Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIURAI 2015

“Te fatata maira hoi to outou ora”!

“Te fatata maira hoi to outou ora”!

“E nânâ i to outou mata i nia, e faateitei i to outou upoo, te fatata maira hoi to outou ora.”—LUKA 21:28.

HIMENE: 133, 43

1. Eaha te mau tupuraa o tei itehia i te matahiti 66? (A hi‘o i te hoho‘a matamua.)

A FERURI na e e Kerisetiano oe o te ora ra i Ierusalema i te matahiti 66. E rave rahi tupuraa tei itehia. Te vai ra te hoê taata toroa Roma, o Florus te i‘oa, o tei eiâ 17 taleni i te vairaa tao‘a o te hiero. Ua riri roa te mau ati Iuda. Ua taparahi haapohe ratou e rave rahi faehau Roma e ua faataa ê mai ratou i to Roma. Ua haa oioi râ to Roma. E toru noa ava‘e i muri iho, ua haaati 30 000 faehau o tei arataihia e Cestus Gallus ia Ierusalema. Ua tapuni te feia orure hau ati Iuda i roto i te pare o te hiero. Tera râ, ua tae roa mai te mau faehau Roma i te patu o te hiero e ua tamata ratou i te vavahi i te reira. Ua haamata te feia o te oire i te mǎta‘u. Eaha to oe huru ia ite oe i teie mau tupuraa atoa?

2. Eaha tei titauhia i te mau Kerisetiano ia rave a ite ai ratou i te nuu Roma e haaati i to ratou oire, e e nafea te reira i tupu ai?

2 Te mau matahiti i na mua ’tu, ua faaara Iesu i ta ’na mau pǐpǐ no nia i teie tupuraa e ua faaue oia ia ratou: “Ia hi‘o . . .  outou ia Ierusalema i te haaatiraahia e te nuu, ua fatata ïa to ’na pau ia ite mai outou. Te feia i parahi i Iudea ra, a maue i nia i te mou‘a i reira, e to roto i te oire ra, a haere i rapae, e eiaha to te mau vahi atoa ra e tomo i roto i te oire.” (Luka 21:20, 21) I te mea hoi e ua haaati te mau faehau i te oire, e nafea ratou e auraro ai i ta Iesu mau faaueraa ia faarue ia Ierusalema? E ohipa maere mau tei tupu. Ua faarue taue mai te nuu Roma ia Ierusalema! Mai ta Iesu i parau, ua “haapotohia” te aroraa. (Mat. 24:22) I muri iho a faarue ai te nuu i reira, tera te taime no te mau Kerisetiano taiva ore no te auraro ia Iesu ma te faarue oioi no te haere i roto i te mou‘a. * I muri iho, i te matahiti 70, ua ho‘i mai te hoê nuu apî i Ierusalema. I tera taime, ua haamou ratou i te oire. No te feia râ o te auraro i te mau faaueraa a Iesu, ua ora mai ïa.

3. Eaha te hoê â tupuraa ta te mau Kerisetiano e fatata i te ite, e eaha ta tatou e hi‘opoa mai i roto i teie tumu parau?

3 E au atoa te faaararaa a Iesu e te mau faaueraa i to tatou tau. Fatata roa, e ite tatou i te hoê â tupuraa. Ua faaohipa Iesu i te mau tupuraa i te senekele matamua no te faataa eaha te tupu mai ia haamata oioi te “ati rahi.” (Mat. 24:3, 21, 29) Mai te mau Kerisetiano taiva ore o tei ora mai i te haamouraa o Ierusalema, e “feia rahi roa” te ora mai i te ati na te ao atoa e fatata mai ra. (A taio i te Apokalupo 7:9, 13, 14.) Mea faufaa roa ia taa ia tatou eaha ta te Bibilia e parau mai ra no nia i teie mau tupuraa i mua nei. No te aha? No te mea, ua taaihia to tatou ora i te reira. E hi‘opoa mai tatou e nafea teie mau tupuraa e ohipa ’i i nia ia tatou.

TE HAAMATARAA O TE ATI RAHI

4. E nafea te ati rahi i te haamata?

4 E nafea te ati rahi i te haamata? Ma te haamouraa i te mau haapaoraa hape atoa. Ia au te Bibilia, o “Babulonia rahi, o te metua vahine o te mau faaturi” te haapaoraa hape. (Apo. 17:5-7) No te aha te haapaoraa hape i faarirohia ’i ei vahine faaturi? No te mea aita ta ’na mau pǔpǔ ekalesiatiko i faaite i te taiva ore i te Atua. Aita ratou i turu ma te taiva ore ia Iesu e to ’na Basileia, ua turu ratou i te mau faatereraa taata e ua haafaufaa ore i te mau haapiiraa Bibilia ia rahi atu â to ratou mana. E ere ta ratou haamoriraa mai te hoê haamoriraa mâ a te feia faatavaihia. (Kor. 2, 11:2; Iak. 1:27; Apo. 14:4) Na vai râ e haamou ia Babulonia rahi? Na Iehova, e faatupu oia i “na tara hoê ahuru” o te hoê ‘puaa taehae uteute’ no te ‘rave i to ’na hinaaro.’ Ua faaauhia te ‘puaa taehae uteute’ i te Nunaa amui e “na tara hoê ahuru,” o te mau mana poritita atoa ïa o te turu ra i te reira.—A taio i te Apokalupo 17:3, 16-18.

5, 6. No te aha tatou e parau ai e e ere te haamouraa o Babulonia rahi i te pohe o te mau melo atoa o te haapaoraa hape?

5 E haapohehia anei te mau melo atoa o te haapaoraa hape ia haamouhia Babulonia rahi? Eita. Ua faaurua Iehova i te peropheta Zekaria ia papai i te tupu mai i muri a‘e. I tera taime, e parau paha te hoê taata e melo oia o te haapaoraa hape i na mua a‘e: “‘E ere au i te peropheta. E taata faaapu vau, e ua riro vau ei tavini na te hoê taata  mai to ’u apîraa mai â.’ Ia ani te hoê taata ia ’na, ‘Eaha teie pepe i roto i to rima?’ E pahono oia, ‘Te pepe ïa i papaihia ’i au i te fare o tau mau hoa.’” (Zek. 13:4-6) No reira, e faahua parau noa te mau tia haapaoraa e ere ratou i te feia faaroo e e patoi ratou e ere ratou i te melo o te mau haapaoraa hape.

6 I te roaraa o tera taime, eaha te tupu no te nunaa o te Atua? Te faataa ra Iesu: “Ahiri hoi e haamaorohia taua tau ra, aore roa ïa e taata e ora; e haapotohia ra taua tau ra, no te feia maitihia ra.” (Mat. 24:22) I te senekele matamua, ua “haapotohia” te ati i Ierusalema. I nehenehe ai te “feia maitihia,” oia hoi te mau Kerisetiano faatavaihia e horo ê. Hoê â huru, e “haapotohia” te tuhaa matamua o te ati rahi no te “feia maitihia.” Eita ta te mau puai poritita, oia hoi “na tara hoê ahuru” e faatiahia ia haamou i to te Atua nunaa. E itehia ïa te hau no te hoê taime poto noa, ia oti te aroraa matamua.

E TAIME TAMATARAA E HAAVARAA

7, 8. (a) I muri a‘e i te haamouraa o te haapaoraa hape, e taime teie no te aha? (b) No te aha te nunaa o te Atua i taa ê ai i te taata atoa i tera taime?

7 Eaha te tupu i muri a‘e i te haamouraa o te haapaoraa hape? Teie te taime no te faaite eaha mau na to roto i to tatou aau. I tera taime, e tamata te taata e rave rahi i te ani i te paruru e te tauturu a te mau faanahonahoraa, oia hoi te “mau mato o te mou‘a.” (Apo. 6:15-17) E imi ïa te nunaa o Iehova i ta ’na paruru. A ‘haapotohia ’i’ te aroraa i te senekele matamua, e ere ïa te taime no te mau ati Iuda no te farii i te Kerisetianoraa. Tera râ te taime no te feia o te riro a‘ena mai ei Kerisetiano i te faarue ia Ierusalema mai ta Iesu i faaue. No to tatou atoa a muri a‘e, ia “haapotohia” te aroraa i nia ia Babulonia rahi, eiaha tatou e tiai ia farii taue mai te taata e rave rahi i te Kerisetianoraa. Tera ïa te taime no te feia haamori mau no te haapapu i to ratou here no Iehova e no te turu i te feia faatavaihia.—Mat. 25:34-40.

Teie te taime no te haapapu i to tatou here ia Iehova e no te turu i te feia faatavaihia

8 Aita tatou i papu maitai eaha te tupu i te roaraa o tera taime tamataraa. Tera râ, ua ite tatou e e ere te oraraa i te mea ohie e e mea titauhia ia tatou ia rave i te mau haapaeraa. I te senekele matamua, ua faarue te mau Kerisetiano i to ratou fare e ua faaruru i te mau fifi no te ora mai. (Mar. 13:15-18) Mea titauhia ia uiui: ‘Ua ineine anei au i te vaiiho i te mau tao‘a materia? Ua ineine anei au i te rave i tei maraa ia ’u no te vai taiva ore ia Iehova?’ A feruri na! I tera taime, o tatou ana‘e te feia e haamori ra i to tatou Atua noa ’tu eaha te tupu mai, mai ta te peropheta Daniela i rave.—Dan. 6:10, 11.

Ua tae mai te taime “hopea”!

9, 10. (a) Eaha te poroi ta te nunaa o te Atua e faaite i te roaraa o te ati rahi? (b) Eaha te huru o te mau enemi o te Atua?

9 I te ati rahi, e ere te taime no te poro i  te “evanelia o te basileia.” Ua mairi te taime no te faaite i tera poroi. Ua tae mai râ te taime “hopea!” (Mat. 24:14) Te faaite ra te nunaa o te Atua ma te mǎta‘u ore i te poroi puai mau o te haavaraa o te ohipa i nia i te taata atoa. Teie poroi, o te ao ino ïa a Satani o te fatata ra i te haamou-roa-hia. Ua faaau te Bibilia i teie poroi i te mau pape paari a na ô ai: “Ua mairi maira te ûa paari rahi no nia mai i te ra‘i i nia iho i te taata nei, e au te topata hoê i te taleni i te teiaha; e ua faaino atura te taata i te Atua, i taua pohe i te ûa paari ra, e pohe rahi roa hoi taua pohe ra.”—Apo. 16:21.

10 E faaroo to tatou mau enemi i teie poroi puai mau. Ua faaurua Iehova i te peropheta Ezekiela no te faataa eaha te huru o te hoê pǔpǔ o te nunaa, tei piihia Goga no Magoga, i roto i te Bibilia: “Te na ô maira te Fatu ra o Iehova; E riro hoê â tupuraa te mau parau i roto i to aau, e riro hoi oe i te mana‘o i te mea ino: e na oe e parau e, E haere au i te fenua oire rii aua-ore-hia ra; e haere au i te feia parahi hau noa ra, o tei parahi ma te ora, o tei parahi ma te patu ore, aore e te‘a e aore e opani, ia noaa te tao‘a pau, ia tufa i te tao‘a; e ia fariu i to rima i te mau vahi ano ia taatahia ra, e te mau taata i haaputuhia mai mai roto i te mau fenua ra, ma te puaa e te tao‘a atoa i te noaaraa, e te parahiraa i ropu i te fenua ra.” (Ezk. 38:10-12) Mea taa ê te nunaa o te Atua i te taata atoa, mai te mea ra e ‘te parahi ra ratou i ropu i te fenua.’ Eita te mau nunaa e nehenehe faahou e haavî ia ratou iho. Te hinaaro ru nei ratou e aro i te feia faatavaihia a Iehova e te feia e turu ra ia ratou.

11. (a) Eaha te titauhia ia tatou ia haamana‘o no nia i te anairaa o te mau tupuraa i te roaraa o te ati rahi? (b) Eaha te huru o te taata ia ite ratou i te mau tapao?

11 Eaha te tupu i muri iho? Aita te Bibilia e parau mai ra eaha te anairaa o te mau tupuraa, e itehia râ te tahi mau tupuraa i te hoê â taime. I roto i ta ’na parau tohu no nia i te anotau hopea o teie nei faanahoraa o te mau mea, ua parau Iesu: “E e piri to roto i te mahana i reira, e to roto i te marama, e to roto i te mau fetia; e e ati rahi to te mau fenua i te ao nei, e te ahoaho; e te miti e te are i te harururaa; e te tarapaperaa o te aau taata i te mǎta‘u, e te mana‘oraa i taua mau mea e fatata i te tupu i te ao nei; e pau hoi te mau mea o te ra‘i ra i te ueuehia. Ei reira ratou e ite ai i te Tamaiti a te taata i te haerea mai na nia i te ata ma te mana e te hanahana rahi.” (Luka 21:25-27; a taio i te Mareko 13:24-26.) I roto i te tupuraa o teie parau tohu, te vai ra anei te mau tapao e te mau tupuraa riaria mau i nia i te ra‘i? Mea titauhia ia tatou ia tiai no te ite. Tera râ, ua taa ia tatou e e ia ite te mau enemi o te Atua i te mau tapao, e riaria roa ratou.

E nehenehe tatou e faaite i te tiaturiraa, no te mea ua ite tatou e e faaorahia tatou! (A hi‘o i te paratarafa 12, 13)

12, 13. (a) Eaha te tupu ia tae mai Iesu “ma te mana rahi e te hanahana”? (b) Eaha te huru o te mau tavini a te Atua i tera taime?

12 Eaha te tupu ia tae mai Iesu “ma te mana rahi e te hanahana”? E haamaitai oia i te feia taiva ore e e haava oia i te feia taiva. (Mat. 24:46, 47, 50, 51; 25:19, 28-30) Ua faaohipa Iesu i te hoê faahoho‘araa no te  faataa ’tu â i te reira. Ua parau oia: “Ia tae maira te Tamaiti a te taata ma ta ’na hanahana, e te mau melahi mo‘a atoa ra, ei reira oia e parahi ai i nia iho i to ’na terono hanahana; e e haaputuhia to te mau fenua atoa i mua i to ’na aro: e na ’na e faataa ia ratou mai te tiai mamoe e faataa i te mamoe i te puaaniho ra: e e tuu oia i te mamoe i tana rima atau, e te puaaniho i te rima aui.” (Mat. 25:31-33) Eaha te tupu mai no te mau mamoe e no te mau puaaniho? E haavahia ratou. No te mau puaaniho, aore ra te feia taiva, e “haere ê ïa e rave i te pohe mure ore.” Area te mamoe, aore ra te feia taiva ore, e fana‘o ïa i te ora mure ore.—Mat. 25:46.

13 Eaha te tupu ia taa i te mau puaaniho e e haamouhia ratou? E oto ïa te itehia. (Mat. 24:30) Eaha ïa te huru o te feia faatavaihia e te feia e turu ra ia ratou? E rave ratou mai ta Iesu i parau: “E ua tupu ana‘e teie nei mau mea, e nânâ i to outou mata i nia, e faateitei i to outou upoo, te fatata maira hoi to outou ora.”—Luka 21:28.

E ANAANA TE MAHANA I ROTO I TE BASILEIA

14, 15. Eaha te ohipa haaputuraa te itehia i muri a‘e a haamata ’i te aroraa a Goga no Magoga i nia i to te Atua nunaa, e e nafea te reira e tupu ai?

14 Eaha te tupu i muri a‘e a haamata ’i Goga no Magoga i te aro i to te Atua  nunaa? Te parau ra te Bibilia e e tono te Tamaiti a te taata i “tana ra mau melahi, e haaputu mai i to ’na ra feia i maitihia, no na apoo mata‘i e maha ra, no te hopea mai o te ra‘i e te fenua ra.” (Mar. 13:27; Mat. 24:31) Aita teie ohipa haaputuraa i taaihia i te taime a maitihia ’i i te taime matamua te mau Kerisetiano faatavaihia. E aita te reira i taaihia i te tapaoraa hopea o te feia faatavaihia e ora noa â i te fenua nei. (Mat. 13:37, 38) E tupu te tapaoraa hou te ati rahi e haamata ’i. (Apo. 7:1-4) Eaha ïa teie ohipa haaputuraa? Tera ïa te taime e fana‘o ai te feia faatavaihia e ora noa â i te fenua i ta ratou haamaitairaa e e haere ai i te ra‘i. (Tes. 1, 4:15-17; Apo. 14:1) E tupu teie tupuraa i muri a‘e a haamata ’i te aroraa a Goga no Magoga. (Ezk. 38:11) Mai ta Iesu i parau, i reira te “feia parau-tia e anaana mai ai i te basileia o to ratou ra Metua mai te anaana o te mahana ra.”—Mat. 13:43. *

15 Te auraa anei ïa e e itehia te “afai-ê-raa” o te feia faatavaihia? Te tiaturi ra te taata e rave rahi o te Amuiraa faaroo Kerisetiano e e ravehia teie mau Kerisetiano no te haere i te ra‘i i roto i te hoê tino taata. Te mana‘o atoa ra ratou e e ite roa ratou ia Iesu ia ho‘i atu no te faatere i te fenua. Tera râ, te faaite ra te Bibilia ma te papu e eita te ho‘iraa o Iesu e itehia. Te na ô ra te Bibilia: “E itea mai ai te tapao no te Tamaiti a te taata i nia i te ra‘i ra.” (Mat. 24:30) Te parau atoa ra te Bibilia, “e ore te tino i‘o nei e te toto e parahi i te basileia o te Atua.” No reira, te feia o te ravehia no te haere i te ra‘i, e “faahuru-ê-hia, eita e mahia, mai te amoraa mata nei, ia tae i te pu hopea ra.” * (A taio i te Korinetia 1, 15:50-53.) Aita tatou e faaohipa ra i ô nei i te parau “afai-ê-raa” no te faataa i teie tupuraa no te mea ua taaihia te reira i te mau haapiiraa hape a te Amuiraa faaroo Kerisetiano. Tera râ, e haaputu-oioi-hia te feia faatavaihia taiva ore e ora noa â i te fenua.

16, 17. Eaha te tupu hou te faaipoiporaa o te Arenio?

16 Tei te ra‘i ana‘e na 144 000 atoa, e reira te faaineineraa hopea no te faaipoiporaa o te Arenio e haamata ’i. (Apo. 19:9) E tupu râ te tahi ohipa hou teie tupuraa faahiahia mau. A haamana‘o, e aro Goga i to te Atua nunaa a ora noa ’i te feia faatavaihia i te fenua nei. (Ezk. 38:16) E nafea ïa te nunaa o te Atua? E faaroo ratou i te mau faaueraa: “E ore outou e aro i tena na, e haamau outou, e tia noa mai, e hi‘o i te ora na Iehova e horoa mai na outou. . . . Eiaha e mǎta‘u, eiaha e taiâ.” (Par. 2, 20:17) I muri noa ’‘e te aroraa a Goga e haamata ’i, e ravehia te feia faatavaihia atoa e toe ra i te fenua nei no te haere i te ra‘i. Te faataa ra te Apokalupo 17:14 i te ohipa e tupu i nia i te ra‘i i te aroraa a Goga. “E e tama‘i mai [te mau enemi o te nunaa o te Atua] i te Arenio ra, e e pau ratou i te Arenio: o te Fatu hoi oia o te mau fatu atoa ra, e te Arii o te mau arii atoa ra: e to ’na atoa ra paeau, e feia parauhia ïa, e te maitihia, e te haapao mau.” E faaora Iesu, amuihia e ta  ’na na 144 000 arii faatavaihia i te ra‘i, i te nunaa o te Atua e ora ra i te fenua nei.

17 E tupu teie faaoraraa i te tama‘i o Aramagedo, e faahanahana te reira i te i‘oa mo‘a o Iehova. (Apo. 16:16) Te feia atoa o tei haavahia ei puaaniho aore ra te feia taiva, e haamouhia ïa ratou. Aita faahou e ino i nia i te fenua e e ora mai te “feia rahi roa” i Aramagedo. I reira ïa te hopea faahiahia mau o te buka o te Apokalupo e tupu ai, oia hoi te faaipoiporaa o te Arenio! (Apo. 21:1-4) * Te feia atoa o te ora ra i te fenua nei, e fana‘o ïa ratou i te farii maitai a te Atua e e ite ai i to ’na here rahi e te faaite i te aau horoa noa. Te tiai ru nei tatou i tera taime. Auê ïa oroa faaipoiporaa faahiahia mau te itehia!

18. Eaha te mau tupuraa faahiahia mau o te faatata i te tae mai o tei tohuhia, e eaha ta tatou e faaoti papu i te rave?

18 Fatata roa teie tupuraa faahiahia mau i te tae mai, eaha ta tatou taitahi e rave? Ua faaurua Iehova i te aposetolo Petero ia papai: “E teie nei, e mou ana‘e taua mau mea atoa nei, mai te aha to outou huru e tia ’i i te haapao maitai e te paieti; i te tiairaa e te ruraa ’tu ia tae mai taua mahana o te Atua ra, te mahana e mou ai te ra‘i i te tutuihia i te auahi, e e tarapape te mau mea rii tumu i te veavea rahi? . . . E teie nei, e au mau here e, o te reira mau mea ta outou e tiai na, e faaitoito, e haapapu hua ia roohia mai outou e ana ma te hau, ma te porao ore e te hapa ore.” (Pet. 2, 3:11, 12, 14) E faaoti papu ana‘e ïa i te tapea i ta tatou haamoriraa mâ ma te ore e taai atu i te haapaoraa hape e oia atoa i te turu i te Arii o te hau, Iesu Mesia.

^ par. 2 A hi‘o i Te Pare Tiairaa o te 1 no Eperera 2012, api 26-27 par. 13-16.

^ par. 15 Eita te tino taata o te feia faatavaihia e ora noa â i te fenua i tera taime, e ravehia no te haere i te ra‘i. (Kor. 1, 15:48, 49) E hopoi-ê-hia paha to ratou tino mai tei na reirahia i nia i to Iesu tino.

^ par. 17 Te horoa atoa mai ra te Salamo 45 i te tahi tuhaa rii o te anairaa o te mau tupuraa. E faatupu na mua te Arii i te tama‘i, e i reira te faaipoiporaa e tupu ai.