Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2015

A pee i te itoito e te haroaroaraa o Iesu

A pee i te itoito e te haroaroaraa o Iesu

“O ta outou i hinaaro na, ore noa ’i te ite ia ’na; . . . i te faarooraa ’tu, ore noa ’i outou i te hi‘o atu ia ’na i teie nei.”—PET. 1, 1:8.

1, 2. (a) E nafea tatou e fana‘o ai i te ora mure ore? (b) E nafea tatou e tapea noa ’i i to tatou tere?

A RIRO mai ai ei Kerisetiano, mai te huru ra e ua haamata tatou i te hoê tere. Ia vai taiva ore tatou i te Atua, e manuïa to tatou tere e e nehenehe tatou e ora e a muri noa ’tu. Te parau ra Iesu: “Area te mau papu e tae noa ’tu i te hopea ra, oia te ora.” (Mat. 24:13) Oia mau, ia tae i te hopea o to tatou tere, e mea titauhia ia vai taiva ore noa e tae roa ’tu i te hopea, te hopea o to tatou oraraa aore ra te hopea o teie nei ao ino. E titauhia râ ia vai ara noa ia ore teie ao ia haafariu ê ia tatou. (Ioa. 1, 2:15-17) E nafea e tapea noa ’i i to tatou tere?

2 E hi‘oraa tia roa o Iesu no tatou. Ma te haapii i ta te Bibilia e parau ra no nia i te tere aore ra huru oraraa o Iesu, e nehenehe tatou e haapii no nia ia ’na. E here e e faatupu tatou i te faaroo ia ’na. (A taio i te Petero 1, 1:8, 9.) Ua  parau mai te aposetolo Petero e ua vaiiho mai o Iesu i te hi‘oraa no tatou ia pee. (Pet. 1, 2:21) Ia pee maite tatou i to ’na hi‘oraa, e faaoromai tatou e tae roa ’tu i te hopea. * I roto i te tumu parau matamua, ua haapii mai tatou e nafea ia pee i te haehaa e te aroha o Iesu. I roto i teie tumu parau, e haapii mai tatou e nafea ia pee i to ’na itoito e haroaroaraa.

E TAATA ITOITO O IESU

3. Eaha te itoito, e e nafea tatou e fana‘o ai i te reira?

3 Te itoito, o te hoê ïa huru aau o te horoa mai i te puai e o te tauturu mai ia faaoromai i te mau fifi. E nehenehe atoa te itoito e tauturu mai ia paturu i te mea maitai, ia vai mǎrû noa e ia vai taiva ore i te Atua i mua i te fifi. Ua taaihia te itoito i te mǎta‘u, te tiaturiraa e te here. E nafea ïa? Ia mǎta‘u tatou i te faariri i te Atua, eita tatou e vaiiho i te mǎta‘u taata ia ohipa i nia ia tatou. (Sam. 1, 11:7; Mas. 29:25) E tauturu mai te tiaturiraa ia Iehova ia tiatonu i to tatou a muri a‘e, eiaha râ i to tatou mau ati. (Sal. 27:14) E turai mai te here pipiri ore ia faaite i te itoito noa ’tu te hamani-ino-raa. (Ioa. 15:13) E itoitohia tatou a tiaturi ai i te Atua e a pee ai i te hi‘oraa o ta ’na Tamaiti.—Sal. 28:7.

4. Mea nafea Iesu i te faaiteraa i te itoito i roto i te hiero? (A hi‘o i te hoho‘a matamua.)

4 I te 12raa o to ’na matahiti, ua faaite Iesu i te itoito ‘i roto i te hiero, a parahi ai oia i ropu i te mau orometua.’ (A taio i te Luka 2:41-47.) Ua ite maitai teie mau orometua i te ture a Mose, oia atoa râ te mau tutuu ati Iuda tei haafifi hoi i te taata ia pee i te Ture. Aita râ to ratou ite i tapea ia Iesu ia paraparau ia ratou. Aita o ’na i mǎta‘u. Ua tamau o ’na i te “ui” ia ratou eiaha te mau uiraa matauhia no ǒ mai i te hoê tamaroa apî mai ia ’na. Te mau uiraa hohonu râ tei huti i te ara-maite-raa e tei haaferuri i teie mau orometua. E mai te peu e ua tamata te mau orometua i te faahema ia Iesu ma te mau uiraa e tupu ai te aimârôraa, aita ratou i manuïa. Ua maere te feia atoa e te mau orometua “i to ’na ite e ta ’na parau.” Ua paturu mau â Iesu i te parau mau itehia i roto i te Parau a te Atua ma te itoito!

5. Mea nafea Iesu i te faaiteraa i te itoito i roto i ta ’na taviniraa?

5 I roto i ta ’na taviniraa, ua faaite Iesu i te itoito i roto i te tuhaa rau. Ei hi‘oraa, ua faaite o ’na i te taata e te haavare ra te mau tia faaroo ia ratou ma te haapii atu i te haapiiraa hape. (Mat. 23:13-36) Aita atoa Iesu i vaiiho i te ao ia haapi‘o ia ’na. (Ioa. 16:33) Ua tamau noa o ’na i te poro noa ’tu te patoiraa. (Ioa. 5:15-18; 7:14) E e piti taime o ’na i te tamâraa i te hiero ma te tiahi i te feia e hinaaro e haaviivii i te haamoriraa mau i ǒ.—Mat. 21:12, 13; Ioa. 2:14-17.

Ua parau atu Iesu ma te itoito i te tiripuna teitei ati Iuda e o ’na te Mesia e te Tamaiti a te Atua

6. Mea nafea Iesu i te faaiteraa i te itoito i te mahana hopea o to ’na ora i te fenua?

6 E hi‘o ana‘e i te itoito o Iesu i te mahana hopea o to ’na ora i te fenua. Ua ite Iesu eaha te tupu ia taiva Iuda ia ’na. Noa ’tu râ, i te oroa Pasa, ua parau o ’na  ia Iuda: “Ta oe e rave ra ia peepee i te rave.” (Ioa. 13:21-27) I te ô i Getesemane, ua parau o ’na ma te itoito i te mau faehau tei haere mai e tapea ia ’na e o ’na o Iesu. Noa ’tu e ua ite o ’na fatata o ’na i te pohe, ua paruru o ’na i ta ’na mau pǐpǐ ma te parau i te mau faehau: “E tuu atu ia ratou nei ia haere na.” (Ioa. 18:1-8) I muri a‘e, a uiui ai te tiripuna teitei ati Iuda ia ’na, ua parau atu Iesu ma te itoito e o ’na te Mesia e te Tamaiti a te Atua. Aita o ’na i mǎta‘u noa ’tu e ua imi noa te tahu‘a rahi i te tumu no te haapohe ia ’na. (Mar. 14:60-65) Ua tapea Iesu i to ’na hapa ore i te Atua e ua pohe i nia i te pou haamauiuiraa. I muri iho i te hutiraa i te aho no te taime hopea, ua tuô o ’na: “Ua oti.”—Ioa. 19:28-30.

A PEE I TE ITOITO O IESU

7. E te mau taurearea, eaha to outou huru aau ia riro ei Ite no Iehova, e e nafea outou e faaite ai e mea itoito outou?

7 E nafea e pee ai i te itoito o Iesu? I te fare haapiiraa. E taurearea ma, mea itoito outou a parau ai i to outou mau hoa haapiiraa e ia vetahi ê e Ite no Iehova outou. Te faaite nei ïa outou i to outou oaoa ia amo i te i‘oa o Iehova noa ’tu e e faaooo atu vetahi. (A taio i te Salamo 86:12.) E hinaaro paha vetahi ia tiaturi outou i te tauiuiraa o te mau mea ora. E nehenehe râ outou e tiaturi e e parau mau ta te Bibilia e faaite ra no nia i te poieteraa. E nehenehe e faaohipa i te buka rairai Cinq questions à se poser sur l’origine de la vie no te pahono i te feia e hinaaro i “te tiaturi i roto ia outou.” (Pet. 1, 3:15) E oaoa ïa outou i te ite e ua paturu outou i te parau mau Bibilia ma te itoito!

8. No te aha e nehenehe ai e poro ma te itoito?

8 I roto i ta tatou taviniraa. Ei Kerisetiano mau, mea faufaa ia tamau i te faaite “i te parau a te Fatu [Iehova] ma te mǎta‘u ore.” (Ohi. 14:3) No te aha e nehenehe ai e poro ma te itoito? A tahi, ua ite tatou e no roto mai ta tatou poroi i te Bibilia. O te parau mau te reira. (Ioa. 17:17) Te piti, ‘e hoa rave ohipa tatou no te Atua’ e ua horoa mai o ’na i to ’na varua mo‘a no te tauturu mai. (Kor. 1, 3:9; Ohi. 4:31) Te toru, te here nei tatou ia Iehova e i te taata. E hinaaro ïa tatou e rave i tei nehenehe no te faaite i te parau apî oaoa. (Mat. 22:37-39) No to tatou itoito, eita tatou e faaea i te poro. Ua faaoti papu tatou i te haapii i te parau mau i te feia tei “haapourihia,” aore ra tei haavarehia e te mau tia faaroo. (Kor. 2, 4:4) E e tamau tatou i te poro i te parau apî oaoa noa ’tu e e patoi vetahi ê i ta tatou poroi aore ra e hamani ino mai ia tatou.—Tes. 1, 2:1, 2.

9. E nafea e faaite ai i te itoito i roto i te ati?

9 I roto i te ati. Ia tiaturi tatou i te Atua, e horoa mai o ’na i te faaroo e te itoito titauhia no te faaoromai i te fifi. Ia pohe te hoê taata herehia, e oto tatou. Eita râ tatou e ere i te tiaturiraa. Ua papu ia tatou e e haapuai mai “te Atua no ’na ana‘e te mahanahana.” (Kor. 2, 1:3, 4; Tes. 1, 4:13) A ma‘ihia ’i aore ra a pepe ai, e mauiui paha tatou. E patoi râ tatou i te rapaauraa atoa ta te Atua e ore e au. (Ohi. 15:28, 29) A hepohepo ai, e ‘faahapa mai paha to tatou aau ia tatou.’ Eita râ tatou e tuu. E tiaturi tatou  ia Iehova o “te fatata nei . . . i te feia aau paruparu.” *Ioa. 1, 3:19, 20; Sal. 34:18.

E TAATA HAROAROA O IESU

10. Eaha te haroaroaraa, e e nafea te hoê Kerisetiano haroaroa e paraparau ai e e haa ’i?

10 Te haroaroaraa, o te aravihi ïa no te taa i te taa-ê-raa i rotopu i te maitai e te ino a maiti atu ai i te rave i te mea maitai. (Heb. 5:14) E rave te hoê Kerisetiano haroaroa i te mau faaotiraa o te haapaari i to ’na mau taairaa e te Atua. E haapao maitai o ’na eiaha e faahuru ê i te tahi atu ma ta ’na mau parau. Te faaoaoa nei râ o ’na ia Iehova no te mea te maiti nei o ’na i te mau parau o te tauturu ia vetahi ê. (Mas. 11:12, 13) Eita o ’na “e riri vave.” (Mas. 14:29) “E ore e pi‘o to ’na haerea,” oia hoi e rave noa o ’na i te mau faaotiraa maitai i roto i to ’na oraraa. (Mas. 15:21) E nafea ia riro ei taata haroaroa? E mea tia ia haapii tatou i te Parau a te Atua e ia faaohipa i ta tatou i haapii mai. (Mas. 2:1-5, 10, 11) E nehenehe atoa e haapii e e pee i to Iesu hi‘oraa tia roa o te haroaroaraa.

11. Mea nafea Iesu i te faaiteraa i te haroaroaraa ma ta ’na huru paraparau?

11 Ua faaite Iesu i te haroaroaraa i roto i ta ’na mau parau e haaraa atoa. Ta ’na huru paraparau. A poro ai i te parau apî oaoa, ua faaohipa Iesu i te mau parau mǎrû i maere ai te feia i faaroo ia ’na. (Mat. 7:28; Luka 4:22) E pinepine o ’na i te taio aore ra i te faahiti i te Parau a te Atua. Ua ite maitai o ’na eaha te irava e faaohipa i roto i tera e tera tupuraa. (Mat. 4:4, 7, 10; 12:1-5; Luka 4:16-21) Ua putapû roa atoa te taata i ta Iesu mau parau a faaroo ai ia ’na ia faataa i te mau Papai. I muri a‘e i to ’na tia-faahou-raa, ua paraparau Iesu i na pǐpǐ e piti e haere ra i Emausa. Ua faataa ’tu Iesu i te auraa o te mau papai te faahiti ra ia ’na. Ua parau teie na pǐpǐ i muri a‘e: “E ere, e hoa, i anaanatae to tâua aau ia ’na i paraparau mai ia tâua i te aratia ra, a faaite mai ai ia tâua i te auraa i te mau parau i papaihia ra.”—Luka 24:27, 32.

12, 13. A faataa mai na i te tahi mau hi‘oraa e faaite ra e e ore Iesu e ru i te riri e i to ’na huru au noa.

12 To ’na huru aau e haerea. Ua tauturu te haroaroaraa ia Iesu ia “ore e ru i te riri.” (Mas. 16:32) E nehenehe ta ’na e haavî i to ’na huru aau e e faaite i te “mǎrû.” (Mat. 11:29) Mea faaoromai noa Iesu i nia i ta ’na mau pǐpǐ noa ’tu ta ratou mau hape. (Mar. 14:34-38; Luka 22:24-27) E ua faaea hau noa a hamani-ino-hia ’i oia.—Pet. 1, 2:23.

13 Ua tauturu te haroaroaraa ia Iesu ia faaite i te huru au noa. Ua taa ia ’na no te aha i haamauhia ’i te ture a Mose  e ua ohipa te reira i nia i to ’na huru i nia i te taata. Ei hi‘oraa, a feruri na i te vahine tei ‘pohehia i te tapahi.’ (A taio i te Mareko 5:25-34.) Tei rotopu teie vahine i te hoê nahoa taata, ua tapea o ’na i te ahu o Iesu e ua ora mai o ’na. Ia au i te ture a Mose, mea viivii o ’na. Eiaha roa ’tu ïa o ’na ia tapea i te tahi atu. (Lev. 15:25-27) Aita râ Iesu i parau iria ’tu ia ’na. No te aha? No te mea ua ite oia e mea faufaa a‘e te mau huru maitatai mai “te aroha, e te haapao mau ra” i te auraro etaeta i te ture a Mose. (Mat. 23:23) Ua parau mǎrû atu Iesu ia ’na: “E tau tamahine, i ora oe i to faaroo; a haere ma te hau, e ma te ora i to ma‘i.” Ua turai te haroaroaraa ia Iesu ia faaite i te mǎrû. Auê ïa hi‘oraa nehenehe mau!

14. Ua maiti Iesu i te rave i te aha, e mea nafea o ’na i te haapao-noa-raa i ta ’na taviniraa?

14 To ’na huru oraraa. Ua faaite Iesu i te haroaroaraa ma to ’na huru oraraa. Ua maiti o ’na i te taviniraa ei toroa no ’na. (Luka 4:43) Ua rave atoa Iesu i te mau faaotiraa tei tauturu ia ’na ia haapao noa e ia faaoti i teie ohipa. Ei hi‘oraa, e huru oraraa au noa to ’na. E nehenehe ïa ta ’na e faaohipa i to ’na taime e itoito i roto i te taviniraa. (Luka 9:58) Ua ite Iesu e mea faufaa roa ia faaineine i te tahi atu ia tamau ratou i te ohipa pororaa i muri a‘e i to ’na poheraa. (Luka 10:1-12; Ioa. 14:12) E ua fafau o ’na i ta ’na mau pǐpǐ e e tauturu o ’na ia ratou i roto i te taviniraa “e tae noa ’tu i te hopea o teie nei ao.”—Mat. 28:19, 20.

A PEE I TE HAROAROARAA O IESU

E tauturu mai te haroaroaraa ia taa i te hinaaro o te taata e ia maiti maitai i ta tatou mau parau (A hi‘o i te paratarafa 15)

15. E nafea e faaite ai i te haroaroaraa ma ta tatou huru paraparau?

15 E nafea e pee ai i te haroaroaraa o Iesu? Ta tatou huru paraparau. I nia i to tatou mau taeae e tuahine, e faaohipa tatou i te mau parau o te faaitoito ia ratou, eiaha o te haaparuparu atu. (Eph. 4:29) A poro ai i te Basileia o te Atua, e mea tia “ia rapaauhia” ta tatou mau parau “i te miti,” oia hoi ia faatano tatou i ta tatou mau parau. (Kol. 4:6) E tutava tatou i te taa eaha te hinaaro o te taata e eaha ta ratou e anaanatae ra a maiti maitai atu ai i ta tatou mau parau. Ia  faaohipa tatou i te mau parau mǎrû, e hinaaro te taata e faaroo ia tatou e e haaputapû ta tatou poroi i to ratou aau. E a faataa ’i i ta tatou mau tiaturiraa, e taio roa ’tu tatou i roto i te Bibilia. O te Parau a te Atua hoi te aratai. Ua ite tatou e mea puai a‘e te poroi Bibilia i te tahi noa ’‘e mea ta tatou e nehenehe e parau.—Heb. 4:12.

16, 17. (a) E nafea tatou e nehenehe ai e faaite i teie na huru maitatai: haere maine i te riri e huru au noa? (b) E nafea e haapao noa ’i i ta tatou taviniraa?

16 To tatou mau huru aau e haerea. E tauturu mai te haroaroaraa i mua i te faateimaharaa ia haavî i to tatou mau huru aau e e tauturu mai ia “haere maine hoi i te riri.” (Iak. 1:19) Ia faahuru ê mai te tahi atu, e tutava tatou i te taa no te aha ratou i paraparau ai aore ra i haa ’i mai tera. Mea ohie a‘e ïa ia faaore i te hapa e ia ore e riri atu. (Mas. 19:11) E tauturu atoa mai te haroaroaraa ia faaite i te huru au noa. E haamana‘o tatou e mea tia ore to tatou mau taeae e tuahine e te faaruru nei paha ratou i te fifi ta tatou e ore e taa maitai ra. Ua ineine tatou i te faaroo i to ratou mana‘o. E ia nehenehe, eita tatou e onoono i nia i to tatou iho mana‘o.—Phil. 4:5.

17 To tatou huru oraraa. Ua ite tatou e o te pororaa i te parau apî oaoa ta tatou haamaitairaa rahi roa ’‘e. E rave ïa tatou i te mau faaotiraa o te tauturu mai ia haapao noa i ta tatou taviniraa. E maiti tatou i te tuu ia Iehova na mua roa i roto i to tatou oraraa. E oraraa au noa atoa to tatou. E nehenehe ïa tatou e faaohipa i to tatou taime e itoito no te poro i te parau apî oaoa hou a tae mai ai te hopea.—Mat. 6:33; 24:14.

18. E nafea tatou e tapea noa ’i i to tatou tere o te aratai i te ora mure ore, e eaha ta oe i faaoti papu e rave?

18 Ua haapii mai tatou i te tahi mau huru maitatai nehenehe mau o Iesu. Auê oaoa e! A feruri na i te mau maitai ia haapii i te tahi atu o to ’na mau huru maitatai e i te riro mai ia ’na. E faaoti papu ana‘e ïa e pee i to Iesu hi‘oraa. Ma te na reira, e tapea noa tatou i to tatou tere o te aratai i te ora mure ore e e haafatata ’tu â tatou ia Iehova.

^ par. 2 Ua papaihia te Petero 1, 1:8, 9 no te mau Kerisetiano e tiaturi ra e ora i nia i te ra‘i. E nehenehe atoa râ te mau parau a Petero e faaohipahia no te mau Kerisetiano e tiaturi ra e ora i te fenua e a muri noa ’tu.

^ par. 9 No te tahi mau hi‘oraa o te taata o tei faaite i te itoito i roto i te ati, a hi‘o i Te Pare Tiairaa o te 1 no Titema 2000, api 24-28; e te A ara mai na! o te 8 no Tenuare 1995, api 26-30.