Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) NOVEMA 2015

Hoê hanere matahiti i raro a‘e i te faatereraa a te Basileia!

Hoê hanere matahiti i raro a‘e i te faatereraa a te Basileia!

“Ia faaau mai te Atua hau . . . i te mau ohipa maitatai atoa ra, ia rave outou i to ’na hinaaro.”—HEB. 13:20, 21.

HIMENE: 136, 14

1. Eaha te faufaaraa o te pororaa a Iesu? A faataa.

MEA au roa na Iesu ia faaite i te poroi o te Basileia o te Atua. I to ’na faaearaa i te fenua nei, o te Basileia te tumu parau faufaa ta ’na i paraparau rahi a‘e. Ua faahiti oia i te Basileia hau atu i te 100 taime i roto i ta ’na taviniraa. Mea faufaa roa ïa te Basileia no Iesu.—A taio i te Mataio 12:34.

2. Ehia taata tei faaroo i te faaueraa i faahitihia i roto i te Mataio 28:19, 20, e no te aha e nehenehe ai e haapapu i te reira?

2 I muri rii noa ’‘e i to ’na faatia-faahou-raahia, ua farerei Iesu i te hoê pǔpǔ e ua hau atu i te 500 taata o tei nehenehe e riro mai ei pǐpǐ. (Kor. 1, 15:6) Peneia‘e ua tupu te reira i te taime i horoa ’i Iesu i te faaueraa ia poro i “te mau fenua atoa.” E ere paha i te mea ohie tera ohipa. * Ua parau oia ia ratou e e tamau te ohipa  pororaa no te hoê taime roa, tae atu i “te hopea o teie nei ao.” A poro ai outou i te parau apî oaoa i teie mahana, te tauturu nei outou ia tupu teie parau tohu.—Mat. 28:19, 20.

3. Eaha na ohipa maitatai e toru o te tauturu ia tatou ia poro i te parau apî oaoa?

3 I muri iho i to Iesu horoaraa i te faaueraa ia poro, ua parau oia, e ‘tei pihaiiho vau ia outou.’ (Mat. 28:20) No reira Iesu i fafau ai i ta ’na mau pǐpǐ e e aratai o ’na i te ohipa pororaa e e tauturu oia ia ratou no te poro na te ao atoa nei. Tei pihaiiho atoa Iehova ia tatou. Ua horoa mai oia i “te mau ohipa maitatai atoa” no te tauturu ia tatou ia poro. (Heb. 13:20, 21) I roto i teie tumu parau, e hi‘opoa ana‘e na ohipa maitatai e toru: (1) te mau ravea i horoahia, (2) te mau huru raveraa i faaohipahia e (3) te faaineineraa i horoahia. Na mua, e hi‘opoa ana‘e te tahi mau ravea ta tatou i faaohipa i na 100 matahiti i mairi.

TE MAU RAVEA O TE TAUTURU I TE MAU TAVINI A TE ATUA IA PORO

4. Mea nafea te ravea e rave rau i tauturu ai ia tatou i roto i te ohipa pororaa?

4 Ua faaau Iesu i te poroi o te Basileia i te huero, o tei tanuhia i roto i te mau repo fenua taa ê. (Mat. 13:18, 19) No te faaineine i te repo fenua, te faaohipa ra te taata faaapu i te mau ravea rau. Hoê â no tatou, ua horoa to tatou Arii i te mau ravea rau ia nehenehe tatou e faaohipa no te tauturu i te taata ia farii i ta tatou poroi. Ua faaohipahia te tahi mau ravea no te hoê taime poto noa, area te tahi atu, te faaohipa-noa-hia ra i teie mahana. Ua tauturu te mau ravea atoa ia aravihi atu â i roto i te pororaa.

Ua tauturu te tareta pororaa i te rahiraa o te mau taeae ia haamata i te poro

5. Mea nafea te mau ravea rau i tauturu ai i roto i ta tatou ohipa pororaa?

5 I 1933, ua haamata te feia poro i te faaohipa i te tareta pororaa, hoê o te mau ravea o tei tauturu i te rahiraa o te mau taeae ia haamata i te poro. Mea nainai roa te tareta e mea poto te poroi Bibilia e te ohie ia taa. I te tahi mau taime, ua piahia te hoê tareta apî e te hoê poroi apî. Ua faaohipa te taeae Erlenmeyer, i te ahururaa o to ’na matahiti, i te tareta pororaa i te taime matamua. Ua faataa oia: “Teie te haamataraa matauhia o te hoê aparauraa, ‘Te hinaaro ra anei oe e taio i teie tareta?’ Ia oti te tareta i te taiohia e te fatu fare, e faaite matou i te papai e e haere noa te aparauraa i mua.”

6. Mea nafea te tareta pororaa i te tautururaa i te feia poro?

6 Ua tauturu te tareta pororaa i te feia poro i roto i te tahi mau tupuraa. Ei hi‘oraa, mea mamahu te tahi feia poro e noa ’tu ua hinaaro mau ratou e poro, aita ratou i ite eaha te parau. Mea mǎta‘u ore roa te tahi atu feia poro. Ua matau noa ratou i te parau i te fatu fare i te mau mea atoa ta ratou i ite tau minuti noa. I te tahi râ mau taime, e ere ta ratou huru paraparauraa i te mea mǎrû. Ua tauturu te tareta pororaa i te feia poro atoa ia horoa ’tu i te hoê poroi papu e te ohie ia taa.

7. Eaha te tahi mau fifi i itehia a faaohipahia ’i te tareta pororaa?

7 Te vai atoa ra te tahi mau fifi. Ua parau te tuahine Grace Estep: “I te tahi mau taime, e parauhia mai, ‘Eaha tera e parauhia ra? Eita  anei ta oe e nehenehe e faaite noa mai eaha te reira?’” Oia atoa, aita ta te tahi mau fatu fare e nehenehe e taio i tei papaihia i nia i te tareta. No vetahi, ua rave noa ratou i te tareta e ua tamau i te opani. Aita te tahi mau taata i au i ta tatou poroi, no reira ratou i tumutu hu‘ahu‘a ’i i te tareta pororaa. Noa ’tu râ te mau fifi, ua tauturu te tareta pororaa i te mau taeae e tuahine ia poro i to ratou mau taata-tupu e ia itehia ratou ei feia poro o te Basileia.

8. Mea nafea te matini faata‘i pehe i faaohipahia ’i? (A hi‘o i te hoho‘a matamua.)

8 Te tahi atu â ravea o tei faaohipahia i muri a‘e i 1930, o te matini faata‘i pehe ïa. Ua pii te tahi mau Ite no Iehova i te reira Aaron, no te mea e ere na ratou e faaite roa ’tu i te parau apî oaoa, na te matini râ. (A taio i te Exodo 4:14-16.) Ia farii te fatu fare i te faaroo atu, e faata‘i ïa ratou i te hoê oreroraa parau Bibilia poto e e opere atu ratou i te tahi mau papai. I te tahi mau taime, e apiti atoa mai te mau utuafare taatoa no te faaroo i te hoê oreroraa parau! I 1934, ua haamata te Taiete Watch Tower i te hamani i te mau matini faata‘i pehe no te taviniraa. Ua haruharu ïa te mau taeae 92 oreroraa parau taa ê.

9. Mea nafea te matini faata‘i pehe i faufaahia ’i?

9 I te faarooraa o Hillary Goslin hoê o teie mau oreroraa parau, ua rave oia i te matini faata‘i pehe no te hoê hebedoma no te faaite atu i te poroi o te Bibilia i to ’na mau taata tapiri. Ei faahopearaa, e rave rahi taata o tei haamata i te farii i te parau mau e ua bapetizohia ratou. Hau atu â, ua apiti na tamahine e piti a te taeae Goslin i te Haapiiraa no Gileada e ua riro mai ei mitionare. Mai te tareta pororaa, ua tauturu atoa te matini faata‘i pehe e rave rahi taata poro ia haamata i te poro. I muri a‘e, maoti te Haapiiraa no te taviniraa Kerisetiano, te tamau ra te Arii i te faaineine i to ’na nunaa ia riro mai ei taata haapii aravihi.

A FAAOHIPA I TE MAU HURU RAVERAA ATOA IA PUTAPÛ TE AAU O TE TAATA

10, 11. Mea nafea te vea e te radio i te faaohiparaahia no te poro i te parau apî oaoa, e no te aha teie mau huru raveraa i manuïa ’i?

10 I raro a‘e i te aratairaa a to tatou Arii, mea rau te huru raveraa apî ta te nunaa o te Atua i faaohipa ia naea te taata e rave rahi i roto i te ohipa pororaa. Mea faufaa roa teie mau huru raveraa mea iti ana‘e te taata e ohipa ra. (A taio i te Mataio 9:37.) Ei hi‘oraa, e rave rahi matahiti i mairi, ua faaohipahia te mau vea no te poro i te parau apî oaoa. I te mau hebedoma atoa, ua hapono atu te taeae Russell i te hoê oreroraa parau Bibilia i te hoê taiete apî. I muri iho, ua hapono atu ratou i ta ’na oreroraa parau i Europa, i Kanada e i Marite. I 1913, ua piahia e 2 000 vea e tei roto te mau oreroraa parau a te taeae Russell e ua fatata 15 000 000 taata o tei taio i te reira!

Ua tauturu te vea e te radio e rave rahi taata i te mau vahi mea iti te taata poro

11 Ua faaohipa-atoa-hia te radio no te poro i te parau apî oaoa. I te 16 no Eperera 1922, ua horoa te taeae Rutherford hoê o ta ’na oreroraa parau matamua i te pu radio. Ua fatata e 50 000 taata o tei faaroo. I muri  iti a‘e, ua haamata tatou i te faaohipa i ta tatou iho pu radio piihia WBBR. Ua nehenehe ïa te porotarama matamua i te 24 no Fepuare 1924 e faaroohia. Te na ô ra Te Pare Tiairaa o te 1 no Titema 1924: “Te mana‘o nei matou e ua riro te radio ei ravea mâmâ roa ’‘e e maitai roa ’‘e no te faaite i te poroi o te parau mau i teie mahana.” Mai te mau vea, ua tauturu te radio e rave rahi taata i te mau vahi mea iti te taata poro.

E rave rahi taata poro e oaoa ra i te poro i te vahi taata e i te faaite atu i ta tatou reni Internet (A hi‘o i te paratarafa 12, 13)

12. (a) I teihea huru pororaa i te vahi taata ta oe e au roa ’‘e? (b) Eaha te tauturu mai ia faaruru i te mau mǎta‘u atoa ia poro tatou i te vahi taata?

12 I teie mahana, te vai ra te hoê huru raveraa maitai atu â ia putapû te aau o te taata, o te pororaa i te vahi taata. E titauhia ia rave hau atu â tutavaraa no te poro i te taata i te mau tapearaa pereoo uta taata, te mau tapearaa pereoo auahi, te mau vairaa pereoo, te mau vahi taata e te mau fare toa. E taiâ anei oe i te poro i te vahi taata? Mai te peu e e, a pure no te ani i te tauturu e a feruri i ta te taeae Manera, te hoê tiaau ratere, i parau: “Ua hi‘o matou i te mau huru taviniraa apî atoa mai te tahi atu ravea no te tavini ia Iehova, no te haapapu i to tatou taiva ore ia ’na e no te tamata i to tatou taiva ore. Ua hinaaro rahi matou e haapapu e ua ineine matou i te tavini ia ’na na roto i te mau ravea atoa ta ’na i ani mai.” Ia faaruru tatou i to tatou mau mǎta‘u e ia faaohipa tatou i te mau huru raveraa apî no te poro, e haapuai  ïa tatou i to tatou tiaturiraa ia Iehova e e riro mai tatou ei taata poro maitai roa ’‘e.—A taio i te Korinetia 2, 12:9, 10.

13. (a) No te aha e raveraa maitai te faaohiparaa i ta tatou reni Internet i roto i te pororaa? (b) Eaha te mau tupuraa ta oe i ite a faaohipa ’i i te reira?

13 Te oaoa ra te rahiraa o te taata poro i te faaite i te taata no nia i ta tatou reni jw.org, i reira ratou e taio e e rave ai i te mau papai Bibilia na roto hau atu 700 reo. I te mau mahana atoa, ua hau atu 1,6 mirioni taata e haere e hi‘o i ta tatou reni Internet. I na mua ’‘e, maoti te radio, ua fana‘o te taata i te mau vahi moemoe i te parau apî oaoa. I teie mahana, te na reira atoa ra ta tatou reni.

TE FAAINEINERAA I TE FEIA PORO O TE PARAU APÎ OAOA

14. Eaha te faaineineraa ta te feia poro i hinaaro rahi, e eaha te haapiiraa tei tauturu ia ratou ia riro ei taata haapii aravihi?

14 Ua manuïa roa te mau ravea e te mau huru raveraa ta tatou i hi‘opoa mai nei. Teie râ, ua hinaaro rahi te feia poro i na mua ’‘e ia faaineinehia ratou no te riro mai ei tavini. Ei hi‘oraa, i te tahi mau taime, eita te hoê fatu fare e farii i ta ’na i faaroo na roto mai i te matini faata‘i pehe. I te tahi atu mau taime, e anaanatae te hoê fatu fare e e hinaaro oia e ite atu â. Ua hinaaro mau te feia poro e ite e nafea e tinai i te mau patoiraa ma te mǎrû e e nafea ratou e riro mai ei taata haapii maitai roa ’‘e. Mea papu e maoti te varua mo‘a o te Atua, ua ite taeae Knorr e mea faufaa no te feia poro ia haapii e nafea e paraparau i roto i te taviniraa. I 1943, ua haamata ïa te mau amuiraa i te faanaho i te Haapiiraa no te taviniraa Kerisetiano. E tauturu mai teie haapiiraa i te taatoa ia riro ei taata haapii aravihi.

15. (a) Eaha ta vetahi i ite a horoa ’i ratou i hoê vauvauraa parau i te Haapiiraa no te taviniraa Kerisetiano? (b) E nafea e papu ai ia oe i te parau fafau a Iehova i roto i te Salamo 32:8 no nia i to oe tupuraa?

15 E rave rahi taeae o tei ore i faaohipahia no te horoa i te vauvauraa parau i mua i te taata. Te haamana‘o ra te taeae Ramu i ta ’na vauvauraa parau matamua i te matahiti 1944. Ua niuhia te reira i nia i te taata Bibilia ra o Doega. Ua na ô oia: “Ua ruru noa to ’u turi avae, to ’u rima e ua atete to ’u niho.” Ua na ô faahou oia: “A tahi ra vau i horoa ’i i te vauvauraa parau i nia i te tahua. Aita râ vau i tuu.” Noa ’tu e e ere i te mea ohie, ua horoa atoa te mau tamarii i te mau vauvauraa parau i te haapiiraa. Te haamana‘o ra te taeae Manera i tei tupu a horoa ’i te hoê tamaroa i ta ’na vauvauraa parau matamua: “No to ’na riaria, ua ta‘i o ’na a haamata ’i i te paraparau. Noa ’tu râ, no to ’na hinaaro rahi e horoa i ta ’na vauvauraa parau, ua ta‘i noa oia i te roaraa o te reira.” Peneia‘e, aita oe e pahono ra i te mau  putuputuraa no te mea mea mamahu oe aore ra e mana‘o paha oe e eita e haere ia oe ia pahono. Mai te peu e tera iho â, a ani ia Iehova i te tauturu no te faaruru i to oe mau mǎta‘u. E tauturu mai oia ia oe mai ta ’na i tauturu i te mau piahi i te Haapiiraa no te taviniraa Kerisetiano i na mua ’‘e.—A taio i te Salamo 32:8.

Mai 1943 mai â, ua tonohia hau atu 8 500 mitionare tei faaineinehia i Gileada i roto 170 fenua

16. Eaha te fa a te Haapiiraa no Gileada (a) i na mua ’‘e e (b) mai 2011 mai?

16 Ua horoa atoa te faanahonahoraa a te Atua i te faaineineraa na roto i te Haapiiraa no Gileada. Te fa o te reira, no te tauturu ïa i te mau piahi ia haapuai i to ratou hinaaro ia poro i te parau apî oaoa. Ua haamata te Haapiiraa no Gileada i 1943 e mai reira mai, ua faaineinehia 8 500 piahi e ua tonohia ratou i roto 170 fenua. Mai 2011 mai â, ua titau-manihini-hia te mau pionie taa ê, te mau tiaau ratere, te mau melo o te Betela aore ra te mau mitionare aita i haere atura i Gileada i teie haapiiraa.

17. Ua manuïa anei te faaineineraa o te Haapiiraa no Gileada?

17 Ua manuïa anei te Haapiiraa no Gileada? E. A feruri na i tei tupu i te fenua Tapone. I Atete 1949, tei raro a‘e mai ahuru taata poro i ǒ nei. I te hopea râ o tera matahiti, ua haere mai 13 mitionare no te poro e te mau taeae e tuahine no ǒ nei. I teie mahana, e 216 000 tiahapa taata poro i te fenua Tapone, e e fatata te afaraa o ratou e pionie ana‘e!

18. Eaha ’tu â haapiiraa ta tatou e fana‘o ra?

18 E rave rahi atu â haapiiraa, mai te Haapiiraa no te taviniraa Kerisetiano, te Haapiiraa no te mau pionie, te Haapiiraa no te feia poro i te parau apî oaoa o te Basileia, te Haapiiraa no te mau tiaau haaati e ta ratou vahine e te Haapiiraa no te mau melo o te Tomite amaa e ta ratou vahine. Ua faaineine maite teie mau haapiiraa i te mau taeae e tuahine e ua haapuai te reira i to ratou faaroo. Mea papu e te tamau ra Iesu i te faaineine e rave rahi tavini.

19. Eaha ta te taeae Russell i parau no nia i te pororaa, e nafea te reira e tupu ai?

19 Ua hau atu te 100 matahiti i to te Basileia o te Atua faatereraa. I te roaraa o tera mau matahiti, ua aratai to tatou Arii ra o Iesu Mesia i te ohipa pororaa. Ia ho‘i mai tatou i te matahiti 1916, ua mana‘o taeae Russell e e haapararehia te parau apî oaoa na te ao atoa nei. Ua parau oia: “Ua maraa oioi te ohipa, e te tamau noa ra i te maraa, no te mea te vai ra te hoê ohipa e ravehia na te ao nei no te poro i te ‘evanelia o te basileia.’” (La foi en marche, Alexander Macmillan, api 69 [Beretane]) Te ravehia ra tera ohipa i teie mahana! Te haamauruuru nei tatou ia Iehova, te Atua o te hau, o tei horoa mai i te mau mea atoa ta tatou e hinaaro mau ra no te rave i to ’na hinaaro!

^ par. 2 E au ra e o te rahiraa taata o teie pǔpǔ tei riro mai ei Kerisetiano. No te aha e nehenehe ai e haapapu i te reira? No te mea ua pii Paulo ia ratou ‘na pae hanere taeae.’ Ua na ô oia e ‘te ora noa nei â te rahiraa o ratou, ua pohe râ te tahi pae.’ No reira, e au ra e ua ite Paulo e te tahi atu mau Kerisetiano e rave rahi o teie feia i faaroo roa ’tu ia Iesu i te hororaa i te faaueraa ia poro.