Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

TE PARE TIAIRAA 2009-03-01

Te titau manihini nei matou ia oe

Te titau manihini nei matou ia oe

PENEIA‘E ua na mua oe i te hoê Piha a te Basileia a te mau Ite no Iehova ma te uiui eaha te ravehia ra i roto. Ua ite anei oe e e fariihia te taata atoa i ta ratou mau putuputuraa tahebedoma? Te farii-mahanahana-hia ra te feia e haere atu.

Teie râ, e uiraa paha ïa ta oe. No te aha te mau Ite no Iehova e putuputu ai? Eaha te tupu i tera mau putuputuraa? E eaha ta te taata tei haere atu, e ere i te Ite no Iehova, e parau no te mau putuputuraa?

‘E haaputuputu i te taata atoa’

Mai mutaa iho mai â, ua haaputuputu te mau taata no te haamori i te Atua e te haapii no nia ia ’na. Fatata a 3 500 matahiti a‘enei, ua parauhia i te mau Iseraela: “E haaputuputu atoa mai i te taata atoa, i te tane, e te vahine, e te tamarii; e te taata ěê i roto i to mau oire ra; ia ite ratou, ia haapii, e ia mǎta‘u i to outou Atua ra ia Iehova, ia haapao, e ia rave hoi i te mau parau atoa o teie nei ture.” (Deuteronomi 31:12) No reira, i Iseraela, i haapiihia na hoi te feia apî mai te feia paari atoa ia haamori e ia auraro i te Atua ra o Iehova.

E senekele i muri a‘e, i te haamauraahia te amuiraa Kerisetiano, e tuhaa faufaa noâ te mau putuputuraa o te haamoriraa mau. Ua papai te aposetolo Paulo: “E haapao maite â tatou te tahi i te tahi, a faaaraara ’tu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, mai ta te tahi pae ra peu, e faaitoito râ.” (Hebera 10:24, 25) Mai te mau taairaa utuafare e haapaarihia ia amui pinepine te mau melo utuafare, e haapaari-atoa-hia te mau taairaa o te here i rotopu i te feia e hinaaro e tavini i te Atua ia haaputuputu te mau Kerisetiano no te haamoriraa.

Ia au i teie mau hi‘oraa o te mau Papai, e putuputu te mau Ite no Iehova i ta ratou Piha a te Basileia e piti taime i te hebedoma. E tauturu te mau putuputuraa i te feia i tae atu ia haafaufaa, ia taa, e ia faaohipa i te mau faaueraa tumu o te Bibilia. Ia nehenehe, e peehia hoê â porotarama na te ao nei, e e fa pae varua to te putuputuraa taitahi. Na mua ’‘e e i muri a‘e i te mau putuputuraa, e “mahanahana” te feia e haere atu te tahi i te tahi na roto i te aparauraa e faaitoito. (Roma 1:12) Eaha te tupu i tera mau putuputuraa?

Oreroraa parau bibilia

O te oreroraa parau no te taatoaraa, matauhia i te hopea hebedoma, te putuputuraa matamua ta te rahiraa o te taata i haere atu. E pinepine Iesu Mesia i te horoa i te mau oreroraa parau no te taatoaraa—oia atoa ta ’na A‘oraa tuiroo i nia i te mou‘a. (Mataio 5:1; 7:28, 29) Ua paraparau te aposetolo Paulo i te mau taata no Ateno. (Ohipa 17:22-34) Ma te pee i taua raveraa ra, e oreroraa parau te vauvauhia i te mau putuputuraa a te mau Ite no Iehova o tei faaineine-taa-ê-hia no te mau taata atoa, a tahi ra paha vetahi o ratou e haere atu ai i te hoê putuputuraa.

E haamata te putuputuraa e te hoê himene o te buka E haamaitai ia Iehova na roto i te himene. * Ia hinaaro ratou, e nehenehe te taata atoa e tia e e himene atoa ’tu. I muri iho i te hoê pure poto, e vauvau te hoê taeae orero aravihi i te hoê oreroraa parau e 30 minuti. (A hi‘o i te tumu parau tarenihia “ Oreroraa parau faufaa no te taatoaraa.”) Ua niu-maitai-hia ta ’na oreroraa parau i nia i te Bibilia. E ani pinepine oia i te feia e faaroo ra ia imi i te mau irava e tano e ia pee i te taioraa. No reira, e hinaaro paha oe e afai i ta oe iho Bibilia, aore ra e nehenehe oe e  ani atu i te tahi Bibilia i te hoê o te mau Ite no Iehova hou te putuputuraa.

Haapiiraa o Te Pare Tiairaa

I roto i te rahiraa o te mau amuiraa a te mau Ite no Iehova, o te Haapiiraa o Te Pare Tiairaa to muri iho i te oreroraa parau no te taatoaraa, o te hoê ïa aparauraa ma te mau uiraa e te mau pahonoraa o te hoê tumu parau bibilia hoê hora. E faaitoito teie putuputuraa i te feia tei haere atu ia pee i te hi‘oraa o te mau taata no Berea i te tau o Paulo, o tei ‘farii i te parau ma te aau mahora e tei imi i te parau i papaihia ra.’—Ohipa 17:11.

Na te hoê himene e omua i te Haapiiraa o Te Pare Tiairaa. To roto te mau haamaramaramaraa e te mau uiraa e tuuhia ’tu e te taeae faatere i te haapiiraa i teie vea, ta oe e nehenehe e ani i te hoê Ite no Iehova. Teie te mau tumu parau tei hi‘opoahia a‘enei: “Te mau metua—a haapii i ta outou mau tamarii ma te here,” “Eiaha roa te ino e tahoohia i te ino i te taata atoa nei,” e “Te tumu ua fatata ’i te hopea o te mau mauiui atoa.” Noa ’tu e e faaterehia te putuputuraa ma te mau uiraa e te mau pahonoraa, e pahono te feia e faaroo ra ma te aau tae e e mea pinepine na te feia tei taio e tei feruri na mua roa i te tumu parau e te mau irava turu te pahono atu. E faaoti te putuputuraa e te himene e te pure.—Mataio 26:30; Ephesia 5:19.

Haapiiraa bibilia a te amuiraa

Hoê po i te hebedoma taitahi, e putuputu faahou te mau Ite no Iehova i te Piha a te Basileia no te hoê porotarama e toru tuhaa no 1 hora e 45 minuti. O te Haapiiraa bibilia a te amuiraa, e 25 minuti, te tuhaa matamua. E tauturu te reira i te feia tei haere atu ia haamatau atu â ia ratou i ta ratou Bibilia, ia faaafaro i  to ratou huru feruriraa e to ratou haerea, e ia riro ei pǐpǐ a te Mesia maitai a‘e. (Timoteo 2, 3:16, 17) Mai te Haapiiraa o Te Pare Tiairaa, e aparauraa ma te mau uiraa e te mau pahonoraa o te hoê tumu parau bibilia teie putuputuraa. E pahono te feia e hinaaro ma te aau tae. E pinepine o te hoê buka aore ra te hoê buka rairai neneihia e te mau Ite no Iehova te ravehia ei papai haapiiraa bibilia.

No te aha e faaohipahia ’i te mau papai bibilia i te putuputuraa? I te mau tau bibilia i tahito, aita i ravai ia taio noa i te Parau a te Atua. ‘I faaitehia na te auraa, e ite a‘era ratou i taua parau i taiohia ra.’ (Nehemia 8:8) I teie mau matahiti i mairi a‘enei, ua tauturu te mau papai no nia i te buka a Isaia, Daniela, e te Apokalupo i te feia tei haere atu i tera putuputuraa ia taa i te reira mau tuhaa o te Bibilia.

Haapiiraa o te taviniraa teotaratia

O te Haapiiraa o te taviniraa teotaratia to muri iho i te Haapiiraa bibilia a te amuiraa. Ua faanahohia tera putuputuraa e 30 minuti no te tauturu i te mau Kerisetiano ia haamaitai i te aravihi o “te haapii-maitai-raa ’tu.” (Timoteo 2, 4:2) Ei hi‘oraa, aita anei ta oe tamarii aore ra te hoê hoa i ui a‘enei ia oe no nia i te Atua aore ra i te Bibilia e e mea fifi no oe ia pahono maitai atu? E nehenehe te Haapiiraa o te taviniraa teotaratia e haapii ia oe e nafea ia horoa i te mau pahonoraa bibilia faaitoito i te mau uiraa fifi. E nehenehe tatou e parau atoa mai te peropheta Isaia: “Ua horoa mai te Fatu ra o Iehova ia ’u i te arero o te feia ite, ia tia ia ’u i[a] parau atu i te parau au i tei rohirohi ra.”—Isaia 50:4.

E haamata te Haapiiraa o te taviniraa teotaratia e te hoê oreroraa parau niuhia i nia i te hoê tuhaa o te Bibilia tei faaitoitohia i te feia e faaroo ra ia taio i te hebedoma na mua ’tu. I muri iho, e ani te taeae orero ia tatara poto mai i te mau mana‘o faufaa o te taioraa i faataahia ta ratou i ite. I muri iho i tera aparauraa, e vauvau te tahi mau piahi tei tapao ia ratou i te haapiiraa i ta ratou tumu parau faataahia.

Ua faataahia te mau piahi no te taio i te hoê tuhaa o te Bibilia mai mua mai aore ra no te faaite e nafea ia haapii i te hoê tumu parau bibilia i te tahi atu taata. I muri iho i te vauvauraa taitahi, e haapopou te hoê taeae a‘o aravihi i te  piahi no ta ’na i rave maitai ma te niu i ta ’na mau a‘oraa i nia i te buka Tirez profit de l’École du ministère théocratique. I muri a‘e, e nehenehe oia e horoa i te mau mana‘o tauturu i te piahi ana‘e e nafea oia e nehenehe ai e haamaitai atu.

Ua faanahohia tera tuhaa oraora o te porotarama no te tauturu eiaha noa i te piahi, i te taatoaraa râ i tae mai o te hinaaro e aravihi atu â i te taio, i te paraparau, e i te haapii i te taata. Ia faaoti te Haapiiraa o te taviniraa teotaratia, na te hoê himene niuhia i nia i te hoê irava bibilia e omua mai i te Putuputuraa no te taviniraa.

Putuputuraa no te taviniraa

O te Putuputuraa no te taviniraa te tuhaa hopea o te porotarama. Na roto i te mau oreroraa parau, faahi‘oraa, uiuiraa mana‘o, e aparauraa e te feia e faaroo ra, e ite te feia i tae atu i te haapii i te parau mau bibilia ia vetahi ê ma te manuïa. Hou a tono ai i ta ’na mau pǐpǐ e poro, ua haaputuputu Iesu ia ratou e ua horoa i te mau faaueraa taa maitai. (Luka 10:1-16) Ineine maitai i teie nei no te ohipa pororaa evanelia, ua fana‘o ratou e rave rahi tupuraa anaanatae. I muri a‘e, ua ho‘i te mau pǐpǐ a Iesu ia ’na ra. (Luka 10:17) E pinepine te mau pǐpǐ i te faaite i ta ratou i fana‘o te tahi i te tahi.—Ohipa 4:23; 15:4.

Tei roto te porotarama e 35 minuti o te Putuputuraa no te taviniraa i Ta tatou taviniraa i te Basileia i neneihia i te mau ava‘e atoa. Teie te mau tumu parau hopea i hi‘opoahia: “A haamori ia Iehova ei utuafare,” “No te aha tatou e ho‘i pinepine ai,” “A pee i te Mesia i roto i ta oe taviniraa.” E faaoti te porotarama e te hoê himene, e na te hoê taeae faataahia o te amuiraa te pure hopea.

Ta te taata tei haere atu i parau

Te tutava ra te mau amuiraa i te farii maitai i te mau taata atoa. Ei hi‘oraa, ua faaroo Andrew i te mau aamu tano ore no nia i te mau Ite no Iehova. I to ’na râ haereraa i ta ’na putuputuraa matamua, ua maere oia i to ’na farii-maitai-raahia. “E vahi au mau te reira,” ta Andrew ïa e parau ra. “Ua maere roa vau i te auhoaraa o te mau taata e i to ratou anaanatae ia ’u.” Ta Ashel, te hoê taurearea i Kanada, ïa e farii ra. “E mea anaanatae mau te putuputuraa! E mea ohie ia pee i te reira.”

Ua matauhia José, e ora ra i Beresilia, ei taata iria i roto i to ’na tuhaa oire. Noa ’tu â râ, ua titau-manihini-hia oia ia haere atu i te hoê putuputuraa i te Piha a te Basileia no reira. “Ua farii mahanahana mai te feia i te Piha a te Basileia ia ’u, noa ’tu e ua ite ratou i to ’u haerea tahito,” ta ’na ïa e parau ra. Te haamana‘o ra Atsushi e ora ra i Tapone: “E mea tia ia farii au e i huru ê na vau i to ’u haereraa i ta ’u putuputuraa matamua e te mau Ite no Iehova. Noa ’tu â râ, ua taa ia ’u e mai te tahi mau taata ratou. Ua tamata mau ratou eiaha vau ia huru ê faahou.”

E farii-popou-hia oe

Mai ta te mau parau i nia nei e faaite ra, e nehenehe te haereraa ’tu i te mau putuputuraa i te Piha a te Basileia e riro ei tupuraa hoona roa. E haapii oe no nia i te Atua, e na roto i te haapiiraa niuhia i nia i te Bibilia ta oe e fana‘o i ǒ, e faaite te Atua ra o Iehova ia oe e nafea “e maitai ai oe.”—Isaia 48:17.

E mea tamoni ore te mau putuputuraa a te mau Ite no Iehova, e aita e titauraa moni. E hinaaro anei oe e haere atu i te hoê putuputuraa i te Piha a te Basileia i to oe vahi? Te titau-manihini-hia ’tu nei oe ia na reira.

^ par. 10 Ua neneihia te mau papai atoa i roto i teie tumu parau e te mau Ite no Iehova.