Eaha to roto?

Tapura tumu parau

E titauhia anei ia tia to oe haerea i te mau taime atoa?

E titauhia anei ia tia to oe haerea i te mau taime atoa?

 E titauhia anei ia tia to oe haerea i te mau taime atoa?

E HAEREA tia to te taata i te tahi taime; no e rave rahi, i te rahiraa ïa o te taime. Ehia râ ta oe i matau o te tutava nei i te faaite i te haerea tia i te mau taime atoa?

I teie mahana, aita e ite-faahou-hia ra te haerea tia i roto i te mau tuhaa rau o te oraraa. Ua matauhia hoi to te Atua mana‘o no nia i te reira, mai te vau o na Ture Ahuru: “Eiaha roa oe e eiâ.” (Exodo 20:15) No e rave rahi râ, e fariihia te eiâraa aore ra te tahi atu huru haerea tia ore ia au i te tupuraa. E hi‘opoa ana‘e e toru tupuraa o te eiâraa e farii-noa-hia ra.

E tumu anei te veve no te eiâ?

Ua parau te hoê tia hau Roma: “O te veve te tumu rahi o te ohipa ino.” E mana‘o paha te taata veve e e mea tano ia eiâ. E farii paha te feia e hi‘o atura. Eaha to Iesu mana‘o? Mea aumauiui roa oia i roto i ta ’na mau haaraa e te feia rii. Ua ‘aroha oia ia ratou.’ (Mataio 9:36) Aita roa ’tu râ oia i farii i te eiâ noa ’tu eaha te tupuraa. Ia nafea ïa te taata veve?

Mea aumauiui te Atua i te feia e tutava mau ra i te auraro ia ’na e e haamaitai oia i ta ratou mau haaraa ia noaa ta ratou e hinaaro. (Salamo 37:25) Te fafau ra te Bibilia: “E ore te feia parau-tia e pohe i te poia ia Iehova; area te tao‘a a te paieti ore ra, e ravea-ê-hia ïa e ana.” (Maseli 10:3) E nehenehe anei te taata veve e tiaturi i teie mau parau? E, ua papu roa ia Victorine.

Ei vahine ivi e pae tamarii haere haapiiraa, e ere i te mea ohie no Victorine. Te ora ra oia i te hoê fenua navai ore e mea iti roa te tauturu totiare. I rapae, te vahi e mea rahi roa te eiâraa, e tupu ai te oraraa utuafare i te rahiraa o te taime. Aita râ Victorine i hema i te eiâ. Ua haa noa oia i te faaravai i ta ’na moni ei vahine hoohoo haerea tia. No te aha oia i tapea noa ’i i te haerea tia?

“A tahi, te tiaturi ra vau e e haerea tia to te Atua e hoê â atoa ïa to ’na haerea i nia ia ’u ia pee au i to ’na huru. A piti, e haapii ta ’u mau tamarii i te haerea tia mai te peu noa e e ite ratou ia ’u ia haa mai te reira.”

Mea nafea oia i te manuïaraa? “E maa, e ahu, e e nohoraa to matou. I te tahi râ taime, ua ani au i te tauturu i te mau hoa, no te aufau  paha i te mau haamâu‘araa mana‘o-ore-hia no te ma‘i. Ua fana‘o noa vau i ta ’u i hinaaro. No te aha? Ua ite to ’u mau hoa e ua faaite au ma te haavare ore i to ’u mau tupuraa e aita vau i titau hau atu i tei hinaarohia.”

“Ua paari mai te mau tamarii ma te haerea tia. Aita i maoro a‘enei, ua ite te hoê taata tapiri i te mau moni hu‘ahu‘a i nia i te airaa maa e ua ani maira e aita anei au e taiâ ra e ia rave te mau tamarii i te reira. Mea fifi roa no ’na ia tiaturi i to ’u parauraa ’tu e eita roa ’tu ratou e na reira. Ma te ite-ore-hia e au, ua opua oia e tamata ia ratou. Ua vaiiho huna ’tu oia i roto i te fare e piti moni 20 toata i te hoê vahi ite-maitai-hia e te tamarii. Ia ’na i ho‘i mai i te mahana i muri iho, ua maere oia i te iteraa e tei reira noâ te moni. Mea hau a‘e te tamarii haerea tia i te tao‘a materia e rave rahi.”

“Te na reira nei hoi te taatoaraa”

Eiâ i te vahi raveraa ohipa, mea matauhia ïa. No reira e rave rahi taata e mana‘o ai e, “Te na reira nei hoi te taatoaraa, eita ïa vau?” Te na ô ra râ te Bibilia: “Eiaha oe e pee i te feia rahi i te parau ino.” (Exodo 23:2) Ua pee Victoire i teie a‘oraa. Ua hoona anei te taime?

I te 19raa o to ’na matahiti, ua rave oia i te ohipa i te fare taviriraa hinu tamara. Ua ite oioi oia e te faatapuni nei na vahine rave ohipa e 40 i te mau huero tamara i roto i ta ratou mau ete no te afai atu i rapae. I te mau hopea hebedoma atoa, e hoo ratou i te huero no te hoê faito e toru aore ra e maha mahana moni ohipa. Te faatia ra Victoire: “Te na reira nei hoi te taatoaraa. Ua mana‘o ratou e e apiti atoa ’tu vau, ua patoi râ vau ma te parau atu e na te haerea tia e aratai ra ia ’u. Ua faaooo mai ratou i te na ôraa e ‘o oe iho â te ere.’”

“I te hoê mahana a faaoti ai matou, ua tia taue maira te taata faatere. Ua paheru oia i te mau ete atoa e ua itea maira te mau huero i roto i ta vera ma eiaha râ ta ’u. I nia i te mau vahine atoa i noaahia, ua tihati-roa-hia vetahi e ua ohipa noa vetahi atu e piti hebedoma ma te aufau-ore-hia. I taua taime ra, ua papu i teie mau vahine e aita roa vau i ere.”

“Na ’u i ite, na ’u iho â ïa”

Eaha to oe huru ia ite oe i te hoê tao‘a ta te tahi taata i moe? No e rave rahi, e faatupu oioi te reira i te mana‘o e ‘Na ’u tera,’ ma te hinaaro ore e faaho‘i atu. “Na ’u i ite, na ’u iho â ïa,” o ta ratou ïa philosophia. No vetahi, aita e ino i ravehia. E feruri ratou, ‘No te fatu, ua moe ïa tao‘a.’ No vetahi atu, e ere na ratou e imi i te fatu, e mea ohipa rahi.

Eaha to te Atua mana‘o? Te faaite ra te Deuteronomi 22:1-3 e e vai noa te hoê tao‘a i te taata i ite, ‘ia imi râ te fatu, e faaho‘i atu oia i te reira ia ’na ra.’ Aita ana‘e oia e faaite atu, e parihia oia i te eiâ. (Exodo 22:9) E au noa anei te reira i teie mahana? E, ua papu roa ia Christine.

Te faatere ra Christine i te hoê fare haapiiraa e ere na te hau. Ua aufauhia oia e mai tei matauhia i Afirika tooa o te râ, ua potaro oia i ta ’na moni ava‘e e tuu noa ’tura i te reira i roto i ta ’na pute. Ua tarape o ’na i te hoê faurao no te faahoro oioi ia ’na i te hoê putuputuraa. I to ’na taeraa ’tu, imi ihora i te tahi moni hu‘ahu‘a no te aufau i te taata faahoro. I roto i te poiri, aita Christine i ite e ua marua ta ’na potaro moni.

Tau minuti i muri a‘e, mea na taua aroâ atoa ra o Blaise, 19 matahiti, e taata matau-ore-hia hoi i tera vahi. Ua faanaho oia i te farerei i te hoê hoa i te putuputuraa to reira Christine. Ua itea ia Blaise te potaro moni e  ua tuu atura i roto i to ’na pute ahu. Ia oti te putuputuraa, faaite atura i to ’na hoa e ua itehia ia ’na te tahi mea i rapae e e nehenehe te taata o tei moe te tahi ohipa e taniuniu ia ’na no te faaite i ta ’na i moe.

I to Christine ho‘iraa ’tu i te fare, ua hitimahuta oia, ua moe ta ’na moni. I te hebedoma i muri iho, i to ’na faaiteraa i te reira i to ’na hoa ia Josephine, parau mai nei oia e ua itea mai te tahi mea e te hoê taata i tae mai i te putuputuraa. Ua niuniu Christine ia Blaise e ua faataa ’tu i te tino moni i moe. Ua oaoa roa oia i to Blaise faaho‘iraa ’tu i te reira. E o Blaise? Hoê hebedoma te moni i te vai-noa-raa ia ’na ra, ua parau râ oia, “Ua oaoa a‘e au i te faaho‘iraa ’tu i te moni i te tapearaa mai.”

E haerea tia to ratou i te mau taime atoa, no te aha?

Aita Victorine, Victoire, e Blaise e ora ra i te hoê â vahi, e aita atoa ratou i matau. Hoê râ mea tei taai ia ratou. E Ite no Iehova ratou o te paturu ra i ta te Bibilia e parau ra no nia i te haerea tia. Te tiai ra ratou i te tupuraa o te parau fafau a te Atua o te hoê ao apî. “Te tatari nei . . . tatou i te ra‘i apî e te fenua apî ta ’na i parau maira, i te vai-mau-raa o te parau-tia.” E taata parau-tia e te haerea tia ïa te taatoaraa e ora ra i reira.—Petero 2, 3:13.

Aita Victorine e mana‘o ra e e maitai roa mai to ’na tupuraa i te pae moni e tae atu ai i te mahana e taui ai te Atua i te mau mea. E tao‘a rahi râ ta ’na i te pae varua, ta te moni hoi e ore roa e nehenehe e hoo. E haerea tia e e peu maitai ta ta ’na mau tamarii. I te mau Tapati atoa, te oaoa ra ratou i te paraparau i to ratou taata-tupu no nia i te maitai o te Atua e i te faataa e nafea oia e haamâha ’i i “te feia atoa i tiaoro atu ia ’na ma te haavare ore” e e tiai ai i “te feia i hinaaro ia ’na.”—Salamo 145:7, 18, 20.

Ua faarue Victoire i ta ’na ohipa i te fare taviriraa hinu tamara. Na ’na iho â ta ’na ohipa i teie nei, e hoo i te garri (te hoê faraoa ota hamanihia e te maniota) i te matete. No to ’na haerea tia, e rave rahi ta ’na hoani. Ua nehenehe ïa oia e faaiti i to ’na taime i te matete no te paraparau hau atu â ia vetahi ê no nia i te tiaturiraa e ora i roto i te hoê ao aita faahou e haerea tia ore. Ua faaipoipo oia e e tavini taime taatoa raua ta ’na tane i teie nei.

Ua moe ta Christine moni i mua i te Piha a te Basileia a te mau Ite no Iehova. Aita Blaise i matau i te taatoaraa tei tae mai i te putuputuraa, ua ite râ oia e o to ’na mau taeae e tuahine Kerisetiano tera o te tutava ra i te faaite i te haerea tia i te mau taime atoa.

Ehia rahiraa taata ta oe i matau o te tutava mau ra i te faaite i te haerea tia i te mau taime atoa? A feruri na ia oe i rotopu e 50, 100, aore ra e 200 taata haerea tia. Tera ta te mau Ite no Iehova e fana‘o ra ma te oaoa i ta ratou Piha a te Basileia. No te aha e ore ai e haere i reira e e haamatau ia ratou?

[Parau iti faaôhia i te api 8]

“Mea hau a‘e te tamarii haerea tia i te tao‘a materia e rave rahi.”—VICTORINE

[Tumu parau tarenihia i te api 10]

Te farii ra anei te Maseli 6:30 ia eiâ?

Te na ô ra te Maseli 6:30: “Eita e faaruehia te eiâ ia eiâ ei haamâha i to ’na hiaai ia pohe i te poia ra.” Te farii ra anei teie parau ia eiâ? Aita roa ’tu. Te faaite ra te mau irava tapiri e no te Atua, e amo iho â te taata eiâ i ta ’na hapa: “Ia itea râ, e tataihitu ïa ta ’na ia faaho‘i mai; e parau roa tei to ’na ra utuafare i te hopoi mai.” (Maseli 6:31) Noa ’tu e e ere hoê â faito faahaparaa to te taata e eiâ ra no te poia e to te taata e eiâ ra no to ’na nounou aore ra no te faaino i te tahi atu taata, e mea tia ia “faaho‘i” oia i ta ’na i eiâ. Noa ’tu eaha te tupuraa, eiaha roa ’tu te feia e hinaaro ra i te farii maitai a te Atua ia eiâ.