Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TETEPA 2015

E aratai papu anei to outou mana‘o haava?

E aratai papu anei to outou mana‘o haava?

‘E te hopea o taua poroi nei o te aroha ïa no roto i te aau viivii ore ra, e te mana‘o haava maitai.’—TIM. 1, 1:5.

HIMENE: 57, 48

1, 2. Na vai i horoa mai i te hoê mana‘o haava, e no te aha tatou e mauruuru ai i te fana‘o i te reira?

UA POIETE te Atua ra o Iehova i te taata e te tiamâraa ia maiti. Ua horoa mai Iehova ia tatou i te hoê aratai no te tauturu ia tatou ia rave i te mau faaotiraa maitai. O te mana‘o haava ïa teie aratai, maoti te reira e ite ai tatou i te mana‘o no nia i te maitai e te ino. Ia faaohipa maitai tatou i to tatou mana‘o haava, e tauturu mai te reira ia tatou ia rave i te maitai e ia haapae i te ino. E haapapu ïa to tatou mana‘o haava e te here ra Iehova ia tatou e te hinaaro ra oia ia manuïa tatou.

2 I teie mahana, e rave iho â te tahi mau taata i te maitai e mea riri atoa na ratou e rave i te ino noa ’tu aita ratou e ite i te mau ture aveia Bibilia. (A taio i te Roma 2:14, 15.) No te aha ïa? No to ratou mana‘o haava. Maoti te reira, e ape ïa te taata e rave rahi i te rave i te mau ohipa ino. A feruri na te faahopearaa ino mau na te ao ahani aita e mana‘o haava to te taata atoa! Eita e ore e e rahi roa ’tu â paha te mau ohipa ino ta tatou e faaroo ra.  E nehenehe iho â tatou e haamauruuru ia Iehova i te horoaraa i te taata atoa i te hoê mana‘o haava.

Ia haamataro-maitai-hia to tatou mana‘o haava, e nafea te reira e tauturu ai ia tatou ia rave i te mau faaotiraa?

3. E nafea to tatou mana‘o haava e tauturu ai ia tatou i roto i te amuiraa?

3 No te rahiraa o te taata, aita e faufaa ia haamataro i to ratou mana‘o haava. No te mau tavini râ a Iehova, te hinaaro ra ratou e haamataro maitai i to ratou mana‘o haava o te tauturu ia ratou ia faatupu i te auhoêraa i roto i te amuiraa. Te hinaaro ra tatou ia haamana‘o mai to tatou mana‘o haava i te mau ture aveia Bibilia no nia i te maitai e te ino. Tera râ, no te haamataro e no te faaohipa i to tatou mana‘o haava, e titauhia ia rave hau atu â i te haapii-noa-raa i ta te Bibilia e parau ra. E mea tia ia here tatou i te mau ture aveia a te Atua e ia tiaturi e e maitai te reira no tatou. Ua papai Paulo: ‘E te hopea o taua poroi nei o te aroha ïa no roto i te aau viivii ore ra, e te mana‘o haava maitai, e te faaroo haavare ore.’ (Tim. 1, 1:5) Ia haamataro tatou i to tatou mana‘o haava e ia pee i te reira, e rahi atu â to tatou here no Iehova e to tatou tiaturiraa ia ’na. E haapapu mai te huru o ta tatou faaohiparaa i to tatou mana‘o haava e mea piri roa to tatou taairaa e o Iehova e e faaite mai te reira i to tatou hinaaro rahi e faaoaoa ia ’na. E faaite atoa to tatou mana‘o haava i to tatou huru taata mau.

4. E nafea e haamataro ai i to tatou mana‘o haava?

4 E nafea ïa tatou e haamataro ai i to tatou mana‘o haava? E titauhia ia tatou ia haapii tamau i te Bibilia, ia feruri maite i nia i ta tatou e taio ra e ia ani atu ia Iehova i te tauturu ia faaohipa i ta tatou i haapii mai. E tia ïa ia tatou ia rave hau atu â i te haapii-noa-raa i te mau aamu e te mau ture. Ta tatou fa ia haapii i te Bibilia, ia ite maitai atu â o vai Iehova. E ia ite atoa eaha to ’na huru, eaha ta ’na e au e ta ’na e ore e au. Ma te haapii atu â no nia ia Iehova, e taa oioi iho â i to tatou mana‘o haava eaha te maitai e te ino no Iehova. Hau atu â tatou i te haamataro i to tatou mana‘o haava, e hau atu â ïa tatou i te haamata e mana‘o mai ia Iehova.

5. Eaha ta tatou e hi‘o mai i roto i teie tumu parau?

5 No reira, e uiui paha tatou: Ia haamataro-maitai-hia to tatou mana‘o haava, e nafea te reira e tauturu ai ia tatou ia rave i te mau faaotiraa? E nafea tatou e nehenehe ai e faatura i te mana‘o haava o vetahi ê? E nafea to tatou mana‘o haava e turai ai ia tatou ia rave i te maitai? E hi‘o ana‘e e toru tuhaa e hinaaro ai tatou ia haamataro-maitai-hia to tatou mana‘o haava: (1) te ravea rapaauraa, (2) te faaanaanataeraa, e (3) ta tatou ohipa pororaa.

A FAAITE I TE HURU AU NOA NO NIA I TE EA

6. Eaha te mau faaotiraa e titauhia ia tatou i te rave no nia i to tatou ea?

6 Te parau mai ra te Bibilia ia haapae tatou i te mau mea e haamauiui ia tatou e ia faatupu i te huru au noa i roto i te mau peu, mai te maa e te inuraa. (Mas. 23:20; Kor. 2, 7:1) Ia faaroo tatou i te mau a‘oraa Bibilia, e tauturu mai te reira ia tatou ia paruru i to tatou  ea. Te ma‘ihia ra e te paari noa ’tu râ ra tatou. Eaha te mau faaotiraa e titauhia ia tatou ia rave? I te tahi mau fenua, e fana‘o te taata i te rapaauraa i matauhia e te rapaauraa taa ê. I te mau piha a te amaa, te tae pinepine ra te mau rata a te mau taeae e tuahine no te ani no nia i te mau huru rapaauraa e rave rau. E rave rahi e ani mai, “E nehenehe anei te hoê tavini a Iehova e farii i teie aore ra i tera huru rapaauraa?”

7. E nafea tatou e nehenehe ai e rave i te mau faaotiraa no nia i te toto?

7 Aita e tiaraa to te hoê amaa aore ra ta te mau matahiapo o te hoê amuiraa ia rave i te mau faaotiraa no te hoê Kerisetiano no nia i te ea, noa ’tu e e ani mai oia eaha te rave. (Gal. 6:5) E nehenehe râ te mau matahiapo e faaite atu i ta Iehova e parau ra no te tauturu i te hoê Kerisetiano ia rave i te hoê faaotiraa maitai. Ei hi‘oraa, ua faaue mai Iehova ia haapae noa tatou i te toto. (Ohi. 15:29) E tauturu rahi mai teie faaueraa i te hoê Kerisetiano ia taa ia ’na e eita oia e farii i te mau huru rapaauraa o te titauhia ia pâmu i te toto taatoa aore ra te hoê o na tuhaa rahi e maha o te toto. E nehenehe teie haamaramaramaraa e faaohipa i te mana‘o haava o te hoê Kerisetiano ia faaoti i te farii aore ra aita i te mau tuhaa rii atoa o te toto, te mau tuhaa nainai a‘e no ǒ mai i te hoê o na tuhaa rahi e maha o te toto. * Eaha te tahi atu a‘oraa Bibilia o te tauturu mai ia tatou ia rave i te mau faaotiraa î i te paari no nia i te mau huru rapaauraa?

8. E nafea Philipi 4:5 e tauturu mai ai ia rave i te mau faaotiraa î i te here no nia i te ea?

8 Te parau mai ra te Maseli 14:15: “Te faaroo ra te ite ore i te mau parau atoa ra; te hi‘o maitai ra râ te taata haapao ra i to ’na taahiraa.” I teie mahana, aita e rapaauraa no te tahi mau ma‘i. No reira, e titauhia ia tatou ia haapao maitai i te mau huru rapaauraa o te parau hanoa e e rapaau iho â te reira i te tahi ma‘i e aita râ e hoê a‘e haapapuraa e manuïa anei te reira. Ua papai Paulo: “Ia itea to outou mǎrû [aore ra, huru au noa] e te taata atoa ra.” (Phil. 4:5) E tauturu mai te huru au noa ia haapao tamau i ta tatou haamoriraa ia  Iehova i roto i to tatou oraraa no nia i te tahi mau tumu parau o te ea. Mai te peu e e haapao noa tatou i to tatou ea, e nehenehe ïa tatou e mana‘o noa ia tatou iho. (Phil. 2:4) Ua ite râ tatou e i roto i teie nei ao, eita ta tatou e nehenehe e fana‘o i te hoê ea maitai roa. No reira, e faaoti papu tatou e o te taviniraa a Iehova te ohipa faufaa roa ’‘e i roto i to tatou oraraa.—A taio i te Philipi 1:10.

E tamata anei outou i te faahepo ia vetahi ê ia pee i to outou huru feruriraa? (A hi‘o i te paratarafa 9)

9. E nafea te Roma 14:13, 19 e ohipa ’i i nia i ta tatou faaotiraa no nia i te ea, e e nafea to tatou auhoêraa e haafifihia ’i?

9 Eita te hoê Kerisetiano au noa e tamata i te faahepo ia vetahi ê ia rave i te mea au a‘e no ’na. I te hoê fenua, ua faaitoito na hoa faaipoipo ia vetahi ê ia rave i te raau no te faaravai atu â i te maa e ma te faaohipa i te hoê ravea taa ê no te tarani i te maa. Ua turai raua i te tahi mau taeae e tuahine ia na reira, aita râ te tahi atu i pee. I te oreraa teie mau ravea i manuïa, ua riri te rahiraa o te mau taeae e tuahine. E tiaraa no na hoa faaipoipo e maiti no raua iho e tamata anei i te raau no te faaravai atu â i te maa aore ra e tarani i te maa. Tera râ, e faaitehia anei te huru au noa ia haafifihia te auhoêraa o te amuiraa no te ravea rapaauraa? I Roma i tahito ra, e mana‘o taa ê to te tahi mau Kerisetiano no nia i te tahi mau maa e oroa. Eaha te a‘oraa ta Paulo i horoa ’tu ia ratou? Ua na ô oia: “Te mana‘o nei te tahi, e huru ê to te tahi mahana i te tahi; te mana‘o nei hoi te tahi, hoê â huru to te mau mahana atoa; ia papu râ te taata atoa i to ’na ihora aau.” E haapao maitai ana‘e ia ore tatou e haafifi ia vetahi ê.—A taio i te Roma 14:5, 13, 15, 19, 20.

A faaoti papu e o te taviniraa a Iehova te mea faufaa roa ’‘e i roto i to outou oraraa

10. No te aha e titauhia ia tatou ia faatura i ta vetahi ê iho mau faaotiraa? (A hi‘o i te hoho‘a matamua.)

10 I te tahi mau taime, aita paha tatou e taa eaha te tumu e rave ai te tahi taata i roto i te amuiraa i te hoê faaotiraa no nia i te tahi ohipa. Eaha ïa ta tatou e nehenehe e rave? Eiaha e haava oioi ia ’na aore ra e faahepo ia ’na ia taui i to ’na huru feruriraa. Peneia‘e, e titauhia ia tatou ia haamataro atu â i to tatou mana‘o haava, aore ra mea paruparu paha to tatou mana‘o haava. (Kor. 1, 8:11, 12) Peneia‘e, aita paha to tatou iho mana‘o haava i haamataro-maite-hia. No reira, no nia anei i te ea e te tahi atu mau uiraa, mea titauhia ia tatou taitahi ia rave i ta tatou iho mau faaotiraa e ia farii i te faahopearaa o te reira.

TE FAAANAANATAERAA AU MAU

11, 12. E nafea te Bibilia e tauturu ai ia tatou ia maiti i te mau faaanaanataeraa?

11 Ua poiete Iehova ia tatou ia nehenehe tatou e oaoa ia faaanaanatae e ia haafaufaa i te reira. Ua papai Solomona e “e taime to te ata” e “e taime to te ori.” (Koh. 3:4) E ere râ te mau faaanaanataeraa atoa i te mea au maitai aore ra i te mea tamǎrû. E titau-atoa-hia ia tatou ia ore e faataa rahi i to tatou taime no te faaanaanataeraa. E nafea to tatou mana‘o haava e tauturu ai ia tatou ia oaoa e ia haafaufaa i te faaanaanataeraa e fariihia e Iehova?

‘E faaara anei to ’u mana‘o haava ia ’u ia tamatahia vau?’

12 Te faaara mai ra te Bibilia ia tatou i “ta te tino e rave nei,” oia hoi “te faaturi, te poreneia, te mau peu faufau ra, te taiata, te haamori idolo, te tahutahu, te tairoiro, te tama‘i,  te mârô, te iria, te vahi a vai ra, te amahamaha, te hairesi, te feii, te taparahi taata, te taero ava, te oehamu tiaâ ra, e mai te reira atoa te huru.” (Gal. 5:19-21) E uiui ana‘e ïa: ‘E tauturu anei to ’u mana‘o haava ia ore e rave i te mau tuaro ino mau aore ra mea taehae, e itehia te tata‘uraa e te here ai‘a? E faaara anei to ’u mana‘o haava ia ’u ia tamatahia vau e mataitai i te hoê hoho‘a teata e te vai ra te mau peu faufau aore ra o te turai ia rave i te mau peu taatiraa tia ore, te inu-hua-raa i te ava aore ra i te mau peu tahutahu?’

13. No nia i te faaanaanataeraa, e nafea te a‘oraa o te Timoteo 1, 4:8 e o te Maseli 13:20 e tauturu ai ia tatou?

13 E tauturu mai te mau faaueraa tumu Bibilia ia haamataro i to tatou mana‘o haava no nia i te faaanaanataeraa. Ei hi‘oraa, te parau ra te Bibilia e “o te haamataro hoi i ta te tino nei, e faufaa iti haihai to te reira.” (Tim. 1, 4:8) No e rave rahi, e tamǎrû e e maitaihia to ratou ea ma te faaetaeta i te tino. E nafea ïa tatou e na reira ’i ma te apiti e te hoê pûpû taata? Mea faufaa anei ia haapao maitai ia faaetaeta tatou i te tino e o vai ma? Te parau mai ra te Maseli 13:20: “O tei amui atoa to ’na haerea i to te feia paari ra, e paari atoa ïa; o tei amui râ i te feia maamaa ra, e pohe [aore ra, e atihia] ïa.” Te mea papu râ, mea faufaa iho â ia faaohipa i to tatou mana‘o haava i haapiihia e te Bibilia ia maiti tatou i te faaanaanataeraa.

14. Eaha te faaohiparaa ta te hoê utuafare i rave ia au i te Roma 14:2-4?

14 E piti tamahine taurearea ta Christian raua Daniela. Te na ô ra Christian: “I ta matou arui haamoriraa utuafare, ua tauaparau matou i nia i te faaanaanataeraa. Ua farii matou e mea tano te tahi mau huru arearea, e te tahi atu râ, e ere ïa. O vai te nehenehe e riro ei amuimuiraa maitai? Ua amuamu hoê o ta mâua tamahine no te mea, i te fare haapiiraa, i te taime faafaaearaa iho â râ, ua ite oia i te tahi mau Ite no Iehova apî e haerea tano ore to ratou. No ’na, ua turaihia o ’na ia na reira atoa. Mai ta tatou i hi‘opoa mai nei, e mana‘o haava to tatou taitahi e mea tia ia vaiiho tatou i te reira e aratai ia tatou ia maiti i te faaanaanataeraa e rave e na muri ia vai ma.”—A taio i te Roma 14:2-4.

E tauturu mai to outou mana‘o haava haamatarohia e te Bibilia ia ape i te mau tupuraa atâta (A hi‘o i te paratarafa 14)

15. E nafea te Mataio 6:33 e tauturu ai ia tatou ia faanaho i te faaanaanataeraa?

 15 Ehia taime ta outou e faataa no te faaanaanataeraa? E tuu anei outou i te mau ohipa mai te mau putuputuraa, te pororaa e te haapiiraa Bibilia na mua i roto i to outou oraraa, aore ra e tuu anei outou i te faaanaanataeraa na mua? Eaha te mea faufaa a‘e no outou? Ua na ô Iesu: “E mata na râ outou i te imi i te basileia o te Atua, e te parau-tia na ’na; e amui-atoa-hia mai taua mau mea ra ia outou.” (Mat. 6:33) Ia faaoti tatou e nafea ia faataa i te taime no te faaanaanataeraa, te haamana‘o anei ra to outou mana‘o haava i te a‘oraa a Iesu?

UA ITOITOHIA TATOU I TE PORO

16. E nafea to tatou mana‘o haava e faaitoito ai ia tatou ia poro?

16 Eita te hoê mana‘o haava e faaara noa ia tatou ia ore e rave i te mau ohipa ino. E turu atoa mai râ ia rave tatou i te maitai, mai te pororaa i tera e tera fare e te farereiraa i te taata ma te faanaho-ore-hia. Tera iho â ta Paulo i rave. Ua papai oia: “Eita hoi au e tia ia ore; e ati hoi to ’u ia ore au ia parau i te evanelia!” (Kor. 1, 9:16) Ia pee tatou i te hi‘oraa o Paulo, e mana‘o haava tano to tatou, ma te ite e te rave ra tatou i te maitai. E ia poro tatou i te parau apî oaoa ia vetahi ê, te haamataro ra tatou i to ratou mana‘o haava. Ua na ô Paulo: “Te haamaitai nei . . . matou ia matou iho i te aau o te taata atoa i te faaiteraa ’tu i te parau mau i mua i te aro o te Atua.”—Kor. 2, 4:2.

17. Mea nafea te hoê tuahine apî i te peeraa i to ’na mana‘o haava haamatarohia e te Bibilia?

17 Ua haapii Jacqueline, 16 matahiti, i te ihiora i te fare haapiiraa. Teie râ, te haapii ra te mau piahi i te haapiiraa niu ore e te tauiuiraa o te mau mea ora. “Aita to ’u mana‘o haava i farii roa i te mau aparauraa mai tei matauhia e au. Eita vau e turu i te haapiiraa niu ore e te tauiuiraa o te mau mea ora. Ua haere au e farerei i ta ’u orometua e ua faaite atu ia ’na i to ’u tiaraa. Ua maere roa vau no te mea ua faaroo maite oia ia ’u e ua titau mai ia faaite atoa ’tu vau i te piahi taatoa i ta ’u tiaturiraa no nia i te poieteraa.” Ua oaoa roa Jacqueline i to ’na faarooraa e peeraa i to ’na mana‘o haava haamatarohia e te Bibilia. E turai anei to outou mana‘o haava ia rave i te mea maitai?

18. No te aha e hinaaro ai tatou ia riro to tatou mana‘o haava ei mea maitai e mea papu?

18 Ta tatou fa, ia ora tatou ia au i te mau faaueraa tumu e te mau ture aveia a Iehova. E tauturu mai to tatou mana‘o haava ia naea i tera fa. Ia haapii tamau tatou i te Parau a te Atua e ia feruri maite i nia i te reira e ia faaohipa i ta tatou e haapii ra, e haamataro iho â tatou i to tatou mana‘o haava. E riro ïa teie ô faahiahia mau ei aratai papu no tatou!

^ par. 7 A hi‘o i te “Uiraa a te feia taio” i roto i Te Pare Tiairaa o te 1 no Tiurai 2004, api 29-31.