Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIUNU 2015

Ua here oia i te taata

Ua here oia i te taata

“E tei te mau tamarii a te taata ra to ’u oaoaraa.”—MAS. 8:31.

1, 2. Mea nafea Iesu i te faaiteraa i to ’na here hohonu no te huitaata?

O TE Tamaiti fanau tahi a te Atua te hi‘oraa maitai roa ’‘e o te paari faito ore o Iehova e te ‘rave ohipa aravihi’ na to ’na Metua. A feruri na i to Iesu oaoa i te tautururaa i to ’na Metua ia “haamau i te mau ra‘i” e ia “haamau i te mau fenua.” No te mau mea atoa râ ta to ’na Metua i poiete, ‘tei te mau tamarii a te taata ra to Iesu oaoaraa.’ (Mas. 8:22-31) Mea papu, ua here oia i te mau taata mai te omuaraa mai iho â.

2 I muri a‘e, ua faaite Iesu i to ’na haapao maitai e here no to ’na Metua e i to ’na here hohonu no te taata atoa. No reira i faarue ai oia i te ra‘i e i pou mai ai oia ma te aau tae i te fenua nei ei taata. No to Iesu here i na reira ’i oia ma te “horoa i to ’na ora ei hoo no te taata e rave rahi.” (Mat. 20:28; Phil. 2:5-8) I te fenua nei, ua horoa te Atua ia Iesu i te mana no te faatupu i te mau semeio. Te haapapu ra teie mau semeio i to Iesu here rahi no te taata e te faaite ra te  mau mea faahiahia i ta ’na e fatata ra i te rave no te huitaata.

3. Eaha ta tatou e hi‘opoa mai i roto i teie tumu parau?

3 I te fenua nei, ua poro Iesu “i te parau maitai o te basileia o te Atua.” (Luka 4:43) Ua ite oia e e faahanahana teie Basileia i te i‘oa o to ’na Metua e e faatitiaifaro te reira i te mau fifi o te huitaata e a muri noa ’tu. I to Iesu pororaa, ua faatupu oia e rave rahi semeio. Ua haapapu teie mau semeio i to ’na haapeapea rahi no te taata atoa. No te aha mea faufaa ’i no tatou? No te mea ua horoa mai oia te itoito e te tiaturiraa no a muri a‘e. E hi‘opoa mai ïa tatou e maha o te mau semeio a Iesu.

‘TEI IA ’NA TE MANA NO TE FAAORA’

4. Eaha tei tupu a ite ai Iesu i te hoê taata e ma‘i lepera to ’na?

4 I te roaraa o ta ’na taviniraa, ua haere Iesu i te oire no Galilea. I roto hoê o na oire i reira, ua farerei oia i te hoê taata e ma‘i ino mau to ’na, oia hoi te lepera. (Mar. 1:39, 40) No te ma‘i rahi o teie taata, ua faataa Luka, e taote atoa, e ‘ua ati oia i te lepera.’ (Luka 5:12) Te parau ra te Bibilia e i to teie taata iteraa ia Iesu, ua ‘tipapa ihora oia i raro, faateni mai ia ’na ra, na ô maira, E te Fatu, ia hinaaro oe ra, e mâ vau ia oe.’ Ua ite teie taata e e mana to Iesu no te faaora i to ’na ma‘i, ua tamata râ oia i te ite e te hinaaro mau ra anei Iesu e faaora ia ’na. No te aha? No te mea, i vahavaha na te mau Pharisea i te taata e ma‘i lepera to ratou. Tera anei râ to Iesu mana‘o? Eaha to ’na huru i nia i teie taata o te roohia paha i te hoê ma‘i o te faaino roa ra i to ’na tino? Mai te peu e o oe tera, eaha ta oe e rave?

5. No te aha Iesu i hinaaro ai e faaora i te lepera?

5 E au ra e, aita teie taata ma‘i i tuô “ua viivii, ua viivii,” mai ta te ture a Mose i titau. (Lev. 13:43-46) Aita râ Iesu i riri atu. Ua haapeapea hoi oia i teie taata e ua hinaaro oia e tauturu ia ’na. Aita i papu maitai ia tatou eaha to Iesu mana‘o, ua ite râ tatou eaha to ’na huru. No to ’na mauiui rahi no teie taata i faatupu ai oia i te hoê semeio. Ua tapea oia i teie taata, ta te feia ê atu i ore i rave. Ma te tiaturi e te aumihi, ua parau Iesu: “Ua tia ia ’u, ia mâ oe. Pee ê atura to ’na lepera i reira ra.” (Luka 5:13) Mea papu, ua horoa Iehova ia Iesu i te mana no te faatupu i teie semeio rahi e ua faaite oia i to ’na here rahi i te taata.—Luka 5:17.

6. Eaha te mea faahiahia i te mau semeio ta Iesu i faatupu, e eaha ta te reira e faaite mai ra?

6 Maoti te puai o te Atua, ua nehenehe ia Iesu e faatupu e rave rahi semeio faahiahia mau. Aita Iesu i faaora noa i te mau lepera, ua faaora atoa râ oia e rave rahi atu huru ma‘i. Te parau mai ra te Bibilia e ua maere te taata i to ratou “iteraa . . . i te vava i te parauraa, e te paruparu i te oraraa, e te pirioi i te haereraa, e te matapo i te hi‘oraa.” (Mat. 15:31) Ia faaora Iesu i te hoê taata, eita oia e titau i te hoê taata ea maitai ia horoa i te tahi tuhaa o to ’na mau mero o te tino. E mana iho â to Iesu no te faaora i te tahi tuhaa o te tino tei ma‘ihia. E ua faaora Iesu i te taata i taua taime ra, oia atoa te feia na te atea ia ’na. (Ioa. 4:46-54) Eaha ta teie mau hi‘oraa maere mau e faaite ra? E mana to Iesu Mesia, to tatou Arii, e te hinaaro ra oia e faaore i te mau ma‘i atoa  e a muri noa ’tu. Ia haapii tatou i ta Iesu huru raveraa i nia i te taata, e hopoi mai te reira i te tiaturiraa e e “faaherehere oia i tei paruparu ra e tei veve” i roto i te ao apî. (Sal. 72:13) E faaora Iesu i te taata ma‘i atoa, no te mea te hinaaro mau ra o ’na e na reira.

“A TIA, A RAVE I TO ROI A HAERE”

7, 8. A faataa na eaha tei tupu a farerei ai Iesu i te hoê taata ma‘i i Beteseda.

7 Tau ava‘e noa i muri a‘e i te faaora-raa-hia te lepera, ua ratere Iesu mai Galilea ’tu e tae atu i Iudea, i reira oia i te tamauraa i te poro i te parau apî oaoa o te evanelia no nia i te Basileia o te Atua. E mirioni taata paha tei faaroo i ta Iesu poroi e ua putapû i to ’na here ia ratou. Ua hinaaro iho â Iesu e tamahanahana i te feia veve e te feia e hepohepo ra ma te horoa i teie tiaturiraa i te taata.—Isa. 61:1, 2; Luka 4:18-21.

8 I te ava‘e Nisana, ua ratere Iesu i Ierusalema no te faatupu i te oroa Pasa. Ua î te oire i te taata o tei tae mai no te oroa taa ê. I te pae apatoerau o te hiero, te vai ra te hoê pape hopu, o Beteseda ïa te i‘oa. I reira, ua farerei Iesu i te hoê taata aita ta ’na e nehenehe e haere faahou.

9, 10. (a) No te aha te taata e haere ai i te pape hopu i Beteseda? (b) Eaha ta Iesu i rave i te pape hopu, e eaha ta te reira e haapii mai? (A hi‘o i te hoho‘a matamua.)

9 E nahoa taata ma‘i tei haere atu i Beteseda. No te aha? Ua mana‘o ratou e e faaora-semeio-hia te hoê taata ma‘i ia haere oia i roto i te pape hopu ia arepu ana‘e te pape. A feruri na i te huehue i te taata e rave rahi o te hepohepo ra e haapeapea ra e o tei hinaaro ra ia faaorahia ratou. E taata tia roa Iesu e mea papu aita i titauhia ia ’na te hoê raau rapaauraa. No te aha oia i haere ai i reira? No to ’na here i te taata. I reira to ’na farereiraa i te hoê taata mea maoro a‘e to ’na ma‘i i to Iesu oraraa i te fenua nei.—A taio i te Ioane 5:5-9.

Ua imi oia i te feia i hinaaro mau i te tauturu

10 Ua ani Iesu i teie taata e e hinaaro anei o ’na e haere faahou. A feruri na i to ’na oto a parau ai oia ia Iesu e ua hinaaro oia e ora e aita râ ta ’na e nehenehe, no te mea aita e taata no te tuu ia ’na i roto i te pape hopu. Ua parau atura Iesu i teie taata e e rave oia i tei ore e mana‘ohia. Rave atura teie taata i to ’na roi e haamata ihora i te haere! Te haapapu ra teie semeio faahiahia mau i ta Iesu e rave i roto i te ao apî. Oia atoa i to Iesu here hohonu i te taata. Ua imi oia i te feia i hinaaro mau i te tauturu. Te faaitoito mai ra te hi‘oraa o Iesu ia tamau i te imi i te feia i roto i ta tatou tuhaa fenua o te hepohepo ra no te mau ohipa riaria e tupu ra i roto i teie nei ao.

‘O VAI TEI TAPEA MAI I TAU AHU NEI?’

11. E nafea te Mareko 5:25-34 e faaite ai e ua here Iesu i te taata ma‘i?

11 A taio i te Mareko 5:25-34. A 12 matahiti a‘enei to te hoê vahine faaoromairaa i te hoê ma‘i haama mau. Ua ohipa to ’na ma‘i i roto i te mau tuhaa atoa o to ’na oraraa, oia atoa i ta ’na haamoriraa. Ua haere oia e farerei e rave rahi taote e ua  pau roa ta ’na moni no te rapaau ia ’na. Tera râ hoi, ua faarahi roa to ’na ma‘i. I te hoê mahana, ua rave teie vahine i te tahi ravea no te maitai mai, ua haere oia na ropu i te nahoa taata e ua tapea i te ahu o Iesu. (Lev. 15:19, 25) I to Iesu taaraa e e mana no roto mai ia ’na tei haere atu i rapae, ani atura oia o vai tei tapea ia ’na. “Ma te mǎta‘u e te rurutaina,” tipapa ihora teie vahine “i raro i mua ia ’na, ua fa‘i hua maira i te parau mau.” Ua ite Iesu e ua faaora Iehova i teie vahine e ua parau atu oia ma te mǎrû: “E tau tamahine, i ora oe i to faaroo; a haere ma te hau, e ma te ora i to ma‘i.”

Ma ta ’na mau semeio, ua haapapu Iesu e te haapao maite ra oia ia tatou e i to tatou mau fifi (A hi‘o i te paratarafa 11, 12)

12. (a) Mai ta tatou i haapii mai nei, ua nafea Iesu i nia i te taata? (b) Eaha te hi‘oraa ta Iesu i vaiiho mai?

12 E tamahanahana mau â te reira i to tatou aau i te iteraa e nafea Iesu e faaite ai i te here i te taata, i te feia ma‘i iho â râ. Mea taa ê roa te reira i ta Satani, te hinaaro ra oia ia tiaturi tatou e mea faufaa ore tatou e aita e taata e here mai ra ia tatou. Ua haapapu râ te mau semeio a Iesu e te haapao maite ra oia ia tatou e i to tatou mau fifi. Auê ïa tatou i te mauruuru no te hoê Arii e Tahu‘a rahi î i te here mai ia ’na! (Heb. 4:15) Aita ana‘e to tatou e ma‘i, mea fifi paha no tatou ia taa i te mau huru aau o te tahi taata mea maoro to ’na ma‘iraahia. A haamana‘o râ ia Iesu. Ua faaite oia i te aumihi i te taata tei ma‘ihia, noa ’tu e aita oia i ma‘ihia a‘enei. Ia tutava maite i te pee i to ’na hi‘oraa î i te here e tia ’i.—Pet. 1, 3:8.

“UA OTO IHORA IESU”

13. Eaha ta te tia-faahou-raa o Lazaro e faaite mai ra no nia ia Iesu?

13 Ua putapû roa Iesu i te iteraa i te oto o vetahi. Ei hi‘oraa, i te poheraa to ’na hoa ra o Lazaro, ‘uuru ihora Iesu e horuhoru atura tana varua’ i te iteraa i te utuafare o Lazaro e te mau hoa e oto ra. (A taio i te Ioane 11:33-36.) Noa ’tu e ua ite oia e e nehenehe ta ’na e faatia faahou mai ia Lazaro, ua ta‘i Iesu. Aita oia i mǎta‘u ia faaite i to ’na mau huru aau  ia vetahi ê. No to ’na here rahi ia Lazaro e i to ’na utuafare i faaohipa ’i oia i te puai no ô mai i te Atua ra no te faaho‘i mai ia Lazaro i te ora.—Ioa. 11:43, 44.

14, 15. (a) Eaha te haapapuraa e te hinaaro ra Iehova e faaore i te mauiui o te huitaata? (b) Eaha ta tatou e haapii mai i te ta‘o ra “apoo”?

14 Te faataa ra te Bibilia ia Iesu mai to ’na ra Metua o Iehova. (Heb. 1:3) Te haapapu mai ra ïa te mau semeio a Iesu e te hinaaro atoa ra o Iehova e faaore i te ma‘i, te oto e te pohe. Fatata Iehova e o Iesu i te faaho‘i mai e rave rahi atu â taata i te ora. Ua parau Iesu e e “fatata mai nei hoi te hora e faaroo ai te feia atoa i roto i te apoo” i te faatia-faahou-hia mai.—Ioa. 5:28, 29.

15 Ua faaohipa Iesu i te ta‘o ra “apoo” no te faaite e ua taaihia te reira i ta te Atua e haamana‘o. E nehenehe ta te Atua mana hope, te Atua poiete i te ao nui atoa, e haamana‘o i te mau tuhaa rii atoa o te feia ta tatou i here tei pohe, oia atoa to ratou huru. (Isa. 40:26) Aita Iehova e nehenehe noa e haamana‘o ia ratou, te hinaaro atoa râ oia e haamana‘o ia ratou. E hi‘oraa faahiahia mau te mau tia-faahou-raa i faahitihia i roto i te Bibilia no nia i te ohipa e tupu i roto i te ao apî.

TA TATOU E HAAPII MAI I TE MAU SEMEIO A IESU

16. Eaha ta te mau tavini a te Atua e rave rahi e fana‘o?

16 Ia vai taiva ore tatou, e nehenehe tatou e ite hoê o na mau semeio rahi roa ’‘e, o te oraraa ’tu ïa i te ati rahi! I muri iti noa ’‘e ia Aramagedo, e ite tatou e rave rahi atu â mau semeio. I tera taime, e fana‘o te taata taitahi i te ea maitai roa. (Isa. 33:24; 35:5, 6; Apo. 21:4) A feruri na i te iteraa i te taata e faarue i to ratou titia mata, ta ratou turutootoo, to ratou parahiraa turairai e ta ratou tao‘a no te tauturu i te tari‘a turi. Ua ite Iehova e mea titauhia i te feia o te ora ’tu ia Aramagedo i te itoito e te ea maitai, no te mea mea rahi ta ratou ohipa. O ratou te feia e faariro i to tatou fenua nehenehe mau ei paradaiso.—Sal. 115:16.

17, 18. (a) No te aha Iesu i faatupu ai i te mau semeio? (b) No te aha mea faufaa ’i ia rave oe i tei titauhia no te fana‘o i te ao apî?

17 Ua faaitoitohia te “feia rahi roa” i teie mahana ia taio mea nafea Iesu i te faaoraraa i te ma‘i. (Apo. 7:9) E haapuai mai teie mau semeio i to tatou tiaturiraa faahiahia mau a ora roa ’tu ai i a muri a‘e. Te faaite atoa ra te reira i te here rahi o te Tamaiti fanau tahi a te Atua no te huitaata. (Ioa. 10:11; 15:12, 13) Te faaite ra te aumihi rahi o Iesu i to Iehova here hohonu no ta ’na mau tavini taitahi.—Ioa. 5:19.

18 I teie mahana, ua î roa teie nei ao i te oto, te mauiui e te pohe. (Roma 8:22) No reira, mea titauhia te ao apî a te Atua. I reira ïa te taata atoa e fana‘o ai i te hoê ea maitai ta te Atua i fafau. Te horoa mai ra te Malaki 4:2 i te hoê tiaturiraa, oia hoi e ‘tupaipai to tatou avae i te repo mai te kafa faaamu o te fare ra,’ e oaoa roa tatou no te mea e faaorahia tatou e e tiamâ mai i te huru tia ore. Ia turai to tatou mauruuru ia Iehova e to tatou faaroo i ta ’na mau parau fafau ia rave i tei titauhia ia tatou no te fana‘o i te ao apî. Auê ïa faaitoitoraa i te iteraa e ua riro te mau semeio ta Iesu i faatupu ei tamǎrûraa tamau o ta te huitaata e fatata i te fana‘o i te roaraa o ta ’na faatereraa!