Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATOPA 2015

Te ite ra anei outou i te rima o te Atua i roto i to outou oraraa

Te ite ra anei outou i te rima o te Atua i roto i to outou oraraa

“E itea te rima o Iehova i to ’na ra mau tavini.”—ISA. 66:14.

HIMENE: 65, 26

1, 2. Eaha te mana‘o to te tahi mau taata no nia i te Atua?

E RAVE rahi taata e tiaturi ra e aita te Atua e tâu‘a i ta ratou e rave ra. Ua mana‘o ratou e aita roa ’tu te Atua e tâu‘a i ta ratou e faaruru ra. Ei hi‘oraa, i muri iho i te hoê vero u‘ana o tei haamou i te hoê tuhaa rahi i Philipino i Novema 2013, ua parau te hoê tavana o te hoê oire rahi: “Tei te tahi atu vahi paha o te Atua.”

2 No te tahi atu, ua mana‘o ratou e aita roa ’tu te Atua e nehenehe e ite i ta ratou e rave ra. (Isa. 26:10, 11; Ioa. 3, 11) Hoê â mana‘o to te tahi mau taata i te tau o te aposetolo Paulo. Ua na ô oia no ratou: ‘Aita ratou i hinaaro i te tapea i te Atua ma te ite atu.’ E ohipa parau-tia ore ana‘e ta ratou e te ino e te nounou.—Roma 1:28, 29.

3. (a) Eaha te mau uiraa e titauhia ia tatou ia ui? (b) I roto i te Bibilia, ua faahiti-pinepine-hia i te “rima” o te Atua no te faataa i te aha?

3 E no tatou ïa? Ua taa ia tatou e te ite ra Iehova i te mau ohipa atoa ta tatou e rave ra. Teie râ, te tiaturi ra anei tatou e te tâu‘a mai ra Iehova? Te ite ra anei tatou i to ’na rima i roto i to  tatou oraraa? I roto i te Bibilia, ua faahiti-pinepine-hia te “rima” o te Atua no te faataa i ta ’na huru faaohiparaa i to ’na puai. Te faaohipa ra oia i to ’na puai no te tauturu i ta ’na mau tavini e no te upootia i nia i to ’na mau enemi. (A taio i te Deuteronomi 26:8.) Ua parau Iesu e ‘e ite te tahi mau taata i te Atua.’ (Mat. 5:8) Tei rotopu anei tatou i teie feia? E nafea tatou ‘e ite ai i te Atua’? E hi‘opoa ana‘e i te tahi mau hi‘oraa Bibilia no nia i te feia tei ite i te rima o te Atua i roto i to ratou oraraa, e te feia tei ore i ite i te reira. E hi‘opoa atoa ana‘e e nafea te faaroo e nehenehe ai e tauturu ia tatou ia ite i te rima o te Atua.

UA PATOI RATOU I TE ITE I TE RIMA O TE ATUA

4. No te aha te mau enemi o Iseraela i patoi ai i te ite i te rima o te Atua?

4 I na mua ’‘e, i nehenehe na e rave rahi e ite e e faaroo mea nafea te Atua i te tautururaa ia Iseraela. Ua faaohipa Iehova i te mau semeio no te faaora i to ’na nunaa mai Aiphiti mai e no te aro e rave rahi arii i te Fenua tǎpǔhia. (Ios. 9:3, 9, 10) Noa ’tu e ua faaroo e ua ite te tahi atu mau arii mea nafea Iehova i te faaoraraa i to ’na nunaa, “ua amui atoa a‘era ratou atoa e aro ia Iosua e Iseraela atoa, i te amuiraa hoê.” (Ios. 9:1, 2) I to ratou aroraa ia Iseraela, ua nehenehe taua mau arii ra e ite i te rima o te Atua. Ei faahopearaa o te puai rahi o Iehova, “ua faaea noa ihora te mahana, vai noa ihora hoi te marama, e oti noa a‘era ratou tahooraa ’tu i to ratou mau enemi.” (Ios. 10:13) Ua vaiiho râ Iehova “ia mârô” te aau o te mau enemi o Iseraela, ia nehenehe ratou e aro ia Iseraela. (Ios. 11:20) Ua pau to Iseraela mau enemi no te mea ua patoi ratou i te fa‘i e ua aro Iehova no to ’na nunaa.

E mea tia ia imi tatou i te rima o te Atua i roto i to tatou oraraa

5. Ua patoi te arii ino ra o Ahaba i te tiaturi i te aha?

5 I muri a‘e, ua nehenehe te arii Ahaba e ite i te rima o te Atua e rave rahi taime. Ua parau atu Elia: “E ore e mairi te hupe e te ua . . . maori ra mai te au i te mau parau a ta ’u vaha.” (Arii 1, 17:1) Maoti noa te rima o te Atua i nehenehe ai te reira e tupu, aita râ Ahaba i tiaturi atu. I muri iho, ua pure Elia ia Iehova e ua pahono atu te Atua ia ’na ma te faatopa atu i te auahi mai te ra‘i mai. Ua ite Ahaba i te reira. No reira Elia i parau ai ia Ahaba e e faaore Iehova i te pa‘urâ e e haamairi atoa mai i te ûa puai. (Arii 1, 18:22-45) Ua ite hoi Ahaba i taua mau semeio ra. Noa ’tura, ua patoi oia i te tiaturi i te ite i to Iehova puai. Eaha ta tatou e haapii mai i teie mau hi‘oraa? E mea tia ia imi tatou i te rima o te Atua i roto i to tatou oraraa.

UA ITE RATOU I TE RIMA O IEHOVA

6, 7. Eaha ta to Gibeona e ta Rahaba i farii?

6 Mea taa ê roa te feia no Gibeona i te mau nunaa e haaati ra ia ratou. Ua ite ratou i te rima o te Atua. Aita to Gibeona i hinaaro e aro i to Iseraela, ua hinaaro râ ratou e imi i te hau. No te aha? Ua parau ratou e ua faaroo ratou no nia ia Iehova e te mau ohipa atoa ta ’na i rave. (Ios. 9:3, 9, 10) E haerea paari to ratou ia farii e ua aro Iehova no Iseraela.

 7 Ua ite atoa Rahaba i te rima o Iehova. E ere oia i te hoê Iseraela, ua faaroo râ oia e mea nafea Iehova i te faaoraraa i to ’na nunaa mai Aiphiti mai. A farerei ai na manu Iseraela e piti ia ’na, ua na ô oia ia raua: “Ua ite au e, ua horoahia e Iehova te fenua na outou.” Ua tiaturi Rahaba e e nehenehe Iehova e faaora mai ia ’na e to ’na utuafare. Ua faaite ïa oia i to ’na faaroo ia Iehova noa ’tu e ua ite oia e e mea atâta te reira no ’na.—Ios. 2:9-13; 4:23, 24.

8. Mea nafea te tahi mau Iseraela i farii ai i te rima o te Atua?

8 Taa ê atu râ i te arii ino ra o Ahaba, ua taa i te tahi mau Iseraela o tei ite i te auahi i te toparaa mai mai te ra‘i mai, ei pahonoraa i te pure a Elia, e no ǒ mai te reira ia Iehova ra. Ua tuô ratou: “O Iehova, oia te Atua.” (Arii 1, 18:39) Mea papu e ua ite ratou i te puai o te Atua.

9. E nafea tatou e ite ai i te rima o Iehova i teie mahana?

9 Ua hi‘opoa mai tatou te mau hi‘oraa maitai e te mau hi‘oraa ino o tei tauturu ia tatou ia taa eaha te auraa ia ‘ite i te Atua,’ aore ra ia ite i te rima o te Atua. Ia noaa ia tatou te ite no nia ia Iehova e i to ’na mau huru maitatai, e ite ïa tatou i to ’na rima e ‘te mata o to tatou aau.’ (Eph. 1:18) E turai te reira ia tatou ia hinaaro e pee i te mau taata taiva ore i na mua ’‘e e i teie mahana atoa. Ua ite ratou mea nafea Iehova i tauturu ai i to ’na nunaa. Teie râ, te vai ra anei te haapapuraa e te tauturu ra Iehova i te taata i teie mahana?

 TE HAAPAPURAA I TE RIMA O TE ATUA I TEIE MAHANA

10. Eaha te haapapu mai e te tauturu ra Iehova i te taata i teie mahana? (A hi‘o i te hoho‘a matamua.)

10 Te tamau ra Iehova i te tauturu i to ’na nunaa i teie mahana e te vai ra e rave rahi haapapuraa no nia i te reira. E pinepine tatou i te faaroo e ua pure te tahi mau taata i te Atua no te tauturu ia ratou e ua pahonohia te reira. (Sal. 53:2) Ei hi‘oraa, a poro ai Allan i te hoê motu iti i Philipino, ua farerei oia i te hoê vahine o tei haamata i te ta‘i. Te na ô ra oia, “I taua poipoi ra, ua pure oia ia Iehova ia nehenehe te mau Ite no Iehova e farerei ia ’na.” I to ’na apîraa, ua haapii taua vahine ra e te mau Ite no Iehova. Tera râ, a faaipoipo ai e a haere ai oia e ora i teie motu iti, ua faaea oia i ta ’na haapiiraa. No te mea ua pahono oioi mai te Atua i ta ’na pure i putapû ai to ’na aau. I roto noa hoê matahiti, ua pûpû oia i to ’na ora ia Iehova.

Te imi ra anei outou i te mau ravea no te ite i te rima o Iehova i roto i to outou oraraa? (A hi‘o i te paratarafa 11-13)

11, 12. (a) E nafea Iehova e tauturu ai i ta ’na mau tavini? (b) A faataa mea nafea Iehova i tauturu ai i te hoê tuahine.

11 E rave rahi nunaa o te Atua tei ite i ta Iehova rima tauturu a faaea ’i ratou i te mau peu ino mai te puhipuhiraa i te avaava, te raveraa i te mau raau taero puai aore ra i te mataitairaa i te mau hoho‘a faufau. No vetahi, ua tamata ratou i te faaea i te reira ma to ratou iho puai, aita râ i manuïa. I to ratou râ aniraa i ta Iehova tauturu, ua horoa ’tu oia i “te mana rahi maitai” ia ratou, e ua manuïa iho â ia ratou i te faaea i ta ratou mau peu ino.—Kor. 2, 4:7; Sal. 37:23, 24.

Te tauturu ra Iehova i ta ’na mau tavini ia faaruru i to ratou mau fifi

12 Te tauturu atoa ra Iehova i ta ’na mau tavini ia faaruru i to ratou mau fifi. Tera atoa ta Amy i ite. Ua tonohia o ’na no te tauturu i te paturaa o te hoê Piha a te Basileia e te hoê fare mitionare i te hoê motu iti i te moana Patitifa. E ta‘ere taa ê i ǒ, e i te rahiraa o te taime aita e uira aore ra aita e pape, e ua î te purumu i te pape. Hau atu â, ua mihi oia i to ’na utuafare e ua ora oia i roto i te hoê piha hotera nainai. I te hoê mahana, ua tama‘i Amy i te hoê tuahine o tei ohipa e o ’na. Ua peapea roa o ’na i ta ’na i rave. Ua pure oia ia Iehova no te tauturu ia ’na a ho‘i ai oia i roto i to ’na piha poiri. I muri iho, a ama faahou ai te mori, ua taio oia i te hoê tumu parau i roto i Te Pare Tiairaa no nia i te tufaraa parau tuite no Gileada. Ua faataa teie tumu parau i te hoê â mau fifi ta Amy e faaruru ra. Te na ô ra oia: “No ’u, mai te mea ra e te paraparau maira Iehova ia ’u i taua po ra. Ua turai te reira ia ’u ia rave atu â i ta ’u hopoia.”—Sal. 44:25, 26; Isa. 41:10, 13.

13. Eaha te haapapuraa e ua tauturu Iehova i to ’na nunaa ia paruru i to ratou tiaraa no te poro?

13 Ua tauturu atoa Iehova i to ’na nunaa ia paturu i te parau apî oaoa i mua i te ture. (Phil. 1:7) Ei hi‘oraa, i te tamataraa te tahi mau hau faatere i te tapea i te ohipa pororaa, ua paruru tatou ia tatou iho i te tiripuna. Ua manuïa tatou e 268 haavaraa na te ao nei i te tiripuna teitei, tei roto e 24 haavaraa ta tatou i manuïa i te Tiripuna Europa o te tiaraa o te taata mai 2000 mai â. Mea papu, aita hoê a‘e taata e nehenehe e tapea i te rima o te Atua!—Isa. 54:17; a taio i te Isaia 59:1.

14. Eaha te tahi atu haapapuraa e vai ra e tei to ’na nunaa te Atua?

 14 Te tahi atu haapapuraa i te rima tauturu a te Atua, o te pororaa ïa i te parau apî oaoa na te ao nei. (Mat. 24:14; Ohi. 1:8) E nehenehe te auhoêraa e vai i rotopu i te mau tavini a Iehova no te mau nunaa atoa, maoti noa te tauturu a Iehova. Mea taa ê roa teie auhoêraa! Te fa‘i atoa ra te feia o te ore e tavini ra ia Iehova: ‘Tei rotopu mau â te Atua ia outou.’ (Kor. 1, 14:25) E rave rahi haapapuraa o te faaite ra e tei to ’na nunaa te Atua. (A taio i te Isaia 66:14.) E no outou iho? Te ite ra anei outou i te rima o Iehova i roto i to outou oraraa?

TE ITE RA ANEI OUTOU I TE RIMA O IEHOVA I ROTO I TO OUTOU ORARAA?

15. I te tahi mau taime, no te aha tatou e ore ai e ite i te rima o te Atua i roto i to tatou oraraa?

15 I te tahi mau taime, aita paha tatou e ite i te rima o te Atua i roto i to tatou oraraa. No te aha? I mua i te mau fifi, e moe paha ia tatou e ua tauturu a‘ena Iehova ia tatou e rave rahi taime. Tera ïa tei tupu no Elia. E taata itoito oia. A hinaaro ai râ te arii vahine Iezebela e haapohe ia Elia, ua riaria roa o ’na. No te hoê taime poto, ua moe ia ’na mea nafea Iehova i te tautururaa ia ’na na mua ’tu. Te parau ra te Bibilia e ua hinaaro Elia e pohe. (Arii 1, 19:1-4) Ihea o ’na e ite ai i te tauturu e te itoito? Mea titauhia ia ’na ia imi ia Iehova.—Arii 1, 19:14-18.

16. E nafea tatou e ite ai i te rima o te Atua ia faaruru tatou i te mau fifi?

16 No to ’na haapeapea i to ’na mau fifi, aita Ioba i ite i to ’na tupuraa mai ta Iehova i ite. (Ioba 42:3-6) I te tahi mau taime, mea fifi atoa paha no tatou ia ite i te rima o te Atua no to tatou mau fifi. Eaha te tauturu mai ia tatou ia ite i ta te Atua e rave ra no tatou? E mea tia ia feruri maite i ta te Bibilia e parau ra no nia i to tatou mau fifi. E riro  atu â ïa Iehova ei mea mau no tatou e e nehenehe atoa tatou e parau atu: “Ite a‘enei au ia oe i te ite tari‘a nei, teie nei râ, te hi‘o nei tau mata ia oe.”

Te faaohipa ra anei Iehova ia outou no te tauturu ia vetahi ê ia ite no nia ia ’na? (A hi‘o i te paratarafa 17-18)

17, 18. (a) E nafea tatou e ite ai i te rima o Iehova i roto i to tatou oraraa? (b) A faataa na i te hoê tupuraa o te faaite ra e te tauturu mai ra te Atua ia tatou i teie mahana.

17 E nafea outou e ite ai i te rima o Iehova i roto i to outou oraraa? E hi‘opoa ana‘e i na hi‘oraa e pae. A tahi, te mana‘o ra paha outou e ua tauturu Iehova ia outou ia imi i te parau mau. Te piti, te haamana‘o ra paha outou i te haereraa i te hoê putuputuraa Kerisetiano a faaroo ai outou i te hoê oreroraa parau e a na ô atu ai: “Tera iho â ta ’u i hinaaro noa ra!” Te toru, ua ite paha outou mea nafea Iehova i te pahonoraa i te hoê o ta outou mau pure. Te maha, ua hinaaro paha outou e tavini atu â ia Iehova e ua ite outou mea nafea oia i te tautururaa ia naea ia outou taua fa ra. Te pae, ua faarue paha outou i ta outou ohipa no te mea aita paha i nehenehe ia outou e faataa rahi i te taime no te tavini ia Iehova no ta outou ohipa. No reira ïa outou i ite ai i te tupuraa i te parau fafau a te Atua: “E ore roa vau e faarue ia oe, e ore, e ore roa ’tu.” (Heb. 13:5) Ia piri atu â tatou ia Iehova, e ite maitai ïa tatou i ta ’na rima i roto i to tatou oraraa.

18 Te na ô ra Sarah, te hoê tuahine no Kenya: “Ua pure au no te hoê piahi e i to ’u mana‘o, aita oia i anaanatae i ta ’na haapiiraa Bibilia. Ua ani au ia Iehova e faaea anei au i ta ’na haapiiraa. I muri iho i to ’u parauraa ’tu ‘Amene,’ ta‘i mai nei te niuniu. Ua taniuniu mai te piahi e e nehenehe anei ta ’na e haere i te putuputuraa na muri ia ’u! Ua oaoa roa vau!” Ia imi tatou i te mau ohipa ta te Atua e rave ra no tatou, e ite iho â tatou i ta ’na rima tauturu. Te faaite ra Rhonna, te hoê tuahine e ora ra i Asia, e titauhia i te taime no te ite e nafea Iehova e tauturu ai ia tatou i roto i to tatou oraraa. Te parau faahou ra oia: “I muri a‘e i to oe na reiraraa, auê ïa faahiahia i te ite i to ’na haapao maitai no tatou!”

19. Eaha ’tu â te mea titauhia ia tatou ia rave no te ite i te rima o te Atua?

19 Ua parau Iesu e no te feia o te ‘ite i te Atua,’ ia mâ to ratou aau. (Mat. 5:8) Eaha ïa te auraa? E mea tia ia vai mâ to tatou mana‘o e ia faaea i te rave i te ino. (A taio i te Korinetia 2, 4:2.) I roto i teie tumu parau, ua hi‘opoa mai tatou, no te ite i te rima o te Atua, e mea tia ia tamau i te haapuai i to tatou taairaa e o ’Na. I to muri nei tumu parau, e hi‘opoa mai tatou mea nafea te faaroo i te tautururaa ia tatou ia ite papu i te rima o Iehova i roto i to tatou oraraa.