Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Me 2015

No te aha e faanahoraa î i te here te tiavaruraa?

No te aha e faanahoraa î i te here te tiavaruraa?

TE HAAMANA‘O ra o Julian i to ’na huru a faaarahia ’i te amuiraa e ere faahou ta ’na tamaiti i te Ite no Iehova. Te parau ra oia: “Ua oti roa vau i tera taime. O ’na te mea paari a‘e o ta ’u mau tamarii e mea piri roa mâua e e rave amui mâua i te ohipa.” Te faataa ra o Julian e haerea maitai noa iho â to ta ’na tamaiti, i muri a‘e râ, ua taui oia e ua haamata oia i te rave i te ohipa ino. Ua tamau noa te ta‘i a te vahine a Julian e aita oia e ite e nafea oia e tamahanahana ’i i ta ’na vahine. Ua parau Julian: “Ua aniani noa mâua mai te peu e ua rave maite anei mâua i ta mâua hopoia ei metua.”

Te horoa ra te Bibilia i teihea tumu e tiavaruhia ’i te hoê taata? I te mea hoi e e faatupu te reira i te oto, no te aha tatou e parau ai e e faaiteraa î i te here te tiavaruraa?

NO TE AHA E TIAVARUHIA ’I TE HOÊ TAATA?

Ia rave te hoê Ite no Iehova i te hoê hara rahi e ia ore oia e tatarahapa, e tiavaruhia ïa oia.

Eita Iehova e titau ia tatou i te tia-roa-raa, te titau râ oia i ta ’na mau tavini ia auraro i ta ’na mau ture e ia vai viivii ore noa. Ei hi‘oraa, ua a‘o atu Iehova i ta ’na mau tavini ia ape i te mau hara rahi, mai te peu taatiraa pae tino tia ore, te haamoriraa idolo, te eiâ, te taviriraa, te taparahi taata e te peu tahutahu.—Kor. 1, 6:9, 10; Apo. 21:8.

E ere i te mea teimaha ta Iehova e titau mai ra e e paruru atoa te reira ia tatou. Ei hi‘oraa, te hinaaro ra tatou paatoa e ora i rotopu i te feia e faaea hau ra, e faatura ra e te feia haerea maitai. O ta tatou ïa e ite ra i rotopu i to tatou mau taeae e tuahine pae varua. No te aha tera huru haerea? No te mea ua pûpû ratou ia ratou iho ia Iehova e ua euhe ratou e ora ia au i ta ’na i parau i roto i te Bibilia.

Tera râ, ei taata tia ore, eaha te tupu ia rave te hoê Kerisetiano o tei bapetizohia i te hoê hara rahi? Ua tupu ïa te reira i nia i te tahi mau tavini a Iehova i tahito ra, aita râ Iehova i faarue ê roa ia ratou. Ei hi‘oraa, noa ’tu e ua faaturi te arii Davida e ua haapohe i te hoê  taata, ua parau atu te peropheta Natana ia Davida e ua faaore Iehova i ta ’na hara.—Sam. 2, 12:13.

No te aha Iehova i faaore ai i ta Davida hara? No te mea ua ite Iehova i te tatarahapa mau a Davida. (Sal. 32:1-5) I teie atoa mahana, ia hara te hoê taata, e faaorehia ta ’na hara ia tatarahapa mau oia e ia faaea oia i te rave i te mea ino. (Ohi. 3:19; 26:20) Mai te peu e aita te mau matahiapo o te hoê tomite haavaraa i ite e aita teie taata e faaite ra i te tatarahapa, mea tia ia tiavaruhia oia.

Ia tiavaruhia te hoê melo o to tatou utuafare aore ra te hoê hoa, mea fifi paha no tatou ia farii i teie faaotiraa e e mana‘o paha tatou e mea etaeta te reira. Te faaite papu mai ra râ te Parau a Iehova e ia tiavaruhia te hoê taata, e faaiteraa î i te here te reira.

EAHA TE FAUFAARAA O TE TIAVARURAA?

Ua parau Iesu e ‘e faatiahia ra te paari e ta ’na ra mau tamarii.’ (Mat. 11:19) E hi‘o ana‘e e toru tumu no te aha e faaotiraa î i te paari ia tiavaru i te hoê taata aita e faaite ra i te tatarahapa.

E tiavaruhia te hoê taata ia ore te i‘oa o Iehova ia faainohia. E faahanahana aore ra e faaino to tatou haerea i te i‘oa o Iehova, no te mea ei Ite no Iehova, te amo ra tatou i to ’na i‘oa. (Isa. 43:10) Mai te hoê tamaiti e faaite ra i te faatura aore ra e faaino i to ’na metua, oia atoa e nehenehe te haerea o te mau tavini a Iehova e faahanahana aore ra e faaino ia Iehova. I te tau o Ezekiela, ua taai te mau taata o te mau nunaa i te mau ati Iuda i te i‘oa o Iehova. (Ezk. 36:19-23) I teie atoa mahana, ua taai te taata i te mau Ite no Iehova i te i‘oa o Iehova. No reira, ia auraro tatou i ta Iehova mau ture, e faahanahana ïa tatou ia ’na.

Ua a‘o atu te aposetolo Petero i te mau Kerisetiano: “Mai te tamarii faaroo ra, eiaha e faaau ia outou iho i to outou mau hinaaro i mutaa iho i to outou mauaraa ra; mai ia ’na hoi i parau mai ia outou e mo‘a ra, ia mo‘a atoa outou i ta outou mau parau atoa: ua oti hoi i te papaihia e, Ia maitai outou; te maitai nei hoi au.” (Pet. 1, 1:14-16) Ei hi‘oraa, ia rave tatou i te peu taatiraa pae tino tia ore, e faaino tatou i te i‘oa o te Atua. Ia vai viivii ore ana‘e râ to tatou haerea, e faahanahana te reira i te i‘oa o Iehova.

Ia rave te hoê Ite no Iehova i te mea ino, e taa paha i te taata i matau ia ’na i ta ’na i rave. Ia faaroo ratou e ere faahou o ’na i te Ite no Iehova, ua taa ia ratou e te auraro ra te nunaa o Iehova i ta te Bibilia e parau ra e te haafaufaa ra ratou i te viivii ore o te amuiraa. Ei hi‘oraa, i Switzerland, ua haere te hoê taata i te hoê putuputuraa e ua parau atu e te hinaaro ra oia e riro mai ei melo o te amuiraa. Ua tiavaruhia to ’na iho tuahine no te mea ua rave oia i te peu morare e ua hinaaro oia i tera taime e apiti i te hoê faanahonahoraa o te “ore roa ’tu e farii i te haerea ino.”

E tiavaruhia te hoê taata ia vai viivii ore noa te amuiraa Kerisetiano. Ua faaara te aposetolo Paulo i to Korinetia i te fifi ia vaiihohia te hoê taata aita i tatarahapa i ta ’na hara i roto i te amuiraa. Ua faaau oia i te haerea viivii o te taata tei hara i te hopue o te faahopue i te faraoa ota taatoa. Ua parau Paulo: “E hopue te puea atoa i te faahopue iti haihai.” E ua a‘o atu oia ia ratou: ‘E faataa ê atu outou i taua taata ino râ i roto ia outou na.’—Kor. 1, 5:6, 11-13.

E rave tera ‘taata ino’ i te peu taatiraa pae tino tia ore ma te haama ore. Ua haamata atoa vetahi o ta ’na amuiraa i te farii i to ’na haerea ino. (Kor. 1, 5:1, 2) Mea atâta hoi, no te mea ua ohipa te peu morare i matauhia i  Korinetia i nia i te oraraa o te tahi atu mau Kerisetiano. I teie atoa mahana, ia tâu‘a ore te amuiraa i te hara rahi, e nehenehe vetahi e haamata i te mana‘o e mea faufaa ore te mau ture aveia a Iehova. (Koh. 8:11) Mai te “to‘a i moe i raro a‘e i te pape” e nehenehe e faatomo i te pahi, e nehenehe te mau taata rave hara eita e tatarahapa e faaino i te faaroo o vetahi ê i roto i te amuiraa.—Iuda 4, 12, Traduction du monde nouveau.

E tauturu te tiavaruraa i tei hara ia taa e ua hape oia. Ua faaohipa Iesu i te hi‘oraa o te hoê tamaiti tei faarue i te fare o to ’na metua tane e ua haamâu‘a i ta ’na tufaa atoa ma te ora i te hoê oraraa morare tia ore. Ua taa râ i teie tamaiti e mea faufaa ore te oraraa ta ’na i ite a faaatea ê ai i te fare o to ’na metua tane. Ua tatarahapa oia e ua faaoti i te ho‘i i to ’na utuafare. Ua oaoa roa te metua tane i te iteraa e ua taui te haerea o ta ’na tamaiti e ua farii popou ia ’na i te fare. (Luka 15:11-24) E tauturu mai teie hi‘oraa ia taa eaha to Iehova huru ia tatarahapa te hoê taata. Te parau ra oia: “Aore roa o ’u e mauruururaa i te pohe o te taata ino ra; ia fariu mairâ te taata i ta ’na parau ino ia ora.”—Ezk. 33:11.

Te amuiraa Kerisetiano, o to tatou ïa utuafare pae varua. Ia tiavaruhia te hoê taata, e ere faahou oia i te hoê melo o te utuafare. I muri a‘e i te iteraa i ta ’na i farerei ma to ’na haerea ino, e taa ia ’na i te hape ta ’na i rave. E haamana‘o atoa o ’na i te oaoa rahi o te hoê taairaa maitai e o Iehova e te amuiraa. Na te reira ïa e tauturu ia ’na ia ho‘i mai i roto i to ’na utuafare pae varua.

No te tauturu i te hoê taata tei tiavaruhia ia ho‘i mai i te amuiraa, e mea titauhia ia faaite papu tatou i te here. Ei hi‘oraa, te tiai ra e piti taata o tei hahaere ra na nia i te mou‘a ia faaorahia raua i te toetoe i te tau hiona. No te toetoe rahi, rohirohi roa a‘era hoê o na taata e e hinaaro atura e taoto. Ia topa râ to ’na taoto i nia i te hiona e pohe oia. No te tauturu ia ’na ia vai araara noa, e poara to ’na hoa i to ’na paparia. Noa ’tu mea mauiui, e faaora râ te reira ia ’na. Ua faaite atoa o Davida i te hoê â mana‘o a na ô ai oia: “A papai mai te taata parau-tia ra ia ’u, e mea hamani maitai ïa.” (Sal. 141:5) Noa ’tu e ua taa ia Davida e mea mauiui te a‘oraa, e tauturu râ te reira ia ’na.

Mai teie poara, mea titauhia ïa te tiavaruraa no te faaho‘i mai i te hoê taata ia Iehova ra. Ua taui te tamaiti a Julian o tei faahitihia i te omuaraa o teie tumu parau i to ’na oraraa e ua ho‘i mai i te amuiraa ahuru matahiti i muri a‘e i to ’na tiavaru-raa-hia. I teie nei, e matahiapo o ’na. Ua fa‘i oia: “Ua turai te tiavaruraa ia ’u ia faaruru roa i te mau faahopearaa o to ’u huru oraraa. Aua‘e teie huru a‘oraa.”—Heb. 12:7-11.

E NAFEA TATOU E FAAITE AI I TE HERE I TE FEIA TEI TIAVARUHIA?

Mea peapea ia tiavaruhia te hoê taata. E ere râ i te auraa e eita roa o ’na e ho‘i mai ia Iehova ra. Mea faufaa roa no tatou taitahi ia vaiiho i te a‘oraa ia ohipa mai. E nafea râ?

E tutava ana‘e i te tauturu i te hoê taata i tatarahapa ia ho‘i mai ia Iehova ra

E tutava noa te mau matahiapo i te pee i te here o Iehova, ia aparau ana‘e ratou i te hoê taata e ere faahou i te Ite no Iehova. E faataa ’tu ratou ma te mǎrû e te papu eaha te titauhia ia ’na ia rave no te ho‘i mai ia Iehova ra e ia riro faahou ei melo o te amuiraa. Ia faaite te hoê taata o tei tiavaruhia e te hinaaro ra oia e ho‘i mai i roto i te amuiraa, e haere pinepine te mau matahiapo e farerei ia ’na no te haamana‘o atu ia ’na eaha ta ’na e nehenehe e rave no te ho‘i mai ia Iehova ra. *

E faaite te mau melo o te utuafare i te here no te amuiraa e no te taata tei tiavaruhia a  turu ai i te faaotiraa a te mau matahiapo. Te faataa ra o Julian: “E tamaiti noa iho â o ’na na ’u, ua faataa ê râ to ’na huru oraraa ia mâua.”

E faaite te taatoaraa o te amuiraa i te here mau i te taata tei tiavaruhia ma te turu i te a‘oraa ta Iehova i horoa ia ’na maoti te mau matahiapo. Te auraa ïa e eita e titauhia ia ratou ia rave i te taime e o ’na aore ra e paraparau ia ’na. (Kor. 1, 5:11; Ioa. 2, 10, 11) Oia atoa, e faaite atu â te amuiraa i te here e i te turu i te utuafare e ua tiavaruhia hoê o te melo. E taime mauiui mau â no te utuafare. Eiaha roa ’tu ratou e mana‘o mai te mea ra e ua tuu-atoa-hia ratou i te hiti e te amuiraa.—Roma 12:13, 15.

Teie ta Julian i parau: “E faanahoraa faufaa te tiavaruraa no tatou, e tauturu mai te reira ia ora ia au i te mau ture aveia a Iehova. Noa ’tu te mauiui o te reira, e faahopearaa maitai ra te itehia i muri a‘e. Ahiri vau i farii i te haerea ino o ta ’u tamaiti, eita o ’na e ho‘i mai.”

^ par. 24 A hi‘o i Te Pare Tiairaa o te 1 no Eperera 1991, api 24-29.