Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATOPA 2014

“E haamau i to outou aau i te mau mea i nia”

“E haamau i to outou aau i te mau mea i nia”

“E haamau i to outou aau i te mau mea i nia ra, eiaha i to teie nei ao.”—KOL. 3:2.

1, 2. (a) Tei roto te amuiraa i Kolosa i te fifi atâta, no te aha? (b) Eaha te a‘oraa tei tauturu i te mau taeae i Kolosa ia riro noa ei hoa o te Atua?

I TE senekele matamua, ua haafifihia te auhoêraa o te amuiraa Kerisetiano i Kolosa! I parau na vetahi mau taeae e e mea tia ia pee te taatoaraa i te ture a Mose. E i parau na vetahi ê e mea ino ia oaoa i te mau maitai o te oraraa. Ua faaara ’tu Paulo ia ratou i te fifi atâta o teie mau mana‘o taa ê: “E ara o te riro noa ’tu outou i te parau paari e te haavare faufaa ore a te hoê taata ’tu, i te parau tutuu a te taata nei, mai te â rii a teie nei ao ra, aore i au i ta te Mesia ra.”—Kol. 2:8.

2 Mai te peu e e pee teie mau Kerisetiano faatavaihia i te mana‘o taata, e patoi ratou i te fana‘oraa taa ê e riro ei tamarii na te Atua. (Kol. 2:20-23) No te tauturu ia ratou ia tapea i to ratou auhoaraa faahiahia e te Atua, ua parau atu Paulo: “E haamau i to outou aau i te mau mea i nia ra, eiaha  i to teie nei ao.” (Kol. 3:2) E mea tia ia haamana‘o teie mau Kerisetiano i to ratou tiaturiraa taa ê e ora e a muri noa ’tu i nia i te ra‘i.—Kol. 1:4, 5.

3. (a) Eaha te tiaturiraa o te mau Kerisetiano faatavaihia? (b) Eaha te mau uiraa ta tatou e hi‘opoa mai?

3 E haamau atoa te mau Kerisetiano faatavaihia i teie mahana i to ratou aau i te Basileia o te Atua e i to ratou tiaturiraa e riro ei ‘feia tufaa e te Mesia’ i nia i te ra‘i. (Roma 8:14-17) E no te feia e tiaturi ra e ora i nia i te fenua? E nafea ta Paulo mau parau e tano ai no ratou? E nafea ratou e haamau ai i to ratou aau i “te mau mea i nia”? (Ioa. 10:16) Ua haamau Aberahama e o Mose i to raua aau i te mau mea i nia i te mau taime fifi atoa. E nafea e pee ai i to raua hi‘oraa?

TE AURAA E HAAMAU I TO TATOU AAU I TE MAU MEA I NIA

4. E nafea te mau Kerisetiano e tiaturi ra e ora i te fenua e haamau ai i to ratou aau i te mau mea i nia?

4 E mea tia ia haamau te feia e tiaturi ra e ora i te fenua i to ratou aau i te mau mea i nia. E na reira ratou a tuu ai ia Iehova e i to ’na Basileia na mua roa i roto i to ratou oraraa. (Luka 10:25-27) Tera ta te Mesia i rave e tera atoa te titauhia ia rave tatou. (Pet. 1, 2:21) I haaatihia na te mau Kerisetiano matamua e te mau huru feruriraa hape, te mau mana‘o philosophia o teie nei ao e i te nounou tao‘a. Hoê â huru i teie mahana i roto i te ao a Satani. (A taio i te Korinetia 2, 10:5.) E mea tia ia pee tatou i te hi‘oraa o Iesu e ia vai ara i te mau mea atoa te nehenehe e tuino i to tatou mau taairaa e o Iehova.

Hoê â anei mana‘o to tatou i to teie nei ao i te moni e te tao‘a?

5. Eaha te uiui no nia i to tatou mana‘o i te moni e te tao‘a?

5 Hoê â anei mana‘o to tatou i to teie nei ao i te moni e te tao‘a? Ia au i ta tatou e mana‘o ra e e rave ra e itehia ’i eaha ta tatou e hinaaro mau ra. O ta Iesu ïa i faataa a parau ai: “Te vahi hoi i vaiihohia ’i ta outou tao‘a ra, e riro atoa i reira to outou aau.” (Mat. 6:21) E uiui ana‘e ïa eaha te mea faufaa a‘e no tatou. I te rahiraa o te taime, e haapeapea noa anei tatou i te moni? E mana‘o noa anei tatou i te ite mai i te ohipa maitai a‘e? E tamata noa anei tatou i te ite i te hoê huru oraraa fana‘o a‘e? Aore ra e tutava anei tatou i te fana‘o i te hoê huru oraraa au noa e i te mana‘o noa i to tatou mau taairaa e o Iehova? (Mat. 6:22) Ua parau Iesu e ia mana‘o noa tatou e haaputu i ‘te tao‘a i teie nei ao,’ e ere paha tatou i to tatou taairaa e o Iehova.—Mat. 6:19, 20, 24.

No te upootia i nia i to tatou mau hinaaro tia ore e titauhia ia haamau noa tatou i to tatou aau i te mau mea i nia

6. E nafea tatou e upootia ’i i nia i to tatou mau hinaaro tia ore?

6 No to tatou huru tia ore, mea ohie roa ia rave i te mau ohipa e ere i te mea maitai. (A taio i te Roma 7:21-25.) Ia ore tatou e turui i nia i te varua mo‘a o te Atua, eita tatou e tâu‘a i ta te Atua mau ture a topa ’tu ai i roto i te inuraa ava, te taeroraa ava, te peu faufau e te taiata. (Roma 13:12, 13) Te aro noa ra tatou i to tatou mau hinaaro tia ore.  No te upootia i tera aroraa, e titauhia ia haamau noa tatou i to tatou aau i te mau mea i nia. E titau te reira i te mau tutavaraa. No reira Paulo i parau ai: “Te moto nei râ vau i tau tino ia vi.” (Kor. 1, 9:27) E titau-atoa-hia ia haavî ia tatou iho. E hi‘opoa ana‘e i te hi‘oraa o e piti taata taiva ore tei rave i tei maraa ia raua no te faaoaoa i te Atua.—Heb. 11:6.

‘UA FAAROO ABERAHAMA IA IEHOVA’

7, 8. (a) Eaha te mau fifi ta Aberahama raua Sara i faaruru? (b) Eaha ta Aberahama i mana‘o tamau?

7 I to Iehova parauraa ia Aberahama ia haere i te fenua o Kanaana e to ’na utuafare, ua auraro Aberahama. Ua haamaitai Iehova ia Aberahama no to ’na faaroo e to ’na auraro ma te faaau i te hoê faufaa ia ’na. Ua parau atu Iehova: “E faariro hoi au ia oe ei nunaa rahi; e e haamaitai au ia oe.” (Gen. 12:2) E rave rahi matahiti tei mairi e aitâ ta Aberahama raua Sara e tamarii. Ua mana‘o anei Aberahama e ua moehia ia Iehova ta ’na i fafau? I tera taime, e ere te oraraa i te mea ohie no Aberahama. Ua faarue o ’na i to ’na oraraa fana‘o i te oire ruperupe o Ura e ua ratere i nia hau atu 1 600 kilometera i te fenua o Kanaana. I ora na o ’na e to ’na utuafare i raro a‘e i te fare ie, aita te maa i navai noa e mea atâta i te tahi taime no te feia eiâ. (Gen. 12:5, 10; 13:18; 14:10-16) Aita râ Aberahama e to ’na utuafare i hinaaro e ho‘i i to ratou oraraa fana‘o i Ura.—A taio i te Hebera 11:8-12, 15.

8 “Ua faaroo” Aberahama ia Iehova e aita o ’na i mana‘o noa i “to teie nei ao.” (Gen. 15:6) Ua mana‘o tamau o ’na i ta te Atua i fafau ia ’na. Ua ite Iehova i te faaroo o Aberahama e ua parau atu: “A hi‘o na to mata i nia i te ra‘i, a taio na i te mau fetia, i te tiaraa ia oe ia taio. E ua na ô maira oia ia ’na, Oia atoa to oe na huaai.” (Gen. 15:5) A faaroo ai i te reira, ua taa ia Aberahama e aita i moehia ia Iehova ta ’na i fafau. I te mau taime atoa e hi‘o ai o ’na i te mau fetia, e haamana‘o o ’na i ta Iehova parau fafau e e fana‘o o ’na e rave rahi huaai. E a tae ai i te taime ta Iehova i faaoti, ua fana‘o Aberahama i te hoê tamaiti, mai ta Iehova iho â i fafau atu.—Gen. 21:1, 2.

9. E nafea e pee ai i te hi‘oraa o Aberahama?

9 Mai ia Aberahama, te tiai atoa nei tatou ia tupu ta Iehova mau parau fafau. (Pet. 2, 3:13) Ia ore tatou e haamau i to tatou aau i te mau mea i nia, e mana‘o paha tatou e mea taere te reira e e iti mai paha to tatou itoito rahi no Iehova. Peneia‘e i na mua ’‘e, ua rave oe i te mau haapaeraa no te riro mai ei pionie aore ra no te apiti i te tahi atu taviniraa taa ê. Eaha râ ta oe e rave ra i teie nei? Mai ia Aberahama anei oe o tei rave i tei nehenehe no Iehova a tiatonu noa ’i i te mau haamaitairaa no a muri a‘e?  (Heb. 11:10) Ua “faaroo Aberahama i te Atua” e ua riro ei hoa no ’na.—Roma 4:3.

UA HI‘O MOSE “I TE ATUA, I TEI ORE E ITEA IA HI‘O”

10. Ua paari mai Mose i roto i teihea huru oraraa?

10 O Mose te tahi atu taata tei haamau i to ’na aau i te mau mea i nia. Ua paari mai o ’na ei melo o te utuafare o te arii o Aiphiti, te nunaa puai roa ’‘e i te ao i tera ra tau. Te parau ra te Bibilia e ua “haapiihia . . . Mose i te mau parau paari a to Aiphiti.” No teie haapiiraa teitei, “mana ’tura [Mose] i te parau e te ravea.” (Ohi. 7:22) E nehenehe ïa ta ’na e riro mai ei taata faufaa mau i Aiphiti. O te tahi atu râ huru haapiiraa te mea faufaa a‘e no Mose.

11, 12. O teihea haapiiraa te mea faufaa roa ’‘e no Mose? E mea nafea tatou i ite ai i te reira?

11 I to ’na tamariiriiraa, ua haapii atu to ’na mama ra o Iokebeda no nia i te Atua o te mau Hebera. Mea faufaa a‘e no Mose teie ite no nia ia Iehova i te tahi atu mau mea. E nehenehe ta ’na e fana‘o i te tao‘a rahi e te mana. Ua faarue râ o ’na i te reira ma te oaoa ia nehenehe o ’na e rave i to te Atua hinaaro. (A taio i te Hebera 11:24-27.) Ua tauturu atu te haapiiraa ta ’na i fana‘o e to ’na faaroo ia Iehova ia haamau i to ’na aau i te mau mea i nia.

E nehenehe ta Mose e fana‘o i te tao‘a rahi e te mana. Ua faarue râ o ’na i te reira ma te oaoa ia nehenehe o ’na e rave i to te Atua hinaaro

12 Noa ’tu e ua fana‘o Mose i te haapiiraa maitai roa ’‘e i Aiphiti, aita o ’na i faaohipa i te reira no te riro ei taata mana, tuiroo e te tao‘a rahi. Te parau nei râ te Bibilia e ‘aita i tia ia Mose ia mairihia o te tamaiti a te tamahine a Pharao ra; e mea maitai ia ’na te rave atoa i te pohe i te amuiraa i te taata no te Atua ra; ia rave i te navenave poto noa o te parau ino ra.’ I muri a‘e, ua faaohipa Mose i to ’na ite no nia ia Iehova no te aratai i to ’Na nunaa.

13, 14. (a) Hou a tia ’i ia Mose ia faatiamâ mai i to Iehova nunaa, eaha tei titauhia ia haapii mai o ’na? (b) Eaha te titauhia ia haapii atoa mai tatou?

13 Ua here Mose ia Iehova e i to ’Na nunaa tei faatîtîhia na i Aiphiti i taua  tau ra. I te 40raa o to ’na matahiti, ua mana‘o Mose e ua ineine o ’na no te faatiamâ mai ia ratou. (Ohi. 7:23-25) Ua ite râ Iehova e aitâ Mose i ineine atura. E mea tia ia haapii o ’na i te haehaa, te faaoromai, te mǎrû e te hitahita ore. (Mas. 15:33) E faaineinehia ïa Mose ia faaruru i te mau fifi ta ’na e ite i muri a‘e. Ua tauturu na 40 matahiti ei tiai mamoe ia ’na ia faatupu i teie mau huru maitatai.

14 Ua tauturu anei te reira ia Mose? E, te parau ra te Bibilia e “e mamahu [aore ra haehaa] rahi to taua taata ra to Mose, i to te taata atoa o te ao atoa nei.” (Num. 12:3) I te mea e ua haapii o ’na ia haehaa, ua tia ia ’na ia faaite i te faaoromai i nia i te mau huru taata atoa e to ratou mau fifi. (Exo. 18:26) Mea faufaa ia faaite atoa tatou i teie mau huru maitatai o te tauturu mai ia ora ’tu i “te ati rahi” e ia ô i roto i te ao apî a te Atua. (Apo. 7:14) E taairaa maitai anei to tatou e te taata, oia atoa e te feia o te riri hanoa e o te huru ê hanoa? E tauturu mai te mau parau a te aposetolo Petero: “E faaturatura ’tu i te taata atoa. E aroha ’tu i te hui taeae.”—Pet. 1, 2:17.

 E HAAMAU ANA‘E I TO TATOU AAU I TE MAU MEA I NIA

15, 16. (a) No te aha mea faufaa ’i ia haamau i to tatou aau i te mau mea i nia? (b) No te aha mea faufaa ’i ia maitai noa te haerea o te mau Kerisetiano?

15 Te ora nei tatou i ‘te anotau ati rahi.’ (Tim. 2, 3:1) No reira mea faufaa ’i ia haamau i to tatou aau i te mau mea tano no te vai piri noa i te Atua. (Tes. 1, 5:6-9) E hi‘o ana‘e e toru ravea no te na reira.

16 To tatou haerea. Ua faataa Petero e mea faufaa roa te haerea maitai a parau ai: “Ia maitai ta outou parau [aore ra haerea] i rotopu i te mau Etene.” Ua parau â o ’na e e hi‘o paha te feia tei ore i ite o vai Iehova i to tatou haerea e e ‘haamaitai i te Atua’ i muri iho. (Pet. 1, 2:12) E rave ana‘e i tei nehenehe no te haamaitai i te Atua na roto i to tatou haerea i te fare, i te ohipa, i te fare haapiiraa, a hauti ai aore ra a poro ai. Parau mau, mea tia ore tatou paatoa e e hape iho â tatou. (Roma 3:23) Teie râ, eiaha e haaparuparu. Maoti te tauturu a Iehova, e nehenehe tatou ‘e rohi hua i te rohiraa maitai i te faaroo.’—Tim. 1, 6:12.

Ia mana‘o tatou mai te Mesia, e faaite atoa tatou i te haehaa e te itoito rahi i roto i ta tatou taviniraa

17. E nafea tatou e pee ai i te huru feruriraa o Iesu? (A hi‘o i te hoho‘a matamua.)

17 To tatou huru feruriraa. Ia maitai noa to tatou haerea, mea faufaa ia faaite i te huru feruriraa e tano. Ua parau te aposetolo Paulo: “Ia hoê atoa o outou huru aau [aore ra huru feruriraa] e to te Mesia ra to Iesu.” (Phil. 2:5) Mai te aha te huru o Iesu? Mea haehaa o ’na e no reira o ’na i hinaaro ai e horoa i tei maraa ia ’na ia Iehova. Ua mana‘o noa o ’na i te pororaa i te parau apî oaoa o te Basileia o te Atua. (Mar. 1:38; 13:10) No Iesu, o te Parau a te Atua te aratai faufaa roa ’‘e. (Ioa. 7:16; 8:28) Ua haapii maite o ’na i te mau Papai mo‘a a tia ’tu ai ia ’na ia faahiti, ia paturu e ia faataa i te reira. Ia mana‘o tatou mai te Mesia, e faaite atoa tatou i te haehaa e te itoito rahi i roto i ta tatou taviniraa e e haapii maite tatou i te Bibilia.

O te pororaa i te parau apî oaoa o te Basileia o te Atua te mea faufaa a‘e no Iesu (A hi‘o i te paratarafa 17)

18. I roto i teihea mau tuhaa faufaa e turu ai tatou i ta Iehova ohipa?

18 To tatou turu. O ta te Atua opuaraa ia auraro “to te ra‘i” e “to nia i te fenua” ia Iesu. (Phil. 2:9-11) Noa ’tu e e tiaraa faufaa mau to Iesu, ua auraro o ’na i to ’na Metua ma te haehaa. Ia na reira atoa tatou e tia ’i. (Kor. 1, 15:28) Te apiti nei tatou i ta Iehova ohipa ma te “faariro i te mau fenua atoa ei pǐpǐ.” (Mat. 28:19) Hau atu â, “e hamani maitai tatou i te taata atoa” a rave ai i te mau mea maitai no to tatou taata-tupu e no to tatou mau taeae.—Gal. 6:10.

19. Eaha ta tatou e faaoti papu i te rave?

19 Auê tatou i te mauruuru e te parau maira Iehova ia haamau i to tatou aau i te mau mea i nia! Mea faufaa ia “horo tamau maite” tatou e ia tiatonu noa i te mau mea tano. (Heb. 12:1) E faaoti papu ana‘e e ohipa “ma te aau atoa mai te mea e e na te Fatu.” E e haamana‘o noa ana‘e e e haamaitai rahi mai to tatou Metua i te ra‘i.—Kol. 3:23, 24.