Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) TITEMA 2014

Ua taa anei ia oe te auraa?

Ua taa anei ia oe te auraa?

“Haamaramarama maira oia ia ratou, ia taa ia ratou te auraa o te mau papairaa.”—LUKA 24:45, Te Faufaa Api.

1, 2. Mea nafea Iesu i te faaitoitoraa i ta ’na mau pǐpǐ i te mahana o to ’na tia-faahou-raa?

TE HAERE avae ra e piti pǐpǐ a Iesu i te hoê oire iti 11 kilometera i te atea ia Ierusalema. Te oto ra raua no te mea ua pohe Iesu e aitâ raua i ite e ua faatia-faahou-hia mai oia. Fa a‘era Iesu ia raua e haere atura e o raua. “Ua faaite maira oia ia raua i te auraa i te mau parau no ’na iho i roto i te mau parau atoa i papaihia ra, mai ia Mose mai â e tae roa ’‘era i te mau peropheta atoa.” (Luka 24:13-15, 27) Ua tamahanahanahia raua e ua î ihora to raua aau i te anaanatae no te mea ua ‘faaite atu o ’na i te auraa’ o te mau Papai.—Luka 24:32.

2 I tera ahiahi, ua ho‘i teie na pǐpǐ i Ierusalema e ua faatia i tei tupu i te mau aposetolo. A paraparau noa ’i ratou, fa a‘era Iesu ia ratou pauroa. Ua mehameha te mau aposetolo e ua haamata i te feaa e o Iesu mau anei tera. Te faataa maira te Bibilia mea nafea o ’na i te faaitoitoraa ia ratou: “Haamaramarama maira oia ia ratou, ia taa ia ratou te auraa o te mau papairaa.”—Luka 24:45, Te Faufaa Api.

3. No te aha tatou e nehenehe ai e paruparu i roto i ta tatou taviniraa? E nafea râ ia oaoa noa?

 3 I te tahi taime, e oto atoa paha tatou mai te mau pǐpǐ. Noa ’tu e te tavini maite nei tatou ia Iehova, e nehenehe tatou e paruparu ia ore te taata e farii i ta tatou pororaa. (Kor. 1, 15:58) Aore ra te mana‘o nei paha tatou e aita ta tatou mau piahi Bibilia e haere roa ra i mua i te pae varua. Peneia‘e ua patoi roa vetahi o ratou ia Iehova. E nafea ia oaoa noa i roto i ta tatou taviniraa? Te tahi tauturu, o te taa-maitai-raa ïa i te auraa o ta Iesu mau faahoho‘araa. E hi‘opoa mai tatou e toru, oia atoa te mau haapiiraa e huti mai.

TE TAATA UEUE HUERO E TAOTO RA

4. Eaha te auraa o ta Iesu faahoho‘araa o te taata ueue huero?

4 A taio i te Mareko 4:26-29. Eaha te auraa o ta Iesu faahoho‘araa o te taata ueue huero e taoto ra? Te faahoho‘a ra te taata ueue huero i te feia poro i te Basileia e te huero i te poroi ta ratou e poro ra i te taata aau maitai. Mai te mau taata atoa, ‘e taoto teie taata ueue huero i te rui e e ara i te ao.’ Mai te tanuraa i te ootiraa, e titauhia te taime ia ‘tupu te huero.’ E na tera huero “iho” e tupu mǎrû noa mai. Oia atoa, e paari mǎrû noa mai te hoê taata i te pae varua aore ra e haafatata mǎrû noa o ’na ia Iehova. Ua haere roa ana‘e o ’na i mua no te faaoti e tavini i te Atua, e hotu mai o ’na ma te pûpû i to ’na ora ia Iehova a bapetizo atu ai.

E faatupu Iehova i te parau mau i roto i te aau o te feia haehaa

5. No te aha Iesu i faatia ’i i te faahoho‘araa o te taata ueue huero e taoto ra?

5 No te aha Iesu i faatia ’i i teie faahoho‘araa? Ua hinaaro Iesu ia ite tatou e na Iehova e faatupu i te parau mau i roto i te aau o te feia haehaa. (Ohi. 13:48; Kor. 1, 3:7) E ueue e e faarari tatou i te huero, eita râ tatou e nehenehe e turai aore ra e haavitiviti i te tupuraa. Mai te taata o te faahoho‘araa, eita tatou e ite e nafea te huero o te Basileia e tupu ai. A rave ai i ta tatou ohipa o te mau mahana atoa, eita paha tatou e ite e te tupu ra tera huero i roto i te tahi taata. Teie râ, i muri a‘e, e hotu mai te reira e e amui mai te pǐpǐ apî ia tatou i roto i te ohipa ootiraa.—Ioa. 4:36-38.

6. Eaha te farii no nia i te haereraa i mua o te hoê piahi Bibilia?

 6 Eaha te haapii mai i teie faahoho‘araa? A tahi, eita tatou e nehenehe e haavitiviti i te haereraa i mua o te hoê piahi Bibilia i roto i te parau mau. Noa ’tu e e horoa tatou i tei nehenehe no te tauturu e no te turu ia ’na, eiaha roa ’tu tatou e faahepo ia ’na ia bapetizo. E farii ana‘e râ ma te haehaa e o ’na ana‘e te nehenehe e faaoti e pûpû i to ’na ora i te Atua. E farii Iehova i ta tatou pûpûraa ia ’na ia here mau tatou ia ’na.—Sal. 51:12; 54:6; 110:3.

7, 8. (a) A faataa na eaha te tahi atu mau haapiiraa te huti mai i te faahoho‘araa a Iesu o te taata ueue huero e taoto ra. (b) Eaha ta te reira e haapii maira no nia ia Iehova e Iesu?

7 Te piti, e tauturu mai te taaraa i te haapiiraa o teie faahoho‘araa ia ore e haaparuparu aita ana‘e tatou e ite oioi i te maitai o ta tatou ohipa haapiiraa. Ia faaoromai râ tatou. (Iak. 5:7, 8) Mai te peu e ua rave tatou i tei maraa no te tauturu i te piahi e aita râ te parau mau i rahi mai i roto i to ’na aau, e ere i te auraa e e ere tatou i te taata haapii maitai. E vaiiho Iehova i te huero o te parau mau ia rahi mai i roto noa i te aau o te hoê taata haehaa o te ineine i te rave i te mau tauiraa. (Mat. 13:23) Eiaha ïa tatou e mana‘o e ua taaihia te manuïaraa o ta tatou taviniraa i te rahiraa taata tei bapetizo ia ratou. Eita hoi Iehova e faito i te manuïaraa o ta tatou taviniraa i te huru o te taata i mua i ta tatou haapiiraa. O ta tatou râ mau tutavaraa ta ’na e haafaufaa nei.—A taio i te Luka 10:17-20; Korinetia 1, 3:8.

Eita Iehova e faito i te manuïaraa o ta tatou taviniraa i te huru o te taata i mua i ta tatou haapiiraa

8 Te toru, eita e nehenehe e ite noa i te mau tauiraa e tupu ra i roto i te aau o te hoê taata. Ei hi‘oraa, ua parau na hoa faaipoipo o tei haapii e te hoê mitionare e ua hinaaro raua e riro mai ei feia poro bapetizo-ore-hia. Ua haamana‘o oia ia raua e e mea titauhia na mua ia faaea raua i te puhipuhi i te avaava. Ua maere roa oia i to raua parauraa e ua faaea a‘ena raua e rave rahi ava‘e i teie nei. Ua taa ia raua e noa ’tu e e puhipuhi raua i te avaava ma te huna, e ite mai Iehova e mea riri na ’na te feia haavarevare. Ua faaoti ïa raua e puhipuhi i te avaava i mua i te mitionare aore ra e faaea roa i tera peu. Noa ’tu e aita te mitionare i ite i te tauiraa rahi ta teie na hoa faaipoipo i rave, ua tauturu to raua here ia Iehova o te rahi noa ’tura ia rave i te mau faaotiraa tano.

TE UPE‘A TORO

9. Eaha te auraa o te faahoho‘araa a Iesu o te upe‘a toro?

9 A taio i te Mataio 13:47-50. Eaha te auraa o te faahoho‘araa a Iesu o te upe‘a toro? Ua parau Iesu e e au te pororaa o te poroi o te Basileia i te tuuraa i te hoê upe‘a toro rahi i roto i te miti. E “i‘a e rave rahi te huru” te noaahia e te hoê upe‘a toro. Oia atoa, e mirioni  taata ua rau te huru te farii ra i ta tatou ohipa pororaa. (Isa. 60:5) Te haapapu ra na mirioni taata e haere maira i te mau matahiti atoa i ta tatou mau tairururaa e Oroa haamana‘oraa i te reira. E au te tahi o teie mau taata i te i‘a “maitatai” e e riro mai ratou ei melo o te amuiraa Kerisetiano. E te tahi atu, e au ïa ratou i te i‘a “iino” e eita Iehova e farii ia ratou.

I muri iho i te taioraa i te Mataio 13:47-50, a hi‘o na i te tahi tupuraa no teie nei tau

E tavini te feia mea au na ratou te parau mau ia Iehova (A hi‘o i na paratarafa 9-12)

10. No te aha Iesu i faatia ’i i te faahoho‘araa o te upe‘a toro?

10 No te aha Iesu i faatia ’i i teie faahoho‘araa? Aita te faataa-ê-raa i te i‘a i roto i te faahoho‘araa i taaihia i te haavaraa hopea i te ati rahi. Te faataa nei râ te reira i te ohipa e tupu i te mau mahana hopea o teie nei ao. Ua faaite Iesu e e ere pauroa te taata o te au i te poroi o te Basileia te hinaaro e riro ei tavini a Iehova. Aita te taata e rave rahi o tei haere mai i te mau putuputuraa aore ra o tei haapii i te Bibilia i ineine i te pûpû i to ratou ora ia Iehova. (Arii 1, 18:21) Ua faaea atoa vetahi i te haere mai i te mau putuputuraa. Ua paari vetahi feia apî i roto i te parau mau. Aita râ ratou iho i haapii mau i te here ia Iehova. Ua faataa maitai Iesu e na tatou taitahi e rave i ta tatou iho faaotiraa. Ia rave tatou i te faaotiraa tano, e hi‘o mai Iehova ia tatou ei taata “hinaarohia.”—Hag. 2:7.

11, 12. (a) E nafea tatou e faufaahia ’i i te faahoho‘araa o te upe‘a toro? (b) Eaha ta te reira e haapii maira no nia ia Iehova e Iesu?

11 E nafea tatou e faufaahia ’i i te faahoho‘araa o te upe‘a toro? Ia taa ia tatou te haapiiraa o teie faahoho‘araa, eita tatou e oto aore ra e paruparu ia ore te hoê piahi Bibilia aore ra ta tatou tamarii e hinaaro e tavini ia Iehova. Ua rave paha tatou i tei nehenehe no te haapii ia ’na. Eita te hoê taata e riro ei hoa no Iehova no te mea noa ua farii oia i te haapii i te Bibilia aore ra ua paari oia i roto i te parau mau. Ia ore oia e hinaaro e farii i ta Iehova aratairaa, eita ta ’na e nehenehe e riro ei tavini a Iehova.

12 Te auraa anei ïa e eita roa ’tu te feia o tei faarue i te parau mau e fariihia ia ho‘i mai i roto i te amuiraa? Te auraa atoa anei e e aita e ravea no te hoê taata tei ore â i pûpû i to ’na ora ia Iehova? E ere. E nehenehe noâ o ’na e  riro ei hoa no Iehova hou a haamata ’i te ati rahi. Te pii nei Iehova ia ratou: “E fariu mai outou ia ’u, e na ’u e fariu atu ia outou.” (Mal. 3:7) Te faataa-maitai-hia ra te reira i roto i te faahoho‘araa a Iesu o te tamaiti haamâu‘a faufaa.—A taio i te Luka 15:11-32.

TE TAMAITI HAAMÂU‘A FAUFAA

13. Eaha te auraa o te faahoho‘araa o te tamaiti haamâu‘a faufaa?

13 Eaha te auraa o ta Iesu faahoho‘araa o te tamaiti haamâu‘a faufaa? Te faahoho‘a ra te metua tane î i te aumihi i to tatou Metua î i te here ra o Iehova. E te tamaiti tei haamâu‘a i ta ’na faufaa, i te feia ïa o tei faarue i te amuiraa. Ua riro ratou ei taata o te ao a Satani o tei au i “te fenua roa” e o tei atea roa ia Iehova. (Eph. 4:18; Kol. 1:21) Ua ite vetahi o ratou i muri a‘e e ua hape mau ratou e ua faaoti e ho‘i ia Iehova ra. E titauhia te tutavaraa rahi. No to ratou râ haehaa e tatarahapa mau i ta ratou i rave, e faaore Iehova i ta ratou hara e e farii ia ratou ma te oaoa.—Isa. 44:22; Pet. 1, 2:25.

Te hinaaro mau ra Iehova ia ho‘i mai te feia tei faarue ia ’na

14. No te aha Iesu i faatia ’i i te faahoho‘araa o te tamaiti haamâu‘a faufaa?

14 No te aha Iesu i faatia ’i i teie faahoho‘araa? Ua faaite Iesu e te hinaaro mau ra Iehova ia ho‘i mai te feia tei faarue ia ’na. Aita te metua tane i roto i te faahoho‘araa i faaea i te tiaturi e e ho‘i mai ta ’na tamaiti. A ite ai o ’na na “te atea ê” i ta ’na tamaiti tei ho‘i mai, horo a‘era o ’na ia ’na ra. Ua hinaaro te metua tane ia ite ta ’na tamaiti e te fariihia ra oia ma te oaoa. E turai teie faahoho‘araa i te feia tei faarue i te parau mau ia ho‘i mai i teie nei iho â taime ia Iehova ra. Peneia‘e ua ino roa to ratou mau taairaa e o Iehova, ua haama ratou e e ere i te mea ohie ia ho‘i mai. Mea hoona râ te mau tutavaraa. E oaoa  Iehova, Iesu e te mau melahi ia ho‘i mai ratou.—Luka 15:11-32.

15, 16. (a) Eaha te mau haapiiraa e huti mai i ta Iesu faahoho‘araa o te tamaiti haamâu‘a faufaa? A faataa. (b) Eaha ta te reira e haapii maira no nia ia Iehova e Iesu?

15 E nafea e faufaahia ’i i te faahoho‘araa o te tamaiti haamâu‘a faufaa? E mea tia ia pee tatou i to Iehova hi‘oraa o te here. Ia ho‘i mai te hoê taata i roto i te amuiraa, eiaha tatou e “faataata parau-tia hua” ia tatou iho a ore atu ai e farii popou ia ’na. E faaino te reira i to tatou iho auhoaraa e o Iehova. (Koh. 7:16) Te tahi atu haapiiraa e huti mai, o te hi‘oraa ïa i te hoê taata tei faarue i te amuiraa mai “te mamoe i moe.” E mamoe ïa teie te nehenehe e ho‘i mai. (Sal. 119:176) E ia farerei tatou i te hoê taata tei atea ê i te amuiraa e tei ore râ i tiavaruhia, e rave anei tatou i tei nehenehe no te tauturu ia ’na ia ho‘i mai? E faaite oioi anei tatou i te reira i te mau matahiapo ia nehenehe ratou e tauturu atu? E na reira tatou ia taa maitai e ia faaohipa tatou i te haapiiraa no ǒ mai i te faahoho‘araa a Iesu.

“E fana‘oraa taa ê mau ia riro ei melo o te faanahonahoraa a Iehova!”

16 Te mauruuru nei te feia tei ho‘i mai i te aroha hamani maitai e te here o Iehova e i te turu o te amuiraa. Te na ô ra te hoê taeae tei tiavaruhia e 25 matahiti i te maoro: “Mai to ’u faaho‘iraahia mai, ua rahi atu â to ’u oaoa a fana‘o ai au i te mau ‘anotau haumǎrû’ no ǒ mai ia Iehova. (Ohi. 3:19) Te turu e te here mau nei te taatoaraa ia ’u! E utuafare pae varua faahiahia mau to ’u i teie nei.” Te parau ra te hoê tuahine apî tei ho‘i mai i muri a‘e i te atea-ê-raa ia Iehova e i te paruparuraa e pae matahiti i te maoro: “Aita ta ’u e nehenehe e faataa ’tu eaha te huru a faaitehia mai ai i nia ia ’u te here ta Iesu i faahiti. E fana‘oraa taa ê mau ia riro ei melo o te faanahonahoraa a Iehova!”

17, 18. (a) Eaha ta tatou i haapii mai i teie na faahoho‘araa e toru? (b) Ua faaoti papu tatou i te rave i te aha?

17 Eaha te mau haapiiraa e huti mai i teie mau faahoho‘araa? A tahi, ua ite mai tatou e eita e nehenehe e haavitiviti i te haereraa i mua o te hoê piahi Bibilia i roto i te parau mau. Na Iehova tera tuhaa. Te piti, mea tano ore ia mana‘o e e hinaaro te feia atoa e amui maira e e haapii ra na muri ia tatou e tavini ia Iehova. E te toru, noa ’tu e e faarue vetahi ia Iehova, eiaha tatou e faaea i te tiaturi e e ho‘i mai ratou. A ho‘i mai ai ratou, e farii ana‘e ia ratou ma te faaite i to Iehova here.

18 E tamau ana‘e tatou paatoa i te imi i te ite, te haapao maitai e te paari. A taio ai i ta Iesu mau faahoho‘araa, a uiui: ‘Eaha te auraa o teie faahoho‘araa? No te aha i papaihia ’i te reira i roto i te Bibilia? E nafea vau e faaohipa ’i i te haapiiraa ta ’u i huti mai? Eaha ta te reira e haapii maira no nia ia Iehova e Iesu?’ A na reira ’i, e faaite tatou e te taa ra ia tatou te mau parau a Iesu.