Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TITEMA 2014

Te haafaufaa ra anei oe i ta oe i fana‘o?

Te haafaufaa ra anei oe i ta oe i fana‘o?

‘Te varua i noaa ia tatou nei, o te varua ïa no ǒ mai i te Atua ra: ia ite tatou i te mau mea i horoa-noa-hia mai e te Atua no tatou nei.’—KOR. 1, 2:12.

1. Eaha te mana‘o o te taata e rave rahi no nia i ta ratou e fana‘o nei?

UA FAAROO a‘ena paha oe i te taata ia parau: “I te taime noa oe e ere ai i te tahi mea e ite ai oe e mea faufaa mau te reira.” Peneia‘e ua mana‘o atoa oe mai tera. Ei hi‘oraa, e nehenehe te hoê taata tei paari mai i roto i te hoê utuafare moni e haafaufaa ore i ta ’na e fana‘o nei. Aore ra no to ’na ite ore i te oraraa, eita paha te hoê taata apî e taa eaha te mea faufaa mau i roto i te oraraa.

2, 3. (a) Eiaha te mau Kerisetiano apî ia pee i teihea huru feruriraa? (b) Eaha te tauturu mai ia haafaufaa i ta tatou e fana‘o nei?

2 Mea apî anei oe? Eaha te mea faufaa no oe? No te feia apî i roto i teie nei ao, e pinepine e mea faufaa a‘e te mau tao‘a materia i te mau taairaa. E hinaaro paha ratou i te ohipa maitai, te fare au mau aore ra te tao‘a tei matara apî mai. Mai te peu e te niu ra ratou i to ratou oraraa i nia i teie mau mea, te ere nei ratou i te mea faufaa a‘e: to ratou taairaa e te Atua. Mai te peu e ua paari oe i roto i te parau  mau, ua fana‘o oe i te hoê ô pae varua faahiahia. (Luka 11:28) A haafaufaa i ta oe tufaa pae varua. Ia ore, e nehenehe oe e ite i te faahopearaa peapea mau i nia i to oraraa.

3 Eiaha roa ’tu râ te reira ia tupu. E hi‘opoa mai tatou i te tahi mau hi‘oraa Bibilia o te tauturu ia oe ia haafaufaa i ta oe tufaa pae varua. E tauturu teie mau hi‘oraa i te feia apî e ia tatou paatoa ia haafaufaa i ta Iehova i horoa mai.

UA HAAFAUFAA ORE VETAHI I TA RATOU TUFAA PAE VARUA

4. E nafea te Samuela 1, 8:1-5 e faataa ’i i na tamaiti a Samuela?

4 Ua fana‘o vetahi mau taata faahitihia i roto i te Bibilia i te hoê tufaa pae varua, aita râ ratou i haafaufaa i te reira. Mea apî roa te peropheta Samuela a tavini ai oia ia Iehova e ua vai taiva ore noa ia ’Na. (Sam. 1, 12:1-5) Aita râ ta Samuela na tamaiti o Ioela raua Abia i pee i to ’na hi‘oraa maitai. Ua riro mai râ raua ei taata pi‘o e te ino.—A taio i te Samuela 1, 8:1-5.

5, 6. Eaha te ohipa i tupu i nia i te mau tamaiti e te mootua a Iosia?

5 Hoê â huru e te mau tamaiti a te arii Iosia. E arii taiva ore Iosia o tei here e tei haamori ia Iehova. A itehia ’i te buka o te Ture a te Atua e a taiohia ’i te reira ia Iosia, ua faaohipa o ’na i ta Iehova mau faaueraa. Ua faaore o ’na i te haamoriraa idolo e te ohipa tahutahu i taua fenua ra e ua faaitoito i te nunaa ia faaroo ia Iehova. (Arii 2, 22:8; 23:2, 3, 12-15, 24, 25) Auê ïa tufaa pae varua faahiahia mau no ta ’na mau tamaiti! A riro mai ai râ e toru o ta ’na mau tamaiti e hoê mootua ei arii, aita hoê a‘e o ratou i haafaufaa i ta ratou i fana‘o.

6 A arii mai ai te tamaiti a Iosia ra o Iehoahaza, ua rave o ’na i “te parau ino i te aro o Iehova.” E toru ava‘e noa o ’na i te ariiraa mai a tuu ai te hoê Pharao no Aiphiti ia ’na i te fare tapearaa. I muri a‘e, mea atea mau o ’na i to ’na fare a pohe ai oia ei taata mau auri. (Arii 2, 23:31-34) I muri iho, ua arii mai to ’na taeae o Iehoiakima 11 matahiti i te maoro. Aita atoa o ’na i haafaufaa i ta ’na i fana‘o no ǒ mai i to ’na metua tane. No to ’na ino, ua parau Ieremia no nia ia ’na: “Mai te tanuraa o te asini to ’na tanuraa.” (Ier. 22:17-19) Mea ino atoa ta Iosia tamaiti ra o Zedekia e ta ’na mootua ra o Iehoiakina e  aita raua i pee i te taiva ore o Iosia.—Arii 2, 24:8, 9, 18, 19.

7, 8. (a) Mea nafea Solomona i te haafaufaa-ore-raa i ta ’na tufaa pae varua? (b) Eaha te haapii mai i te mau hi‘oraa Bibilia o te feia tei haafaufaa ore i ta ratou tufaa pae varua?

7 Ua haapii mai te arii Solomona i to ’na ra papa o Davida e nafea ia tavini ia Iehova. I muri a‘e râ, ua haafaufaa ore o ’na i ta ’na tufaa pae varua. “Paari a‘era hoi Solomona, faafariu-ê-hia ihora tana aau e te mau vahine na ’na, a pee atu ai i te mau atua ěê; aita a‘era tana aau i au i to ’na Atua ia Iehova, mai te aau o to ’na metua ra o Davida.” (Arii 1, 11:4) No teie ohipa, ua ere Solomona i ta Iehova farii maitai.

8 E nehenehe teie mau taata e ite o vai Iehova e e rave i te mea tia. Ma te peapea râ, aita ratou i na reira. E ere râ te feia apî atoa te haafaufaa ore i ta ratou tufaa pae varua. E hi‘opoa ana‘e i teie nei i te hi‘oraa maitai o te tahi feia apî ta oe e nehenehe e pee.

UA HAAFAUFAA VETAHI I TA RATOU I FANA‘O

9. Mea nafea te mau tamaiti a Noa i te horoaraa i te hi‘oraa maitai roa? (A hi‘o i te hoho‘a matamua.)

9 E hi‘oraa maitai roa te mau tamaiti a Noa. Ua oaoa ratou i te tauturu ia Noa ia patu i te araka no te faaora i te taata. Ua ite ratou e e mea tia ia faaroo ratou ia Iehova e ua tomo i roto i te araka hou te diluvi. (Gen. 7:1, 7) Te faahopearaa? Te na ô ra te Genese 7:3 e ua rave ratou i te mau animara i roto i te araka “ia ora to ratou fanau‘a i nia i te fenua atoa nei.” E ua faaora-atoa-hia te taata. Ua haafaufaa ta Noa mau tamaiti i ta ratou tufaa pae varua. No reira ratou i oaoa ’i i te tauturu ia faaora i te taata e ia haamau faahou i te haamoriraa mau i nia i te fenua.—Gen. 8:20; 9:18, 19.

Aita roa ’tu na Hebera apî e maha i haamoe o vai ratou e eaha ta ratou i haapii

10. Mea nafea e maha tane Hebera i Babulonia i te faaiteraa e mea faufaa no ratou ta ratou tufaa pae varua?

10 E hanere matahiti i muri a‘e, ua patoi e maha tane Hebera i te pee i te huru oraraa o to Babulonia. Ua haruhia e ua afai-tîtî-hia Hanania, Misaela, Azaria e o Daniela i Babulonia i 617 hou te Mesia. Mea haviti e mea aravihi ratou e e nehenehe ratou e manuïa i Babulonia. Aita roa ’tu râ ratou i haamoe o vai ratou e eaha ta ratou i haapii. No reira Iehova i haamaitai rahi ai i teie mau tane.—A taio i te Daniela 1:8, 11-15, 20.

11. Mea nafea vetahi ê i te faufaaraahia i te tufaa pae varua a Iesu?

11 O Iesu te hi‘oraa maitai roa ’‘e o tei haafaufaa i ta ’na tufaa pae varua. Ua au mau o ’na i ta to ’na Metua i haapii atu. Mea papu te reira a parau ai oia: “O ta tau Metua . . . i haapii mai ia ’u ra, o ta ’u ïa e parau nei.” (Ioa. 8:28) Ua oaoa o ’na i te faaite ia vetahi ê i ta ’na i haapii mai ia faufaa-atoa-hia ratou. Ua parau oia: “E parau haere â vau i te parau maitai o te basileia o te Atua i te mau oire ê atu â e tia ’i, i tonohia mai ai hoi au.” (Luka 4:18, 43) Aita te ao e  haafaufaa ra i te parau mau no ǒ mai i te Atua ra. No reira Iesu i faaara ’i i ta ’na mau pǐpǐ ia ore e riro “i to teie nei ao.”—Ioa. 15:19.

A HAAFAUFAA I TA OE I FANA‘O

12. (a) E nafea te Timoteo 2, 3:14-17 e tano ai no te taata apî e rave rahi i teie mahana? (b) Ia uiui te mau Kerisetiano apî i te aha?

12 Mai te peu e e metua to oe o te here ra ia Iehova, ua fana‘o oe i te hoê tufaa pae varua. Ua tano atoa ïa ta te Bibilia e parau ra no nia ia Timoteo no oe. (A taio i te Timoteo 2, 3:14-17.) Ua haapii to mau metua ia oe o vai Iehova e e nafea e faaoaoa ’i ia ’na. Ua na reira paha raua mai to oe aiûraa mai â. Ua tauturu te reira ia oe ‘ia paari e tae noa ’tu i te ora i te faaroo i te Mesia ra ia Iesu’ e ‘ia au roa i te mau ohipa maitatai atoa’ no te tavini i te Atua. Tera râ, te haafaufaa mau ra anei oe i ta oe e fana‘o nei? A uiui: ‘Eaha to ’u mana‘o i te tavini taiva ore e rave rahi tei ora i na mua ’‘e? E oaoaraa anei no ’u ia riro ei Ite no Iehova? Eaha to ’u huru aau a feruri ai e tei roto vau i te feia varavara roa ta te Atua i matau? Te taa ra anei ia ’u e e fana‘oraa taa ê otahi e te faahiahia mau ta ’u?’

Eaha to oe huru aau i te riro ei tavini taiva ore a te Atua mai e rave rahi na mua ’tu ia oe? (A hi‘o i na paratarafa 9, 10, 12)

13, 14. Eaha ta vetahi tei paari i roto i te parau mau e hinaaro e rave, e no te aha râ mea maamaa ’i te reira? A faataa.

13 Aita paha vetahi tei paari e te mau metua Kerisetiano e ite ra e mea faahiahia roa te parau mau e mea au ore mau te ao a Satani. Ua hinaaro vetahi e ite mai te aha te huru o te oraraa i roto i teie nei ao. Tera râ, e horo anei oe i mua i te hoê pereoo e tere ra no te ite noa mai te peu e pepe aore ra e pohe oe? Mea maamaa te reira, e ere anei?  Aita ïa e faufaa ia tamata i te mau mea ino o teie nei ao no te ite i te mauiui rahi ta te reira e faatupu.—Pet. 1, 4:4.

Aita e faufaa ia tamata i te mau mea ino o teie nei ao no te ite i te mauiui rahi ta te reira e faatupu

14 Ua paari o Gener i roto i te parau mau i Asia e ua bapetizohia oia i te 12raa o to ’na matahiti. I to ’na râ taurearearaa, ua hinaaro o ’na e tamata i te oraraa i roto i te ao ma te tiaturi e e noaa ia ’na te tiamâraa. Ua haamata Gener i te haavare i to ’na utuafare e ua huna i te tahi mau mea ia ratou. I te 15raa o to ’na matahiti, ua rave o ’na i te tahi mau mea ino ta to ’na mau hoa e rave ra mai te inuraa i te ava e te parau-ino-raa. I te maororaa po roa o ’na e ho‘i mai ai i te fare, i muri iho i te hautiraa i te patia pôro e te mau hauti haavî u‘ana i nia i te roro uira. I te hoê mahana, ua taa ia ’na e aita o ’na e oaoa ra i ta ’na e rave ra e mea faufaa ore to ’na oraraa. Ua ho‘i mai o ’na i roto i te parau mau i teie nei. Te na ô ra o ’na e i te tahi taime mea fifi noâ ia ore e hema i teie ao, tera râ, o te haamaitairaa a Iehova te mea faufaa a‘e no ’na.

15. Ua paari tatou i roto i te parau mau aore ra aita, ia feruri tatou paatoa i te aha?

15 Noa ’tu e aita to oe mau metua i roto i te parau mau, a feruri i ta oe fana‘oraa taa ê ia itehia e te Atua poiete e ia tavini ia ’na! I nia i na miria taata i te fenua, ua faaite Iehova ia ’na iho ia oe. Auê ïa haamaitairaa e! (Ioa. 6:44, 45) Noa ’tu e ua haapii tatou i te parau mau e to tatou mau metua aore ra aita, e nehenehe tatou e oaoa mau i te ite i te reira. (A taio i te Korinetia 1, 2:12.) Te na ô ra Gener: “O vai hoi au ia itehia mai au e Iehova, te Atua no ’na te ao nui?” (Sal. 8:4) Te parau ra te hoê tuahine: “E oaoa mau te mau piahi ia itehia ratou e to ratou orometua haapii. E fana‘oraa hau ê mau ïa ia itehia mai e Iehova, te Orometua rahi roa ’‘e!”

EAHA TA OE E RAVE?

16. Eaha te maitiraa î i te paari no te mau Kerisetiano apî?

16 A feruri i ta oe tufaa pae varua faahiahia e a haamau ei fa e tavini ia  Iehova. A pee i te hi‘oraa maitai o te mau tavini taiva ore i tahito ra. Eiaha e riro mai te rahiraa o te feia apî i roto i te ao o te haafaufaa ore ra i to ratou oraraa. Aita to ratou e ananahi.—Kor. 2, 4:3, 4.

17-19. No te aha e haerea î i te paari ia ore e pee i te ao?

17 E ere iho â i te mea ohie ia ore e pee i te ao. E haerea î i te paari râ ia na reira. A feruri na i te hoê taata e faaineine ra ia ’na no te Heiva tuaro nui. No te tapae i tera faito, e mea tia ia taa ê o ’na i to ’na mau hoa. E haapae o ’na i te mea e rave rahi o te rave i to ’na taime e itoito. Ua ineine o ’na i te ore e pee i to ’na mau hoa no te faaineine atu â ia ’na e no te naea i ta ’na fa.

A feruri i ta oe tufaa pae varua faahiahia e a haamau ei fa e tavini ia Iehova

18 Aita te rahiraa o te taata i roto i te ao e feruri roa ra i te mau faahopearaa ino o ta ratou e rave ra. Te mau Ite no Iehova râ, oia ïa. Mai te peu e mea taa ê tatou i te ao e te haapae nei tatou i te mau mea mai te haerea morare ore o te nehenehe e tuino i to tatou taairaa e o Iehova, e “rave [t]atou i te ora mure ore.” (Tim. 1, 6:19) Te na ô ra te tuahine faahiti-ê-na-hia: “Ia turu oe i ta oe e tiaturi ra, e oaoa mau oe i te hopea o te mahana. E faaite te reira e ua fana‘o oe i te puai no te ore e pee i te ao a Satani. Hau roa ’tu â, mai te huru ra e te ite ra oe i te Atua ra ia Iehova ia oaoa ia oe e ia ataata mai! I reira oe e oaoa ’i i te riro ei mea taa ê!”

19 Eiaha e haamâu‘a i to oe oraraa ma te mana‘o noa i ta oe e nehenehe e fana‘o i teie nei â. (Koh. 9:2, 10) Ua taa ia oe no te aha oe e ora ’i e e nehenehe oe e ora e a muri noa ’tu. E tauturu te reira ia oe ia rave i te mau faaotiraa maitai e ia ore e “haere i ta te tahi pae Etene haerea.” Mea faufaa to oe oraraa.—Eph. 4:17; Mal. 3:18.

20, 21. Eaha to tatou ananahi ia rave tatou i te mau faaotiraa tano? Eaha râ ta Iehova e titau maira?

20 Ia rave tatou i te faaotiraa tano, e oaoa tatou i te oraraa i teie nei â e e ora tatou e a muri noa ’tu i roto i te ao apî a te Atua. E haamaitai rahi mai Iehova. (Mat. 5:5; 19:29; 25:34) Eita râ o ’na e horoa i teie mau haamaitairaa i te taata atoa. Te titau ra o ’na ia faaroo tatou ia ’na. (A taio i te Ioane 1, 5:3, 4.) Mea hoona râ ia faaitoito i te tavini ia Iehova ma te taiva ore i teie nei â!

21 Mea rahi te mea ta Iehova i horoa mai. Te fana‘o nei tatou i te ite mau o ta ’na Parau. Te taa maitai ra ia tatou te parau mau no nia ia ’na e i ta ’na mau opuaraa. Ei Ite no Iehova, te oaoa nei tatou i te amo i to ’na i‘oa. Te fafau ra te Atua e tei pihaiiho o ’na ia tatou no te tauturu mai. (Sal. 118:7) E faaite paatoa ana‘e, tei apî e tei paari, e te haafaufaa ra tatou i ta tatou tufaa pae varua e te hinaaro ra tatou e horoa ia Iehova “te haamaitai mure ore.”—Roma 11:33-36; Sal. 33:12.