Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATOPA 2014

 AAMU

Tuhaa faufaa o to ’u oraraa i roto i te taviniraa

Tuhaa faufaa o to ’u oraraa i roto i te taviniraa

Teie tei tupu i te hoê mahana i 1947, i Santa Ana, i Salvador: A faaterehia ’i te Haapiiraa o Te Pare Tiairaa, ua taora te mau tamaroa i te ofai rarahi i roto i te fare mitionare na roto atu i te opani tei vai matara noa. O te mau perepitero Katolika to muri i teie ohipa ino. Aita i maoro, ua tae mai ratou i te fare mitionare e te hoê nahoa tei riri. E lamepa auahi ta vetahi i to ratou rima e e idolo ta te tahi atu. E piti hora i te maoro, ua taora ratou i te ofai i nia i te fare mitionare e ua tuô, “Ia ora maoro te Paretenia!” e “Ia pohe Iehova!” Ua hinaaro ratou e faariaria i te mau mitionare ia faarue ratou i tera fenua. Ua ite au no te mea o vau hoê o tera mau mitionare i tera putuputuraa a 67 matahiti i teie nei. *

E PITI matahiti hou teie tupuraa, ua faaoti mâua Evelyn Trabert i te Haapiiraa Bibilia no Gileada a te Watchtower tei ravehia i taua tau ra i pihai iho ia Ithaca, New York. Tei roto mâua i te maharaa o te piha e ua tonohia mâua ei mitionare i Salvador. Ua tavini vau i ǒ fatata e 29 matahiti. Hou a faatia ’i i to ’u oraraa ei mitionare, e hinaaro vau e faataa ’tu no te aha vau i maiti ai e apiti i tera ohipa.

NAFEA TO ’U UTUAFARE I TE HAAPIIRAA MAI I TE PARAU MAU?

Ua fanauhia vau i 1923 i Spokane, i Washington (Marite). E pǐpǐ a Luther to ’u na metua, o John e Eva Olson. Aita râ raua i farii i te haapiiraa o te po auahi. Mea fifi hoi no raua ia tiaturi e e haamauiui te hoê Atua î i te here i te taata. (Ioa. 1, 4:8) I ohipa na to ’u papa i te hoê vahi euraa faraoa. E i te hoê po, ua faataa ’tu te hoê hoa ohipa ia ’na maoti te Bibilia e eita te Atua e haamauiui i te taata i roto i te po auahi. Aita i maoro, haamata a‘era raua i te haapii e te mau Ite no Iehova. Ua ite mai raua i ta te Bibilia e haapii mau ra no nia i te ora i muri a‘e i te pohe.

Noa ’tu e e iva matahiti noa to ’u i tera taime, te haamana‘o noâ ra vau i te oaoa rahi o to ’u na metua i ta raua i haapii mai. Ua oaoa roa raua i te ite e o Iehova te i‘oa o te Atua e aita e Toru tahi. (Ioa. 8:32) Ua faaite atoa mai to ’u na metua i ta raua i haapii e ua apo vau i teie pue parau mau mai te hoê rimu. Aita roa ’tu vau i mana‘o a‘enei e mea  fiu ia taio i te Bibilia. Ua oaoa râ vau i te hi‘opoa i te reira. Noa ’tu to ’u mamahu, ua apee au i to ’u na metua i roto i te pororaa. Ua bapetizohia raua i 1934 e o vau i 1939 i te 16raa o to ’u matahiti.

E o papa raua mama i te tairururaa i 1941 i Saint Louis, i Missouri

I te tau veavea i 1940, ua hoo atu to ’u na metua i to raua fare e ua haere i Cœur d’Alène, Idaho. I reira matou i te haamataraa i te taviniraa pionie. I ora na matou i roto i te hoê fare tahua tarahuhia i nia ’‘e i te hoê vahi tataîraa pereoo. I faaohipa-atoa-hia na to matou fare no te mau putuputuraa. Mea iti roa te amuiraa tei fana‘o i te Piha a te Basileia i tera tau. I putuputu na te rahiraa i roto i te mau piha tarahuhia aore ra i te fare o te mau taeae e tuahine.

I 1941, ua haere matou e toru i te hoê tairururaa i Saint Louis, Missouri. Ua parauhia te mahana hopea o tera tairururaa, “Te mahana no te mau tamarii.” I tera mahana, ua anihia i te feia apî mai te 5 i te 18 matahiti ia parahi i pihai iho i te tahua. A fatata ’i te hopea o te hoê oreroraa parau, ua paraparau tia ’tu te taeae Joseph Rutherford ia matou te feia apî. Ua ani mai o ’na ia matou ia tia mai mai te peu e farii matou i te “faaroo i te Atua e i ta ’na Arii.” Ua tia matou paatoa. Parau a‘era te taeae Rutherford: “A hi‘o na, teie hau atu 15 000 ite apî i te Basileia!” I tera taime, ua faaoti au e riro ei pionie no te roaraa o to ’u oraraa.

UA TONOHIA TO MATOU UTUAFARE

Tau ava‘e i muri a‘e i tera tairururaa, ua anihia i to ’u utuafare ia haere i te oire no Oxnard i te pae apatoa o Kalifonia no te haamau i te hoê amuiraa. I ora na matou i roto i te hoê fare tavere nainai e te hoê noa roi. I te mau po atoa, e tuuhia ïa ta ’u roi i nia i ta matou airaa maa. Auê ïa tauiraa ia faaauhia i te tau a fana‘o ai au i ta ’u iho piha no te taoto!

I te 7 no Titema 1941, ua tupita te mau Tapone ia Pearl Harbor i Vaihi. I te mahana i muri iho, ua apiti te Hau Amui no Marite i te Piti o te tama‘i rahi. Ua tapae matou i Kalifonia i muri iti noa ’‘e. I te mea e tei pihai iho noa te mau pahi hopu Tapone, ua faaue te faatereraa i te feia atoa i te pae miti ia tupohe i ta ratou mori i te po. No te poiri, mea fifi ïa no te mau pahi hopu ia tupita i te vahi ta ratou i hinaaro.

Tau ava‘e i muri iho, i Tetepa 1942, ua haere matou i te Tairururaa Kerisetiano a te ao apî i Cleveland i Ohio. Te haamana‘o maitai ra vau i te oreroraa parau a te taeae Nathan Knorr, “Te hau—E vai maoro anei?” Ua faataa mai o ’na i te parau tohu i roto i te Apokalupo pene 17 no nia i te “puaa” o te “vai na, e aita nei; e ua fatata i te a‘e a‘e i nia mai raro mai i te abuso.” (Apo. 17:8, 11) Ua faataa te taeae Knorr e “taua puaa” ra, o te Totaiete o te mau Nunaa ïa o tei faaea i te ohipa i te tau tama‘i. Faaite a‘era o ’na e e fa faahou mai te hoê faanahonahoraa i te ao nei no te hau a itehia ’tu ai te hoê tau hau rahi a‘e. Tera iho â tei tupu. I 1945 ua hope te Piti o te tama‘i rahi e i muri iho ua mono te mau Nunaa Amui i te Totaiete o te mau Nunaa. Mai reira mai, ua haamata te mau Ite no Iehova i te poro i te parau apî oaoa i te tuhaa fenua rahi roa na te ao. Auê ïa maraaraa rahi mau tei itehia mai reira mai!

Ta ’u parau tuite no Gileada

Ua tauturu mai tera parau tohu ia taa e mea rahi â te ohipa. No reira, a faaitehia ’i e e haamata te Haapiiraa no Gileada i te matahiti i muri iho, ua hinaaro vau e apiti atu e e riro ei mitionare. I tera area taime, i 1943, ua tonohia vau ei pionie i Porland, i Oregon. I tera tau, i faaohipa na matou i te  matini faata‘i pehe a farerei ai i te taata i to ratou fare ia faaroo ratou i te mau oreroraa parau. Ia oti, e pûpû atu matou i te mau papai Bibilia no nia i te Basileia o te Atua. I te roaraa o tera matahiti, ua mana‘ona‘o noa vau i te taviniraa mitionare.

I 1944, ua titau-manihini-hia mâua to ’u hoa here ra o Evelyn Trabert i te Haapiiraa no Gileada. Auê au i te oaoa e ua fariihia mâua! E pae ava‘e, ua faaite mai to matou mau taeae haapii ma te au mau e nafea ia haapii i te Bibilia. Ua maere roa mâua i to ratou haehaa. Ei hi‘oraa, i te tahi taime, e ohipa to matou mau orometua haapii ei tuati e na ratou e horoa mai i ta matou maa. Ua faaoti mâua i te Haapiiraa no Gileada i te 22 no Tenuare 1945.

TA ’U TAVINIRAA EI MITIONARE

I Tiunu 1946, ua tapae vau, Evelyn e o Leo raua Esther Mahan i Santa Ana i Salvador. “Ua teatea” te aua i ǒ no te “auhune.” (Ioa. 4:35) Tau ava‘e i muri iho, ua fana‘o matou i ta matou tairururaa haaati matamua i Santa Ana. Ua titau manihini matou i te taata e ua fatata e 500 tei tae mai. Auê matou i te oaoa! Ua hae roa râ te pǔpǔ ekalesiatiko i ta matou pororaa. No reira ratou i faanaho ai, hoê hebedoma i muri iho, i te tupuraa faahitihia i te omuaraa. Ua tamata ratou i te faariaria mai ia faarue matou i tera vahi. Aita râ, ua faaoti papu atu â matou e faaea i ǒ e e tauturu i te taata. Ua faaara ’tu te pǔpǔ ekalesiatiko ia ratou eiaha e taio i te Bibilia. Mea iti roa tei navai i te moni no te hoo mai hoê. Mea rahi râ tei hinaaro e haapii i te parau mau. Ua oaoa ratou i te ite e te haapii ra matou i te reo Paniora ia nehenehe matou e haapii atu ia ratou o vai o Iehova e i ta ’na parau fafau e faariro i te fenua ei paradaiso.

I roto i ta ’u piha no Gileada, o matou e pae tei tonohia i Salvador. Mai te pae aui atu: Evelyn Trabert, Millie Brashier, Esther Mahan, vau e Leo Mahan

O Rosa Ascencio hoê o ta ’u mau piahi Bibilia matamua. I ora na o ’na e te hoê taata e aita raua i faaipoipo. I muri a‘e râ i to ’na haamataraa i te haapii i te Bibilia, ua faataa ê mai o ’na ia ’na. Haapii atoa ’tura tera tane i te Bibilia. Ua faaipoipohia raua, ua bapetizohia e ua riro mai ei Ite no Iehova itoito rahi. O Rosa te pionie tamau matamua no Santa Ana. *

E fare toa nainai ta Rosa. I te mau taime atoa e haere ai o ’na e poro, e opani o ’na i ta ’na fare toa ma te tiaturi e e haapao Iehova i to ’na mau hinaaro. Ua navai noa iho â ta ’na mau hoani. Ua ite o ’na e te aupuru ra Iehova ia ’na mai tei fafauhia i roto i te Mataio 6:33. Ua vai taiva ore Rosa ia Iehova e tae roa ’tu i to ’na poheraa.

E ono mitionare matou tei tarahu i te hoê fare o te hoê taata tapihoo matau-maitai-hia. I te hoê mahana, ua haere te hoê perepitero i tera taata ra e ua faaara ia ’na e ia tamau noa o ’na i te tarahu mai i te fare ia matou, e tiavaruhia raua ta ’na vahine i ta raua haapaoraa. Aita tera taata i mǎta‘u e ua parau atu e e ere i te fifi no ’na mai te peu e e tiavaruhia o ’na. Ua au ore a‘ena o ’na i te tahi mau mea ta te pǔpǔ ekalesiatiko i rave. Ua haapapu  mai o ’na e e nehenehe ta matou e faaea i roto i te fare no te maororaa ta matou i hinaaro.

UA RIRO MAI TE HOÊ TAATA FAATURAHIA EI ITE NO IEHOVA

Amaa patuhia i 1955

I te oire pu, San Salvador, ua haapii te tahi atu mitionare i te Bibilia i te vahine a te hoê taata îite o Baltasar Perla te i‘oa. Aita teie taata i tiaturi faahou i te Atua, ua ite hoi o ’na e mea haavarevare te tia faaroo e rave rahi. E taata mǎrû mau râ o ’na. Noa ’tu e aita o ’na i riro mai atura ei Ite no Iehova, ua faaite o ’na e e nehenehe ta ’na e hamani i te hoho‘a fare o te Betela i Salvador e e tauturu i te patu i te reira. E aita o ’na i faaaufau i te mau Ite no Iehova no ta ’na ohipa.

A patuhia ’i te amaa, ua ohipa Baltasar e te Ite no Iehova e rave rahi e ua papu e ua itea ia ’na te parau mau. Ua bapetizohia o ’na i te 22 no Tiurai 1955 e ua bapetizohia ta ’na vahine o Paulina aita i maoro i muri iho. Te tavini nei ta raua na tamarii e piti ia Iehova ma te taiva ore. A 49 matahiti i teie nei ta raua tamaiti, o Baltazar atoa te i‘oa, i te ohipa-noa-raa i te Betela i New York. Te turu ra o ’na i te ohipa pororaa na te ao nei e te tavini ra i roto i te Tomite amaa no Marite. *

A haamata ’i matou i te faatupu i te mau tairururaa mataeinaa i San Salvador, ua tauturu mai te taeae Perla ia fana‘o i te hoê piha tuaro rahi no te putuputu. I te taime matamua i putuputu ai matou i ǒ, mea rahi te parahiraa aita e taata to nia iho. Aita râ i maoro, ua rahi roa mai te taata tei haere mai i te matahiti taitahi e aita i navai faahou te parahiraa i roto i te piha tuaro. I teie mau tairururaa, ua tia ia ’u ia ite i te feia ta ’u i haapii atu i te Bibilia. E ua oaoa mau vau a bapetizohia ’i te mau piahi o ta ’u mau piahi Bibilia! E au ra e e mootua ratou na ’u.

Te paraparau ra te taeae Franz i te mau mitionare i te hoê tairururaa

I te hoê tairururaa, ua piri mai te hoê taeae e ua parau mai e te tatarahapa ra o ’na. Aita vau i taa i ta ’na i hinaaro e parau e aita vau i ite o vai o ’na. Ua parau mai tera taeae, “Tei rotopu vau i te mau tamaroa tei taora i te ofai i nia ia outou i Santa Ana.” Ua î to ’u aau i te oaoa i te ite e te tavini ra o  ’na ia Iehova i teie nei mai ia ’u. Ua haamana‘o mai teie aparauraa e o te taviniraa taime taatoa te huru oraraa mauruuru roa ’‘e.

Ta matou tairururaa haaati matamua i Salvador

UA RAVE AU I TE MAU FAAOTIRAA MAURUURU MAU

E 29 matahiti i te maoro, ua tamau vau i te tavini i Salvador ei mitionare. Ua tavini au i Santa Ana, Sonsonate, Santa Tecla e San Salvador. I tera mau matahiti, ua paari mai to ’u na metua e ua hinaaro raua i ta ’u tauturu i te pae hopea. No reira, i muri a‘e i te pure e rave rahi, ua faaoti au i te vaiiho i ta ’u taviniraa mitionare no te ho‘i i Spokane i 1975.

Ua pohe to ’u papa i 1979 e ua aupuru vau i to ’u mama e vau â matahiti. Mea paruparu roa o mama. Mea iti roa ïa te ohipa ta ’na e nehenehe e rave. E 94 matahiti to ’na a pohe ai. E taime fifi roa te reira no ’u. No te ahoaho e te hepohepo, ua rohirohi roa vau. Ua roohia vau i te ma‘i iri mauiui mau parauhia zona. Ua ite râ vau i te rima î i te here o Iehova ia tauahi ia ’u. Ua pahono oia i ta ’u mau pure e ua tauturu mai ia faaruru i tera taime fifi. Ua tapea Iehova i ta ’na parau e aupuru ia ’u i roto i to ’u ruhiruhiaraa.—Isa. 46:4.

I 1990, ua haere au i Omak i Washington. I reira, ua tia ia ’u ia poro i roto i te tuhaa fenua reo Paniora e ua oaoa faahou vau. Ua bapetizohia e rave rahi o ta ’u mau piahi Bibilia. I Novema 2007, ua haere au e ora i roto i te hoê fare tahua i te oire tapiri no Chelan i Washington no te mea eita ta ’u e nehenehe faahou e haapao i to ’u fare i Omak. Te haapao maitai nei te amuiraa reo Paniora no ǒ nei ia ’u e te mauruuru mau nei ia ratou. I te mea e o vau ana‘e te Ite no Iehova paari i ǒ nei, te here nei ratou ia ’u mai to ratou iho mama ruau.

Ua maiti au eiaha e faaipoipo e eiaha e fanau i te tamarii no te tavini atu â ia Iehova. (Kor. 1, 7:34, 35) No ’u, eita e nehenehe e fana‘o i te mau mea atoa i roto i teie oraraa. Ua faaoti ïa vau e haapao noa i te mea faufaa a‘e: E tavini ia Iehova ma to ’u aau atoa. Ua tauturu vau i te taata e rave rahi ia haapii i te parau mau e ua riro mai ratou mai ta ’u iho mau tamarii. E i roto i te ao apî, e fana‘o vau i te taime rahi roa no te rave i te mau mea atoa ta ’u e hinaaro. Mea au roa na ’u te irava i roto i te Salamo 145:16 i reira Iehova e fafau ai e e “haamâha [o ’na] i te hiaai o te mau mea ora atoa nei.”

Te tauturu maira te taviniraa pionie ia vai itoito noa e te horoa maira i te hoê fa i roto i to ’u oraraa

E 91 matahiti to ’u i teie nei e te maitai noa ra to ’u ea. E pionie noâ vau. Te tauturu maira te taviniraa pionie ia vai itoito noa e te horoa maira i te hoê fa i roto i to ’u oraraa. A tae ai i Salvador no te taime matamua, no haamata noa ’tura te ohipa pororaa. I teie nei râ, ua hau atu i te 39 000 taata poro i ǒ. Ua ite au e noa ’tu e te tamata noa ra Satani i te tapea i ta tatou ohipa pororaa, eita iho â e mau ia ’na. Te haapuai mau râ teie maraaraa i to ’u faaroo. Ua papu ia ’u e te turu ra te varua mo‘a a Iehova i to ’Na nunaa.

^ par. 4 A hi‘o i te Buka matahiti a te mau Ite no Iehova no 1981, api 44-46 (Farani).

^ par. 19 Buka matahiti no 1981, api 41-42 (Farani).

^ par. 24 Buka matahiti no 1981, api 65-67, 73-74 (Farani).