Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA 2009-09-01

E paturu te haapaoraa maitai i te mau ture aveia morare teitei

E paturu te haapaoraa maitai i te mau ture aveia morare teitei

E HAAPII mai te haapaoraa maitai e nafea ia haamaitai i to tatou huru feruriraa e to tatou haerea. E turu atoa mai i roto i ta tatou tutavaraa i te rave i te mea tia e i te faaite i to tatou mau huru maitatai roa ’‘e. E nafea tatou e ite ai e e na reira te haapaoraa maitai?

A tapao na i ta te aposetolo Paulo i papai i  te mau Kerisetiano o te senekele matamua i ora na i Korinetia, i Heleni. Ua matauhia tera oire tahito no ta ’na mau peu morare ore. Ua faaara Paulo: “E ore hoi te taiata, e te haamori idolo, e te faaturi, e te mahu, e te paia, e te eiâ, e te nounou tao‘a, e te taero ava, e te faaino, e te haru e ore ana‘e ïa e parahi i te basileia o te Atua.” Ua parau faahou râ oia: “Mai te reira hoi te hoê pae o outou na, ua horoihia râ outou, ua faataahia râ outou, ua tiahia râ outou i te i‘oa o te Fatu ra o Iesu, e te Varua o to tatou Atua.” (Korinetia 1, 6:9-11) A feruri na: ua tauturu te haapaoraa maitai i vetahi i ere na i te mau ture aveia morare ia riro mai ei tavini mâ e te parau-tia a te Atua!

I te tahi a‘e pae, te a‘o ra te Bibilia: “Te vai atura . . . te tau e ore ai ratou e farii ai i te parau mau, no te anoenoe ra o to ratou tari‘a, e haaputu ïa ratou i te orometua i au i to ratou iho hinaaro.”—Timoteo 2, 4:3.

Eaha ta te mau haapaoraa ta oe i matau e rave ra i roto i tera tuhaa? Te paturu ra anei ratou i te mau faaueraa tumu a te Bibilia no nia i te morare? Aore ra te faaiti nei ratou i te faufaaraa o te a‘oraa maramarama a te Parau a te Atua, ma te parau atu i te taata i te mea ‘anoenoe i to ratou tari‘a’?

No te tauturu ia oe ia ite e te faahotu ra anei te tahi haapaoraa i te huero maitai, no te aha e ore ai e rave i te taime no te pahono i te mau uiraa i muri nei?

TUMU PARAU: Te faaipoiporaa.

TA TE BIBILIA E HAAPII RA:

“Ia haamaitaihia te faaipoipo i te taata atoa ra, e te viivii ore hoi te roi; e haava hoi te Atua i te poreneia e te faaturi ra.”—Hebera 13:4.

UIRAA:

Te titau ra anei tera haapaoraa i to ’na mau melo ia faaipoipo i mua i te ture?

TUMU PARAU: Te faataaraa.

TA TE BIBILIA E HAAPII RA:

I to ’na uiraahia e e te vai ra anei te tahi tumu papu no te faataa, ua pahono Iesu: “O te haapae noa i tana ra vahine, e ere no te faaturi ra, a faaipoipo atu ai i te tahi, ua faaturi ïa.”—Mataio 19:9, V.C.J.S.

UIRAA:

Te auraro ra anei tera haapaoraa i te aratairaa a Iesu e te faatia ra anei i te faataaraa e te faaipoipo-faahou-raa mai te peu noa o te faaturi te tumu?

TUMU PARAU: Te peu morare i te pae taatiraa.

 TA TE BIBILIA E HAAPII RA:

“E maue ê atu i te faaturi. Te mau hara atoa e ravehia e te taata nei, aita ra te tino; o te taata râ i faaturi ra, ua hamani ino oia i to ’na iho tino.”—Korinetia 1, 6:18.

“Na to ratou mau vahine hoi i ruri è i te peu mau ra ei peu tia ore. E te mau tane atoa hoi, i te faarueraa i te tahoeraa au i te vahine, ua faatupu ïa i te hinaaro te tahi i te tahi, te tane i te tane i te raveraa i te mea faufau; e ua noaa ihora ia ratou iho te utua e au i ta ratou ra hapa.”—Roma 1:26, 27, V.C.J.S.

UIRAA:

Te haapii ra anei tera haapaoraa e e hara te taatiraa morare ore i rotopu i te hoê tane e te hoê vahine e i rotopu atoa i na taata hoê â mero?

TUMU PARAU: Te patururaa ma te itoito i te mau titauraa a te Bibilia i rotopu i to ’na mau melo.

TA TE BIBILIA E HAAPII RA:

“Eiaha outou e amui atu i te taata i parauhia e taeae ia riro ei taiata, e te nounou tao‘a, e te haamori idolo, e te faaino, e te taero ava, e te haru; e eiaha atoa e amu noa ’tu i te maa i reira.” (Korinetia 1, 5:11) E no te feia e parau ra e e Kerisetiano ratou aita râ e tatarahapa ra i ta ratou hara? “A faataa è atu . . . i taua taata ino ra mai rotopu atu ia outou na,” ta te Bibilia e parau ra.—Korinetia 1, 5:13, V.C.J.S.

UIRAA:

E tiavaru anei tera haapaoraa i te hoê melo e tâu‘a ore ra i te mau ture aveia a te Bibilia ma te tatarahapa ore?