Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TETEPA 2015

‘Ia mau papu i roto i te faaroo’

‘Ia mau papu i roto i te faaroo’

‘Ia mau papu i roto i te faaroo, e faaitoito.’—KOR. 1, 16:13.

HIMENE: 60, 64

1. (a) Ua aha Petero a tupu ai te hoê vero i te Miti no Galilea? (A hi‘o i te hoho‘a matamua.) (b) No te aha Petero i haamata ’i i te paremo?

I TE hoê po, te tutava noa ra te aposetolo Petero e te tahi mau pǐpǐ i te hôe na te Miti no Galilea a tupu mai ai te hoê vero. Ite a‘era ratou ia Iesu o te haere mai ra na nia i te miti. Tuô atura Petero ia Iesu no te ani atu e e nehenehe anei ta ’na e haere na nia i te pape tae atu ia ’na ra. I to Iesu parauraa ia ’na ia haere mai, pou atura Petero mai te poti atu e tamata ’tura oia i te haere ia Iesu ra. I muri iti a‘e râ, haamata ihora Petero i te paremo. No te aha? No te mea ua hi‘o oia i te vero e i te mau are, riaria a‘era oia. Ani atura Petero ia Iesu i ta ’na tauturu e haru oioi ihora Iesu ia ’na ma te parau: “Taata faaroo tapetepete e, e aha oe i feaa ai?”—Mat. 14:24-32, Te Faufaa Api.

2. Eaha ta tatou e hi‘opoa mai i teie nei?

2 E hi‘o ana‘e e toru tumu no nia i te faaroo o ta tatou e haapii mai no nia i te hi‘oraa o Petero: (1) mea nafea Petero i tiaturi roa ’i e o Iehova te nehenehe e tauturu ia ’na, (2) no te aha  Petero i haamata ’i i te ere i te faaroo, e (3) eaha tei tauturu ia Petero ia tiaturi faahou. E tauturu mai te hi‘opoaraa o teie mau mana‘o ia ite e nafea tatou ‘ia mau papu i roto i te faaroo.’—Kor. 1, 16:13.

MAOTI TE FAAROO, E NEHENEHE TE ATUA E TAUTURU MAI

3. No te aha Petero i pou atu i te poti, e ua aha tatou mai ia ’na ra?

3 E faaroo puai to Petero. No te aha e nehenehe e parau i te reira? I to Iesu piiraa ia ’na, pou atura Petero mai te poti atu e haere atura i nia i te miti. Ua tiaturi oia e e nehenehe atoa ta ’na e na reira mai ia Iesu maoti te puai o te Atua. Hoê â no tatou, i to Iesu titauraa mai ia pee tatou ia ’na, ua pûpû tatou i to tatou ora no Iehova e ua bapetizohia tatou. No te aha? No to tatou faaroo ia Iehova e ia Iesu e no te mea ua tiaturi tatou e e tauturu mai raua ia tatou.—Ioa. 14:1; a taio i te Petero 1, 2:21.

Maoti te faaroo o Petero i nehenehe ai oia e rave i te tahi ohipa o te ore e nehenehe i te hoê taata ia rave

4, 5. No te aha e mea faufaa ’i te faaroo?

4 Mea faufaa to tatou faaroo. Maoti te faaroo o Petero i nehenehe ai oia e haere na nia i te pape, te tahi ohipa o te ore e nehenehe i te hoê taata ia rave. E tauturu to tatou faaroo ia rave i te tahi ohipa eita paha ta tatou e nehenehe e rave. (Mat. 21:21, 22) No vetahi o tatou, ua taui roa to tatou haerea e huru, no reira ua maere roa te taata o tei matau ia tatou i na mua ’‘e. Ua na reira tatou no te mea te here nei tatou ia Iehova, e ua tauturu mai oia ia manuïa tatou. (A taio i te Kolosa 3:5-10.) Ua turai to tatou faaroo ia pûpû tatou i to tatou ora no Iehova, e ia riro ei hoa no ’na, te tahi ohipa o te ore e nehenehe e rave ia ore oia e tauturu ia tatou.—Eph. 2:8.

5 E haapuai to tatou faaroo ia tatou. Ei hi‘oraa, e nehenehe te reira e tauturu mai ia upootia i nia i te mau aroraa a te Diabolo, to tatou enemi puai mau. (Eph. 6:16) Oia atoa, no to tatou tiaturi ia Iehova, aita e faufaa ia haapeapea roa ia fifihia tatou. Ua fafau Iehova e e horoa mai oia i ta tatou e hinaaro ra ia tiaturi râ tatou ia ’na e ia tuu i to ’na Basileia na mua roa. (Mat. 6:30-34) Hau atu â, no to tatou faaroo, e horoa mai ïa Iehova i te ô nehenehe mau, te ora mure ore.—Ioa. 3:16.

E ARATAI TE ERERAA I TA TATOU E TIATONU RA IA ERE I TO TATOU FAAROO

6, 7. (a) Ua faaauhia te mata‘i e te are o tei faariaria ia Petero i te aha? (b) No te aha e mea faufaa ’i ia taa e e nehenehe tatou e ere i to tatou faaroo?

6 I to Petero haereraa na nia i te Miti no Galilea, ua haamata oia i te riaria. No te aha? No te mata‘i e no te are. E nehenehe e faaau i te reira i te fifi e te faahemaraa e rave rahi ta te mau Kerisetiano e faaruru ra i teie mahana. Noa ’tu e mea fifi mau te reira, e nehenehe tatou e puai mai maoti te tauturu a Iehova. A haamana‘o râ i tei tupu ia Petero. Aita oia i paremo no te mata‘i e no te are ta ’na i faaû. Tera râ, te parau ra te Bibilia: “Ia ite râ oia i te u‘ana o te mata‘i, mǎta‘u ihora.” (Mat. 14:30) Ua faaea Petero i te hi‘o ia Iesu e ua tiatonu râ oia i nia i te puai o te vero. Ua haamata ïa oia i te ere i to ’na faaroo. Oia atoa,  ia tiatonu noa tatou i nia i to tatou mau fifi, e haamata tatou i te feaa e e tauturu mai anei Iehova ia tatou.

Ia tiatonu tatou i nia i te mau ohipa ino, e riro oioi iho â to tatou faaroo ei mea paruparu

7 Mea faufaa ia taa e e nehenehe tatou e ere i to tatou faaroo. No te aha? No te mea te parau ra te Bibilia, i ere ai tatou i te faaroo no te hara ïa e fifi ohie ai tatou. (Heb. 12:1) Mai ia Petero, ia tiatonu tatou i nia i te mau ohipa ino, e riro oioi iho â to tatou faaroo ei mea paruparu. E nafea ïa tatou e ite ai e te fifihia ra to tatou faaroo? E tauturu mai ïa teie mau uiraa ia hi‘opoa ia tatou iho.

8. E nafea te mau parau fafau a te Atua e ore faahou ai e riro ei mea mau no tatou mai tei ravehia i na mua ’‘e?

8 Mea mau anei te mau parau fafau a te Atua no ’u i teie nei mahana mai i na mua ’‘e? Ei hi‘oraa, ua fafau te Atua e haamou i te ao a Satani. E haafariu ê anei râ te faaanaanataeraa e rave rau o teie nei ao ia tatou? Mai te peu e e, e nehenehe tatou e haamata i te feaa e te fatata mai ra te hopea. (Hab. 2:3) A rave na i te tahi atu hi‘oraa. Ua horoa Iehova i te tusia taraehara. Ua fafau oia i te faaore i ta tatou mau hara. Ia mana‘ona‘o râ tatou i ta tatou mau hara i na mua ’‘e, e haamata paha tatou i te feaa e e faaore anei Iehova i ta tatou mau hara. (Ohi. 3:19) E ei faahopearaa, eita ïa tatou e oaoa faahou i roto i te taviniraa i te Atua e e nehenehe atoa tatou e faaea i te poro ia vetahi ê.

9. Eaha te tupu ia tiatonu tatou i nia i to tatou iho mau hinaaro?

9 Te horoa ra anei au ia ’u iho no Iehova? Ia haa rahi tatou no Iehova, e tauturu mai te reira ia tiatonu i nia i to tatou tiaturiraa no a muri a‘e. Eaha râ ia haamata tatou i te tiatonu atu â i nia i to tatou iho mau hinaaro? Ei hi‘oraa, te rave ra paha tatou i te hoê ohipa mea aufau-maitai-hia e te taotia ra te reira i ta tatou taviniraa ia Iehova. E nehenehe te reira e haaparuparu i to tatou faaroo, e e nehenehe atoa tatou e riro mai ei taata “toaruaru” ma te faaiti i ta tatou taviniraa ia Iehova ia faaauhia i ta tatou e nehenehe iho â e rave.—Heb. 6:10-12.

Ua haapii te mau pǐpǐ a Iesu e mea faufaa te faaroo no te faaore i te hapa a vetahi ê

10. E nafea e faaite ai i to tatou faaroo ia Iehova a faaore ai i te hapa a vetahi ê?

10 Mea fifi anei no ’u ia faaore i te hapa a vetahi ê? Ia haamauiui vetahi ê ia tatou, e turaihia anei ra tatou ia riri ia vetahi ê aore ra ia ore e paraparau ia ratou? Mai te peu e e, e haapao rahi noa ïa tatou i to tatou iho huru aau. Te faaite ra tatou i to tatou faaroo ia Iehova a faaore ai i te hapa a vetahi ê. E nafea ïa? Ia hara te hoê taata ia tatou, e tarahu ta ratou ia tatou. Ia hara tatou ia Iehova, e tarahu ta tatou ia ’na. (Luka 11:4) No reira, ia faaore tatou i te hapa a vetahi ê, te tiaturi nei tatou ia Iehova. Te tiaturi ra tatou e e haamaitai iho â oia i to tatou haerea. E mea  faufaa a‘e ta ’na haamaitairaa i te tarahu a te hoê taata no te ohipa ta ’na i rave i nia ia tatou. Ua haapii te mau pǐpǐ a Iesu e mea faufaa te faaroo no te faaore i te hapa a vetahi ê. A parau ai Iesu ia ratou ia faaore i te hapa a vetahi ê noa ’tu ehia taime i hara ’i vetahi ê ia ratou, ua taparu atu ta ’na mau pǐpǐ ia ’na: ‘A faarahi mai i to matou faaroo.’—Luka 17:1-5.

11. Na te aha e haafifi ai ia tatou ia haafaufaa i te hoê a‘oraa?

11 E inoino anei au ia a‘ohia mai? A imi i te mau ravea e faufaahia ’i te hoê a‘oraa. Eiaha e haapao i te mau hape i roto i te a‘oraa e horoahia ra e te hoê taata aore ra i to ’na paruparu. (Mas. 19:20) Eiaha roa ’tu e mairi hoê noa ’‘e taime no te haapii ia mana‘o atu â mai ia Iehova!

12. Eaha te fifi ia amuamu noa te hoê taata no nia i te mau taeae e aratai ra i te amuiraa?

12 E amuamu anei au no nia i te mau taeae e aratai ra i te amuiraa? A haapao noa ’i te mau Iseraela i te parau hape a na manu ahuru, ua amuamu ratou no nia ia Mose e Aarona. Ua ani atu ïa Iehova ia Mose: “Afea hoi ratou e faaroo mai ai ia ’u”? (Num. 14:2-4, 11) Oia mau, ua ite hoi Iehova e eita te mau Iseraela e tiaturi ia ’na no te mea ua amuamu ratou no nia ia Mose, ia Aarona e i te feia ta ’na i faatoroa. Hoê â no tatou, ia amuamu noa tatou no nia i te mau taeae ta Iehova e faaohipa ra no te aratai i to ’na nunaa, te faaite ra ïa te reira e te iti noa ra to tatou faaroo i te Atua.

13. No te aha eiaha ’i tatou e inoino ia ite tatou e ua iti roa mai to tatou faaroo?

13 I muri a‘e i te hi‘opoaraa i teie mau uiraa, eiaha e inoino ia ite outou e ua iti roa mai to outou faaroo. A haamana‘o e ua riaria atoa Petero i muri iho e ua haamata oia i te feaa. E i te tahi mau taime, ua faaite Iesu i te mau  aposetolo e e “faaroo tapetepete” to ratou. (Mat. 16:8) Teie râ, e haapiiraa faufaa te tupuraa o Petero no tatou. A hi‘o na i ta ’na i rave i muri iho i to ’na haamataraa i te feaa e i te paremo i roto i te miti.

E PUAI TO OUTOU FAAROO IA TIATONU I NIA IA IESU

14, 15. (a) Eaha ta Petero i rave i to ’na haamataraa i te paremo i roto i te miti? (b) E nafea tatou e tiatonu maite ai i nia ia Iesu?

14 Eaha ta Petero i rave i to ’na haamataraa i te paremo i roto i te miti? Ua ite hoi Petero i te au, e nehenehe oia e faaoti i te au e tae atu i te poti. (Ioa. 21:7) No te aha râ oia i ore ai e na reira? No te mea aita oia i tiaturi ia ’na iho no te tauturu. Ua tiatonu faahou Petero i nia ia Iesu e ua farii oia i ta ’na tauturu. Ia ite tatou e te iti ra to tatou faaroo, mea tia ia pee tatou i te hi‘oraa o Petero. E nafea ïa tatou?

15 Mai ia Petero i tiatonu faahou i nia ia Iesu no te tauturu, e tia atoa ia tatou ia tiatonu maite i nia ia Iesu. (A taio i te Hebera 12:2, 3.) Eita râ tatou e nehenehe e ite mata ia ’na mai ta Petero i ite. E nafea ïa tatou e tiatonu maite ai i nia ia Iesu? Ma te haapii i ta ’na mau haapiiraa e i ta ’na mau haaraa, oia atoa ma te pee maite i to ’na hi‘oraa. Ma te na reira, e fana‘o tatou i te tauturu no te haapuai i to tatou faaroo. E hi‘o ana‘e i te tahi mau ravea e pee ai tatou i te hi‘oraa o Iesu.

Ia tiatonu maite tatou i nia i te hi‘oraa o Iesu e ia pee maite tatou ia ’na, e puai mai to tatou faaroo (A hi‘o i te paratarafa 15)

16. E nafea te Bibilia e tauturu mai ai ia haapuai i to tatou faaroo?

16 A haapuai i to tatou tiaturiraa i te Bibilia. Ua papu ia Iesu e o te Parau a te Atua te Bibilia e e horoa mai te reira i te mau a‘oraa maitai roa ’‘e no tatou. (Ioa. 17:17) No te pee i te hi‘oraa o Iesu, mea titauhia ia taio tatou i te Bibilia i te mau mahana atoa, ia haapii i te reira e ia feruri maite i te mau haapiiraa e itehia ra. Mea titauhia ia imi i te mau pahonoraa o ta tatou mau uiraa. Ei hi‘oraa, te tiaturi ra anei outou e te ora nei tatou i te anotau hopea? A haapuai i to outou tiaturiraa e te fatata mai ra te hopea ma te haapii i te mau parau fafau Bibilia o te haapapu ra e te ora nei tatou i te anotau hopea. E hinaaro anei outou e haapuai i to outou tiaturiraa i roto i te mau parau fafau a te Atua no a muri a‘e? A haapii ïa i te mau parau fafau Bibilia tei tupu a‘ena. Te tiaturi ra anei iho â outou e e aratai papu te Bibilia i teie tau no outou? E nehenehe e taio i te mau aamu o te mau taeae e tuahine tei taui i to ratou oraraa no te maitai mai maoti te tauturu a te Bibilia. *Tes. 1, 2:13.

17. No te aha i nehenehe ai Iesu e faaoromai i te mau tamataraa u‘ana, e e nafea tatou e pee ai i to ’na hi‘oraa?

17 E tiaturi papu ana‘e i te mau haamaitairaa ta Iehova i fafau. Ua tiaturi papu Iesu i te mau haamaitairaa ta ’na e fana‘o e ua tauturu te reira ia ’na ia faaoromai i te mau tamataraa u‘ana. (Heb. 12:2) Aita roa ’tu te mau mea atoa ta te ao i pûpû i haafariu ê ia ’na. (Mat. 4:8-10) E nafea ïa tatou e pee ai i te hi‘oraa o Iesu? Ma te feruri maite i te mau parau fafau faahiahia mau ta Iehova i rave. A feruri na ia outou i roto i te ao apî. A papai aore ra a peni i te mau ohipa ta outou e hinaaro e rave i roto i te paradaiso. Aore ra a papai i te i‘oa o te feia o te faatia-faahou-hia mai o ta outou e hinaaro e tauaparau atu e ta outou e hinaaro e parau atu. A hi‘o i teie mau parau fafau a te Atua, eiaha noa no te taatoaraa, no outou taitahi atoa râ.

18. E nafea te pure e tauturu mai ai ia haapuai ai i to tatou faaroo?

 18 A pure ia rahi atu â te faaroo. Ua haapii Iesu i ta ’na mau pǐpǐ ia ani ia Iehova i to ’na varua mo‘a. (Luka 11:9, 13) Mai ta outou e ani atu ia fana‘o i te varua mo‘a, a pure ia rahi atu â te faaroo, hoê ïa tuhaa o te hotu a te varua mo‘a. E nehenehe outou e pure ma te haapapu i ta outou aniraa. Ei hi‘oraa, ia mana‘o outou e mea fifi ia faaore i te hapa a vetahi ê, a ani atu ia Iehova ia tamau i te haapuai i to outou faaroo e ia tauturu ia outou ia faaore i ta ratou mau hapa.

19. E nafea tatou e maiti ai i te mau hoa maitai?

19 A maiti i to outou mau hoa e faaroo puai to ratou. Ua maiti maite Iesu i to ’na mau hoa piri. O te mau aposetolo to ’na mau hoa piri roa ’‘e, no to ratou taiva ore e auraro ia ’na. (A taio i te Ioane 15:14, 15.) A pee i te hi‘oraa o Iesu e a maiti maite i to outou mau hoa. No reira, mea au a‘e ia maiti i te feia e faaroo puai to ratou e o te auraro ra ia Iesu. E nehenehe te mau hoa mau e faaite i te haerea maitai i te taata taitahi, noa ’tu e te hinaaro ra ratou e horoa ’tu aore ra e farii mai i te a‘oraa.—Mas. 27:9.

20. Eaha te tupu ia tauturu outou ia vetahi ê ia haapuai i to ratou faaroo?

20 A tauturu ia vetahi ê ia patu i to ratou faaroo. Ua tauturu Iesu i ta ’na mau pǐpǐ ia haapuai i to ratou faaroo maoti ta ’na mau parau e haaraa. (Mar. 11:20-24) Mea titauhia ia pee tatou i te hi‘oraa o Iesu. Na te reira e haapuai i to tatou iho faaroo e te faaroo o vetahi ê. (Mas. 11:25) E nafea outou e tauturu ai i te taata i roto i ta outou tuhaa fenua? Ia haapii atu outou i te Bibilia ia vetahi ê, a haapapu e te vai mau ra te Atua e te tâu‘a mai ra oia ia tatou. Oia atoa, o te Bibilia te Parau a te Atua. E nafea e tauturu ai i to tatou mau taeae e tuahine ia haapuai noa i to ratou faaroo? Ia ite outou i te tahi taata e ohumu ra no nia i te mau taeae e aratai ra i te amuiraa, eiaha e ape ia ’na. A faaohipa i te mǎrû no te tauturu ia ’na ia haamaitai faahou i to ’na faaroo. (Iuda 22, 23) Mai te peu e te haere noa ra outou i te fare haapiiraa e te aparau ra ta outou orometua i nia i te tauiuiraa o te mau mea ora, a faaitoito e a paruru i ta outou tiaturiraa no nia i te poieteraa. E maere paha outou a ite ai i te huru o ta outou orometua e o to outou hoa haapiiraa.

21. Te fafau mai ra Iehova ia tatou taitahi i te aha?

21 Ua tauturu Iehova e Iesu ia Petero ia faaruru i te taiâ e te mǎta‘u. I muri a‘e râ i roto i to ’na oraraa, ua riro Petero ei hi‘oraa puai mau o te faaroo no vetahi ê. Oia atoa, e tauturu Iehova ia tatou taitahi ia mau papu i roto i te faaroo. (A taio i te Petero 1, 5:9, 10.) E tutava ana‘e ia patu i te faaroo puai. Ma te na reira, e haamaitai ïa Iehova ia tatou.

^ par. 16 Ei hi‘oraa, a hi‘o i te anairaa tumu parau “Ua taui te Bibilia i to ’u oraraa” i roto i Te Pare Tiairaa no te taatoaraa.