Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) ME 2015

Ua “hi‘o” ratou i te mau mea i fafauhia

Ua “hi‘o” ratou i te mau mea i fafauhia

“Aita i noaa tei parauhia maira, ua hi‘o râ ratou i taua mau mea ra i te atea ê.”—HEB. 11:13.

1. No te aha mea maitai ai ia feruri tatou i te mau ohipa aita â tatou i ite atura? (A hi‘o i te hoho‘a matamua.)

UA HOROA mai Iehova i te hoê ô faahiahia mau: te aravihi ïa ia feruri i te mau ohipa aita â tatou i ite atura. E tauturu mai te reira ia tiai i te mau mea faahiahia mau no a muri a‘e, ia faaineine i te mau opuaraa e ia ape i te mau fifi. Ua ite Iehova i te ohipa e tupu mai a muri a‘e, e ua faaite oia ia tatou eaha tei tupu. I te mea e eita tatou e ite roa ’tu, e nehenehe râ tatou e feruri noa a haapuai ai te reira i to tatou faaroo.—Kor. 2, 4:18.

2, 3. (a) E nafea to tatou feruriraa e tauturu ai ia tatou? (b) Eaha te mau uiraa ta tatou e hi‘opoa mai i roto i teie tumu parau?

2 I te tahi mau taime e feruri iho â tatou i te mau mea eita roa ’tu e tupu. Ei hi‘oraa, e feruri paha te hoê tamahine e tei nia iho o ’na i te hoê pěpě o te rere ra. Mea papu, eita te reira e nehenehe e tupu. Ta Hana râ e feruri ra, te metua vahine o Samuela, e nehenehe ïa e tupu. Ua mana‘ona‘o noa oia i te mahana e afai ai oia i ta ’na tamaiti i te  sekene no te ohipa e te mau tahu‘a. E ere i te hoê noa moemoeâ, tera hoi ta ’na i opua e rave. Ua tutava o ’na i te tapea i ta ’na i euhe ia Iehova, a feruri noa ’i o ’na i tera mahana. (Sam. 1, 1:22) Ia mana‘ona‘o tatou i te mau parau fafau a Iehova, te mana‘ona‘o ra ïa tatou i te tahi mau parau o te tupu iho â.—Pet. 2, 1:19-21.

3 E rave rahi tavini a Iehova i tahito ra i nehenehe na e feruri i ta Iehova i tǎpǔ. No te aha mea maitai ai no ratou ia feruri i te reira? E no te aha e mea maitai ai ia feruri atoa mai te aha ra to tatou oraraa ia tupu te mau parau fafau a te Atua?

UA PUAI ATU Â TO RATOU FAAROO A FERURI AI I TE TUPU A MURI A‘E

4. No te aha i nehenehe ai ta Abela e feruri no nia i te hoê a muri a‘e maitai a‘e?

4 O Abela te taata matamua o tei faatupu i te faaroo i te parau fafau a Iehova. Ua ite oia eaha ta Iehova i parau i te ophi i muri a‘e i to Adamu raua Eva hararaa: “E tuu hoi au i te au ore e riri ai ra ia orua o te vahine, e to huaai, e to ’na ra huaai; na ’na e haaparuparu i to afii, e na oe e haaparuparu i to ’na poro avae.” (Gen. 3:14, 15) Aita Abela i ite maitai nafea te reira e tupu ai. Tera râ, ua feruri noa paha o ’na i nia i ta te Atua i parau. E nehenehe ta Abela e mana‘o, ‘o vai te haaparuparuhia e te ophi e te tauturu i te taata ia riro faahou mai ei taata tia roa?’ Ua papu ia Abela e e tupu iho â ta Iehova i tǎpǔ e ua farii noa na Iehova i te mau tusia ta ’na i pûpû.—A taio i te Genese 4:3-5; Hebera 11:4.

5. No te aha mea maitai ai no Enoha ia feruri i te tupu a muri a‘e?

5 O Enoha te tahi atu taata o tei faaite i te faaroo puai mau i te Atua. Ua ora oia i rotopu i te mau taata ino o tei faahiti i te “parau etaeta” i nia i te Atua. Teie nei râ, e taata itoito o Enoha e ua poro i te poroi a te Atua. E ua parau atu oia i te taata e e haamou Iehova i te feia ino. (Iuda 14, 15) Na te aha i tauturu ia ’na ia na reira? Ua feruri oia i te mahana e î ai te fenua i te mau taata e tavini ia Iehova.—A taio i te Hebera 11:5, 6.

6. I muri a‘e i te diluvi, eaha paha ta Noa i mana‘o?

6 No to Noa faaroo ia Iehova, aita oia i haamouhia i te diluvi. (Heb. 11:7) E no to ’na atoa faaroo i pûpû ai oia i te tusia animara na Iehova. (Gen. 8:20) I muri a‘e i te diluvi, ua ino faahou te ao. Ua haamata o Nimeroda i te faatere e ua hinaaro oia ia orure hau te taata ia Iehova. (Gen. 10:8-12) Ua vai puai noa râ te faaroo o Noa. Mai ia Abela, ua papu ia ’na e ia tae i te hoê mahana e faaore te Atua i te hara e te pohe e aita atoa e taata faatere ino faahou i te fenua nei. E nehenehe atoa tatou e feruri i tera mahana faahiahia mau o te fatata i te tae mai!—Roma 6:23.

UA FERURI NOA RATOU I TE TAIME E E TUPU IHO Â TE MAU PARAU FAFAU A TE ATUA

7. Eaha te a muri a‘e e tiaihia ra e Aberahama, Isaaka e Iakoba?

7 Ua feruri o Aberahama, Isaaka e Iakoba i te hoê a muri a‘e faahiahia mau. Ua fafau hoi o Iehova ia ratou e e haamaitai o ’na i te mau nunaa atoa maoti to ratou “huaai.” (Gen. 22:18; 26:4;  28:14) Ua fafau atoa te Atua e e riro mai to ratou utuafare ei nunaa rahi e e fana‘o ratou i te Fenua tǎpǔhia faahiahia mau. (Gen. 15:5-7) No to Aberahama, Isaaka e Iakoba iteraa e e tupu iho â te mau parau fafau a Iehova i nehenehe ai ratou e feruri i to ratou utuafare e ora a‘ena ra i taua fenua ra. Mai te taime a hara ’i Adamu raua Eva, ua tauturu Iehova i ta ’na mau tavini taiva ore ia taa e e nafea te taata e fana‘o faahou ai i te oraraa tia roa.

8. Eaha tei tauturu ia Aberahama ia haapuai i to ’na faaroo e ia auraro?

8 No to Aberahama faaroo puai, ua auraro o ’na ia Iehova noa ’tu te mau tupuraa fifi mau. Ua feruri Aberahama e te tahi atu tavini taiva ore ma te papu i ta Iehova i fafau, noa ’tu e aita te reira i tupu a ora noa ’i ratou. Te parau ra te Bibilia: “Ua hi‘o râ ratou i taua mau mea ra i te atea ê.” (A taio i te Hebera 11:8-13.) Ua ite Aberahama e ua tapea noa iho â Iehova i ta ’na i fafau i tahito ra, ua papu ïa ia ’na e e tupu te mau mea atoa ta Iehova i fafau no a muri a‘e.

Ua faaoromai te mau taata i tahito ra e tae roa i te taime e aratai ai Iehova e ta ’na faatereraa i te fenua nei e a muri noa ’tu

9. E nafea te faaroo o Aberahama i ta Iehova i fafau i tauturu ai ia ’na?

9 No to Aberahama faaroo i ta Iehova i fafau, i rave ai o ’na i ta Iehova i ani atu ia ’na. Ei hi‘oraa, ua vaiiho o ’na i to ’na nohoraa i te oire no Ura. E no te toea o to ’na oraraa, aita oia i faaea tumu i roto i te mau oire ta ’na i haere. Ua ite atoa oia e aita te mau oire e haaati ra ia ’na e vai noa, no te mea aita te mau faatereraa e haamori ra ia Iehova. (Ios. 24:2) Ua tiai ru noa oia ia tae i te taime e aratai ai Iehova e ta ’na faatereraa i te fenua e a muri noa ’tu. Teie faatereraa, o “taua oire niu mau ra, o te Atua te faaau e te faatia ra.” (Heb. 11:10) Ua tiaturi Aberahama, Abela, Enoha, Noa e te tahi atu, i te tia-faahou-raa. Ua puai roa mai to ratou faaroo ia Iehova a mana‘o ai i te mau taime atoa e ora e a muri noa ’tu i nia i te hoê fenua nehenehe mau.—A taio i te Hebera 11:15, 16.

10. No te aha e mea maitai ai no Sara ia feruri i te tupu a muri a‘e?

10 E faaroo puai to Sara, te vahine a Aberahama i ta Iehova i fafau. Noa ’tu e aita ta ’na e tamarii i te 90raa o to ’na matahiti, ua tiai noa oia i te taime a noaa ’i ta ’na tamarii. Ua feruri o Sara i ta ’na tamarii ia riro mai ei nunaa rahi. (Heb. 11:11, 12) E nafea o ’na e papu ai? No te mea ua parau o Iehova i ta ’na tane: “E haamaitai au ia ’na, e e horoa vau i te tahi tamaiti no oe ia ’na, e e haamaitai atoa vau ia ’na: e riro hoi Sara ei metua no te mau fenua, e e hui arii atoa te fanau ia ’na.” (Gen. 17:16) Mai ta Iehova i fafau, ua fanau mai Sara ia Isaaka. Ua haapapu teie semeio ia ’na e e tupu iho â te toea o ta Iehova i fafau. E nehenehe  atoa to tatou faaroo e puai mai ia feruri tatou i te mau mea faahiahia atoa ta Iehova i fafau mai.

UA FERURI HOHONU OIA I NIA I TE HAAMAITAIRAA

11, 12. Eaha tei tauturu ia Mose ia here roa ’tu â ia Iehova?

11 Ua faatupu atoa Mose i te faaroo i ta Iehova i fafau. Ua paari mai o ’na i Aiphiti mai te hoê arii. No to ’na râ here rahi ia Iehova i te tahi atu mea, aita o ’na i hinaaro i te mana e te mau tao‘a. Ua haapii to ’na metua Hebera ia ’na no nia ia Iehova e no nia atoa i ta ’na i fafau no te faaora i te mau tamarii Iseraela i te faatîtîraa e no te horoa ’tu i te Fenua tǎpǔhia. (Gen. 13:14, 15; Exo. 2:5-10) Rahi noa ’tu â Mose i te feruri i teie mau parau fafau, rahi noa ’tu â oia i te here ia Iehova.

12 Te parau mai ra te Bibilia i ta Mose e mana‘o noa ra: “No te faaroo i ore i tia ’i ia Mose, a paari ai oia ra, ia mairihia o te tamaiti a te tamahine a Pharao ra; e mea maitai ia ’na te rave atoa i te pohe i te amuiraa i te taata no te Atua ra; ia rave i te navenave poto noa o te parau ino ra. E tao‘a rahi hoi ia ’na te mau faainoraa, i te Mesia nei, i te mau tao‘a atoa o Aiphiti ra, te haapao maite ra hoi oia i te utua ra ei hoo.”—Heb. 11:24-26.

13. No te aha e mea maitai ai no Mose ia feruri hohonu i ta Iehova i fafau?

13 Ua feruri hohonu o Mose i ta Iehova i fafau no te faaora i te tamarii Iseraela i te faatîtîraa. Mai te tahi mau tavini a Iehova, ua ite atoa Mose e e faaora Iehova i te mau taata atoa i te pohe. (Ioba 14:14, 15; Heb. 11:17-19) Ua taa iho â ia Mose e mea here mau na Iehova i te taata. Maoti te tupuraa i here rahi ai oia ia Iehova e i puai ai to ’na faaroo no ’na. Na te reira atoa i tauturu ia ’na ia tavini ia Iehova i te roaraa o to ’na oraraa. (Deut. 6:4, 5) Noa ’tu ua hinaaro Pharao e haapohe ia ’na, aita Mose i riaria ia ’na, ua ite oia e e haamaitai Iehova ia ’na a muri a‘e.—Exo. 10:28, 29.

A FERURI NA I TA TE FAATERERAA A TE ATUA E RAVE

E nehenehe anei oe e feruri e rave ra i te mau mea atoa ta Iehova i fafau ia oe? (A hi‘o i te paratarafa 15)

14. Eaha ta te taata e rave rahi e mana‘o ra no a muri a‘e?

14 E rave rahi taata e mana‘o ra no a muri a‘e e e feruri ra i te mau mea e ore roa ’tu e tupu. Ei hi‘oraa, te moemoeâ ra te tahi mau taata veve roa e e riro mai ratou ei feia moni e eita ratou e haapeapea faahou. Tera râ, te parau ra te Bibilia e e riro noa te oraraa i roto i te ao a Satani, ei mea “rohirohi e ei taiâraa.” (Sal. 90:10) E rave rahi atoa te mana‘o ra e na te hoê faatereraa taata e faatitiaifaro i te mau fifi o teie nei ao. Tera râ, te parau ra te Bibilia e o te faatereraa ana‘e a te Atua te nehenehe e na reira. (Dan. 2:44) E rave rahi taata o te mana‘o ra e eita roa ’tu teie ao e taui. Tera râ, te parau ra te Bibilia e e haamou te Atua i teie ao ino. (Zeph. 1:18; Ioa. 1, 2:15-17) E inoino roa te feia e te feruri ra i te mau mea aita e tuea ra i ta Iehova mau parau.

15. (a) No te aha e mea maitai ai no tatou ia feruri i te a muri a‘e ta te Atua i fafau mai? (b) Eaha hoê o te mau mea o ta oe e tiai noa ra?

15 Ua fafau mai Iehova i te hoê a muri a‘e faahiahia mau. Ia mana‘o tatou i tera  taime, e oaoa roa ’tu â tatou e e itoitohia tatou no te tavini noa ia ’na. Noa ’tu e fana‘o oe i te ora i te ra‘i aore ra i te fenua nei, te feruri râ anei oe e rave ra i te mau mea atoa ta Iehova i fafau ia oe? Ia tiai ru oe e ora e a muri noa ’tu i te fenua nei, a feruri na e te ohipa ra oe e to oe mau hoa no te faariro i te fenua ei aua nehenehe mau. Te haapao mai ra te feia e aratai ra i teie ohipa ia oe. Te here ra te taata atoa e haaati ra ia oe ia Iehova mai ia oe e na reira ra. Mea maitai to oe ea e mea itoito oe e e aore roa ohipa e haapeapea faahou ia oe. Te oaoa ra oe, no te mea e nehenehe oe e faaohipa i to oe mau aravihi e to oe ite no te tauturu ia vetahi ê e ia faahanahana ia Iehova. Peneia‘e e tauturu atu â oe i te feia o te faatia-faahou-hia mai ia haapii no nia ia Iehova. (Ioa. 17:3; Ohi. 24:15) Ia feruri oe i teie mau tupuraa, aita oe e moemoeâ ra. E tupu iho â te reira no te mea te faaite ra te Bibilia no a muri a‘e.—Isa. 11:9; 25:8; 33:24; 35:5-7; 65:22.

A APARAU NO NIA I TA OE E TIAI RU RA

16, 17. No te aha e mea maitai ai ia aparau tatou no nia i te a muri a‘e ta te Atua i fafau mai?

16 Ia parau tatou i te mau taeae e tuahine i ta tatou e hinaaro ra e rave i roto i te ao apî, e papu roa ’tu â i roto i to te tahi e te tahi feruriraa i te hoê a muri a‘e faahiahia mau. Parau mau, aita tatou i ite papu eaha ta tatou taitahi e rave, ia aparau râ tatou no nia i ta tatou e tiai ru ra, te faaite ra ïa tatou i te faaroo i ta Iehova i fafau. Ma te na reira, e faaitoito tatou te tahi i te tahi ia tavini ia Iehova i te mau taime fifi, mai ta te aposetolo Paulo i na reira i nia i to ’na mau taeae no Roma.—Roma 1:11, 12.

17 Ia mana‘o oe i te a muri a‘e ta te Atua i fafau mai, e iti mai to oe haapeapea  i to oe mau fifi. I te hoê taime, ua haapeapea Petero e ua parau atu ia Iesu: “Inaha matou, ua faarue i te mau mea atoa e ua pee mai ia oe; e eaha ta matou nei utua?” Ua hinaaro Iesu ia mana‘o Petero e te tahi atu mau pǐpǐ i pihaiiho ia ’na, i te mau mea faahiahia ta ratou e rave a muri a‘e. Ua parau atu oia: “Ia parahi te Tamaiti a te taata i nia iho i to ’na terono hanahana, e parahi atoa outou, o tei pee mai ia ’u nei, i nia iho i te terono hoê ahuru e ma piti i te haavaraa i te mau opu o Iseraela tino ahuru ma piti ra. E te taata atoa no to ’u nei i‘oa i faarue ai i te fare, e te mau taeae, e te mau tuahine, e te metua tane, e te metua vahine, e te vahine iho, e te tamarii, e te fenua, e hanere atu ïa ta ’na e noaa, e e roaa ia ’na te ora mure ore.” (Mat. 19:27-29) E nehenehe ïa Petero e te tahi atu mau pǐpǐ e feruri ia ratou e faatere ra e o Iesu i nia i te ra‘i e e tauturu i te taata i te fenua nei ia riro mai ei taata tia roa.

18. No te aha e mea maitai ai no tatou ia feruri i te taime a faatupu ai te Atua i ta ’na i fafau?

18 Ua hi‘o mai tatou eaha tei tauturu i te mau tavini a Iehova ia haapuai i to ratou faaroo. Ua feruri Abela i ta Iehova i fafau no te hoê a muri a‘e faahiahia mau. E no to ’na faaroo i teie parau fafau i mauruuru roa ’i Iehova ia ’na. Ua feruri Aberahama i te taime e tupu ai ta Iehova i fafau no nia i te “huaai,” no reira oia i auraro ai ia Iehova noa ’tu e mea fifi mau te reira. (Gen. 3:15) Ua tiai ru Mose i te haamaitairaa ta Iehova i fafau atu ia ’na e o te tauturu ia ’na ia here atu â ia Iehova e ia vai taiva ore noa. (Heb. 11:26) Ia feruri tatou i te taime e faatupu ai Iehova i te mau mea atoa ta ’na i fafau, e puai atu â to tatou faaroo e to tatou here ia Iehova. I to muri mai tumu parau, e hi‘opoa mai tatou eaha te tahi atu ravea no te faaohipa i to tatou feruriraa.