Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TENUARE 2015

Haamauruuru ia Iehova e ia haamaitaihia oe

Haamauruuru ia Iehova e ia haamaitaihia oe

“E arue ia Iehova; e maitai hoi to ’na.”—SAL. 106:1.

1. No te aha e haamauruuru ai ia Iehova?

NO Ǒ mai ia Iehova “te mau mea maitatai i ho-mai-hia mai, e te mau mea tia roa e maitai roa ’i.” (Iak. 1:17) O ’na to tatou Tiai mamoe î i te here e te haapao maite ra o ’na i to tatou mau hinaaro atoa. (Sal. 23:1-3) Mea tano iho â ia haamauruuru ia Iehova ma te aau atoa. O ’na to tatou “haapuraa” e “etaeta,” ia mauiui iho â râ tatou. (Sal. 46:1) Hoê â mana‘o to tatou i to te fatu salamo tei papai: “E arue ia Iehova; e maitai hoi to ’na; e tia hoi to ’na aroha i te vai-maite-raa.”—Sal. 106:1.

Ta tatou irava matahiti 2015: “E arue ia Iehova; e maitai hoi to ’na.”—Salamo 106:1

2, 3. (a) Eaha te mau faahopearaa ia riro ei taata mauruuru ore? (b) Eaha te mau uiraa ta tatou e hi‘opoa mai?

2 No te aha e mea tia ’i ia mauruuru tatou ia Iehova? Mai tei tohuhia, e riro te taata i te anotau hopea ei mea mauruuru ore mau. (Tim. 2, 3:2) Mea rahi te ore e au i te mau mea maitai ta Iehova i rave no ratou. Te ora nei tatou i roto i te  hoê ao nounou tao‘a o te faaitoito ra e mirioni taata ia hoo hau atu i ta ratou e hinaaro mau ra. Mea rahi ïa te ore e mauruuru i ta ratou e fana‘o nei. Mai te mau Iseraela i tahito, e nehenehe tatou e riro ei taata mauruuru ore e e haafaufaa ore i ta tatou mau haamaitairaa e to tatou mau taairaa faufaa mau e o Iehova.—Sal. 106:7, 11-13.

3 A feruri atoa na i te nehenehe e tupu tei roto ana‘e tatou i te fifi. E nehenehe tatou e mana‘o noa i te reira a ore atu ai e haapao i ta tatou mau haamaitairaa. (Sal. 116:3) E nafea e faaite noa ’i i te mauruuru? E nafea ia tapea i te huru feruriraa maitai noa ’tu te mau fifi ino mau? E hi‘o ana‘e.

‘E RAVE RAHI, E IEHOVA, TE MAU OHIPA TAA Ê I RAVEHIA E OE’

4. E nafea e faaite noa ’i i te mauruuru ia Iehova?

4 E titauhia te tutavaraa no te faaite noa i te mauruuru ia Iehova. A tahi, e mea tia ia imi tatou mea nafea Iehova i te haamaitairaa ia tatou iho. Ia oti, mea faufaa ia feruri maite e nafea tera mau haamaitairaa e faaite ai i to te Atua here rahi ia tatou. A na reira ’i te fatu salamo, ua maere roa o ’na i te mau mea faahiahia atoa ta Iehova i rave no ’na.—A taio i te Salamo 40:5; 107:43.

5. Eaha te haapii mai i te aposetolo Paulo no nia i te mauruuru?

5 E haapii ana‘e e nafea ia mauruuru ia Iehova ma te hi‘opoa i te hi‘oraa o te aposetolo Paulo. Ua feruri maite o ’na i ta ’na mau haamaitairaa no te mea ua haamauruuru tamau o ’na i te Atua i roto i te pure. Ua fa‘i Paulo e e taata “faaino” o ’na i mutaa iho “e te hamani ino, e te hauti” aore ra parau ino. Ua mauruuru o ’na no te mea noa ’tu te mau mea ta ’na i rave na, ua faaite te Atua e te Mesia i to raua aroha hamani maitai i nia ia ’na e ua horoa ’tu i te fana‘oraa taa ê e poro ia vetahi ê. (A taio i te Timoteo 1, 1:12-14.) Ua mauruuru mau atoa Paulo no to ’na mau taeae e tuahine Kerisetiano e ua haamauruuru tamau ia Iehova no to ratou mau huru  maitatai e ta ratou taviniraa taiva ore. (Phil. 1:3-5, 7; Tes. 1, 1:2, 3) Oioi Paulo i te haamauruuru ia Iehova no te mau mea atoa ta to ’na mau taeae i rave no ’na a faaruru ai o ’na i te ati. (Ohi. 28:15; Kor. 2, 7:5-7) E ere ïa i te mea maere i faaitoito ai Paulo i te mau Kerisetiano: “Ia mauruuru roa outou i te Atua . . . , te a‘oraa te tahi i te tahi, ma te salamo, e te himene, e te sire a te varua.”—Kol. 3:15-17.

TE FERURI-MAITE-RAA E TE PURE

6. No te aha oe e mauruuru ai ia Iehova?

6 E nafea e pee ai i te hi‘oraa o Paulo? E nehenehe e feruri maite i ta Iehova i rave no tatou iho. (Sal. 116:12) Eaha ta oe e pahono i te hoê taata te ui ia oe, “Eaha te mau haamaitairaa no ǒ mai ia Iehova ta oe e mauruuru ra?” E faahiti anei oe i to oe mau taairaa e o Iehova? Te faaoreraa o ta oe mau hara maoti te tusia taraehara o te Mesia? To oe mau taeae e tuahine Kerisetiano tei tauturu ia oe i te taime fifi? To oe hoa faaipoipo aore ra tamarii? A faataa i te taime no te feruri maite i te ravea rau i haamaitai ai te Atua ia oe. E turai te reira ia oe ia haamauruuru ia ’na i te mau mahana atoa.—A taio i te Salamo 116:12; 92:1, 2.

A pee i te huru feruriraa mauruuru o Hana e Hezekia e a haamauruuru ia Iehova no ta ’na i rave no oe

7. (a) No te aha ia haamauruuru ai ia Iehova a pure ai? (b) No te aha mea maitai ai ia haamauruuru ia Iehova a pure ai oe?

7 E hinaaro tatou e haamauruuru ia Iehova na roto i te pure a feruri maite ai i ta tatou mau haamaitairaa atoa. (Sal. 95:2; 100:4, 5) E pure noa vetahi no te ani i te tahi mea i te Atua. E oaoa râ Iehova ia pure tatou ia ’na no te haamauruuru ia ’na no ta tatou e fana‘o nei. Mea rahi te hi‘oraa Bibilia o te mau tavini a te Atua, mai ia Hana e Hezekia, tei haamauruuru ia Iehova na roto i te pure. (Sam. 1, 2:1-10; Isa. 38:9-20) A pee ïa i to raua huru feruriraa mauruuru e a haamauruuru ia Iehova no ta ’na i rave no oe. (Tes. 1, 5:17, 18) A na reira ’i, e itoitohia oe, e here atu â oe i te Atua e e riro noa oe ei hoa no ’na.—Iak. 4:8.

Eaha te mau haamaitairaa no ǒ mai ia Iehova ta oe e mauruuru ra? (A hi‘o i na paratarafa 6, 7)

8. E nafea tatou e nehenehe ai e riro ei taata mauruuru ore?

8 Ia ore tatou e haapao, e nehenehe tatou e ore e mauruuru faahou i ta Iehova mau ô. No te aha? Mea tia ore tatou e ua tutuu mai to tatou na metua matamua i te huru feruriraa mauruuru ore. Ua tuu Iehova ia Adamu raua Eva i roto i te hoê paradaiso e ua horoa ’tu i te mau mea atoa ta raua i hinaaro. E nehenehe ta raua e ora e a muri noa ’tu i roto i te hau. (Gen. 1:28) Aita râ raua i mauruuru i ta raua mau fana‘oraa taa ê. Ua nounou e ua hinaaro raua hau atu â haamaitairaa. Te faahopearaa? Ua ere raua i te mau mea atoa. (Gen. 3:6, 7, 17-19) E nehenehe tatou e riro ei mea  mauruuru ore mai teie nei ao a ore atu ai e mauruuru faahou i te mau mea atoa ta Iehova i horoa mai. Mai te aha? Mai to tatou auhoaraa piri e o ’na aore ra ta tatou fana‘oraa taa ê e riro ei melo o te hoê fetii taeae na te ao. E nehenehe te mau mea o teie nei ao e haafariu ê ia tatou. (Ioa. 1, 2:15-17) No te ore e topa i roto i teie marei, e mea tia ia feruri maite tatou i ta tatou haamaitairaa e rave rahi. Oia atoa ia haamauruuru tamau i te Atua no te fana‘oraa taa ê e riro ei nunaa no ’na.—A taio i te Salamo 27:4.

A FAARURU AI I TE MAU FIFI

9. I roto i te fifi mauiui mau, no te aha mea faufaa ’i ia feruri maite i ta tatou mau haamaitairaa?

9 E tauturu mai te hoê huru feruriraa mauruuru ia faaoromai i te mau fifi mauiui mau o te taui taue i to tatou oraraa, mai te taivaraa o to tatou hoa faaipoipo, te hoê ma‘i ino mau, te pohe o te hoê taata herehia aore ra te hoê ati natura puai mau. E tamahanahana mai te feruri-maite-raa i ta Iehova mau haamaitairaa ia tatou e e haapuai ia tatou ia faaoromai â. E hi‘o ana‘e i te mau tupuraa i muri nei.

10. Mea nafea te feruri-maite-raa i ta ’na mau haamaitairaa i te tautururaa ia Irina?

10 I faaipoipo na Irina, te hoê pionie tamau i Marite Apatoerau, i te hoê matahiapo tei taiva ia ’na e tei faarue ia ’na e ta raua mau tamarii. * Eaha tei tauturu ia Irina ia tavini noa ia Iehova ma te taiva ore? Te na ô ra o ’na: “Te mauruuru nei au ia Iehova i te haapaoraa mai ia ’u. Ua maiti au e faaite i te mauruuru no te mau mea maitai atoa ta ’u e ite nei i roto i to ’u oraraa. E haamana‘o mai te reira e e fana‘oraa taa ê mau ia fana‘o i te haapao maitai e te here o to tatou Metua aupuru i te ra‘i ra. Ua ite au e eita roa ’tu o ’na e faarue ia ’u.” Noa ’tu te tupuraa peapea e rave rahi ta Irina i faaruru i roto i to ’na oraraa, ua tauturu to ’na huru feruriraa oaoa ia ’na ia faaoromai e ia faaitoito ia vetahi ê.

11. Eaha tei tauturu ia Kyung-sook ia faaruru i to ’na ma‘i ino mau?

11 Ua tavini Kyung-sook, e ora ra i Asia, ei pionie e ta ’na tane hau atu e 20 matahiti i te maoro. Ua ite-taue-hia e e mariri ai taata o te mahaha to ’na e ua parauhia e e pohe o ’na i roto e toru aore ra e ono ava‘e. Noa ’tu e ua faaruru raua ta ’na tane i te tamataraa e rave rahi na mua ’‘e, e ea maitai noa to raua. Te na ô ra o ’na: “Ua oti roa vau! Mai te huru ra e ua ere au i te mau mea atoa e ua riaria mau vau.” Eaha tei tauturu ia Kyung-sook? Te parau ra o ’na: “I te mau po atoa hou a haere ai i nia i te roi, e haere au i nia ’‘e i to maua fare a pure atu ai ma te reo puai no nia e pae ohipa ta ’u i mauruuru i tera mahana. E mahanahana  roa vau e e turai te reira ia ’u ia faaite i to ’u here ia Iehova.” Eaha te mau maitai ta Kyung-sook i fana‘o i teie mau pure? Te na ô ra o ’na: “Ua taa ia ’u e te tauturu ra Iehova ia tatou i roto i te mau tupuraa peapea. Oia atoa e mea rahi a‘e te haamaitairaa i roto i to tatou oraraa i te mau fifi.”

Sheryl e to ’na taeae o John tei ora mai i te ati (A hi‘o i te paratarafa 13)

12. Mea nafea Jason i te tamahanahanaraahia i muri a‘e i te poheraa ta ’na vahine?

12 Tei roto Jason, o te ohipa ra i te hoê amaa i Afirika, i te taviniraa taime taatoa hau atu e 30 matahiti i te maoro. Te na ô ra o ’na: “A hitu matahiti i teie nei, ua pohe ta ’u vahine. Mea mauiui mau. Ia feruri noa vau i ta ’na i faaruru a aro ai i te mariri ai taata, e paruparu vau.” Eaha tei tamahanahana rii ia Jason? Te parau ra o ’na: “I te hoê mahana, ua haamana‘o vau i te hoê taime au mau e ta ’u vahine e ua haamauruuru vau ia Iehova na roto i te pure no te reira. Ua tamahanahana rii te reira ia ’u e i muri iho ua haamauruuru tamau vau ia Iehova no teie mau taime oaoa ta mâua i fana‘o. Ua taui te faaiteraa i te mauruuru i to ’u huru feruriraa. Te mauiui noa ra vau. Tera râ, te haamauruuru nei au ia Iehova no to ’u faaipoiporaa oaoa e te fana‘oraa taa ê e tavini ia ’Na e te hoê vahine o tei here mau ia ’Na. Maoti te reira, mea maitai a‘e to ’u huru hi‘oraa i te oraraa.”

“Te oaoa mau nei au e o Iehova to ’u Atua.”—Sheryl

13. Eaha tei tauturu ia Sheryl ia faaoromai a pohe ai te rahiraa o te mau melo o to ’na utuafare?

13 I te hopea o te matahiti 2013, ua tairi te mata‘i rorofai puai mau o Haiyan ia Philipino. Ua ere Sheryl, 13 noa matahiti i tera taime, i te rahiraa o ta ’na i fana‘o na. Te na ô ra o ’na: “Aita e fare faahou to ’u e aita faahou te rahiraa o te mau melo o to ’u utuafare.” Ua pohe to ’na papa, to ’na mama e e toru o to ’na taeae e tuahine i roto i te pape i tahe no te ûa puai mau. Eaha tei tauturu ia Sheryl ia faaruru i teie ati ma te ore e  inoino? Te mauruuru nei â Sheryl ia Iehova no te mea te feruri maite ra o ’na i te mau haamaitairaa atoa ta ’na e fana‘o ra. Te parau ra o ’na: “Ua ite au i ta te mau taeae e tuahine i rave no te tamahanahana e te faaitoito i te feia i hinaaro i te tauturu. Ua ite au e ua pure noa te mau taeae na te ao atoa no ’u. Te oaoa mau nei au e o Iehova to ’u Atua. E horoa noa mai o ’na i ta tatou e hinaaro mau ra.” Oia mau, mea mauruuru ana‘e tatou no ta tatou mau haamaitairaa, eita tatou e oto rahi roa ino. E tauturu mai te reira ia faaoromai i te mau fifi atoa ta tatou e faaruru.—Eph. 5:20; a taio i te Philipi 4:6, 7.

“E OAOA VAU IA IEHOVA”

14. Eaha te tiaturiraa faahiahia mau ta tatou e fana‘o nei? (A hi‘o i te hoho‘a matamua.)

14 I te roaraa o te tuatapaparaa, ua mauruuru noa te nunaa o Iehova i ta ratou mau haamaitairaa. A faaorahia ’i te mau Iseraela i te rima o Pharao e i to ’na mau nuu i te miti Uteute, ua himene ratou ma te oaoa e ma te arue e te haamauruuru ia Iehova. (Exo. 15:1-21) I teie mahana, te haamaitairaa ta tatou e poihere rahi nei, o te iteraa ïa e fatata roa aita e mauiui faahou. (Sal. 37:9-11; Isa. 25:8; 33:24) A feruri na i to tatou huru aau a haamou ai Iehova i to ’na mau enemi atoa e a farii ai o ’na ia tatou i roto i te hoê ao apî parau-tia e te hau. E mahana oaoa mau te reira e haamauruuru ai tatou ia Iehova!—Apo. 20:1-3; 21:3, 4.

Te haamaitairaa ta tatou e poihere rahi nei, o te iteraa ïa e fatata roa aita e mauiui faahou

15. Eaha ta oe e faaoti papu e rave i 2015?

15 I 2015, te tiai ru nei tatou i te haamaitairaa e rave rahi no ǒ mai ia Iehova. E faaruru paha tatou i te tahi mau fifi. Noa ’tu râ eaha te tupu, ua ite tatou e eita roa ’tu Iehova e faarue ia tatou. (Deut. 31:8; Sal. 9:9, 10) E horoa noa mai o ’na i ta tatou e hinaaro mau ra no te tavini ia ’na ma te taiva ore. E faaoti papu ana‘e e pee i te huru feruriraa o te peropheta Habakuka tei parau: “Ore noa ’tu â te ruperupe i te suke, e ore noa ’tu te maa i nia i te mau vine; ore noa ’tu te olive i te hotu mai, e ore noa ’tu â te maa i nia i te fenua; mou noa ’tu te nǎnǎ i roto i te aua, e ore noa ’tu te puaatoro i roto i te vairaa ra: e oaoa vau ia Iehova, e ou‘au‘a noa vau i te Atua i to ’u nei ora.” (Hab. 3:17, 18) I teie matahiti e haere maira, e tamau ana‘e i te feruri maite i ta tatou mau haamaitairaa atoa e e pee ana‘e i te a‘oraa o ta tatou irava matahiti 2015: “E arue ia Iehova; e maitai hoi to ’na.”—Sal. 106:1.

^ par. 10 Ua tauihia te tahi mau i‘oa i roto i teie tumu parau.