Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA 2009-09-01

E paturu te haapaoraa maitai i te here taeae

E paturu te haapaoraa maitai i te here taeae

“O TEI ore i here ra, aore ïa i ite i te Atua: e here hoi te Atua,” ta te Bibilia e parau ra. (Ioane 1, 4:8, V.C.J.S.) E mea tia ïa ia paturu te haapaoraa maitai i te here taeae.

Te rave nei e rave rahi haapaoraa i te hoê ohipa faahiahia ma te aupuru i te feia ma‘i, ruhiruhia, e veve. Te faaitoito nei ratou i to ratou mau melo ia faaohipa i teie a‘oraa a te aposetolo Ioane: “O te taata . . . tei ia ’na te tao‘a o teie nei ao, e ite atura oia i tana taeae i te atiraa, pipiri atura to ’na aau ia ’na, teihea te hinaaro i te Atua i te parahiraa i roto ia ’na? E au mau tamarii ra, eiaha to tatou te aroha vaha ana‘e e te aroha arero; ei aroha rave râ, ei mea mau.”—Ioane 1, 3:17, 18.

E ia tama‘i te mau nunaa? Ta te Atua faaueraa ia “here atu i to taata tupu mai ia oe iho na,” no te mau taime hau noa anei, a haapae atu ai i te reira ia faaoti te tahi taata poritita aore ra arii e aro atu i te nunaa tapiri?—Mataio 22:39, V.C.J.S.

Ua parau Iesu: “O te mea teie e ite ai te taata atoa e, e pipi outou na’u, ia here outou ia outou iho.” (Ioane 13:35, V.C.J.S.) A pahono ai oe i te mau uiraa i muri nei, a ui ia oe iho: ‘Te here ra anei te mau melo o tera haapaoraa i te mau taata atoa e i te  mau taime atoa, eiaha ma te parau noa, ma te ohipa atoa râ?’

TUMU PARAU: Te tama‘i.

TA TE BIBILIA E HAAPII RA:

Ua faaue Iesu i ta ’na mau pǐpǐ: “Te parau atu nei râ vau ia outou: e here atu i to outou mau enemi, e hamani maitai atu i te feia i riri roa mai ia outou.”—Mataio 5:44, V.C.J.S.

I to te mau faehau haereraa mai e haru ia Iesu, ua rave ihora Petero i te hoê ‘o‘e no te paruru ia Iesu. Ua parau râ oia: “A oomo i to ‘o‘e i roto i te vehî; o te rave hoi i te ‘o‘e ra, e pohe ïa i te ‘o‘e.”—Mataio 26:52.

Ua papai te aposetolo Ioane: “O te mea teie e itea ’i te tamarii a te Atua, e te tamarii a te diabolo: o tei ore i rave i te parau-tia ra, e ere ïa i to te Atua; e ere atoa tei ore i aroha i tana taeae. Teie hoi te parau ta outou i faaroo, mai te matamua mai, ia aroha tatou ia tatou iho. Eiaha mai ia Kaina ra, no taua varua ino ra oia, e taparahi pohe roa ’tura i to ’na teina.”—Ioane 1, 3:10-12.

UIRAA:

Te faaitoito ra anei tera haapaoraa i to ’na mau melo ia apiti atu i te tama‘i?

TUMU PARAU: Te poritita.

TA TE BIBILIA E HAAPII RA:

I muri a‘e i to ratou iteraa e e nehenehe ta Iesu e faatupu i te mau semeio, ua hinaaro vetahi ia faaô o ’na i roto i te poritita. Ua aha oia? “E ite aera Iesu e, te opua ra ratou e tii puai mai iana, e hopoi ei faaarii, horo faahou oia i te moua, oia anae ra.”—Ioane 6:15, V.C.J.S.

I to Iesu haruraahia e pari-haavare-raahia ei taata e turai i te nunaa ia patoi i te faatereraa, ua pahono atu oia: “E ere i to teie nei ao to ’u basileia; ahiri no teie nei ao to ’u basileia, ua faaitoito ïa tau mau tavini ia ore au ia tuuhia ’tu i te rima o te ati Iuda; e ere râ to ’u basileia i to ǒ nei.”—Ioane 18:36.

Ia ’na i pure i te Atua no ta ’na mau pǐpǐ, ua na ô Iesu: “Ua tuu atu vau i ta oe parau ia ratou, e te riri nei to te ao nei ia ratou, no te mea e ere ratou i to teie nei ao, mai ia ’u nei hoi e ere i to teie nei ao ra.”—Ioane 17:14.

UIRAA:

Te pee ra anei tera haapaoraa i to Iesu hi‘oraa ma te ore e faaô i roto i te poritita, noa ’tu e e riri mai te tahi mau tia?

TUMU PARAU: Te mana‘o oti noa.

TA TE BIBILIA E HAAPII RA:

I to te mau taata peritome-ore-hia matamua e ere i te ati Iuda riroraa mai ei Kerisetiano, ua tapao te aposetolo Petero: “E ore te Atua e haapao mai i te huru o te taata nei; I te mau fenua’toa ra, o tei mataû iana, e o tei rave i te haapaoraa tia mau, e ite maitai hia mai ïa e ana.”—Ohipa 10:34, 35, V.C.J.S.

 I to ’na papairaa i te mau Kerisetiano o te senekele matamua, ua parau Iakobo: “E au mau taeae ra, eiaha outou e mau i te parau a to tatou Fatu ra a Iesu Mesia, te Fatu o te hanahana ra, ma te haapao i te huru o te taata. Ia haere mai hoi te hoê taata i roto i to outou sunago, ma te tapea auro i te rima e te ahu unauna ra; a tomo atoa mai ai te hoê taata tao‘a ore ma te ahu ino ra: ite atura outou i tei ahu i te ahu unauna ra, e ua parau atura ia ’na e, E parahi oe i ǒ nei i te vahi maitai; a parau atu ai i te taata tao‘a ore ra, Tia noa ’tu oe i ǒ atu, e aore ïa, E parahi i ǒ nei i tau tiroaroaraa avae nei; e ere anei ua faahuru ê outou, e ua riro ei feruri mana‘o ino ra?”—Iakobo 2:1-4.

UIRAA:

Te haapii ra anei tera haapaoraa e mea aifaito te taata atoa i te aro o te Atua e eiaha to ’na mau melo ia hi‘o ino atu ia vetahi ê no to ratou iri e tiaraa totiare?