Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiurai 2015

 AAMU

E haamana‘o vau i to ’u here matamua no Iehova o te tauturu ia ’u ia faaoromai

E haamana‘o vau i to ’u here matamua no Iehova o te tauturu ia ’u ia faaoromai

I TIUNU 1970, ua tarava vau i nia i te hoê ro‘i i te fare ma‘i i Pennsylvania, i Marite. E 20 matahiti to ’u, e e faehau vau o te mauiui ra i te hoê ma‘i ino mau. Ua rave te hoê utuutu ma‘i i to ’u ne‘iraa toto i te mau afa hora atoa. Mea huru paari a‘e oia ia ’u, e ua haapeapea roa oia no ’u. I te mea hoi e ua tamau to ’u ne‘iraa toto i te topa, parau atura vau ia ’na: “Ua ite a‘ena oe i te hoê taata pohe i na mua ’‘e?” Ua huru ê roa to ’na hoho‘a mata e ua na ô mai: “Aita vau i ite a‘enei.” E au ra e eita vau e ora mai. Tera râ, ua ora mai au. E faaite atu vau ia outou i te tahi tuhaa o to ’u oraraa.

TO ’U AAMU MATAMUA I TE TAMA‘I

Ua ma‘ihia vau a rave noa ’i au i te ohipa ei taata aravihi i roto i te piha tâpûraa i te roaraa o te tama‘i i Vietnam. Ua oaoa ra vau i te tauturu i te feia ma‘i e i te feia tei pepe. Ta ’u fa, o te riroraa ïa ei taote tâpû. Ua tae atu vau i Vietnam i Tiurai 1969. Mai te mau faehau apî, ua vaiihohia ia ’u ia haamatau i te taa-ê-raa o te hora i Vietnam e te veavea atoa.

Ua tonohia vau no te ohipa i roto i te hoê fare ma‘i faehau i Delta du Mékong. E rave rahi manureva tautau o te afai mai i te mau faehau tei pepe i te fare ma‘i. No to ’u here i to ’u fenua e i ta ’u ohipa, i hinaaro ai au e tauturu i tera taime i to ’u mau hoa o to ’u fenua. Ua faaineinehia te mau faehau tei pepe no te hoê tâpûraa, ia oti, e afai-oioi-hia ratou i roto i te hoê piha metara te vai ra te hoê faatoetoeraa mata‘i e o te faaohipahia ei piha tâpûraa. Ua rave te hoê taote tâpû, te hoê taote faataoto e te hoê utuutu ma‘i i tei maraa ia ratou ia ora mai te feia pepe. Ua tapao vau i te mau pute ereere aita i tatarahia ’tura mai roto mai i te mau manureva tautau. Ua parauhia mai ia ’u e i roto i tera mau pute te vai ra te tahi vaehaa o te tino o te mau faehau tei pohe i te tama‘i. Teie hoê o to ’u aamu matamua i te tama‘i.

UA IMI AU I TE ATUA

Mea apî roa vau a faaroo ai au i te parau mau e te mau Ite no Iehova

Mea apî roa vau a faaroo ai au i te parau mau e te mau Ite no Iehova. Ua haapii to ’u mama i te Bibilia e te mau Ite no Iehova, aita roa ’tu râ oia i bapetizo ia ’na. Tera râ, ua oaoa roa vau i te apiti atu i teie mau haapiiraa. I te hoê mahana, ua haere mâua to ’u metua tane hoovai na mua i te Piha a te  Basileia. Ua ani atu vau ia ’na, “Eaha tera?” Ua pahono mai oia, “Eiaha oe e tapiri atu i teie mau taata!” No to ’u here e no to ’u tiaturi i to ’u metua tane hoovai, ua faaroo vau ia ’na e aita roa ’tu vau i farerei faahou i te mau Ite no Iehova.

I to ’u ho‘iraa i Vietnam, ua ite au e rave rahi haamana‘oraa mauiui mau. No te mau mea ta ’u i ite i te roaraa o te tama‘i, aita vau i faaite hoê noa ’‘e huru aau. E au ra e aita e taata i taa eaha mau na tei tupu i Vietnam. Te haamana‘o ra vau e no te feia orure hau, e haapohe tamarii te mau faehau Marite. No te mea ia au i te mau faahitiraa, ua haapohe ratou i te mau tamarii hapa ore. Ua feruri au i teie mau mea atoa, e mea faufaa no ’u te hoê taairaa e te Atua.

A imi ai au i te Atua, ua haamata vau i te haere i roto i te mau haapaoraa taa ê. Ua here noa vau i te Atua, aita râ vau i au i ta ’u i ite i roto i teie mau haapaoraa. I te pae hopea, ua haere au i te hoê Piha a te Basileia i Delray Beach, i Floride. Te putuputuraa matamua ta ’u i haere, i te hoê ïa Tapati no Fepuare 1971.

A tomo ai au i roto i te Piha a te Basileia, ua oti te oreroraa parau, ua faaea râ vau no te Haapiiraa o Te Pare Tiairaa. Aita vau i haamana‘o eaha te tumu parau, ua haamana‘o râ vau i te mau tamarii e imi ra i te mau irava i roto i ta ratou Bibilia. Ua faahiahia roa vau! Ua faaroo e ua hi‘o noa ïa vau. A haere ai au i rapae, ua haere mai te hoê taeae paari e 80 matahiti to ’na e farerei ia ’u. O Jim Gardner to ’na i‘oa. Ua toro mai oia i te buka Te parau mau e aratai i te ora mure ore ra e ua ani mai, “E farii anei oe i te reira?” Ua parau atu vau ia ’na e e, ua faaoti atura mâua i te farerei faahou no te haapiiraa Bibilia matamua i te mahana maha poipoi.

I muri a‘e i te putuputuraa i te Tapati, ua haere au i te ohipa. Tei te hoê fare ma‘i i Boca Raton, i Floride ta ’u ohipa. E haamata vau i ta ’u ohipa mai te hora 11 i te po e tae atu i te hora 7 i te poipoi. Aita i rahi te feia ma‘i i tera po, e taime ïa to ’u no te taio i te buka te Parau mau. Ua haru te hoê vahine utuutu ma‘i i ta ’u buka, ua hi‘o oia i te api matamua e ua onoono o ’na no te ite e e riro anei au ei Ite no Iehova. Ua haru mai au i ta ’u buka, e ua parau atu vau ia ’na e noa ’tu ua taio vau i te tahi noa tuhaa o te buka, ua faaoti papu vau e riro mai ei Ite no Iehova. Ua vaiiho mai oia ia ’u, e ua faaoti vau i te taio i te buka i tera po.

Ta ’u taata haapii, o Jim Gardner, e taeae faatavaihia teie o tei matau ia Charles Russell

Ua haamata vau i ta ’u haapiiraa Bibilia matamua e te taeae Gardner ma te ani atu, “Eaha ta taua e haapii?” Ua pahono mai oia, “Te buka ta ’u i horoa ’tu ia oe.” Ua na ô atu vau, “Ua oti te reira i te taiohia e au.” Ma te hamani maitai, ua parau te taeae Gardner, “E hi‘opoa ïa taua i teie pene hoê.” Ua maere roa vau i te mau tuhaa iti rahi ta ’u i ore i ite. Ua ani mai oia ia ’u ia hi‘o i te mau irava i roto i ta ’u Bibilia te King James. Ua ite atura vau no nia i te Atua mau ra o Iehova. E toru pene o te buka te Parau mau ta mâua Jim i haapii mai i tera poipoi. I muri a‘e i te reira, ua haapii mâua e toru pene i te mau mahana maha atoa. Ua oaoa roa vau i teie mau  haapiiraa. E haamaitairaa teie no ’u i te haapiiraahia e teie taeae faatavaihia o tei matau ia Charles Russell!

Tau hebedoma i muri iho i te haapiiraa, ua fariihia vau ia poro i te parau apî maitai. E ere i te mea ohie no ’u i te poro i tera e tera fare, ua tauturu mai râ o Jim ia ’u ia ore e ahoaho. (Ohi. 20:20) Maoti ta ’na tauturu, ua au roa vau i te taviniraa. No ’u, o te taviniraa te fana‘oraa taa ê rahi mau ta ’u i fana‘o. Ua oaoa roa vau i to ’u riroraa ei rave ohipa a te Atua.—Kor. 1, 3:9.

TO ’U HERE MATAMUA NO IEHOVA

I teie nei, e faatia ’tu vau ia outou i te tahi ohipa taa ê roa no ’u, o to ’u ïa here matamua no Iehova. (Apo. 2:4) Ua tauturu mai to ’u here no Iehova ia faaoromai i te haamana‘oraa mauiui mau o te tama‘i e te tahi atu fifi e rave rahi.—Isa. 65:17.

Ua tauturu mai to ’u here no Iehova ia faaoromai i te mau haamana‘oraa mauiui mau o te tama‘i e te tahi atu mau fifi e rave rahi

Ua bapetizohia i Tiurai 1971 i te tairururaa mataeinaa “Te i‘oa o te Atua” i te Yankee Stadium

I 1971, ua anihia vau ia faarue i te piha o ta to ’u na metua i vaiiho mai ia faaea vau i roto. No te aha? Aita to ’u metua tane hoovai i hinaaro i te hoê Ite no Iehova e ora i reira! I tera tau, aita i rahi ta ’u moni. E aufau mai te fare ma‘i ia ’u i te piti noa o te hebedoma, e ua haamâu‘a vau i te rahiraa o ta ’u moni no te hoo mai i te mau ahu no te taviniraa, no te mea ua hinaaro vau e faahanahana ia Iehova. E moni â ta ’u i te fare vairaa moni, tei Michigan râ, to ’u iho oire. Ua titauhia ia ’u ia ora i roto i to ’u pereoo no te hoê tau mahana noa. Ua hopu vau i te pape e ua hahu vau i to ’u taa i te vahi haumitiraa o te vahi titoraa mori.

I te hoê mahana a ora noa ’i au i roto i to ’u pereoo, ua faaoti au i ta ’u ohipa i te fare ma‘i e ua haere au i te Piha a te Basileia tau hora na mua ’‘e i te putuputuraa o te taviniraa. I te mea hoi e te parahi ra vau i muri i te Piha a te Basileia, i te hoê vahi aita te taata e ite mai ia ’u, ua ho‘i faahou mai te mau mea i tupu i Vietnam i roto i to ’na feruriraa. E au  ra e te hau‘a ra vau i te iri taata tei paapaa e te ite ra vau i te toto. Ua haamata vau i te ahoaho. Mai te mea ra e te faaroo e te ite ra vau i te taurearea apî i te taparuraa ia ’u: ‘E ora mai anei au? E ora mai anei au?’ Ua ite au e e pohe iho â ratou, ua tamata râ vau i te tamahanahana ia ratou ma te faatiaturi e e maitai mai ratou. A parahi noa ’i au i reira, ua oti roa vau.

Noa ’tu te mau taime a farerei ai au i te fifi i roto i to ’u oraraa, e tutava vau i te haamana‘o i to ’u here matamua no Iehova

A pure noa ’i au ia Iehova, ua tamau noa ta ’u ta‘i. (Sal. 56:8) I reira ïa vau i te haamataraa i te feruri maite i nia te tia-faahou-raa. Ua taa ’tura ia ’u e e tiaturiraa faahiahia mau teie! E faaho‘i mai Iehova i teie feia apî i te ora, e fana‘oraa taa ê ta ratou i te iteraa i te parau mau no nia ia ’na. E faaore roa te tia-faahou-raa i te oto, te mauiui ta tatou e ite ra. (Ohi. 24:15) I to ’u taaraa i te reira, ua rahi faahou mai to ’u here no Iehova mai na mua ’tu. Ua riro tera mahana ei mahana taa ê mau no ’u. Mai reira mai, noa ’tu te mau taime a farerei ai au i te fifi i roto i to ’u oraraa, e tutava vau i te haamana‘o i to ’u here matamua no Iehova.

MEA MAITAI IEHOVA I NIA IA ’U

Ua rave te taata i te ohipa ino i te roaraa o te tama‘i, e o ta ’u atoa ïa i rave. Ua tamahanahanahia râ vau maoti te feruri-maite-raa i na irava Bibilia e piti o ta ’u i au roa. Te irava matamua, tei roto ïa i te Apokalupo 12:10, 11 e o te parau ra e e maoti râ ta tatou ohipa pororaa e maoti atoa te toto o Iesu, e upootia ’i te reira i nia i te Diabolo. Te piti o te irava, tei roto ïa i te Galatia 2:20, o te haamana‘o ra ia ’u e ua pohe iho â Iesu no ’u. Maoti te tusia o te Mesia, ua faaore Iehova i ta ’u mau hapa. I teie râ mahana, e mana‘o haava mâ to ’u. No reira ïa vau e hinaaro rahi ai ia faaite atu ia vetahi ê no nia i to tatou Atua aroha ra o Iehova!—Heb. 9:14.

Ia feruri au i nia i te mau mea ta ’u i ite i roto i to ’u oraraa, mea papu no ’u e ua aupuru noa Iehova ia ’u. Ei hi‘oraa, i te mahana a ite ai Jim e te ora nei au i roto i to ’u pereoo, ua haafarerei oia ia ’u i te hoê tuahine e piha tarahu ta ’na i roto i to ’na fare. Ua papu ia ’u e ua faaohipa Iehova ia Jim e i teie tuahine ia fana‘o vau i te hoê fare maitai no ’u. E Atua maitai mau o Iehova! Te aupuru ra oia i to ’na feia haamori taiva ore.

E HAAPII IA FAAITE I TE ITOITO RAHI E OIA ATOA I TE MǍRÛ

I Me 1971, ua hinaaro vau e haere i Michigan. Hou a faarue ai i Floride, ua faaî vau i roto i te muriraa o to ’u pereoo e rave rahi papai, e haere atura vau i Apatoerau. Hou a faarue ai i to muri iho oire, ia Géorgie, ua opere vau i te mau papai atoa. Ua poro vau ma te itoito rahi i te parau apî oaoa o te Basileia i te mau vahi i haere ai au. Ua poro vau i te mau fare tapearaa, e tae roa ’tu i te horoaraa ’tu i te mau api parau na te mau tane i roto i te vahi haumitiraa i te vahi faafaaearaa. Te feruri noa nei au aita anei te feia ta ’u i paraparau atu i ite i te parau mau.—Kor. 1, 3:6, 7.

Te fa‘i nei au e i te taime a ite ai au i te parau mau, e ere noa vau i te mea mǎrû, i nia iho â râ i to ’u utuafare. I te tahi mau taime, aita vau e tapea i te parau. Mea here roa na ’u i to ’u iho na mau taeae, o John raua Ron. Ia poro vau ia raua, e tamata vau i te faahepo ia raua ia farii i ta ’u mau tiaturiraa apî. I muri iho râ, ua tatarahapa ’tu vau ia raua. Ua tamau noa râ vau i te pure ia farii raua i te parau mau. Mai reira mai, ua tauturu mai Iehova ia ’u ia faaite atu â i te mǎrû ia poro e ia haapii atu vau i te taata.—Kol. 4:6.

VETAHI O TA ’U I HERE

O to ’u taairaa e o Iehova te tuhaa matamua i roto i to ’u oraraa. Te vai atoa râ te tahi atu taata mea here roa na ’u, o ta ’u iho â vahine herehia, o Susan. I hinaaro noa na vau i te hoê vahine o te tauturu ia ’u ia tavini ia Iehova. E ua riro Susan ei vahine o te faaoti papu i te here rahi ia Iehova. I te hoê mahana  a haamatau ai mâua, ua haere au e farerei ia ’na i te fare o to ’na na metua i Rhode Island. E tei reira oia, te parahi noa ra i nia i te taupee e taio ra i Te Pare Tiairaa e ta ’na Bibilia. Ua faahiahia roa vau e noa ’tu e aita o ’na i taio i te hoê tumu parau haapiiraa, ua imi râ oia i te mau irava atoa. Ua taa ïa ia ’u e mea faufaa roa no ’na to ’na taairaa e o Iehova. Ua faaipoipo mâua i Titema 1971. Te mauruuru nei au i te fana‘o i te hoê vahine o tei turu ia ’u. Te mea ta ’u i au roa ’‘e, noa ’tu ua here oia ia ’u, ua rahi atu â to ’na here no Iehova.

Mâua ta ’u vahine o Susan e ta mâua na tamaiti Paul e o Jesse

Ua horoa mai Iehova e piti tamaiti nehenehe mau na mâua, o Jesse raua Paul. A paari mai ai, ua aratai Iehova ia raua. (Sam. 1, 3:19) E taairaa iho â to raua e o Iehova e ua oaoa roa mâua i te reira. Ua tavini raua taitahi ia Iehova ma te taime taatoa hau atu e 20 matahiti. Te tamau noa ra raua i te tavini ia ’na, no te mea ua haamana‘o atoa raua i to raua here matamua no Iehova. Ua oaoa roa ’toa vau i ta mâua nau hunoa vahine, Stephanie e o Racquel, o ta ’u i faariro mai ta ’u iho mau tamahine. Ua mauruuru roa vau e ua faaipoipo ta ’u na tamaiti i te mau vahine o te here ra ia Iehova ma to raua aau atoa e o te faaohipa ra i to raua oraraa no te tavini ia ’Na.—Eph. 6:6.

Mea au roa na matou e poro i roto i te mau tuhaa fenua mea varavara i te porohia

Ua tavini au 16 matahiti i Rhode Island, e e rave rahi hoa to ’u i reira. Te haamana‘o ra vau i te mau matahiapo maitai mau o tei ohipa e o vau. Te haamauruuru atoa nei au i te mau tiaau ratere o te  tauturu ia ’u. E fana‘oraa taa ê i te taviniraa ia Iehova e te mau tane o tei tapea i to ratou here matamua no Iehova. I 1987, ua haere matou i Caroline Apatoerau i te vahi e hinaaro rahi ra i te tauturu, e e rave rahi atoa hoa maitai to matou i reira. *

E faatere i te putuputuraa no te pororaa ei tavini ratere

I Atete 2002, ua farii mâua Susan i te titau-manihini-raa e riro ei melo o te utuafare o te Betela i Patterson, i Marite. Ua ohipa vau i roto i te Tuhaa taviniraa, e ua ohipa Susan i te vahi pu‘araa ahu, o ta ’na ïa i au roa ’‘e! I Atete 2005, ua fana‘o vau i teie haamaitairaa e riro ei melo o te Tino aratai. E ere au i te mea aravihi no teie hopoia apî. No Susan atoa, mea rahi ta ’na hopoia, te ohipa e te ratereraa i te tahi atu fenua o te titauhia ia rave. Aita roa ’tu oia e au e reva na nia i te manureva, e revareva noa râ mâua na nia i te manureva. Ua tauturu rahi mau te a‘oraa î i te here a te tahi atu mau vahine a te mau melo o te Tino aratai ia ’na. Ua faaoti papu atu â o ’na i te turu ia ’u e ua here vau ia ’na no te reira!

I roto i ta ’u piha ohipa, e rave rahi hoho‘a ta ’u o te haamana‘o mai ra i te oraraa faahiahia ta ’u i fana‘o. Ua ite au e rave rahi haamaitairaa o te haamana‘o mai ia ’u i to ’u here matamua no Iehova!

E faaoaoa mai te horoa-rahi-raa i te taime no to ’u utuafare

^ par. 30 E nehenehe outou e ite hau atu â no nia i te taviniraa taime taatoa a te taeae Morris i te api 31 o Te Pare Tiairaa o te 1 no Eperera 2006.