia paruparu tatou, a hema ohie noa ’tu ai tatou. I teie nei ïa e feruri maite ai i teie mau tupuraa. Eiaha e tiai! Ia haamana‘o tatou i ta tatou pûpûraa ia Iehova i te  mau mahana atoa, e faaoti papu ïa tatou e fariu ê i te mea faufaa ore.—Mas. 1:5; 19:20.

18, 19. (a) A faataa i te taa-ê-raa o te mata “maitai” e te mata ‘ma‘i.’ (b) No te aha e titauhia ’i ia mana‘ona‘o i te mea faufaa, e eaha ïa te a‘oraa a te Philipi 4:8?

18 I te mau mahana atoa, to mua i to tatou mata te mau faaanaanataeraa au rahi roa. Mea faufaa roa ia pee i ta Iesu a‘oraa ei mata “maitai” to tatou. (Mat. 6:22, 23) E tiatonu te mata “maitai” i te hoê fa, te raveraa i te hinaaro o te Atua. Area te mata ‘ma‘i,’ mea ino ïa e te nounou i te mau mea faufaa ore.

19 E haamana‘o ana‘e e e ohipa te mea ta tatou e hi‘o i nia i to tatou feruriraa e aau. E titauhia ïa ia mana‘ona‘o tatou i te mea faufaa. (A taio i te Philipi 4:8.) Ia pure noa ïa tatou mai te papai salamo: “E faafariu ê i tau mata ia ore ia hi‘o i te mea faufaa ore.” E a faaitoito ai tatou i te ohipa ia au i tera pure, e nehenehe tatou e tiaturi e na Iehova ‘e faaitoito ia tatou i to ’na ra e‘a.’—Sal. 119:37; Heb. 10:36.

Ia haamana‘o tatou i te aha no nia i . . .

• te taairaa o to tatou mata, feruriraa e aau?

• te fifi atâta ia mataitai i te hoho‘a faufau?

• te faufaaraa ia “maitai” to tatou mata?

[Uiraa haapiiraa]

[Hoho‘a i te api 23]

Eiaha te mau Kerisetiano e mataitai i teihea mau mea faufaa ore?