Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) NOVEMA 2014

No te aha ia mo‘a ’i tatou?

No te aha ia mo‘a ’i tatou?

“Ia mo‘a hoi outou.”—LEV. 11:45.

1. Nafea te buka Levitiko e tauturu mai ai ia tatou?

TE TITAU nei Iehova ia mo‘a ta ’na mau tavini atoa. Noa ’tu e ua faahitihia teie parau i roto i te Bibilia taatoa, e faahiti-pinepine-hia te reira i roto i te buka Levitiko. Mea maitai ia maramarama e ia haafaufaa i teie buka. E tauturu mai hoi te reira ia ite e nafea ia vai mo‘a noa.

2. Eaha te itehia i roto i te buka Levitiko?

2 E tuhaa te Levitiko, buka papaihia e Mose, o “te mau Parau mo‘a atoa” tei “mea maitai ei haapiiraa.” (Tim. 2, 3:16) I roto i te reo tumu o te Bibilia, ua papaihia te i‘oa o Iehova ahuru a‘e taime i roto i te mau pene atoa o teie buka. Ia taa ia tatou te Levitiko, e puaihia tatou no te ore e rave i te tahi noa ’‘e mea e faainohia ’i te i‘oa o te Atua. (Lev. 22:32) E haamana‘o mai te parau ‘O vau o Iehova,’ tei faahiti-pinepine-hia i roto i teie buka, ia faaroo i te Atua. I roto i teie tumu parau e i to muri nei, e itea ia tatou te mau tao‘a faufaa rahi itehia i roto i te Levitiko e o te tauturu mai ia mo‘a noa i roto i ta tatou haamoriraa i te Atua.

E TITAUHIA TE MO‘ARAA

3, 4. Eaha ta te tamâraa o Aarona e o ta ’na mau tamaiti i faahoho‘a? (A hi‘o i te hoho‘a matamua.)

3 A taio i te Levitiko 8:5, 6. Ua faatoroa Iehova ia Aarona  ei tahu‘a rahi o Iseraela e i ta ’na mau tamaiti ei tahu‘a no te nunaa. Ua faahoho‘a Aarona ia Iesu e ta ’na mau tamaiti i te mau Kerisetiano faatavaihia. Eaha te auraa o te tamâraa o Aarona? Te auraa anei e e titauhia ia tamâhia Iesu? E ere. Mea hara ore Iesu e te “ino ore.” (Heb. 7:26; 9:14) I muri iho noa i to Aarona tamâraahia i faahoho‘ahia ’i oia ia Iesu. Mea viivii ore hoi o ’Na e te parau-tia. Eaha ïa ta te tamâraa o te mau tamaiti a Aarona e faahoho‘a ra?

4 Te faahoho‘a ra te tamâraa o te mau tamaiti a Aarona i te tamâraa o te feia i maitihia no te riro ei tahu‘a i nia i te ra‘i. Ua taaihia anei teie tamâraa i to ratou bapetizoraa? Aita. Eita hoi te bapetizoraa e tamâ i te hara. E taipe râ teie o te pûpûraa te hoê taata ia ’na iho i te Atua. Ua tamâhia tei faatavaihia i “te parau i a‘ohia” e e mea tia ïa ia faaohipa roa ratou i ta te Mesia mau haapiiraa i roto i to ratou oraraa. (Eph. 5:25-27) Mea na reira ratou e moa ’i e e mâ ’i. E no te mau “mamoe ê atu” ïa?—Ioa. 10:16.

Te oaoa nei Iehova a ite ai e mea mâ e te auhoê to ’na nunaa

5. No te aha e nehenehe ai e parau e mea mâ te mau mamoe ê atu i te Parau a te Atua?

5 Aita te mau tamaiti a Aarona i faahoho‘a i te “feia rahi roa” o te mau mamoe ê atu a Iesu. (Apo. 7:9) Ua mo‘a e ua mâ atoa mai râ te mau mamoe ê atu i te Parau a te Atua. Ia faatupu te feia e tiaturi ra e ora i te fenua i te faaroo i ta te Bibilia e parau ra no nia i te puai o te tusia o Iesu, e hinaaro ratou e haamori ia Iehova i “te rui e te ao.” (Apo. 7:13-15) E ohipa tamau te tamâraa o te feia faatavaihia e o te mau mamoe ê atu. Mea mâ noa ïa to ratou haerea i te mau taime atoa. (Pet. 1, 2:12) Te oaoa nei Iehova  a ite ai e mea mâ e te auhoê to ’na nunaa a auraro e a pee ai ratou ma te taiva ore i to ratou Tiai mamoe ra o Iesu!

6. No te aha ia hi‘opoa tamau ai tatou ia tatou iho?

6 E mea tia ia vai mâ noa te mau tahu‘a no Iseraela i te pae tino. Eaha ïa te auraa no tatou i teie mahana? Ua tapao ta tatou piahi Bibilia e rave rahi e mea maitai to tatou faaahuraa e mea mâ tatou, oia atoa ta tatou mau vahi haamoriraa. Hau atu â, e mea tia ia faaite te feia e hinaaro ra e haamori ia Iehova i te hoê “aau maitai.” (A taio i te Salamo 24:3, 4; Isa. 2:2, 3.) E mea tia ïa ia tavini tatou ia Iehova e te hoê feruriraa mâ, te hoê aau mâ e te hoê tino mâ. E titauhia ia hi‘opoa tamau tatou ia tatou iho. I te tahi taime, e ite paha tatou e e titauhia ia rave i te mau tauiraa rahi ia mo‘a noa. (Kor. 2, 13:5) Ei hi‘oraa, ia ui te hoê Kerisetiano bapetizohia o te hi‘o ra i te hoho‘a faufau: ‘Te faaite ra anei vau e mea mo‘a vau?’ Ia oti, mea faufaa ia imi o ’na i te tauturu no te faaea i tera peu ino.—Iak. 5:14.

A FAAITE E MEA MO‘A OE MA TE FAAROO ATU

7. Eaha te hi‘oraa ta Iesu i vaiiho tei tuea i to te mau tahu‘a faahitihia i roto i te Levitiko 8:22-24?

7 A haamauhia ’i te autahu‘araa i Iseraela, i tuuhia na te toto o te hoê pinia mamoe oni i nia i te tari‘a atau, te manimani rima rahi atau e te manimani avae rahi atau o te Tahu‘a rahi ra ia Aarona e o ta ’na mau tamaiti. (A taio i te Levitiko 8:22-24.) I faaohipahia na te toto mai tera no te faaite e e rave te mau tahu‘a i ta ratou mau hopoia ma te taiva ore. Oia atoa, ua vaiiho Iesu ei Tahu‘a rahi i te hoê hi‘oraa tia roa no te feia faatavaihia e no te mau mamoe ê atu. Ua faaroo o ’na i te aratairaa a te Atua, ua rave i to Iehova hinaaro e ua pee i te hoê huru oraraa mo‘a.—Ioa. 4:31-34.

8. Eaha te titauhia ia rave tatou paatoa?

8 Ei tavini a Iehova, e mea tia ia pee tatou paatoa i te hi‘oraa o Iesu o tei tapea i to ’na hapa ore i te Atua. E mea tia ia faaroo maite tatou i ta te Atua mau aratairaa itehia i roto i te Bibilia. Eita ïa tatou e ‘faariri i te varua mo‘a o te Atua.’ (Eph. 4:30) A faaoti papu e ‘haamanina i te e‘a o to avae.’—Heb. 12:13.

E mea tia ia faaroo maite tatou i ta te Atua mau aratairaa itehia i roto i te Bibilia. Eita ïa tatou e ‘faariri i te varua mo‘a o te Atua’

9. Eaha ta e toru taeae o tei ohipa amui e rave rahi matahiti e te mau melo o te Tino aratai i parau, e nafea ta ratou mau faaararaa e tauturu ai ia vai mo‘a noa?

9 E hi‘o ana‘e i ta e toru taeae i parau. Ua ohipa amui ratou e rave rahi matahiti e te mau melo o te Tino aratai. Ua faahiti hoê: “E huru taviniraa otahi mau teie. I te tahi râ mau taime, ua faaite te ohipa-amui-raa e te mau taeae faatavaihia e e taeae tia ore noâ ratou. Hoê râ o ta ’u mau fa i te roaraa o te mau matahiti, o te faarooraa ïa i te mau taeae e aratai ra.” Ua parau te piti o te taeae:  “Ua tauturu mai te mau irava mai te Korinetia 2, 10:5 no nia i te “faaroo i te Mesia” ia faaroo e ia ohipa amui e te mau taeae e aratai ra. Tera te faaroo no roto roa mai i te aau.” Ua parau te toru o te taeae: “Teie te auraa e au i ta Iehova e au ra e e riri i ta ’na e riri ra, oia atoa e imi tamau i ta ’na aratairaa e e rave i ta ’na e au: e faaroo i ta ’na faanahonahoraa e i te feia ta ’na e faaohipa ra no te turu i ta ’na opuaraa no te fenua.” Te haamana‘o ra teie taeae i te hi‘oraa o Nathan Knorr. Ua farii taeae Knorr, tei riro mai ei melo o te Tino aratai, i tei parauhia i roto i te tumu parau “Fanauraa o te nunaa” o Te Pare Tiairaa no 1925 noa ’tu e ua patoi vetahi ê i te reira. Ua putapû te taeae i teie auraro o te taeae Knorr. E tauturu te feruri-maite-raa i te mau parau a teie na taeae e toru ia faaroo i te Atua e ia vai mo‘a noa.

AURARORAA MO‘A I TA TE ATUA TURE I TE TOTO

10. No te aha mea faufaa roa ’i no tatou ia auraro i ta te Atua ture no nia i te toto?

10 A taio i te Levitiko 17:10, 14. Ua faaue Iehova i te mau Iseraela eiaha e amu “i te toto o te mau mea atoa nei.” Ua faaue-atoa-hia te mau Kerisetiano eiaha e amu i te toto taata e animara. (Ohi 15:28, 29) Mea mauiui ia feruri ia tatou ia rave i te hoê ohipa e faarue ai te Atua ia tatou a tiavaruhia ’tu ai i te amuiraa. Te here nei tatou ia Iehova e te hinaaro nei e faaroo ia ’na. I roto atoa i te fifi atâta, eita tatou e faaroo ore ia ’na noa ’tu e tera te aniraa a te feia o tei ore i ite o vai Iehova aore ra o tei ore e tâu‘a ra ia ’na. E faaooo mai paha vetahi aita ana‘e tatou e farii i te toto. Ua maiti râ tatou e faaroo i te Atua. (Iuda 17, 18) Eaha te tauturu mai ia faaoti papu eiaha e amu i te toto aore ra e farii i te hoê pâmuraa toto?—Deut. 12:23.

Ua here tatou ia Iehova e te hinaaro nei tatou e faaroo ia ’na

11. No te aha e nehenehe ai e parau e e oroa faufaa roa te Mahana taraehara?

11 E hi‘o ana‘e eaha ta te tahu‘a rahi i Iseraela i rave na hoê taime i te matahiti i te Mahana taraehara. E taa ïa ia tatou i to te Atua mana‘o i te toto. Ua faaohipa-noa-hia te toto no te hoê fa taa ê: te faaoreraa i te hara ia nehenehe te mau Iseraela e fana‘o i te taairaa hau e te Atua. E pîpîhia te toto o te puaatoro e o te puaaniho i mua i te tapo‘i o te afata faufaa. (Lev. 16:14, 15, 19) Na roto i tera toto e faaore ai te Atua i te hara a te mau Iseraela. Ua parau atoa Iehova e ia haapohe te hoê taata i te hoê animara ei maa na ’na, e mea tia ia faatahe o ’na i te toto o te animara i raro a tapo‘i atu ai i te repo. “Tei te toto hoi te maa ora e ora ’i te mau mea atoa.” (Lev. 17:11-14) E ere teie mau faaueraa i te huru raveraa faufaa ore. E hanere matahiti na mua ’tu, ua opani te Atua ia Noa e i to ’na huaai ia amu i te toto. (Gen. 9:3-6) Eaha ïa te auraa no te mau Kerisetiano?

12. E nafea Paulo e taai ai i te toto i te faaoreraa i te hara?

12 Ua faataa te aposetolo Paulo e e mana to te toto no te tamâ a papai ai:  “Aita rea hoi e mea toe i te tamâhia i te toto i ta te ture ra; e aore e toto i faatahehia ra, aita roa e faaoreraa hara.” (Heb. 9:22) No te hoê taime poto noa râ te faufaa o te mau tusia animara. Ua faahiti Paulo e i haamana‘o na teie mau tusia i te mau Iseraela e e taata hara ratou e e titauhia te hoê tusia rahi a‘e no te faaore roa i ta ratou mau hara. ‘E ata te ture no te mau mea maitatai a muri atu, e ere râ i taua mau mea mau ihora.’ (Heb. 10:1-4) E nafea ïa e faaorehia ’i te hara?

13. Eaha te auraa no oe te pûpûraa ’tu Iesu i te faufaa o to ’na toto ia Iehova?

13 A taio i te Ephesia 1:7. Ua pohe Iesu ei tusia no te taata atoa e e auraa faufaa mau to te reira no te feia e here ra ia ’na e i to ’na Metua. (Gal. 2:20) Na te ohipa râ ta Iesu i rave i muri a‘e i to ’na tia-faahou-raa e faaora ia tatou i te hara, mai tei itehia i te Mahana taraehara. A haere ai te tahu‘a rahi i roto i te vahi Mo‘a Roa, mai te huru ra e te tia ra o ’na i mua i te Atua. I reira, e pûpû te tahu‘a i te toto o te animara i te Atua. (Lev. 16:11-15) I muri iho i to ’na tia-faahou-raa, ua haere Iesu i nia i te ra‘i e ua pûpû i te faufaa o to ’na toto taata i te Atua. (Heb. 9:6, 7, 11-14, 24-28) Auê tatou i te oaoa, maoti hoi te faaroo i te toto  o te tusia o Iesu e nehenehe ai ta tatou mau hara e faaorehia a fana‘o atu ai i te mana‘o haava mâ!

14, 15. No te aha mea faufaa ’i ia taa e ia faaroo i ta Iehova ture no nia i te toto?

14 Ua taa maitai a‘e paha ia oe i teie nei no te aha Iehova e faaue mai ai eiaha e amu i “te toto o te mau mea atoa nei.” (Lev. 17:10, 14) Te taa ra anei ia oe no te aha mea mo‘a mau ai te toto no te Atua? E faahoho‘a te toto i te ora. (Gen. 9:4) E farii iho â oe e e mea tia ia tuea to tatou mana‘o i te toto i to te Atua e ia faaroo i ta ’na faaueraa e haapae i te reira. Teie te ravea otahi e ite ai tatou i te hau e te Atua: E faatupu i te faaroo i te tusia taraehara o Iesu e e taa e mea faufaa roa te toto no to tatou Atua poiete.—Kol. 1:19, 20.

Ua faaoti papu anei oe e faaroo i ta te Atua ture no nia i te toto? (A hi‘o i na paratarafa 14, 15)

15 I roto i te hoê tupuraa mana‘o-ore-hia, e titauhia paha ia rave tatou i te faaotiraa e farii aore ra aita i te pâmuraa toto, i te mau tuhaa o te toto aore ra i te tahi ravea rapaauraa o te faaohipa i te toto. Mea faufaa ia pure oe ia Iehova, ia rave i te mau maimiraa e ia rave i te hoê faaotiraa papu hou a tupu ai te tahi ohipa ru. E papu ïa ia oe e e haapae iho â oe i te toto. Eita roa ’tu tatou e hinaaro ia oto Iehova no te mea ua farii tatou i ta ’na e faahapa ra! I teie mahana, mea rahi te taote e te taata te faaitoito nei ia horoa i to tatou iho toto no te faaora ia vetahi ê. Ei nunaa mo‘a râ o te Atua, ua ite tatou e e tiaraa to Iehova no te parau e nafea ia faaohipa i te toto. No ’na, mea mo‘a “te toto o te mau mea atoa nei.” Ia faaoti papu ïa tatou e faaroo i ta ’na ture no nia i te toto e tia ’i. E nehenehe atoa tatou e faaite ma to tatou haerea mâ e mea faufaa no tatou te toto o te tusia o Iesu. O to ’na ana‘e toto te nehenehe e faaore i ta tatou mau hara e e horoa mai i te ora mure ore.—Ioa. 3:16.

Ia faaoti papu tatou e faaroo i ta te Atua ture no nia i te toto e tia ’i

NO TE AHA IEHOVA E HINAARO AI IA MO‘A TATOU?

16. No te aha ia mo‘a ’i te nunaa o Iehova?

16 I to Iehova faatiamâraa mai i te mau Iseraela i te faatîtîraa i Aiphiti, ua parau oia ia ratou: “Na ’u . . . na Iehova i aratai mai ia outou, mai te fenua maira mai Aiphiti, ia riro vau ei Atua no outou; e ia mo‘a hoi outou, no te mea te mo‘a nei au.” (Lev. 11:45) Ua hinaaro Iehova ia mo‘a te mau Iseraela no te mea mea mo‘a oia. E te hinaaro ra Iehova ia mo‘a atoa tatou i teie mahana. O ta te buka Levitiko ïa e faataa maitai ra.

17. Eaha to oe mana‘o no nia i te buka Bibilia o te Levitiko?

17 Eita e ore e ua maitaihia oe i te hi‘opoaraa i te tahi mau tuhaa faufaa i roto i te Levitiko. Peneia‘e ua au roa ’tu â oe i teie buka o te Bibilia e ua taa maitai a‘e no te aha ia mo‘a ’i tatou. Eaha ’tu â te haapii mai i te buka Levitiko? E nafea teie buka o te Bibilia e tauturu mai ai ia haamori i te Atua ma te viivii ore? O ta tatou ïa e aparau i to muri mai tumu parau.