Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) TITEMA 2014

‘A faaroo, ia taa ia outou’

‘A faaroo, ia taa ia outou’

“A faaroo mai na, ia taa ia outou.”—MAR. 7:14, Te Faufaa Api.

1, 2. No te aha te taata e rave rahi i ore ai i taa i ta Iesu mau parau?

IA PARAPARAU mai te hoê taata, e faaroo tatou i to ’na reo e oia atoa to ’na toparaa reo. No te taa râ i ta ’na e parau maira, e titauhia ia taa i te auraa o ta ’na mau parau. (Kor. 1, 14:9) Ua paraparau Iesu i e tausani taata na roto i to ratou iho reo. E ere râ ratou pauroa tei taa i te auraa o ta ’na mau parau. No reira Iesu i na ô ai: “A faaroo mai na, ia taa ia outou.”—Mar. 7:14, Te Faufaa Api.

2 No te aha aita ’i ratou i taa i ta Iesu i parau atu? E mana‘o oti noa to vetahi aore ra e mana‘o turai ino atoa. Ua parau Iesu no nia i teie mau taata: “Faaore tiâ outou i ta te Atua ra parau, ia ô mai ta outou parau i tuuhia maira.” (Mar. 7:9) Aita ratou i tutava i te taa i ta Iesu mau parau. Aita atoa i hinaaro e taui i ta ratou mau peu e to ratou mana‘o. Ua faaroo teie mau taata e to ratou tari‘a, aita râ i taa i te reira e to ratou aau. (A taio i te Mataio 13:13-15.) E nafea tatou e papu ai e te hinaaro noa ra tatou e faufaahia i ta Iesu haapiiraa?

 NAFEA TATOU E FAUFAAHIA ’I I TA IESU HAAPIIRAA?

3. No te aha te mau pǐpǐ a Iesu i taa ’i i ta ’na mau parau?

3 E titauhia ia pee tatou i te hi‘oraa o te mau pǐpǐ haehaa a Iesu. Ua parau Iesu ia ratou: “Ua maitai râ to outou mau mata, te hi‘o nei hoi ïa, e to outou mau tari‘a, te faaroo nei hoi ïa.” (Mat. 13:16) No te aha ratou i taa ’i i ta Iesu mau parau? Ua pee ratou e toru taahiraa. A tahi, ua ineine ratou i te tuu i te mau uiraa e i te imi i ta Iesu e mana‘o mau ra. (Mat. 13:36; Mar. 7:17) Te piti, ua ineine ratou i te taai i te mau mea apî ta ratou i haapii mai i ta ratou i farii a‘ena i roto i to ratou aau. (A taio i te Mataio 13:11, 12.) Te toru, ua ineine ratou i te faaohipa i ta ratou i haapii no ratou iho e no te tauturu ia vetahi ê.—Mat. 13:51, 52.

4. Eaha na taahiraa faufaa roa e toru no te taa i ta Iesu mau faahoho‘araa?

4 Mai te mau pǐpǐ, e titauhia ia pee atoa tatou e toru taahiraa no te taa i ta Iesu mau faahoho‘araa. A tahi, e mea tia ia faataa i te taime no te haapii e te feruri maite i ta Iesu mau parau, no te rave i te mau maimiraa e no te tuu i te mau uiraa tano maitai. O te ite te reira. (Mas. 2:4, 5) Te piti, mea faufaa ia feruri i te taairaa i rotopu i tera ite e ta tatou i ite a‘ena e e nafea tatou e faufaahia ’i. Ua faaite ïa oe i te haapao maitai aore ra ua taa ia oe eaha te rave. (Mas. 2:2, 3) Te toru, e mea tia ia faaohipa tatou i ta tatou i haapii i roto i to tatou oraraa. Tera ïa te paari.Mas. 2:6, 7.

E faaora te paari ia tatou!

5. Maoti te hoê hi‘oraa, a faataa na i te taa-ê-raa i rotopu i te ite, te taaraa i te tahi ohipa e te paari.

5 Eaha te taa-ê-raa i rotopu i te ite, te taaraa i te tahi ohipa e te paari? E nehenehe e rave i teie hi‘oraa: A feruri na e te tia ra oe i ropu i te purumu e te tere maira te hoê pereoo faauta taata. A tahi, e ite oe e e pereoo faauta taata te haere maira—tera ïa te ite. I muri iho, ua ite oe e ia tia noa oe i reira, e faaûhia oe—ua taa ïa ia oe eaha te tupu! E ou‘a ïa oe i te hiti purumu—tera ïa te paari! Te parau maira te Bibilia ia ‘tapea i te paari maitai’ no te mea e faaora te reira ia tatou!—Mas. 3:21, 22; Tim. 1, 4:16.

6. Eaha na uiraa e maha te uihia a hi‘opoa ’i e hitu faahoho‘araa a Iesu? (A hi‘o i te  tumu parau tarenihia.)

6 I roto i teie tumu parau e i to muri mai, e hi‘opoa mai tatou e hitu faahoho‘araa a Iesu. Teie te mau uiraa te uihia: Eaha te auraa o te faahoho‘araa? (Tera ïa te ite.) No te aha Iesu i faatia mai ai i tera faahoho‘araa? (Tera ïa te taaraa i te tahi ohipa.) E nafea e faaohipa ’i i te reira no te tauturu ia tatou iho e ia vetahi ê? (Tera ïa te paari.) E eaha ta te reira e haapii maira no nia ia Iehova e Iesu?

TE HUERO SINAPI

7. Eaha te auraa o ta Iesu faahoho‘araa o te huero sinapi?

7 A taio i te Mataio 13:31, 32. Eaha te auraa o ta Iesu faahoho‘araa o te  huero sinapi? Te faahoho‘a ra te huero sinapi i te poroi o te Basileia ta tatou e poro ra, oia atoa i te amuiraa Kerisetiano. Mai “tei iti roa i te mau huero atoa,” mea nainai mau te amuiraa Kerisetiano a haamauhia ’i te reira i 33 i muri a‘e i te Mesia. Aita râ i maoro, ua rahi oioi mai te amuiraa Kerisetiano maoti te ohipa pororaa. Aita e rave rahi i mana‘o e e rahi roa mai te reira e ma te vitiviti. (Kol. 1:23) Ua parau mai Iesu e “e tau noa mai te mau manu o te reva i roto i [to ’na] mau amaa.” Te auraa ïa e a rahi roa mai ai te amuiraa Kerisetiano, e ite te feia aau maitai i te maa, te mǎrû e te paruru pae varua i reira.—A hi‘o i te Ezekiela 17:23.

Ua rahi roa mai te amuiraa Kerisetiano ma te faahiahia mau

8. No te aha Iesu i faaohipa ’i i te faahoho‘araa o te huero sinapi?

8 No te aha Iesu i faaohipa ’i i teie faahoho‘araa? Ua faaohipa o ’na i te tupuraa maere mau o te hoê huero sinapi no te faahoho‘a e nafea te Basileia o te Atua e rahi mai ai, e paruru ai e e upootia ’i i nia i te mau fifi. Mai 1914, ua rahi roa mai te amuiraa Kerisetiano ma te faahiahia mau. (Isa. 60:22) Te tauturuhia ra te mau melo o teie amuiraa ia vai piri noa ia Iehova. (Mas. 2:7; Isa. 32:1, 2) Aita e patoiraa te nehenehe e tapea i te amuiraa ia ore ia rahi mai.—Isa. 54:17.

9. (a) Eaha te haapii mai i te faahoho‘araa o te huero sinapi? (b) Eaha ta te reira e haapii maira no nia ia Iehova e Iesu?

 9 Eaha te haapii mai i te faahoho‘araa o te huero sinapi? Peneia‘e te ora nei tatou i te vahi mea iti roa te Ite no Iehova e mea iti roa te maraaraa. Noa ’tu râ, eiaha roa ’tu tatou e haamoe e e nehenehe te Basileia e upootia i nia i te mau fifi atoa. E faaitoito mai teie mana‘o ia faaoromai. Ei hi‘oraa, a tapae ai te taeae Edwin Skinner i Initia i 1926, mea iti roa te Ite no Iehova i ǒ. E ere i te mea ohie no te mea mea iti roa te maraaraa. Ua poro noa râ o ’na e ua ite i te poroi o te Basileia ia upootia i nia i te mau fifi rahi mau. I teie mahana, ua hau atu i te 37 000 Ite no Iehova i Initia e ua hau atu i te 108 000 taata tei tae atu i te Oroa haamana‘oraa i 2013. I te matahiti a tae ai te taeae Skinner i Initia, no haamata noa atoa ’tura te ohipa pororaa i Zambie. I teie nei, ua hau atu i te 170 000 Ite no Iehova i ǒ e e 763 915 taata tei tae atu i te Oroa haamana‘oraa i 2013. Te auraa ïa e 1 taata i nia 18 i Zambie tei haere i te Oroa haamana‘oraa. Auê ïa maraaraa faahiahia mau e!

TE FAAHOPUE

10. Eaha te auraa o te faahoho‘araa o te faahopue?

10 A taio i te Mataio 13:33. Eaha te auraa o te faahoho‘araa o te faahopue? Tei nia teie faahoho‘araa i te poroi o te Basileia e e nafea te reira e taui ai i te oraraa o te taata. Te faahoho‘a ra te taatoaraa o te faraoa ota i te mau nunaa atoa. E te faahopueraa, i te parareraa o te poroi o te Basileia maoti te ohipa pororaa. E ite-oioi-hia te huero sinapi ia rahi mai. Area te faahopue, eita ïa. I muri a‘e roa e itehia ’i te mau faahopearaa.

11. No te aha Iesu i faaohipa ’i i te faahoho‘araa o te faahopue?

11 No te aha Iesu i faaohipa ’i i teie faahoho‘araa? Ua faaite Iesu e e mana to te poroi o te Basileia no te naea i “te hopea o te fenua” e no te faatupu i te tauiraa e rave rahi i roto i te aau o te taata. (Ohi. 1:8) Noa ’tu e eita paha tatou e ite oioi i tera mau tauiraa, te tupu ra te reira. Mea rahi mau te taata na te ao atoa te farii nei i te poroi o te Basileia e te vaiiho nei i te poroi puai mau ia taui i to ratou huru.—Roma 12:2; Eph. 4:22, 23.

12, 13. A faataa mai na mea nafea te ohipa pororaa i te maraaraa mai mai tei faataahia i roto i te faahoho‘araa o te faahopue.

12 E pinepine te mau faahopearaa o ta tatou pororaa i te itehia e rave rahi matahiti i muri a‘e te taata i te faarooraa i te poroi no te taime matamua. Ei  hi‘oraa, e ho‘i roa mai tatou i 1982. I poro na na hoa faaipoipo o Franz e Margit te i‘oa, tei tavini i te Betela i Beresilia, i roto i te hoê oire nainai. Ua haamata raua e rave rahi haapiiraa Bibilia, oia atoa a te hoê mama e ta ’na na tamarii e maha. E 12 matahiti to te tamaiti paari i tera taime. Mea mamahu roa o ’na e e pinepine o ’na i te tapuni hou a haamata ’i te haapiiraa. Ua faaea râ te haapiiraa no te mea ua tonohia Franz e Margit i te tahi atu vahi. E piti ahuru ma pae matahiti i muri a‘e, ua ho‘i mai raua. A feruri na i to raua oaoa a ite ai i ǒ i te hoê amuiraa e 69 taata poro, e pionie tamau 13 o ratou, o te putuputu ra i roto i te hoê Piha a te Basileia apî! Oia atoa i te ite i teie tamaroa mamahu tei paari mai e te tavini ra i teie nei ei tiaau o te tino matahiapo! Mai te faahopue i roto i te faahoho‘araa a Iesu, ua parare te poroi o te Basileia e ua taui i te oraraa o te taata e rave rahi.

13 I te mau fenua atoa ua taotiahia ta tatou ohipa pororaa, e nehenehe te puai o te poroi o te Basileia e taui i te taata. E pinepine tatou i te maere i te parareraa o te poroi i tera mau fenua. Ei hi‘oraa, ua tae te poroi o te Basileia i Cuba i 1910 e ua haere te taeae Russell i tera motu i 1913. Mea iti roa te maraaraa i te omuaraa. E i teie mahana? Ua hau atu ïa i te 96 000 taata e poro ra i te parau apî oaoa i Cuba e e 229 726 taata tei tae atu i te Oroa haamana‘oraa i 2013. Te auraa ïa e 1 taata i nia e 48 tei haere atu. I te mau fenua atoa aita i taotiahia ta tatou ohipa, ua tae roa atoa paha te poroi o te Basileia i te mau vahi te ore e mana‘ohia e te mau Ite no Iehova no ǒ. *Koh. 8:7; 11:5.

Tei roto te mau mea atoa i te rima o Iehova

14, 15. (a) E nafea tatou iho e faufaahia ’i i te haapiiraa i roto i te faahoho‘araa o te faahopue? (b) Eaha ta te reira e haapii maira no nia ia Iehova e Iesu?

14 E nafea tatou e faufaahia ’i i ta Iesu i haapii mai i roto i te faahoho‘araa o te faahopue? A feruri maite ai i te auraa o ta Iesu faahoho‘araa, e taa ia tatou e aita e faufaa ia haapeapea i te ravea e porohia ’i na mirioni taata tei ore â i faaroo i te poroi o te Basileia. Tei roto te reira i te rima o Iehova. Teie râ, eaha ta tatou ohipa? Te pahono ra te Parau a te Atua: “Ei te poipoi a ueue ai i ta oe huero, e ei te ahiahi eiaha e parahi noa, aore hoi oe i ite i tei tupu, teie e tera, e ia maitai apipiti atoa.” (Koh. 11:6) Mea faufaa ia haamana‘o noa tatou i te ani ia Iehova ia haamaitai i te ohipa pororaa, i te mau fenua iho â râ ua taotiahia ta tatou ohipa.—Eph. 6:18-20.

15 Eiaha atoa tatou e paruparu aita ana‘e tatou e ite oioi i te mau ohipa maitai o ta tatou pororaa. Eiaha tatou e vahavaha “i te mahana parau rii  haihai.” (Zek. 4:10) E riro paha te mau faahopearaa ei mea rahi a‘e e te faahiahia a‘e i ta tatou i mana‘o!—Sal. 40:5; Zek. 4:7.

TE TAATA HOOHOO E TE TAO‘A MOE

16. Eaha te auraa o te faahoho‘araa o te taata hoohoo e o te tao‘a moe?

16 A taio i te Mataio 13:44-46. Eaha te auraa o te faahoho‘araa o te taata hoohoo e o te tao‘a moe? I te tau o Iesu, e haere atea vetahi mau taata hoohoo no te imi e no te hoo mai i te poe maitai mau. Te faahoho‘a ra “te hoê poe maitai roa” i roto i te faahoho‘araa a Iesu i te parau mau faufaa roa o te Basileia. E te taata hoohoo, i te feia aau maitai e imi ra na te mau vahi atoa i teie parau mau. Ua ineine te taata hoohoo i te hoo atu i te mau tao‘a atoa na ’na no te hoo mai i teie poe maitai roa. Ua horoa atoa Iesu i te faahoho‘araa o te hoê taata e ohipa ra i roto i te hoê aua e o te ite mai i te tao‘a “moe.” Taa ê atu i te taata hoohoo, aita o ’na i imi noa i te tao‘a. A ite ai râ e mea faufaa tera tao‘a, ua ineine atoa o ’na i te hoo atu i te mau mea “atoa” no te fana‘o i te reira.

17. No te aha Iesu i horoa ’i i te faahoho‘araa o te taata hoohoo e o te tao‘a moe?

17 No te aha Iesu i horoa ’i i na faahoho‘araa e piti? Ua faaite o ’na e e nehenehe e itea i te parau mau ma te ravea taa ê. Te imi nei vetahi i te parau mau e te rave nei i te mau haapaeraa no te itea i te reira. Te ite nei vetahi ê i te parau mau noa ’tu e aita ratou e imi ra i te reira, peneia‘e a poro ai te tahi taata ia ratou. Ua ite râ i teie na taata i roto i na faahoho‘araa e piti e mea faufaa te mea ta raua i ite mai e ua ineine raua i te rave i te mau haapaeraa rahi no te fana‘o i te reira.

Ia ineine oe i te rave i tei nehenehe no te tuu noa i te reira na mua roa

18. (a) E nafea tatou e faufaahia ’i i teie na faahoho‘araa? (b) Eaha ta te reira e haapii maira no nia ia Iehova e Iesu?

18 E nafea tatou e faufaahia ’i i teie na faahoho‘araa? (Mat. 6:19-21) A uiui: ‘Hoê â huru anei to ’u i to teie na taata no nia i te parau mau? No ’u, e au anei te parau mau i te hoê tao‘a? Ua ineine anei au i te rave i te mau haapaeraa no te fana‘o i te reira aore ra te vaiiho nei au i te tahi atu mau ohipa mai te mau haapeapearaa o te oraraa ia haafariu ê ia ’u?’ (Mat. 6:22-24, 33; Luka 5:27, 28; Phil. 3:8) Ia hinaaro mau tatou i te parau mau, e ineine tatou i te rave i tei nehenehe no te tuu noa i te reira na mua roa.

19. Eaha ta tatou e hi‘opoa i to muri mai tumu parau?

19 E faaite ana‘e e ua faaroo e ua taa maitai ia tatou te auraa o teie mau faahoho‘araa. A haamana‘o e eita e navai ia taa noa i to te reira auraa. Mea faufaa ia faaohipa i ta tatou i haapii mai. I to muri mai tumu parau, e hi‘opoa mai tatou e toru â faahoho‘araa e i te mau haapiiraa e huti mai.

^ par. 13 E nehenehe e taio na roto i te reo Farani i te hoê â huru aamu i Raparata (Buka matahiti no 2001, api 186); Heremani hitia o te râ (Buka matahiti no 1999, api 83); e Papua (Buka matahiti no 2005, api 63). Oia atoa na roto i te reo Tahiti no nia i te motu o Robinson Crusoé (Te Pare Tiairaa o te 15 no Tiunu 2000, api 8).