Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) ATOPA 2015

E mea maitai no ’u ia haafatata ’tu i te Atua

E mea maitai no ’u ia haafatata ’tu i te Atua

E IVA matahiti to ’u a ite ai au e ua faaea to ’u tupuraa. I teie mahana e 43 matahiti to ’u, hoê metera noa to ’u roa. I te iteraa to ’u na metua e eita roa ’tu vau e roroa mai, ua faaitoito raua ia ’u ia haa rahi ia ore au e mana‘ona‘o noa i nia i to ’u roa. No reira, no te tamau i te rave i te ohipa, ua faanaho vau i te hoê fare hooraa maa hotu i mua i to matou fare. Ua tamau vau ia vai ma noa teie vahi. Ua anaanatae ïa te taata e haere mai i reira.

Tera râ, noa ’tu mea rahi ta ’u ohipa, aita te reira i taui. Mea poto noa iho â vau, e mea tia ia ’u ia faaruru i te mau mea matauhia o te oraraa mai te teitei o te mau vahi aufauraa. E au ra e i hamanihia na te mau mea atoa no te taata mea roa a‘e ia ’u. Ua mauiui roa vau. Ua taui râ te reira i te 14raa o to ’u matahiti.

I te hoê mahana, ua hoo e piti vahine Ite no Iehova i te tahi mau maa hotu e i muri iho ua pǔpǔ mai raua ia ’u i te hoê haapiiraa Bibilia. Ua taa ia ’u e mea faufaa a‘e ia ite o vai Iehova e i ta ’na opuaraa i to ’u roa. Ua tauturu rahi te reira ia ’u. Ua riro te Salamo 73:28 ei irava au-roa-hia e au. Te parau ra te tuhaa matamua o teie irava: “E mea maitai . . . ia ’u ia haafatata ’tu i te Atua.”

Ua faarue oioi to matou utuafare i Côte d’Ivoire no te ora i Burkina Faso e ua taui roa to ’u oraraa. I to matou vahi faaearaa matamua, ua matau te taata i te ite ia ’u i pihai iho i te vahi hooraa maa hotu. I teie râ vahi faaearaa apî to matou, e taata ěê vau e no te feia atoa no ǒ, mea huru ê roa no ’u. Te hi‘o noa ra te taata ia ’u, no reira vau i faaea noa ’i i roto i te fare e rave rahi hebedoma. Ua haamana‘o vau i te maitai rahi ta ’u i ite a haafatata ’tu ai au ia Iehova. Ua papai ïa vau i te amaa a te mau Ite no Iehova e ua tonohia mai te hoê taata au mau. Ua haere mai Nani, te hoê mitionare, e farerei ia ’u na nia i te hoê pereoo e piti huira.

Mea heehee roa te purumu one i to matou vahi faaearaa. E i te tau ûa, mea vari roa. Ua topa Nani e rave rahi taime mai to ’na pereoo e piti huira a haere mai ai oia e faatere i ta ’u haapiiraa. Aita râ oia i taora i te tauera. I te hoê mahana, ua ani mai e e haere mai oia e tii ia ’u no te haere i te mau putuputuraa. Taa ’tura ia ’u e mea titauhia ia faarue te fare no te faaruru i te mata taata. Hau atu â, e teiaha ’tu â  to ’na pereoo e piti huira ia parahi au i muri, mea fifi a‘ena hoi ia faahoro i te reira. Noa ’tu ua farii au, te haamana‘o ra vau i te piti o te tuhaa o te irava au-roa-hia e au: “Ua tiaturi au i te Fatu ra ia Iehova.”

I te tahi taime, ua topa mâua Nani i roto i te vari. No to mâua râ anaanatae i te mau putuputuraa, aita mâua i tâu‘a i te reira. Mea taa ê iho â te mata ataata here mau i roto i te Piha a te Basileia e te mata o te taata ia haere au i rapae! E iva ava‘e i muri iho, ua bapetizohia vau.

Te parau ra te toru o te tuhaa o te irava o ta ’u i au roa, “ia faaite â vau i ta oe atoa ra mau ohipa.” Ua ite au e o te taviniraa te tautooraa rahi roa ’‘e no ’u. Ua haamana‘o noa vau i te taime matamua i haere ai au e poro i tera e tera fare. E hi‘o noa mai te mau tamarii e te feia paari ia ’u, e pee mai ratou na muri ia ’u a faaooo noa ’tu ai i ta ’u huru haere. Ua mauiui roa vau. I to ’u râ haamana‘oraa e te hinaaro mau ra ratou i te paradaiso mai ia ’u, ua nehenehe au e faaoromai.

No te faaohie a‘e i te mau ohipa, ua noaa mai to ’u pereoo taataahi e toru huira. E turai to ’u hoa pororaa ia ’u mai te hoê vahi teitei e ia oti e e ou‘a oia i nia i te pereoo taataahi a hee atu ai mâua i raro. Noa ’tu e mea fifi te pororaa no ’u na mua ’‘e, ua oaoa roa râ vau i muri iho. No reira i 1998, ua faaoti au e riro ei pionie tamau.

Ua faatere au e rave rahi haapiiraa Bibilia e ua bapetizohia na feia haapii e maha. Hau atu â, ua farii atoa hoê o to ’u mau tuahine i te parau mau! Ia faaroo vau mea nafea te tahi mau piahi i te haereraa i mua, ua faaitoito te reira ia ’u i te taime tano. I te hoê mahana, a mauiui noa ’i au i te ma‘i malaria, ua tae mai te hoê rata na Côte d’Ivoire mai. Ua haamata vau hoê haapiiraa Bibilia e te hoê taurearea piahi no te haapiiraa teitei i Burkina Faso o ta ’u i horoa na te hoê taeae. Tau taime i muri a‘e, ua haere teie piahi e ora i Côte d’Ivoire. Ua oaoa roa vau i to ’u faarooraa e ua riro oia ei taata poro bapetizo-ore-hia!

E nafea vau e aupuru ai ia ’u iho? Ua farii te hoê faanahonahoraa no te feia huma ia haapii ia ’u i te nira. Ua tapao te hoê taata haapii i ta ’u huru rave i te ohipa e ua parau mai “E haapii paha matou ia oe e nafea ia hamani i te pu‘a.” E ua na reira ratou. I teie nei, e pu‘a ïa vau i te ahu e e hamani atoa vau i te pu‘a i te fare. Mea au na te taata i ta ’u pu‘a e ua parau atu ia vetahi ê ia hoo atoa i te reira. Na ’u iho e afai roa ’tu i te reira na nia i te hoê pereoo e toru huira.

Teie râ hoi, i 2004, ua faaea vau i te taviniraa pionie tamau no te mauiui rahi o to ’u tua. Te tamau râ ra vau i te haere i te pororaa.

No te feia, e taata ataata roa vau. E rave rahi tumu e oaoa ai au no te mea mea maitai no ’u ia haafatata ’tu i te Atua.—Faatiaraa a Sarah Maiga.