Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Eperera 2015

E te mau matahiapo, a haapii i te mau taeae ia amo i te hopoia

E te mau matahiapo, a haapii i te mau taeae ia amo i te hopoia

“E te mau parau ta oe i faaroo ia ’u nei, . . . e tuu atu i te feia parau mau.”—TIM. 2, 2:2.

1. (a) Eaha ta te mau tavini a te Atua i ite no nia i te haapiiraa, e eaha te nehenehe e huti mai no tatou i teie mahana? (b) Eaha ta tatou e hi‘opoa i roto i teie tumu parau?

UA ITE te nunaa o te Atua e e aratai te haapiiraa i te manuïaraa. Ei hi‘oraa, ua faanaho Aberama i ‘to ’na mau taata i haapiihia e ana’ e ua faaora mai ratou ia Lota. (Gen. 14:14-16) Ua “haapiihia” te feia himene i te tau o te arii Davida no te faatae i te mau himene arueraa ia Iehova. (Par. 1, 25:7) I teie mahana, e mea tia ia aro tatou ia Satani e i ta ’na ao. (Eph. 6:11-13) Te ohipa puai atoa nei tatou no te arue ia Iehova ma te faaite ia vetahi ê i to ’na i‘oa. (Heb. 13:15, 16) Mai te mau tavini a te Atua i tahito, mea faufaa ia haapiihia tatou no te manuïa. I roto i te amuiraa, ua horoa Iehova i te mau matahiapo te hopoia e haapii i te tahi atu. (Tim. 2, 2:2) Mea nafea te tahi mau matahiapo i te haapiiraa i te mau taeae ia haapao i to Iehova nunaa?

A TAUTURU I TE TAEAE IA HERE ATU Â IA IEHOVA

2. Hou a haapii ai i te hoê taeae te mau mea apî, eaha ta te hoê matahiapo e rave e no te aha?

2 E nehenehe te hoê matahiapo e faaauhia i te hoê taata  faaapu. Hou a tanu ai i te huero, mea faufaa ia tuu te taata faaapu i te mau mea maitatai i roto i te repo ia tupu e ia paari maitai te raau tanu. Oia atoa, hou a haapii ai i te hoê taeae i te mau mea apî, e faaite na mua te hoê matahiapo i te tahi mau aratairaa Bibilia o te tauturu i te taeae ia ineine no te faaohipa i ta ’na i haapii mai.—Tim. 1, 4:6.

3. (a) E nafea ta Iesu mau parau i roto i te Mareko 12:29, 30 e nehenehe ai e faaohipahia i roto i te hoê aparauraa e te hoê taeae? (b) Eaha te huru o te hoê taeae a faaroo ai i te hoê matahiapo ia pure no ’na?

3 Mea faufaa ia taa e nafea te parau mau e ohipa ’i i nia i te mana‘o e te huru aau o te taeae ta oe e haapii ia amo i te mau hopoia. I te mea e ua pûpû o ’na ia ’na ia Iehova, e nehenehe oe e ani ia ’na mea nafea te reira i te ohiparaa i nia i ta ’na mau faaotiraa i roto i te oraraa. E aratai te reira i te hoê aparauraa no nia i te mau ravea no te tavini ia Iehova ma te aau atoa. (A taio i te Mareko 12:29, 30.) E nehenehe atoa oe e pure e o ’na no te ani ia Iehova ia horoa ’tu na ’na te varua mo‘a ta ’na i hinaaro no te haapii i te amo i te mau hopoia. E itoitohia ’tu â te taeae ia faaroo o ’na ia oe ia pure no ’na!

4. (a) Eaha te tahi mau aamu Bibilia te nehenehe e tauturu i te hoê taeae ia haere i mua? (b) Eaha te fa te titauhia ia haamau te mau matahiapo a haapii ai i te tahi atu?

4 A haamata ’i oe i te haapii i te hoê taeae, mea maitai ia tauaparau i nia i te mau aamu Bibilia o te tauturu ia ’na ia ite i te faufaaraa ia riro ei tauturu e ei taeae tiaturihia e te haehaa. (Arii 1, 19:19-21; Neh. 7:2; 13:13; Ohi. 18:24-26) E huru maitatai faufaa teie no ’na mai te mau mea maitatai e tuuhia i roto i te repo. E tauturu te reira ia ’na ia haere oioi i mua. Ua parau Jean-Claude, te hoê matahiapo no Farani, eaha ta ’na fa a haapii ai i te hoê taeae: e tauturu ia ’na ia rave i te mau faaotiraa î i te paari niuhia i nia i te mau aratairaa Bibilia. Te na ô ra o ’na: “E imi au i te taime no te taio amui i te hoê irava no te ‘faaaraara i te mata’ o te taeae i ‘te mau mea taa ê’ itehia i roto i te Parau a te Atua.” (Sal. 119:18) E nafea ’tu â e tauturu ai i te hoê taeae ia haere i mua?

 A FAAHITI I TE MAU FA E A FAAITE NO TE AHA

5. (a) Mea faufaa anei ia paraparau e te hoê taeae no nia i ta ’na mau fa i roto i te taviniraa a Iehova? A faataa. (b) No te aha ia haapii ai te mau matahiapo i te mau taeae ia amo i te hopoia i to ratou iho â apîraa?

5 A ani i te hoê taeae eaha ta ’na mau fa i roto i te taviniraa a Iehova. Aita ana‘e, a tauturu ia ’na ia haamau i te tahi fa. Ma te oaoa, a faaite atu i te tahi fa ta oe i haamau e i to oe huru aau a naea ’i i te reira. E ravea ohie teie e o te manuïa. Te na ô ra Victor, te hoê matahiapo e pionie i Afirika: “I to ’u apîraa, ua uiui mai te hoê matahiapo no nia i ta ’u mau fa. Ua tauturu teie mau uiraa ia ’u ia feruri maitai i ta ’u taviniraa.” Te parau nei te mau matahiapo aravihi e mea faufaa ia haapii i te mau taeae i to ratou iho â apîraa noa ’tu e e taurearea. E nehenehe e horoa i te mau ohipa i roto i te amuiraa ia au i to ratou matahiti. E tiatonu noa ïa ratou i ta ratou mau fa a paari mai ai e i mua i te faahemaraa e rave rahi.—A taio i te Salamo 71:5, 17. *

A faataa i te taeae no te aha mea faufaa ’i ia rave o ’na i te ohipa ta oe i horoa ’tu e a haapopou ia ’na no ta ’na mau tutavaraa (A hi‘o i na paratarafa 5-8)

6. Mea nafea Iesu i te haapiiraa i te tahi atu ia amo i te hopoia?

 6 No te turai i te hoê taeae ia tavini, eita e navai ia parau noa ia ’na eaha te rave. E mea tia atoa ia faataa oe no te aha mea faufaa ’i ia na reira. Ua parau te Orometua rahi ra o Iesu i ta ’na mau aposetolo ia poro. Ua faaite râ na mua oia no te aha e mea tia ’i ia na reira ratou: “O te mana atoa i te ra‘i e te ao atoa nei ua pûpûhia mai tei ia ’u ana‘e. E teie nei, e haere outou e faariro i te mau fenua atoa ei pǐpǐ.” (Mat. 28:18, 19) E nafea oe e nehenehe ai e pee i te huru raveraa a Iesu?

7, 8. (a) E nafea te mau matahiapo e nehenehe ai e pee i te huru raveraa a Iesu? (b) Mea faufaa anei ia haapopou i te hoê taeae? A faataa. (c) Eaha te tahi mau mana‘o te nehenehe e tauturu i te mau matahiapo ia haapii i te tahi atu ia amo i te hopoia? (A hi‘o i te tumu parau tarenihia “ E nafea ia haapii i te mau taeae?”)

7 Ia ani oe i te hoê taeae ia rave i te hoê ohipa, a faataa ’tu i roto i te Bibilia no te aha mea faufaa ’i te reira. E haapii ïa oe ia ’na ia rave i te tahi ohipa no te mea e aratairaa Bibilia to muri, eiaha noa te tahi faatureraa. Ei hi‘oraa, ia ani oe i te hoê taeae ia tamâ e ia haapao i te vahi tomoraa o te Piha a te Basileia, e nehenehe oe e faaite atu i te Tito 2:10. A faataa e nafea ta ’na ohipa e faariro ai i te poroi o te Basileia ei mea anaanatae atu â. A parau atoa ia ’na ia feruri i te mau melo paari o te amuiraa e e nafea ta ’na ohipa e tauturu ai ia ratou. E tauturu teie huru aparauraa ia ’na ia feruri atu â i te taata, eiaha i te mau faatureraa. Ia ite o ’na e nafea te mau taeae e tuahine e faufaahia ’i i ta ’na ohipa, e oaoa o ’na no te mea te tavini ra o ’na i te tahi atu.

8 A haapopou atoa i te taeae ia faaohipa o ’na i ta oe i parau atu. Mea faufaa anei ia na reira? E tauturu te pape i te hoê raau tanu ia tupu maitai. Oia atoa, e tauturu ta oe mau haapopouraa i te hoê taeae ia haere i mua i roto i ta ’na taviniraa ia Iehova.—A hi‘o i te Mataio 3:17.

TE TAHI ATU FIFI

9. (a) No te aha mea fifi ai no te mau matahiapo i te tahi mau fenua ruperupe ia haapii i te taeae ia amo i te hopoia? (b) No te aha aita ’i te tahi mau taeae apî i tuu i te taviniraa a te Atua na mua roa?

9 Mea fifi paha no te mau matahiapo i te mau fenua ruperupe ia faaitoito i te mau taeae bapetizohia e 20 aore ra e 30 tiahapa matahiti ia ohipa ’tu â i roto i te amuiraa. Ua parau mai te mau matahiapo aravihi no e 20 fenua, no te aha i to ratou mana‘o, e ore ai te tahi mau taeae apî e tavini atu â i roto i te amuiraa. Ua parau te rahiraa e aita te mau metua o teie mau taeae i faaitoito ia ratou i to ratou apîraa ia haamau i te mau fa i roto i te taviniraa a Iehova. E a hinaaro ai te tahi mau taeae apî e tavini atu â, ua faaitoito atu to ratou mau metua ia haamau i te mau fa taaihia i te haapiiraa teitei aore ra i te hoê toroa i roto i te ao! Aita roa ’tu ïa ratou i tuu i te taviniraa a te Atua na mua roa.—Mat. 10:24.

10, 11. (a) E nafea te hoê matahiapo e tauturu mǎrû noa ’i i te hoê taeae ia taui i to ’na huru feruriraa? (b) Eaha te mau irava ta ’na e nehenehe e faaohipa no te turai i te hoê taeae ia rave hau atu â, e no te aha? (A hi‘o i te nota i raro i te api.)

10 Mai te peu e e au ra e aita te hoê taeae e hinaaro ra e rave hau atu â i roto i te amuiraa, e titauhia te faaitoitoraa e te faaoromai rahi no te taui i to ’na huru feruriraa. E haere râ! E nehenehe te hoê taata faaapu e tauturu i te hoê raau tanu ia tupu afaro ma te aratai mǎrû noa i te tumu. Oia atoa, e nehenehe oe e tauturu mǎrû noa i te hoê taeae ia ite e mea faufaa ia taui i to ’na huru feruriraa e ia farii hau atu â hopoia i roto i te amuiraa. E nafea?

 11 A rave i te taime no te faahoa ’tu ia ’na. A faaite atu e mea faufaa o ’na no te amuiraa. A mairi ai te tau, a parahi e a haaferuri ia ’na i nia i te mau irava o te nehenehe e tauturu ia ’na ia feruri i ta ’na pûpûraa ia Iehova. (Koh. 5:4; Isa. 6:8; Mat. 6:24, 33; Luka 9:57-62; Kor. 1, 15:58; Kor. 2, 5:15; 13:5) A tutava i te haaputapû i to ’na aau ma te mau uiraa mai teie: ‘Eaha ta oe i fafau ia Iehova a pûpû ai i to oe ora ia ’na? I to oe mana‘o, eaha to Iehova huru a bapetizohia ’i oe?’ (Mas. 27:11) ‘Eaha to Satani huru?’ (Pet. 1, 5:8) Mea puai mau te mau irava mai teie no te haaputapû i te aau o te hoê taeae.—A taio i te Hebera 4:12. *

E TE MAU TAEAE, A FAAITE I TO OUTOU TAIVA ORE

12, 13. (a) Mai te aha te huru o Elisaia a haapiihia ’i o ’na? (b) Mea nafea Iehova i te haamaitairaa i te taiva ore o Elisaia?

12 E te mau taeae apî, e hinaaro te amuiraa i ta outou tauturu! Eaha te nehenehe e tauturu ia outou ia oaoa i roto i ta outou taviniraa ia Iehova? No te ite, e hi‘opoa ana‘e i te tahi mau tupuraa i roto i te oraraa o Elisaia, o tei haapii-atoa-hia ia amo i te hopoia.

13 A 3 000 matahiti a‘enei, ua parau te peropheta Elia i te hoê taata apî o Elisaia te i‘oa ia riro ei tauturu na ’na. Ua farii oioi Elisaia e ua rave o ’na ma te taiva ore i te ohipa haehaa no te peropheta. (Arii 2, 3:11) E ono matahiti i te maoro, ua haapii Elia ia Elisaia. E a fatata ’i te ohipa a Elia i te hope i Iseraela, ua parau o ’na i ta ’na tauturu e e nehenehe ta ’na e faaea i te tavini ia ’na. E toru râ taime to Elisaia parauraa ’tu: “E ore au e faarue ia oe.” Ua faaoti papu o ’na e faaea noa e to ’na ra taata haapii. E ua haamaitai Iehova i te taiva ore o Elisaia ma te faatia ia ’na ia ite ia Elia ia ravehia na roto i te hoê puahiohio.—Arii 2, 2:1-12.

14. (a) E nafea te mau taeae e nehenehe ai e pee i te hi‘oraa o Elisaia? (b) No te aha mea faufaa ’i ia faaite i te taiva ore?

14 Te haapiihia ra anei oe ia amo i te hopoia? E nafea oe e nehenehe ai e pee i te hi‘oraa o Elisaia? A farii oioi i te ohipa e horoahia mai noa ’tu e mea haehaa. A hi‘o i te taeae e haapii ra ia oe mai to oe hoa. A faaite ia ’na i to oe mauruuru no ta ’na e rave ra no oe. E i to oe atoa hinaaro e tamau i te pee i ta ’na e haapii mai ra. E te mea faufaa ’tu â, a rave i ta oe ohipa ma te taiva ore. No te aha? Ia faaite oe e e taeae taiva ore oe o te nehenehe e tiaturihia, e papu i te mau matahiapo e te hinaaro ra Iehova ia fana‘o oe hau atu â hopoia i roto i te amuiraa.—Sal. 101:6; a taio i te Timoteo 2, 2:2.

A FAATURA I TE MAU MATAHIAPO ARAVIHI

15, 16. (a) Mea nafea Elisaia i te faaiteraa i to ’na faatura no to ’na taata haapii? (A hi‘o i te hoho‘a matamua.) (b) No te aha te tahi atu mau peropheta i tiaturi ai ia Elisaia?

15 Te faaite atoa ra te aamu o Elisaia e mea faufaa no te mau taeae i teie mahana ia faatura i te mau matahiapo aravihi. I muri iho i te farereiraa i te hoê pǔpǔ peropheta i Ieriko, ua haere Elia raua Elisaia i te anavai Ioridana. I reira, ‘rave ihora Elia i to ’na ahu, ua taviri ihora, e ua tairi ihora i taua pape ra, taa ê atura.’ Haere ihora raua i te tahi pae o te anavai na nia i te repo mǎrô a “paraparau noa ’i.” Ua tamau  noa Elisaia i te horoa i te tari‘a faaroo i te mau parau atoa a to ’na taata haapii. Aita roa ’tu o ’na i mana‘o e ua ite pauroa o ’na. I muri iho, ravehia ihora Elia na roto i te hoê puahiohio e ho‘i a‘era Elisaia i te anavai Ioridana. I reira, tairi ihora Elisaia i te pape e te ahu o Elia e ua parau a‘era: “Teihea te Atua o Elia ra o Iehova?” Taa ê faahou atura te pape.—Arii 2, 2:8-14.

16 Ua tapao anei oe e ua tuea te semeio matamua a Elisaia i te semeio hopea a Elia? Eaha ta te reira e haapii mai ra? Aita Elisaia i mana‘o e i te mea o ’na te peropheta i teie nei, e mea tia ia taa ê ta ’na mau ohipa i ta Elia. Ua pee maite râ o ’na i te huru raveraa a Elia. Ua faaite te reira i to ’na faatura no to ’na taata haapii e ua tauturu i te tahi atu mau peropheta ia tiaturi ia Elisaia. (Arii 2, 2:15) Ua tavini o ’na ei peropheta e 60 matahiti i te maoro e ua horoa Iehova ia ’na ra te puai no te rave i te semeio e rave rahi atu â i ta Elia. Eaha ïa te haapiiraa no te mau taeae e haapiihia ra ia amo i te hopoia?

17. (a) E nafea te mau taeae e nehenehe ai e pee i te haerea o Elisaia? (b) E nafea Iehova e nehenehe ai e faaohipa i te mau taeae taiva ore o te fana‘o ra i te haapiiraa?

17 A fana‘o ai oe hau atu â hopoia i roto i te amuiraa, eiaha oe e mana‘o e mea tia ia taa ê ta oe mau ohipa i tei ravehia i na mua ’‘e. A haamana‘o: e ravehia te tahi tauiraa no te hoê hinaaro i roto i te amuiraa aore ra no te pee i te faaueraa a te faanahonahoraa a Iehova. Eiaha oe e rave i te mau tauiraa no to oe noa hinaaro. Ma te tamau noa i te faaohipa i te mau huru raveraa a Elia, ua tauturu Elisaia i te tahi atu mau peropheta ia tiaturi ia ’na e ua faaite i to ’na faatura no to ’na taata haapii. Hoê â huru ia tamau oe i te faaohipa i te mau huru raveraa niuhia i nia i te Bibilia a to oe mau taata haapii. E faaite oe i to oe faatura no te mau matahiapo aravihi e e tiaturi to oe mau taeae e tuahine ia oe. (A taio i te Korinetia 1, 4:17.) A aravihi atu â ’i oe, e rave oe i te mau tauiraa o te tauturu i te amuiraa ia pee i te faanahonahoraa a Iehova o te haere noa ra i mua. E e nehenehe Iehova e tauturu ia oe ia rave i te mau ohipa rahi a‘e i ta to oe mau taata haapii, mai ta ’na i rave i nia ia Elisaia.—Ioa. 14:12.

18. No te aha mea faufaa ’i ia haapii i te mau taeae i roto i te mau amuiraa i teie nei â?

18 Te tiaturi nei matou e turai te mau mana‘o tauturu i roto i teie tumu parau e i to na mua ’tu i te matahiapo e rave rahi ia faataa i te taime no te haapii i te mau taeae. Oia atoa ia ineine te mau taeae ia haapiihia ratou e ia faaohipa i ta ratou i haapii mai no te haapao i te nunaa o Iehova. E haapuai teie haapiiraa i te mau amuiraa atoa na te ao e e tauturu ia tatou taitahi ia vai taiva ore i te mau taime faufaa mau i mua nei.

^ par. 5 Eaha te rave ia faaite te hoê taeae apî i te hoê huru feruriraa î i te paari, i te haehaa e i te tahi atu mau huru maitatai faufaa no te tavini i roto i te amuiraa? E nehenehe te mau matahiapo e feruri e faatoroa ia ’na ei tavini tauturu noa ’tu e aita o ’na i naea ’tura e 20 matahiti.—Tim. 1, 3:8-10, 12; a hi‘o i Te Pare Tiairaa o te 1 no Tiurai 1989, api 29 (Farani).

^ par. 11 E nehenehe oe e aparau i nia i te mau mana‘o faufaa itehia i roto i Te Pare Tiairaa o te 1 no Eperera 2012, api 20-22, paratarafa 8-13; e te buka “Ia vai maite outou i roto i te here o te Atua,” pene 16, paratarafa 1-3.