Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIUNU 2015

“Ia faaoromai tamau”

“Ia faaoromai tamau”

A RIRO mai ai Anita * ei Ite no Iehova, ua inoino roa ta ’na tane. Ua tamata oia i te tapea ia Anita ia ore oia e haere i te mau putuputuraa e ua faaue oia ia ’na ia ore roa ’tu e faahiti i te i‘oa o te Atua. No te faaroo noa i te i‘oa o Iehova, e riri roa oia.

Hau atu â, aita te tane a Anita e hinaaro ia haapii oia i ta raua mau tamarii no nia ia Iehova aore ra ia afai ia ratou i te mau putuputuraa. Mea fifi roa no ’na, no te mea e tamata oia i te tauturu i ta ’na mau tamarii ia ore ta ’na tane e ite i te reira.

Mai ta te hi‘oraa o Anita e faataa ra, e nehenehe te hoê melo o to oe utuafare e tamata ia faaea oe i te tavini ia Iehova. Aore ra te vai ra paha te tahi atu tupuraa fifi. Peneia‘e ua ma‘ihia oe no te hoê roaraa taime. Ua pohe paha ta oe tamarii, ta oe tane aore ra vahine. Aore ra ua faarue paha hoê melo o to oe utuafare i herehia e oe ia Iehova. I roto i teie mau tupuraa, e nafea oe no te vai taiva ore ia Iehova?

Ua parau te aposetolo Paulo: “Ia faaoromai tamau.” (Heb. 10:36) Na te aha ïa e tauturu ai ia oe ia faaoromai?

A PURE NO TE ANI I TA IEHOVA TAUTURU

Ia mauiui oe, a haamana‘o e mea titauhia ia tiaturi oe ia Iehova no te faaoromai. A pure no te ani i ta ’na tauturu. O ta Ana ïa i rave i te pohe-taue-raa ta ’na tane. A 30 matahiti to raua faaipoiporaa. Te parau ra o Ana: “Aita roa ’tu oia i ho‘i mai i te fare mai te ohipa mai. E 52 matahiti noa to ’na.”

Noa ’tu mea rahi ta Ana ohipa, te vai noa râ to ’na mauiui. Eaha ïa ta ’na i rave? Te parau ra oia: “Ua haamahora vau i to ’u aau ia Iehova e ua taparuparu atu vau i ta ’na tauturu.” Ua ite oia e ua tauturu Iehova ia ’na no te mea ia pure ana‘e Ana, e ite oia i te hau e te mǎrû i muri a‘e. E te na ô ra oia: “Ua papu ia ’u e e faaho‘i mai iho â Iehova i ta ’u tane i te tia-faahou-raa.”—Phil. 4:6, 7.

Ua fafau Iehova i ta ’na mau tavini e e faaroo oia i ta ratou mau pure. (Sal. 65:2) E horoa oia i ta ratou e hinaaro mau ra ia tamau ratou i te tavini ia ’na. Oia atoa, e  tauturu Iehova ia oe ia vai taiva ore ia ’na noa ’tu te mau tupuraa fifi mau.

A VAI PIRI E TO TATOU MAU TAEAE E TUAHINE

Ua horoa mai Iehova i te tahi atu ravea no te tauturu ia tatou ia faaoromai, o to tatou mau taeae e tuahine ïa o te amuiraa. E nehenehe tatou e haapii mai i te huru raveraa a te mau taeae no Tesalonia no te tauturu i te tahi i te tahi a hamani-ino-hia ’i ratou ma te u‘ana. I te roaraa i tera taime, mea titauhia hoi ia ratou ia rahi atu â i te faaitoito te tahi i te tahi. (Tes. 1, 2:14; 5:11) Ua tauturu ratou i to ratou mau taeae e tuahine ia vai taiva ore ia Iehova ma te amuimui e te mau hoa piri. E nafea tatou e vai taiva ore mai te feia no Tesalonia?

Mea titauhia ia faahoa i roto i te amuiraa e ia faaitoito te tahi i te tahi, i roto iho â râ i te mau taime fifi. (Roma 14:19) Ua mauiui atoa te aposetolo Paulo no te hamani-ino-raa e te tahi atu mau fifi. Ua horoa râ Iehova ia ’na i te puai no te faaoromai. Ei hi‘oraa, ua tauturu Iehova ia Paulo maoti te mau taeae e tuahine. Ua parau te aposetolo no nia i to ’na mau hoa: “O ratou tei haamahanahana mai ia ’u nei.” (Kol. 4:10, 11) Mea here na teie mau taeae ia Paulo. Ia hinaaro oia i te tauturu, e tamahanahana e e faaitoito ratou ia ’na. Peneia‘e e mana‘o oe i te tahi taime a parau ai aore ra a rave ai te mau  taeae e tuahine o ta oe amuiraa i te tahi ohipa o tei faaitoito ia oe.

A ANI I TE TAUTURU A TE MAU MATAHIAPO

Ua horoa atoa mai Iehova i te tahi atu tauturu, o te mau matahiapo o te amuiraa. E nehenehe ratou e faaitoito ia oe e e horoa ’tu i te a‘oraa maitai no roto mai i te Bibilia. Ua riro ratou “mai te faarǔrǔraa i te vero ra, e mai te pupuniraa i te mata‘i rahi ra; e mai te pape rii tahe i te vahi pâpâmaro ra; e mai te mǎrǔ o te hoê mato rahi i te fenua paurâ.” (Isa. 32:2) Mea tamahanahana ia ite e ua ineine teie mau taeae i te tauturu ia tatou. No reira, i te mau taime fifi, a haere e farerei i te mau matahiapo. E nehenehe ratou e tauturu ia oe ia tavini noa oe ia Iehova.

Mea papu, eita ta te mau matahiapo e nehenehe e faatitiaifaro i to oe mau fifi atoa. E taata tia ore atoa ratou mai ia oe. (Ohi. 14:15) E nehenehe râ oe e maitai mai ia haere oe e farerei i te hoê matahiapo e a pure ai oia ia Iehova no nia i to oe fifi. (Iak. 5:14, 15) Ei hi‘oraa, ua faaitoito te mau matahiapo i te hoê taeae no Italia o te mauiui ra e rave rahi matahiti no te hoê ma‘i ino mau. Ua parau oia: “Maoti te here e te haapao maitai o te mau taeae, oia atoa te haere-pinepine-raa mai e hi‘o ia ’u, ua tauturu te reira ia ’u ia faaoromai.” Mai te peu e te mauiui noa ra oe, te hinaaro ra Iehova ia ani oe i te tauturu a te mau matahiapo.

A TIATONU I TE TAVINIRAA IA IEHOVA

Ia tiatonu tatou i te taviniraa ia Iehova, e ite tatou e nafea Iehova e tauturu ai ia tatou. O ta John ïa i ite. I te 39raa o to ’na matahiti, ua ite oia e e ma‘i mariri ai taata to ’na. No ’na, e ere i te mea tano i ma‘ihia ’i oia, mea apî roa hoi o ’na. E ua haapeapea oia no ta ’na vahine e ta raua tamaiti, e toru matahiti noa to ’na. Te parau ra oia: “Aita noa ta ’u vahine i haapao i ta mâua tamaiti, ua haapao atoa râ oia ia ’u, oia hoi ma te tauturu ia ’u ia haere e hi‘o i to ’u mau taote.” No te mau ravea rapaauraa, ua rohirohi roa oia e ua mauiui atoa to ’na opu. E ere tera ana‘e. Ua ite atoa John e fatata to ’na papa i te pohe e mea titauhia i te hoê taata no te haapao ia ’na.

Eaha tei tauturu ia John e to ’na utuafare i te roaraa o tera taime fifi? Noa ’tu e e pinepine John i te rohirohi, e imi oia i te ravea ia tamau to ’na utuafare i te tiatonu i nia i te taviniraa ia Iehova. Te na ô ra oia: “E apiti matou i te mau putuputuraa atoa, e haere tamau matou i roto i te taviniraa i te mau hebedoma atoa e e rave tamau i te arui haamoriraa utuafare, noa ’tu e mea fifi.” Ua haapii John i te faufaaraa ia vai puai noa to ’na taairaa e o Iehova. Noa ’tu i te omuaraa ua huru ê e ua haapeapea o ’na, ua mǎrû roa ’tu â mai o ’na. Ua ite oia e ua here Iehova ia ’na e ua horoa ’tu i te puai ta ’na i hinaaro. Oia atoa, ia haapeapea aore ra ia mǎta‘u oe, e nehenehe Iehova e tauturu ia oe. Te parau ra John: “E nehenehe Iehova e faaitoito atu â ia oe, mai ta ’na i na reira i nia ia ’u.”

Ia mauiui oe, a haamana‘o i te mau parau a Paulo: “Ia faaoromai tamau.” A tiaturi ia Iehova ma te pure ia ’na. A vai piri noa e to oe mau taeae e tuahine o te amuiraa, a ani i te tauturu a te mau matahiapo e a tamau i te tiatonu i te haamoriraa ia Iehova. E tauturu oia ia oe i roto i te mau fifi atoa o ta oe e farerei ra i teie nei â aore ra i roto i te mau fifi o ta oe e farerei i mua nei.

^ par. 2 Ua tauihia te tahi mau i‘oa.