Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TETEPA 2015

E nafea tatou e ite ai e te here ra Iehova ia tatou?

E nafea tatou e ite ai e te here ra Iehova ia tatou?

“A hi‘o na i te huru o to te Metua [here] ia tatou nei.”—IOA. 1, 3:1.

HIMENE: 91, 13

1. Ua faaitoito te aposetolo Ioane ia tatou ia aha, e no te aha?

TE FAAITOITO mai ra te aposetolo Ioane ia feruri maite i to Iehova here rahi no tatou. Te taio ra tatou i roto te Ioane 1, 3:1: “A hi‘o na i te huru o to te Metua [here] ia tatou nei.” Ia feruri maite tatou i to Iehova here rahi no tatou e mea nafea oia i te faaiteraa mai i te reira, e piri atu â e e here atu â ïa tatou ia ’na.

2. No te aha mea fifi ai no vetahi ia taa e te here ra Iehova ia ratou?

2 Teie râ hoi, mea fifi no vetahi ia taa e te here ra te Atua ia ratou. Te mana‘o ra ratou e aita te Atua e tâu‘a ra i te taata. No ratou, te faatere noa ra aore ra te a‘o noa ra te Atua i te feia i faaroo ore ia ’na. No te mau haapiiraa hape, te mana‘o atoa ra vetahi e e mea ino te Atua e eita roa ’tu e nehenehe e here ia ’na. No vetahi ê, te tiaturi nei ratou e te here ra te Atua i te taata atoa noa ’tu ta ratou mau haaraa. Maoti râ te haapiiraa o te Bibilia e nehenehe ai outou e ite i te parau mau no nia ia Iehova. Ua ite outou e o te here te huru maitatai rahi roa ’‘e  a Iehova e no reira oia i horoa ’i i ta ’na Tamaiti ei taraehara no outou. (Ioa. 3:16; Ioa. 1, 4:8) Teie râ, no te tupuraa e rave rau ta outou i faaruru i roto i te oraraa, e mea fifi paha no outou ia taa e te here ra Iehova ia outou.

3. Eaha te tauturu mai ia taa i to Iehova here no tatou?

3 No te tauturu ia tatou ia taa i to Iehova here no tatou, e titauhia ia taa na mua roa e o Iehova tei poiete ia tatou. Na ’na i horoa mai i te ora no tatou. (A taio i te Salamo 100:3-5.) No reira te Bibilia e pii ai i te taata matamua te ‘tamaiti na te Atua.’ (Luka 3:38) E ua haapii mai Iesu ia pii tatou ia Iehova ‘to matou Metua i te ra‘i.’ (Mat. 6:9) O Iehova to tatou Metua, e te here ra oia ia tatou mai te hoê metua tane maitai e here ra i ta ’na mau tamarii.

4. (a) Eaha te huru Metua o Iehova i nia ia tatou? (b) Eaha ta tatou e hi‘opoa mai i roto i teie tumu parau e i to muri nei?

4 Mea fifi no vetahi ia mana‘o i te hoê metua tane ei taata î i te here. Peneia‘e, te mana‘o ra ratou mai te reira no te tahi mau haamana‘oraa mauiui mau a hamani-ino-hia ’i ratou i to ratou tamariiriiraa na to ratou metua tane. Eita roa ’tu Iehova e na reira i nia i ta ’na mau tamarii. O ’na te Metua maitai roa ’‘e. (Sal. 27:10) Mea here roa na ’na ia tatou e te aupuru ra oia ia tatou na roto e rave rahi ravea. Hau atu â tatou i te ite e te herehia ra tatou e Iehova, hau atu â ïa tatou i te here ia ’na. (Iak. 4:8) I roto i teie tumu parau, e hi‘opoa ana‘e e maha tumu o te faaite ra i to Iehova here no tatou. E i to muri nei tumu parau, e hi‘opoa mai tatou e maha ravea no te faaite i to tatou here no Iehova.

E ATUA Î I TE HERE E TE HOROA NOA O IEHOVA

5. Eaha ta te Atua e horoa na te mau taata atoa?

5 I to Paulo haereraa i Ateno, i Heleni, ua ite oia e rave rahi idolo e ua tiaturi te taata e na ta ratou mau atua i horoa mai i te ora no ratou. Ua paraparau ïa oia ia ratou no nia i ‘te Atua tei hamani i te ao e te mau mea atoa i roto.’ Ua parau mai oia e o te Atua “tei horoa mai i te ora, e te aho, e te mau mea atoa” e maoti ‘o ’na e ora ’i, e hahaere ai e e vai mai ai tatou.’ (Ohi. 17:24, 25, 28) Te horoa ra Iehova i te mau mea atoa na tatou ia nehenehe tatou e ora e e oaoa i te oraraa. A feruri na i te tahi mau mea ta ’na i horoa mai maoti to ’na here no tatou.

6. Eaha te huru o te vahi ta Iehova i horoa mai? (A hi‘o i te hoho‘a matamua.)

6 Ei hi‘oraa, ua faanaho Iehova i te hoê vahi nehenehe mau no tatou. (Sal. 115:15, 16) Ua poiete oia i te mau paraneta atoa, e o te fenua iho â te mea taa ê mau. Ua hi‘opoa te mau aivanaa i te reva teitei e ua ite ratou i te paraneta e rave rahi, aita râ te taata e nehenehe e ora ’tu. Aita noa Iehova i horoa na tatou i te mau mea atoa no te ora noa, ua poiete atoa râ oia i te fenua nehenehe mau e te au mau e te papu no tatou ia oaoa i te oraraa. (Isa. 45:18) Ia feruri maite tatou i te vahi ta to tatou Metua ra o Iehova i horoa mai, e ite ïa tatou e te here ra Iehova ia tatou.—A taio i te Ioba 38:4, 7; Salamo 8:3-5.

7. E nafea te huru o ta Iehova poieteraa ia tatou e faaite ai e te here mau ra oia ia tatou?

7 Te vai atoa ra te tahi atu tumu i here ai Iehova ia tatou, i to ’na ïa poieteraa ia tatou e ma te horoa mai i te aravihi ia pee tatou i to ’na hi‘oraa. (Gen. 1:27) Oia hoi, e  nehenehe tatou e ite i to ’na here no tatou e e faaite i to tatou here no ’na. Ua ite o ’na e tera te tumu o to tatou oaoa mau. Hoê â no te mau tamarii, e rahi atu â to ratou oaoa a ite ai e te here ra to ratou metua ia ratou. A haamana‘o, ua haapii mai Iesu e e oaoa iho â tatou ia haafatata ’tu i to tatou Metua ra o Iehova. (Luka 11:28) Ua horoa mai oia i te mau mea atoa e oaoa ’i tatou. Mea papu, e Atua horoa noa oia e te here ra oia ia tatou.—Tim. 1, 6:17; Sal. 145:16.

TE HAAPII MAI RA IEHOVA IA TATOU I TE PARAU MAU

8. No te aha tatou e hinaaro ai ia haapii Iehova ia tatou?

8 Ua here te mau metua tane i ta ratou mau tamarii e aita ratou e hinaaro ia haavarehia aore ra ia taivahia ratou. E rave rahi râ metua e ore e farii i te mau ture aveia Bibilia no nia i te maitai e te ino. No reira eita e noaa ia ratou ia aratai i ta ratou mau tamarii ma te tano. E peapea e e huanane ïa  te faahopearaa. (Mas. 14:12) Teie râ, te horoa ra Iehova i te aratairaa maitai roa ’‘e i ta ’na mau tamarii no te mea o ’na “te Atua parau mau.” (Sal. 31:5) Te oaoa ra o ’na i te haapii ia tatou i te parau mau no nia ia ’na. E te haapii atoa mai ra oia ia tatou e nafea e haamori ai ia ’na. E te faaite ra Iehova ia tatou i te haerea maitai roa ’‘e no te ora. (A taio i te Salamo 43:3.) Eaha ta Iehova i haapii mai e e nafea te reira e faaite mai e te here ra Iehova ia tatou?

E pee te mau metua tane i te hi‘oraa o Iehova ma te haapii atu i te parau mau i ta ratou mau tamarii e ma te tauturu ia ratou ia noaa i te hoê taairaa e to ratou Metua i te ra‘i (A hi‘o i te mau paratarafa 8-10)

9, 10. (a) No te aha Iehova e faaite ai ia tatou no nia ia ’na iho? (b) Eaha ta ’na e haapii mai no nia i ta ’na opuaraa no tatou?

9 Na mua roa, te faaite mai ra Iehova no nia ia ’na iho. Te hinaaro ra oia ia matau tatou ia ’na. (Iak. 4:8) No reira oia i faaite ai ia tatou i te auraa o to ’na i‘oa. Mea rahi atu â te faahitiraa o to ’na i‘oa i roto i te Bibilia i te tahi atu i‘oa. Oia atoa, te faaite mai ra Iehova i to ’na huru. Ia mataitai tatou i te mau mea atoa ta ’na i poiete, e ite ïa tatou e e Atua puai o ’na e te î i te paari. (Roma 1:20) E a taio ai i te Bibilia, e ite tatou e e Atua parau-tia o ’na e te here ra oia ia tatou. A haapii ai i te huru faahiahia mau o Iehova, e piri atu â ïa tatou ia ’na.

A haapii ai tatou i te huru faahiahia mau o Iehova, e piri atu â ïa tatou ia ’na

10 Te haapii atoa mai ra Iehova eaha ta ’na opuaraa. Te faaite ra Iehova e tei roto tatou i to ’na utuafare. Te faataa ra oia eaha ta ’na e titau mai ra ia nehenehe tatou e ohipa amui ma te hau e to ’na utuafare atoa. Te haapapu ra te Bibilia e aita te Atua i hamani ia tatou e te tiaraa ia faaoti eaha te mea maitai e te mea ino no tatou iho. (Ier. 10:23) Ua ite Iehova eaha te mea maitai roa ’‘e no tatou. Ma te farii i to ’na tiaraa mana e ma te faaroo ia ’na, e ite ïa tatou i te hoê oraraa hau e te oaoa. Ua haapii mai Iehova i teie parau mau faufaa no te mea te here ra oia ia tatou.

11. Eaha ta to tatou Metua î i te here i fafau mai no nia i te a muri a‘e?

11 Te haapeapea ra iho â te hoê metua tane î i te here i te a muri a‘e o ta ’na mau tamarii. Te hinaaro ra oia ia ite ratou i te hoê oraraa oaoa. Tera noa râ, te haapeapea ra e rave rahi taata i teie mahana no nia i te a muri a‘e, e te ohipa rahi noa ra ratou ia noaa i te mau mea e ore hoi e vai maoro. (Sal. 90:10) Auê ïa tatou i te mauruuru i to tatou Metua ra o Iehova, o te haapii ra ia tatou e nafea e fana‘o i te hoê oraraa oaoa i teie nei â, e o te fafau atoa ra i te hoê a muri a‘e faahiahia mau!

TE ARATAI E TE A‘O RA IEHOVA I TA ’NA MAU TAMARII

12. Mea nafea Iehova i tamata ’i i te tauturu ia Kaina e ia Baruka?

12 I to Iehova iteraa e ua opua Kaina i te rave i te hoê ohipa ino mau, ua tamata oia i te tauturu ia Kaina ma te ani atu: “Eaha oe i riri ai; e eaha hoi i tuatua ’i to mata na? Ia rave oe i te parau maitai ra, eita anei e itehia mai?” (Gen. 4:6, 7) Aita râ Kaina i hinaaro i ta Iehova tauturu, no reira oia i oto ai. (Gen. 11-13) I te tahi atu taime, ua ite Iehova e mea ino to Baruka haerea o tei faarohirohi e o tei haaparuparu ia ’na. Ua faaara  ïa Iehova ia Baruka ia taui i to ’na huru feruriraa no te mea aita to ’na haerea i tano. Ua faaroo Baruka i ta Iehova a‘oraa, e ua ora mai ïa oia.—Ier. 45:2-5.

13. Eaha ta te mau tavini a Iehova i haapii a faaruru ai ratou i te tahi mau fifi ino mau?

13 Te aratai e te a‘o ra Iehova ia tatou no te mea te here ra oia ia tatou. Aita noa oia e a‘o ia tatou i te taime e titauhia, e faaineine atoa râ oia ia tatou. (Heb. 12:6) I roto i te Bibilia, e taio tatou i te aamu o te tahi mau tavini taiva ore o tei faaineinehia e Iehova ia riro ratou ei taata maitai roa ’‘e. Ei hi‘oraa, ua faaruru Iosepha, Mose e Davida i te tahi mau fifi ino mau. I roto i te ati, tei pihai iho noa Iehova ia ratou. E ua tauturu mai te mau ohipa atoa ta ratou i haapii i tera taime i to Iehova horoaraa i te mau hopoia rahi atu â ia ratou. Ia taio tatou i roto i te Bibilia e nafea Iehova e turu ai e e faaineine ai i ta ’na mau tavini, e ite ïa tatou e te here mau ra oia ia tatou.—A taio i te Maseli 3:11, 12.

14. Ia rave tatou i te tahi ohipa ino, e nafea Iehova e faaite mai ai i te here?

14 Noa ’tu e e rave tatou i te hoê ohipa ino, te tamau ra Iehova i te faaite i te here ia tatou. Ia farii tatou i ta ’na a‘oraa e ia tatarahapa atoa tatou, e faaore roa oia i ta tatou mau hara. (Isa. 55:7) Eaha ïa te auraa? Te faaite ra te mau parau a Davida no nia i to Iehova faaoreraa i te hara e e Atua aroha hamani maitai oia ia tatou: “Oia tei faaore i ta oe atoa ra mau hapa, e o tei faaora i to oe atoa ra mau ma‘i; o tei faaora ia oe i te pohe; o tei faakorona ia oe i te hamani maitai e te aroha; mai te hitia o te râ e taa ê i te tooa o te râ ra, o ta ’na ia faataa-ê-raa i ta tatou mau hara ia tatou nei.” (Sal. 103:3, 4, 12) Te a‘o e te aratai ra Iehova ia tatou ma te ravea rau. Te hinaaro ra anei outou e rave oioi i te mau tauiraa? A haamana‘o noa e te a‘o ra Iehova ia tatou no to ’na here ia tatou.—Sal. 30:5.

TE PARURU RA IEHOVA IA TATOU

15. Eaha ’tu â ravea o te faaite mai e te here ra Iehova ia tatou?

15 E paruru te hoê metua tane î i te here i to ’na utuafare i te ati. Te na reira atoa ra to tatou Metua ra o Iehova. Te parau mai ra te fatu salamo no nia ia Iehova: “Te tiai ra oia i te varua o to ’na feia mo‘a ra; e te faaora ra oia ia ratou i te rima o te paieti ore ra.” (Sal. 97:10) A feruri na: Mai ta outou e haa oioi no te paruru i to outou mata no te mea mea faufaa roa te reira no outou, te haa oioi atoa ra Iehova no te paruru i ta ’na mau tavini no te mea mea faufaa roa ratou no ’na.—A taio i te Zekaria 2:8.

Te haa oioi ra Iehova no te paruru i ta ’na mau tavini no te mea mea faufaa roa ratou no ’na

16, 17. Mea nafea Iehova i te parururaa i to ’na nunaa i na mua ’‘e e i teie mahana?

16 Te tahi atu â ravea ta Iehova i rave no te paruru i to ’na nunaa i na mua ’‘e e i teie mahana, na roto ïa i ta ’na mau melahi. (Sal. 91:11) I te hoê po, ua haapohe te hoê melahi 185 000 faehau no Asura e ua faaora i te nunaa o te Atua. (Arii 2, 19:35) I te senekele matamua, ua faaora mai te mau melahi ia  Petero, Paulo, e te tahi atu taata mai roto mai i te fare auri. (Ohi. 5:18-20; 12:6-11) Aita i maoro a‘enei, ua tupu te hoê tama‘i ino mau i te fenua Afirika. Tei roto te fenua i te arepurepu no teie mau tama‘i, eiâraa, maferaraa e haapoheraa. Noa ’tu ua ere e rave rahi taeae i ta ratou mau tao‘a atoa, ua ora mai râ ratou. Ua ite ratou i to Iehova here e ua ite atoa mai e ua aupuru Iehova ia ratou. Noa ’tu te mau tupuraa fifi mau ta ratou i faaruru, ua oaoa noa ratou. I to te hoê tia o te pu rahi farereiraa ia ratou e i to ’na aniraa i te mau taeae e tuahine eaha to ratou huru, ua pahono atu ratou: “Mea maitai roa, maoti o Iehova!”

17 Parau mau, te vai ra vetahi o te mau tavini a Iehova, mai te pǐpǐ ra o Setephano e te tahi atu â mau pǐpǐ mai ia ’na, tei pohe no te mea ua vai taiva ore ratou. Eita noa Iehova e nehenehe e arai i te mau tupuraa fifi mau. E paruru atoa ra oia i to ’na nunaa mai te hoê pǔpǔ. E na reira oia ma te faaara ’tu ia ratou i nia i te ravea e rave rau ta Satani e faaohipa ra no te tamata i te haafifi ia ratou. (Eph. 6:10-12) E ite tatou i teie mau faaararaa i roto i te Bibilia e i te mau papai a te faanahonahoraa a Iehova. Ei hi‘oraa, ua haapii mai tatou no nia i te mau fifi atâta o te Internet, te nounou moni, e oia atoa, te mau hoho‘a teata, buka aore ra hautiraa morare ore e haavî u‘ana. Mea papu, te here ra Iehova ia tatou e te hinaaro ra oia e paruru ia tatou.

TE HOÊ HAAMAITAIRAA RAHI

18. Eaha to outou huru aau no nia i to Iehova here no outou?

18 I to Mose mana‘oraa no nia i te mau matahiti atoa i tavini na oia ia Iehova, ua papu ia ’na i to Iehova here no ’na. I na ô ai Mose: “I te poipoi ra, a faaî oe ia matou i to here, ia oâoâ e ia rearea matou i to matou nei pue mahana toe.” (Sal. 90:14, Te Bibilia Mo’a V.C.J.S., 1976) E haamaitaihia tatou ia hinaaro tatou e taa e e ite i to Iehova here no tatou. Auê ïa haamaitairaa rahi e ia herehia tatou e Iehova! Te tuea ra to tatou huru aau i to te aposetolo Ioane o tei parau: “A hi‘o na i te huru o to te Metua [here] ia tatou nei.”—Ioa. 1, 3:1.