Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2015

Te aratai ra Iehova i ta tatou ohipa haapiiraa na te ao

Te aratai ra Iehova i ta tatou ohipa haapiiraa na te ao

“O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te e‘atia maitai ia haere oe ra.”—ISA. 48:17.

1. Eaha tei haafifi i te ohipa pororaa?

MEA rahi te fifi ta te nunaa o Iehova i faaruru a haamata ’i i te poro i te parau apî oaoa a hau atu 130 matahiti a‘enei. * Mai te mau Kerisetiano matamua, e pǔpǔ iti ratou o tei poro i te hoê poroi au-ore-hia e te taata e rave rahi. No vetahi, mea ite ore teie mau taata. I muri a‘e, a hurihia ’i Satani i te fenua, ua hamani-ino-hia ratou. (Apo. 12:12) E mai reira mai, ua poro ratou i roto i teie “anotau hopea” e tupu ai te ati e rave rahi.—Tim. 2, 3:1.

2. Eaha ta Iehova i rave no te tauturu ia tatou ia poro?

2 Ua tauturu noa râ Iehova i to ’na nunaa. Te hinaaro ra o ’na ia poro ratou i te parau apî oaoa na te fenua atoa e  eita roa ’tu o ’na e vaiiho i te tahi noa ’‘e mea ia tapea i tera ohipa. Ua tauturu o ’na i to ’na nunaa ia haamori ia ’na mai ta ’na e hinaaro ma te faataa ê mai ia ratou i te haapaoraa hape. Ua na reira o ’na i na mua ’‘e a faatiamâ ’i i te mau Iseraela ia Babulonia. (Apo. 18:1-4) E e faufaahia tatou i ta Iehova mau haapiiraa. Te tauturu maira o ’na ia ora ma te hau te tahi e te tahi e te faaineine maira o ’na ia haapii i te tahi atu no nia ia ’na. (A taio i te Isaia 48:16-18.) E ere no te mea e te aratai ra Iehova i ta tatou ohipa e e tauiui noa o ’na i te mau tupuraa na te ao no te tauturu mai ia poro. Parau mau, ua faaohie te tahi mau tupuraa na te ao i ta tatou pororaa. Te faaruru noa nei râ tatou i te hamani-ino-raa e te tahi atu mau fifi no ǒ mai i te ao a Satani. E nehenehe ta tatou e poro maoti noa te tauturu a Iehova.—Isa. 41:13; Ioa. 1, 5:19.

3. Mea nafea te parau tohu a Daniela i te tupuraa?

3 Ua tohu Daniela e i te tau hopea, e maramarama te taata e rave rahi i te parau mau Bibilia. (A taio i te Daniela 12:4.) Na mua noa ’‘e “te tau hopea,” ua tauturu Iehova i to ’na nunaa ia taa i te mau haapiiraa Bibilia faufaa e ia patoi i te mau haapiiraa hape a te Amuiraa faaroo Kerisetiano. I teie mahana, te haapii nei to ’na nunaa i te parau mau Bibilia e ati a‘e te ao. Oia mau, ua tupu iho â te parau tohu a Daniela. Fatata e vau mirioni taata tei haapii i te parau mau e te haapii atoa nei i te tahi atu. Eaha ïa te tahi mau mea tei tauturu i te nunaa o Iehova ia poro na te ao atoa?

TE HURIRAA BIBILIA

4. Mai te matahiti 1900, ua hurihia te Bibilia na roto ehia rahiraa reo?

4 I teie mahana, e Bibilia ta e rave rahi e e tauturu mai te reira ia haapii i te taata i te parau apî oaoa. E ere râ mai tera i na mua ’‘e. Tau hanere matahiti, aita te mau tia o te Amuiraa faaroo Kerisetiano i hinaaro ia taio te taata i te Bibilia. Ua hamani ino roa atoa ratou i te feia tei taio i te reira e ua haapohe i te tahi mau taata tei huri i te Bibilia. I te mau matahiti 1800 râ, ua huri aore ra ua nenei te tahi mau faanahonahoraa i te Bibilia taatoa aore ra i te tahi mau tuhaa na roto e 400 reo. E mai te matahiti 1900, e Bibilia ta te taata e rave rahi. Noa ’tu râ, aita ratou i taa i ta te reira e haapii ra.

5. Eaha ta te mau Ite no Iehova i rave no te huri i te Bibilia?

5 Ua ite te nunaa o Iehova e e mea tia ia faaite ratou ia vetahi ê i ta te Bibilia e haapii ra. E ua na reira iho â ratou. I te omuaraa, ua faaohipa ratou i te huriraa Bibilia i vai na e ua pûpû atu na te taata. Mai 1950 ua pia ratou i te Huriraa o te ao apî o te mau Papai mo‘a, to ’na taatoaraa aore ra te tahi noa tuhaa, na roto hau atu 120 reo. I 2013, ua pia ratou i te Bibilia Beretane faaapîhia o te Huriraa o te ao apî. Mea ohie a‘e ia taa i te reira e ia huri. E ia faaohipa tatou i te hoê Bibilia ta te taata e taa, mea ohie a‘e ïa ia haapii ia ratou i te parau mau.

TE TAU HAU

6, 7. (a) O teihea mau tama‘i tei tupu i na 100 matahiti i mairi? (b) Mea nafea te tau hau i te tahi mau fenua i te tautururaa ia tatou ia poro?

6 Mea rahi te tama‘i tei tupu i na  100 matahiti i mairi, oia atoa na tama‘i rahi e piti. E mirioni taata tei pohe. No te aha ïa e parau ai e ua itehia te hau e mea nafea te reira i te tautururaa i te nunaa o Iehova ia poro? I te piti o te tama‘i rahi, na Nathan Knorr i aratai i te mau Ite no Iehova. I te hoê tairururaa i 1942, ua horoa o ’na i te oreroraa parau anaanatae mau “Te hau—E vai maoro anei?” Ua faataa te taeae Knorr i te parau tohu o te Apokalupo pene 17 e ua haapapu e aita i tae atura i te taime ia tupu Aramagedo. E ia hope te tama‘i, e itehia te hoê tau hau.—Apo. 17:3, 11.

7 E ere iho â ïa i te auraa e ua itehia te hau i te mau vahi atoa i muri a‘e i te tama‘i. E mirioni hoi tei pohe i roto i te tahi atu mau tama‘i i muri a‘e i te piti o te tama‘i rahi. I te fenua e rave rahi râ, ua itehia te tau hau o tei faaohie i te pororaa a te mau Ite no Iehova. Te faahopearaa? I te piti o te tama‘i rahi, aita i raea 110 000 Ite no Iehova. I teie nei râ mahana, fatata ratou i te vau mirioni! (A taio i te Isaia 60:22.) Oia mau, i te tau hau, e nehenehe tatou e poro i te parau apî oaoa i e rave rahi atu â taata.

TE MAU FAURAO

8, 9. Eaha tei faaohie i te mau tere, e no te aha te reira e tauturu ai ia tatou i roto i ta tatou ohipa?

8 A haamata ’i te nunaa o Iehova i te poro i Marite, e ere i te mea ohie ia haere i tera e tera vahi. I 1900, e 21 matahiti ïa i muri a‘e i te haamataraa i te nenei i Te Pare Tiairaa, e 8 000 noa pereoo i tera fenua e mea iti roa te purumu maitai. I teie nei râ mahana, ua hau atu i te hoê miria e te afa pereoo na te ao e mea rahi te purumu maitai i te rahiraa o te vahi. E nehenehe ïa e faaohipa i te pereoo e te purumu no te haere e poro i te taata i te vahi atea mau i te oire e i te vahi fifi ia haere atu. Noa ’tu râ e mea fifi ia rave i teie mau tere i ǒ tatou e e titauhia ia haere avae i nia e rave rahi kilometera, e rave tatou i tei nehenehe no te haere e no te poro i te taata i te mau vahi atoa.—Mat. 28:19, 20.

E rave tatou i tei nehenehe no te haere e no te poro i te taata i te mau vahi atoa

9 E faaohipa atoa tatou i te tahi atu mau faurao. E haponohia te mau Bibilia e te tahi atu mau papai na nia i te pereoo rarahi, te pahi e te pereoo auahi. Te auraa ïa e i roto noa tau hebedoma, e nehenehe te mau papai e afaihia i te mau taeae e tuahine i te mau vahi moemoe. Te rave atoa ra te mau tiaau haaati, te mau melo o te Tomite amaa, te mau mitionare e te tahi atu i te manureva no te horoa i te mau oreroraa parau i te mau tairururaa e no te tauturu i te mau amuiraa. Te reva atoa nei te mau melo o te Tino aratai e te tahi atu mau taeae no te pu rahi i te fenua e rave rahi no te faaitoito e no te haapii i to ratou mau taeae e tuahine. Te tauturu nei teie mau ravea atoa i te nunaa o Iehova ia vai hoê.—Sal. 133:1-3.

 TE REO E TE OHIPA HURIRAA

10. A faataa na e nafea te reo Beretane e faaohipahia ’i na te ao.

10 I te senekele matamua, mea rahi te taata i roto i te Hau emepera Roma tei paraparau i te reo Heleni. I teie mahana, mea rahi te taata na te ao te paraparau nei i te reo Beretane. Ia au i te hoê buka, hoê taata i nia e maha na te ao te paraparau ra aore ra te taa ra i te reo Beretane. (English as a Global Language) Mea rahi te taata e haapii nei i te reo Beretane, o tera reo hoi te faaohipahia na te ao no te tapihooraa, te poritita, te ihi e te anohaa.

11. Eaha te tuhaa o te reo Beretane i roto i te ohipa a te nunaa o Iehova?

11 Ua tauturu te reo Beretane ia haaparare i te parau mau. I na mua ’‘e, tei roto noa ta tatou mau papai i te reo Beretane. I te mea e ua paraparauhia teie reo na te ao, mea rahi ïa te taata tei nehenehe e taio i te reira. Te faaohipa atoa ra ta tatou pu rahi i te reo Beretane. E te faaineinehia ra te mau taeae e tuahine no te fenua e rave rahi e o te taa ra i te reo Beretane i ta tatou mau haapiiraa i Patterson i New York.

Te taa ra i te mau Ite no Iehova na te ao i te “parau maitai,” aore ra reo viivii ore, o te parau mau e mea tahoê ratou

12. Ua hurihia ta tatou mau papai na roto ehia reo, e mea nafea te mau porotarama roro uira i te tautururaa mai?

12 O ta tatou râ hopoia ia poro i te parau apî oaoa i te taata na te ao atoa. No reira tatou e huri ai i ta tatou mau papai na roto hau atu e 700 reo. Mea nafea? Ua tauturu mai te mau roro uira e te mau porotarama roro uira, mai te MEPS, ia rave i te ohipa huriraa. E nehenehe ïa te mau Ite no Iehova na te ao e taa i te “parau maitai,” aore ra reo viivii ore, o te parau mau e e tahoê.—A taio i te Zephania 3:9.

TURE E FAAOTIRAA A TE TIRIPUNA

13, 14. Mea nafea te mau ture e te mau faaotiraa a te mau tiripuna i tauturu ai ia tatou?

13 Ua tauturu rahi te mau ture Roma i te mau Kerisetiano matamua ia poro. I teie atoa mahana, te tauturu nei te mau ture i te fenua e rave rahi ia tatou ia poro. Ei hi‘oraa, i Marite, ua horoa te mau ture i te taata i te tiaraa no te maiti i ta ratou haapaoraa, no te paraparau  no nia i ta ratou mau tiaturiraa e no te putuputu. I tera fenua, e tiamâraa ïa to tatou no te haere i te mau putuputuraa e no te poro. Ua tiamâ atoa tatou no te faanaho i te ohipa pororaa na te ao mai ta tatou pu rahi i Marite. I te tahi taime, i titauhia na ia haere i te tiripuna no te paturu i to tatou tiaraa no te poro i te parau apî oaoa. (Phil. 1:7) E ia tutava te mau haava aore ra te mau tia haava i te faaore i to tatou tiaraa no te poro, e haere roa tera ohipa i te tiripuna teitei a‘e e e pinepine tatou i te manuïa.

14 I te tahi atu mau fenua atoa, ua haere tatou i te tiripuna no te paturu i to tatou tiamâraa no te haamori ia Iehova e no te poro. A pau ai, ua haere tatou i mua i te mau tiripuna nunaa rau. Ei hi‘oraa, e pinepine tatou i te haere i te Tiripuna Europa o te mau tiaraa o te taata. Mai Tiunu 2014, ua manuïa tatou e 57 haavaraa i roto i tera Tiripuna e mea tia ia pee te rahiraa o te fenua i Europa i tei faaotihia e tera Tiripuna. Noa ’tu e e ‘ririhia tatou e te fenua atoa,’ ua faatia te mau ture i te fenua e rave rahi ia tatou ia haamori ia Iehova ma te tiamâ.—Mat. 24:9.

RAVEA APÎ TEI TAUTURU IA TATOU

Te pûpû nei tatou i te mau papai Bibilia na roto e rave rahi reo

15. Eaha te mau ravea apî tei fa mai i te pae o te neneiraa, e mea nafea te reira i te tautururaa mai?

15 Ua tauturu mai te mau ravea apî i te pae o te neneiraa ia poro i te parau apî oaoa i te taata rahi a‘e. Hau atu i te hanere matahiti i te maoro, ua faaohipa te taata i te ravea neneiraa hamanihia e Johannes Gutenberg i te area 1450. I na 200 matahiti râ i mairi, ua hamanihia te  mau matini neneiraa maitai a‘e mai te matini neneiraa parauhia offset. I muri iho, mea vitiviti a‘e e mea au a‘e te huru neneiraa. Mea mâmâ a‘e atoa ia hamani i te papie e ia tahoê i te mau buka. Mea nafea te reira i te ohiparaa i nia i ta tatou mau papai? I 1879, ua neneihia Te Pare Tiairaa matamua na roto noa i te reo Beretane. Aita e hoho‘a e ua neneihia e 6 000 vea. I teie mahana, te neneihia ra Te Pare Tiairaa na roto hau atu e 200 reo. E hoho‘a nehenehe mau e te ǔ rau to roto e ua hau atu i te 50 000 000 vea te neneihia ra i te ava‘e taitahi.

16. Eaha te tahi mau ravea apî tei tauturu mai ia poro na te ao atoa? (A hi‘o i te hoho‘a matamua.)

16 Ua tauturu te ravea apî e rave rahi tei hamanihia i na 200 matahiti i mairi i te nunaa o Iehova ia poro i te parau apî oaoa. Ua faahiti a‘ena tatou i te pereoo auahi, pereoo e te manureva. Te vai atoa nei râ te pereoo tataahi, te matini patapata, te mau matini no te feia matapo, te niuniu uira, te niuniu paraparau, te taviri hoho‘a, te haruharuraa reo, te haruharuraa video, te radio, te afata teata, te hoho‘a teata, te roro uira e te Internet. Noa ’tu e e ere na te nunaa o Iehova i hamani na mua i teie mau mea, te faaohipa nei ratou i te reira no te pia i te Bibilia e te tahi atu mau papai na roto i te reo e rave rahi e no te poro na te ao atoa nei. Ma te na reira, te ‘ote nei ratou i te û o te mau fenua,’ mai ta te Bibilia i tohu.—A taio i te Isaia 60:16.

Te here ra Iehova ia tatou e te hinaaro ra o ’na ia ohipa tatou e o ’na

17. (a) Eaha te mea papu no nia i te ohipa pororaa? (b) No te aha Iehova e hinaaro ai ia ohipa tatou e o ’na?

17 Mea papu e na Iehova e aratai ra i ta tatou ohipa pororaa. No te aha Iehova e hinaaro ai ia ohipa tatou e o ’na? Te hinaaro ra anei o ’na i ta tatou tauturu? Aita, no te mea râ te here ra o ’na ia tatou e te hinaaro ra o ’na ia ohipa tatou e o ’na. Ma ta tatou pororaa, e faaite atu tatou i to tatou here ia ’na e i te taata. (Mar. 12:28-31; Kor. 1, 3:9) Auê tatou i te mauruuru ia Iehova i te tautururaa mai ia poro na te ao atoa! E faaohipa ana‘e ïa i te mau tupuraa atoa no te poro no nia ia Iehova e i to ’na Basileia!

^ par. 1 Mai te matahiti 1870, ua matauhia te nunaa o Iehova mai te Feia haapii Bibilia. I 1931, ua haamata ratou i te amo i te i‘oa Ite no Iehova.—Isa. 43:10.