Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) MATI 2015

Eaha ta te parabole o te mau taleni e haapii mai ra?

Eaha ta te parabole o te mau taleni e haapii mai ra?

“Tuu atura oia i ta te tahi, e pae ïa taleni, e piti ta te tahi, hoê ta te tahi.”—MAT. 25:15.

1, 2. No te aha Iesu i faatia ’i i te parabole o te mau taleni?

UA FAATIA Iesu i te parabole o te mau taleni no te haapapu i ta ’na mau pǐpǐ faatavaihia eaha ta ratou hopoia. Teie râ, no te mau pǐpǐ atoa a Iesu teie parabole. No reira, noa ’tu e tiaturiraa to tatou no te ora i te ra‘i aore ra i te fenua, e titauhia ia haapii tatou i te auraa o teie parabole.

2 I teihea taime to Iesu faatiaraa i teie parabole? A horoa ’i oia i ta ’na mau pǐpǐ i te hoê tapao o te faaite ra e ua arii mai oia e ua haamata te anotau hopea. (Mat. 24:3) E tuhaa ïa te parabole o te mau taleni o teie tapao e te tupu nei te reira i to tatou tau.

3. Eaha ta tatou e haapii i roto i te mau parabole o te Mataio pene 24 e 25?

3 I te taime a faatia ’i Iesu i te parabole o te mau taleni, ua faatia oia e toru atu â parabole. E tuhaa atoa to te reira o te tapao o te anotau hopea. Te faataa ra teie mau parabole atoa i te mau huru maitatai taa maitai te titauhia ia faatupu ta ’na mau pǐpǐ. E nehenehe tatou e taio i teie mau parabole i roto i te Mataio 24:45 tae atu i te 25:46. Tei nia  te parabole matamua i te tavini haapao maitai, te pǔpǔ iti Kerisetiano faatavaihia na ratou te hopoia e haapii i te nunaa o Iehova. E titauhia ia vai taiva ore ratou e ia haapao maitai. * Te parabole i muri iho, no nia ïa i na paretenia hoê ahuru. I roto i teie parabole, ua faaara o Iesu i te mau Kerisetiano faatavaihia e e titauhia ia ineine ratou e ia vai ara no te mea aita ratou i ite i te mahana aore ra te hora e tae mai ai oia. * I muri iho, faatia ihora Iesu i te parabole o te mau taleni no te haapii i te mau Kerisetiano faatavaihia atoa e e titauhia ia ohipa puai no te haapao i ta ratou mau hopoia Kerisetiano. I reira, faatia ihora Iesu i te parabole o te mamoe e te puaaniho, no nia iho â râ i te feia e tiaturi ra e ora i nia i te fenua. Ua haapapu oia e e titauhia ia vai taiva ore noa ratou e ia tutava ratou i te tauturu i to ratou mau taeae faatavaihia. * E faataa teie tumu parau i te auraa o te parabole o te mau taleni.

UA HOROA TE HOÊ TAATA I TA ’NA MAU TAVINI I TE HOÊ TINO MONI RAHI

4, 5. I roto i te parabole, te faahoho‘a ra te taata ia vai, e eaha te hoê taleni?

4 A taio i te Mataio 25:14-30. I roto i te parabole o te mau taleni, ua faahiti Iesu i te hoê taata o tei haere no te hoê tere. I roto i te hoê â huru parabole, ua faahiti Iesu i te hoê taata tei haere no te hoê tere no te riro mai ei arii. * (Luka 19:12) E rave rahi matahiti, ua faaite ta tatou mau papai e i roto i na parabole e piti, te faahoho‘a ra teie taata ia Iesu o tei haere i te ra‘i i te matahiti 33. Teie râ, aita Iesu i riro ei arii i te taime a haere ai oia i te ra‘i. Ua tiai oia tae atu i te matahiti 1914 a tuuhia ’i to ’na mau enemi “ei taahiraa avae no ’na.”—Heb. 10:12, 13.

5 Ua parau Iesu e e vau taleni ta te taata i roto i te parabole. E moni rahi roa teie. * Hou taua taata ra a reva ai, ua horoa oia i teie moni i ta ’na mau tavini. Ua parau oia ia ratou ia faaohipa i teie moni ia rahi atu â te reira. Mea faufaa roa te moni no teie taata. Mea faufaa roa atoa ïa te tahi ohipa no Iesu. Eaha ïa? O te ohipa ïa ta ’na i rave i te fenua nei.

“E faateitei i to outou mata, e hi‘o i te mau aua ra, ua teatea ïa i teie nei ua auhune”

6, 7. Te faahoho‘a ra te mau taleni i te aha?

6 No Iesu, e ohipa faufaa roa te pororaa. Ua ite oia i te taata e rave rahi ia riro mai ei pǐpǐ na ’na. (A taio i te Luka  4:43.) Teie râ, ua ite oia e mea rahi â te ohipa e mea rahi â te taata te farii i te parau apî oaoa. Ua parau oia i ta ’na mau pǐpǐ: “E faateitei i to outou mata, e hi‘o i te mau aua ra, ua teatea ïa i teie nei ua auhune.” (Ioa. 4:35-38) Eita te hoê taata faaapu maitai e faarue noa i te hoê aua tei ineine no te auhune. Ua faaite o Iesu i te hoê â haerea. Hou oia a ho‘i ai i te ra‘i, ua faaue Iesu i ta ’na mau pǐpǐ: “E teie nei, e haere outou e faariro i te mau fenua atoa ei pǐpǐ.” (Mat. 28:18-20) Ma te na reira, ua horoa Iesu i te hoê tao‘a faufaa roa na ratou, te hopoia faufaa roa e poro.—Kor. 2, 4:7.

7 Mai te taata o tei horoa i te moni i ta ’na mau tavini, ua horoa Iesu i ta ’na mau pǐpǐ faatavaihia te ohipa e faariro i te taata ei pǐpǐ. (Mat. 25:14) No te reira, te faahoho‘a ra te mau taleni i te hopoia e poro e e faariro i te taata ei pǐpǐ.

8. Noa ’tu e ua horoa te fatu i ta ’na tavini taitahi i te hoê tino moni taa ê, eaha ta ’na i hinaaro ia ratou?

8 Ua parau Iesu e ua horoa te fatu e pae taleni i te tavini matamua, e piti taleni i te piti o te tavini e hoê taleni i te toru o te tavini. (Mat. 25:15) Ua horoa te fatu i ta ’na tavini taitahi i te hoê tino moni taa ê, teie râ, ua hinaaro oia ia  horoa ratou paatoa i tei maraa ia ratou no te faarahi i ta ’na moni. Oia atoa Iesu, ua hinaaro oia ia horoa ta ’na mau pǐpǐ faatavaihia i tei maraa ia ratou i roto i te ohipa pororaa. (Mat. 22:37; Kol. 3:23) I te Penetekose 33, ua haamata te mau pǐpǐ a Iesu i te faariro i te taata o te mau nunaa atoa ei pǐpǐ. E a taio ai tatou i te buka Bibilia o te Ohipa, e ite-maitai-hia e ua ohipa puai iho â ratou. *Ohi. 6:7; 12:24; 19:20.

E FAAOHIPA TE MAU TAVINI I TE MAU TALENI I TE ANOTAU HOPEA

9. (a) Ua aha na tavini taiva ore e piti i te moni e eaha ta tatou e haapii mai i te reira? (b) Eaha te titauhia ia rave te feia e tiaturi ra e ora i te fenua?

9 Te faahoho‘a ra na tavini matamua e piti, tei faaohipa maitai i te moni a to raua fatu, i te mau taeae e tuahine faatavaihia taiva ore i te anotau hopea. Mai 1919 iho â, ua horoa ratou i tei maraa ia ratou i roto i te ohipa pororaa. I roto i te parabole, ua horoahia i na tavini taitahi e piti te hoê tino moni taa ê, e ere râ i te auraa e e piti pǔpǔ taata faatavaihia taiva ore taa ê raua. Ua ohipa na tavini e piti ma te puai e ua tataipiti i te moni. O te feia faatavaihia noa anei râ te ohipa puai i roto i te pororaa e te ohipa haapiiraa? E ere. Eaha ta te parabole a Iesu o te mamoe e te puaaniho e haapii mai ra? E mea tia ia tauturu te feia e tiaturi ra e ora i te fenua e a muri noa ’tu i to Iesu mau taeae faatavaihia i roto i te ohipa pororaa e ia vai taiva ore ia ratou. E haamaitairaa taa ê teie no ratou. Oia mau, ‘hoê nǎnǎ’ te nunaa o Iehova o te ohipa puai ra no te poro e no te faariro i te taata ei pǐpǐ.—Ioa. 10:16.

10. Eaha te hoê tuhaa o te tapao o te haapapu ra e te ora nei tatou i te anotau hopea?

10 Te hinaaro nei Iesu ia ohipa puai ta  ’na mau pǐpǐ atoa no te faariro e rave rahi atu â taata ei pǐpǐ. O ta ratou ïa i rave i te senekele matamua. I teie anotau hopea, te tupu nei te parabole a Iesu o te mau taleni. Te rave ra anei ta ’na mau pǐpǐ i tera ohipa? Oia mau, aita i itehia a‘enei e rave rahi roa taata ia faaroo i te parau apî oaoa e ia riro mai ei pǐpǐ! No te ohipa puai e ravehia ra e te mau pǐpǐ atoa a Iesu, e hanere tausani taata te bapetizohia ra i te mau matahiti atoa. Te apiti atoa nei ratou i te ohipa pororaa. Te faaite maitai nei teie ohipa, oia atoa te mau faahopearaa maitai e itehia ra, e e tuhaa faufaa te pororaa o te tapao ta Iesu i horoa no nia i te anotau hopea. Aita e hape e te oaoa ra Iesu i ta ’na mau tavini!

Ua horoa Iesu i ta ’na mau tavini i te hoê tao‘a faufaa mau, te hopoia faufaa roa e poro (A hi‘o i te paratarafa 10)

AFEA TE FATU E TAE MAI AI?

11. Mea nafea tatou i ite ai e e tae mai Iesu i te ati rahi?

11 Ua parau Iesu: “E maoro a‘era, ho‘i maira [“tae maira,” Kingdom Interlinear] te fatu o taua mau tavini ra, faaau maira i te parau ia ratou.” (Mat. 25:19) E rave te Fatu, Iesu, i te reira i te pae hopea o te ati rahi. Mea nafea tatou i ite ai? I roto i ta ’na parau tohu itehia i roto i te Mataio pene 24 e 25, e rave rahi taime to Iesu faahitiraa i to ’na taeraa mai, haerea mai aore ra ho‘iraa mai. Ei hi‘oraa, ua parau oia e e ite te feia i te Tamaiti a te taata “i te haerea mai na nia i te ata o te ra‘i.” Te faahoho‘a ra te reira i te taime e haava ’i Iesu i te taata i te ati rahi. Ua faaara atoa oia i ta ’na mau pǐpǐ o te ora i te anotau hopea ia vai ara. Ua parau oia: “Aore hoi outou i ite i te hora e tae mai ai to outou Fatu” e “Ei te hora mana‘o-ore-hia e outou na e tae mai ai te Tamaiti a te taata nei.” (Mat. 24:30, 42, 44) No reira, i roto i te parabole o te mau taleni, ua faahiti atoa Iesu i te taime e tae mai ai oia no te haava i te taata e no te haamou i te ao a Satani. *

12, 13. (a) Eaha ta te fatu i parau i na tavini e piti, e no te aha? (b) I teihea taime e noaa ’i te tapaoraa hopea a te feia faatavaihia? (A hi‘o i te tumu parau tarenihia “ Haavahia ei taata tia a pohe ai.”) (c) Eaha te haamaitairaa a te taata tei turu i te feia faatavaihia?

12 A ho‘i mai ai te fatu i to ’na tere, ua  ite mai oia e ua noaa mai i te tavini matamua e pae atu â taleni e i te piti o te tavini e piti atu â taleni. Parau atura te fatu ia raua taitahi: “Ua tia roa, e teie nei tavini maitai e te haavare ore; o oe i haapao maitai i tena na tao‘a iti haihai, e faatiaau atu vau ia oe i nia iho i te mea rahi.” (Mat. 25:21, 23) Eaha ta te Fatu ra o Iesu e rave a tae mai ai oia?

13 Na mua noa ’‘e a haamata ’i te ati rahi, e horoa te Atua i te farii maitai hopea i te feia faatavaihia itoito o te ora noa ra i te fenua i tera taime. O ta ratou ïa tapaoraa hopea. (Apo. 7:1-3) I muri iho, hou Aramagedo, e haamaitai Iesu ia ratou ma te faatia ia ratou i te ora i te ra‘i. Eaha râ te tupu i nia i te mau taata e tiaturi ra e ora i te fenua e o tei turu i te feia faatavaihia i roto i te ohipa pororaa? E haavahia ratou ei mamoe a fana‘o atu ai i te ora i te fenua faaterehia e te Basileia o te Atua.—Mat. 25:34.

TE HOÊ TAVINI INO E TE FAATAU

14, 15. Ua parau anei Iesu e mea rahi te feia faatavaihia te riro mai ei tavini ino e te faatau? A faataa.

14 Te faahiti atoa ra te parabole i te tavini tei fana‘o hoê noa taleni. Aita oia i faarahi i te moni na to ’na fatu aore ra i tuu i te fare moni ia noaa mai te apî. Ua tanu râ oia i te moni. Ua parau te fatu e e tavini ino e te faatau oia. Ua rave te fatu i te taleni a te tavini ino e ua horoa ’tu i te tavini matamua. I muri iho, ua huri o ’na i te tavini ino “i roto i te pouri” i reira oia i te oto-noa-raa.—Mat. 25:24-30; Luka 19:22, 23.

15 A parau ai Iesu e mea ino e te faatau hoê o na tavini e toru, aita oia i parau  e e riro mai hoê taata faatavaihia i nia e toru mai teie tavini. Ua ite tatou i te reira ma te faaau i teie parabole i e piti atu â parabole. I roto i te parabole o te tavini haapao maitai e te paari, ua faahiti Iesu i te hoê tavini ino o tei rave ino i te tahi atu mau tavini. Aita Iesu i mana‘o e e riro mai te mau melo o te tavini haapao maitai e te paari mai te tavini ino. Ua faaara râ Iesu i teie feia faatavaihia eiaha ratou ia riro mai mai te tavini ino. I roto i te parabole o na paretenia hoê ahuru, ua faahiti Iesu e pae paretenia maamaa. Aita râ oia i mana‘o e e riro mai te afaraa o te feia faatavaihia ei mea maamaa. Ua faaara râ Iesu i te ohipa e tupu ia ore ratou e ineine e e vai ara. * Oia atoa, i roto i te parabole o te mau taleni, aita Iesu i parau e e riro mai te taata faatavaihia e rave rahi i te anotau hopea ei tavini ino e te faatau. Ua faaara oia i te feia faatavaihia eiaha ia riro mai mai te hoê tavini ino, ia tutava râ ratou i te poro ma te itoito.—Mat. 25:16.

E haamaitai Iesu i ta ’na mau pǐpǐ atoa o te ohipa puai ra i roto i te ohipa pororaa

16. (a) Eaha na haapiiraa e piti ta tatou e nehenehe e huti mai i te parabole o te mau taleni? (b) Mea nafea teie tumu parau i tauturu mai ai ia taa i te parabole o te mau taleni? (A hi‘o i te tumu parau tarenihia “ Eaha ta tatou i taa no nia i te parabole o te mau taleni?”)

16 Eaha na haapiiraa e piti ta tatou e nehenehe e huti mai i te parabole o te mau taleni? A tahi, ua horoa Iesu i ta ’na mau pǐpǐ faatavaihia i te hoê tao‘a faufaa, te hopoia e poro e e faariro i te taata ei pǐpǐ. Te piti, te hinaaro ra Iesu ia ohipa puai tatou paatoa i roto i te pororaa. Ia faaitoito tatou ma te taiva ore i roto i teie ohipa e ia faaroo e ia vai taiva ore noa tatou ia Iesu, mea papu e e haamaitai mai oia.—Mat. 25:21, 23, 34.

^ par. 3 Ua faataahia o vai te tavini haapao maitai e te paari i roto i Te Pare Tiairaa o te 15 no Tiurai 2013, api 21-22, paratarafa 8-10.

^ par. 3 Ua faataa te tumu parau i na mua ’tu o vai te mau paretenia.

^ par. 3 Ua faataahia te parabole o te mamoe e te puaaniho i roto i Te Pare Tiairaa o te 15 no Atopa 1995, api 23-28, e i roto atoa i te tumu parau i muri iho o teie vea.

^ par. 5 I te tau o Iesu, e ohipa te hoê taata e 20 matahiti i te maoro no te noaa mai i te moni tei tuea i te hoê taleni.

^ par. 8 I muri noa ’‘e i te poheraa o te mau aposetolo, ua parare te ohipa apotata i roto i te taatoaraa o te mau amuiraa. E rave rahi matahiti i te maoro, mea iti roa tei ravehia i roto i te ohipa pororaa. I “te auhuneraa” râ, aore ra i te tau hopea, e haamata faahou te ohipa pororaa. (Mat. 13:24-30, 36-43) A hi‘o i Te Pare Tiairaa o te 15 no Tiurai 2013, api 9-12.

^ par. 15 A hi‘o i te paratarafa 13 o te tumu parau “‘E ara’ anei oe?” o teie vea.