Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tetepa 2014

A haapao i ta outou tamarii mai te tiai mamoe

A haapao i ta outou tamarii mai te tiai mamoe

“A hi‘o maitai na i to nǎnǎ mamoe.”—MAS. 27:23.

1, 2. (a) Eaha te tahi o te mau hopoia a te tiai mamoe Iseraela? (b) E nafea te mau metua e tuea ’i i te mau tiai mamoe?

I ISERAELA i tahito ra, mea fifi te oraraa o te mau tiai mamoe. E mea titauhia ia ohipa ratou i rapae i te tau veavea e toetoe. E ia paruru atoa i ta ratou mamoe i te mau animara taehae e te feia eiâ. E hi‘opoa tamau te mau tiai i te mamoe taitahi e e rapaau i tei ma‘ihia aore ra tei pepe. E haapao taa ê ratou i te mau pinia mamoe, mea paruparu a‘e hoi ratou i te mau mamoe tei paari.—Gen. 33:13.

2 E mea tia ia faaite te mau metua Kerisetiano i te hoê â huru maitatai i to te mau tiai mamoe. Te hopoia a te mau metua, o te haapiiraa ïa i ta ratou tamarii ia au i te mau ture aveia a Iehova. (Eph. 6:4) Mea ohie noa anei? E ere! E pinepine te mau tamarii i te faaû i te mau mana‘o ta Satani e paturu ra. Te vai atoa ra to ratou iho huru tia ore. (Tim. 2, 2:22; Ioa. 1, 2:16) E nafea outou e nehenehe ai e tauturu i ta outou tamarii? E hi‘opoa ana‘e e toru ohipa ta outou e nehenehe e rave no te haapao i ta outou tamarii mai te tiai mamoe: (1) E matau maitai ia ratou, (2) e faaamu ia ratou e (3) e aratai ia ratou.

 IA MATAU MAITAI OUTOU I TA OUTOU TAMARII

3. E nafea te mau metua e matau maitai ai i ta ratou tamarii?

3 E hi‘opoa maite te hoê tiai maitai i ta ’na mamoe taitahi no te papu e aita te mamoe i ma‘ihia. Te na ô ra te Bibilia: “A hi‘o maitai na i to nǎnǎ mamoe.” (Mas. 27:23) Ei metua, e hinaaro outou e hi‘o maitai i to “nǎnǎ mamoe,” oia hoi i ta outou mau tamarii. E mea tia ïa ia haapao outou i ta ratou e rave ra e ia ite atoa i to ratou mau mana‘o e huru aau. E nafea ïa? A tauaparau pinepine e ta outou mau tamarii.

A tauaparau pinepine e ta outou mau tamarii

4, 5. (a) Eaha te tahi mau mana‘o ohie ia faaohipa te nehenehe e tauturu i te tamarii ia faaite i to ratou mau mana‘o e huru aau? (A hi‘o i te hoho‘a matamua.) (b) Eaha ta outou i rave ia paraparau ohie a‘e ta outou mau tamarii ia outou?

4 Ua faaite vetahi mau metua e mea fifi ia tauaparau e ta ratou mau tamarii a taurearea ’i. Eita paha teie mau taurearea e hinaaro e faaite i to ratou mau mana‘o e huru aau. Tera atoa anei no outou? Eaha ïa te rave? Eiaha e faahepo ia ratou ia parahi a tauaparau atu ai ehia hora i te maoro. A tamata râ i te tauaparau ia ratou i te taime au maitai. (Deut. 6:6, 7) A faataa i te taime no ratou. A hahaere e o ratou. A hauti aore ra a ohipa e o ratou i te fare. Mea hau ana‘e ta outou mau tamarii, e anaanatae ratou i te faaite i to ratou mau mana‘o e huru aau.

E hinaaro ta outou mau tamarii e ite e mea faufaa no outou to ratou mau fifi

5 E ia ore â ta outou tamarii e hinaaro e paraparau? A tamata ïa i te tahi atu ravea. Ei hi‘oraa, eiaha ïa e ani eaha ta ’na i rave i tera mahana, a faaite atu râ eaha ta outou i rave. E anaanatae ïa o ’na i te faaite mai i ta ’na i rave. Aore ra no te ite eaha to ’na mana‘o no nia i te hoê tumu parau, a tuu atu i te mau uiraa no nia i te tumu parau iho, eiaha râ no nia ia ’na. E nehenehe outou e ani eaha te mana‘o o to ’na mau hoa no nia i te reira e eaha te a‘oraa ta ’na e horoa ’tu.

6. E nafea ta outou mau tamarii e ite ai e e taime to outou no ratou e mea ohie ia paraparau ia outou?

6 E hinaaro ta outou mau tamarii e paraparau ia outou a ite ai ratou e e taime to outou no ratou e mea ohie ia paraparau ia outou. Eita ratou e faaite atu i to ratou mau fifi a ite ai e mea rahi roa ta outou ohipa no te faataa i te taime no ratou. E nafea ia papu e mea ohie ia paraparau ia outou? Eiaha e parau noa ’tu e, “E nehenehe oe e paraparau mai i te mau taime atoa e hinaaro ai oe.” E hinaaro ta outou mau tamarii taurearea e ite e eita outou e riri i ta ratou e parau atu. Oia atoa e mea faufaa no outou to ratou mau fifi. Te parau ra Kayla, ahuru ma iva matahiti to ’na: “E nehenehe ta ’u e paraparau i to  ’u papa no nia i te mau mea atoa. Eita o ’na e tâpû mai i ta ’u parau e eita o ’na e haava mai. E faaroo noa mai o ’na. E horoa noa mai ïa o ’na i te mau a‘oraa maitai a‘e.”

A faaoromai e a faaroo maitai i ta outou tamarii

7. (a) E nafea te hoê metua e vai aifaito ai a tauaparau ai no nia i te hoê tumu parau mai te haamatauraa? (b) E nafea te mau metua e nehenehe ai e faariri i ta ratou tamarii?

7 I te tahi mau taime, e titauhia ia tauaparau outou e ta outou tamarii no nia i te mau tumu parau fifi ia paraparau, mai te haamatauraa i te tahi taata no te faaipoipo. A na reira ’i, ia papu ia outou e te haapii atu nei iho â outou i te mea tano. Ei hi‘oraa, i te hoê fare tamaaraa, e hi‘o outou i te tapura o te mau maa e pûpûhia ra. E faaararaa ana‘e to nia iho no nia i te taeroraa i te maa. E haere outou e tamaa i te tahi atu vahi, e ere anei? E nehenehe te reira e tupu atoa e ta outou tamarii. Mai te peu e e faaararaa ana‘e ta outou mau a‘oraa, e riri mai ta outou tamarii a ore atu ai e ani faahou mai i to outou mana‘o. (A taio i te Kolosa 3:21.) A vai aifaito râ. Te na ô ra te hoê tuahine apî o Emily te i‘oa: “Ia paraparau mai to ’u metua ia ’u no nia i te haamatauraa, eita raua e faataa mai i te reira mai te hoê mea au ore. E faataa mai râ raua e mea oaoa ia haamatau i te hoê taata e ia ite mai i te hoê tane faaipoipo. Ua tauturu mai te reira ia ’u ia paraparau ia raua ma te ore e haama no nia i teie tumu parau. E hinaaro vau ia ite raua i te taairaa ta ’u e faatupu ra e te tahi atu, aita vau e hinaaro ra e huna i te reira ia raua.”

8, 9. (a) Eaha te mau maitai ia faaite i te faaoromai e ia faaroo ma te ore e tâpûpû i te parau? (b) Eaha ta outou i ite a faaroo ai i ta outou tamarii?

8 A faaoromai e a faaroo maitai i ta outou tamarii. E faaite te reira e mea ohie ia paraparau ia outou. (A taio i te Iakobo 1:19.) Te na ô ra te hoê metua vahine taa noa o Katia te i‘oa: “I na mua ’‘e, e riri hanoa vau i ta ’u tamahine. Aita ta ’na parau i oti atura, era ’tu ta ’u. Ua rohirohi roa vau no te faaroo ia ’na aore ra aita vau i hinaaro ia haapeapeahia mai au. I teie nei, ua taui au i to ’u huru e ua taui atoa ta ’u tamahine. Mea faaroo a‘e o ’na i teie nei.”

A faaroo atu no te matau maitai ia ratou (A hi‘o i na paratarafa 3-9)

9 Ua ite te hoê papa o Ronald te i‘oa i te hoê â tupuraa e ta ’na tamahine taurearea. Te na ô ra o ’na: “A faaite mai ai o ’na e te here ra o ’na i te hoê tamaroa i te fare haapiiraa, ua riri roa vau i te omuaraa. Haamana‘o a‘era vau e mea faaoromai o Iehova i nia i ta ’na mau tavini e aita o ’na e titau rahi roa ra ia ratou. Feruri ihora vau e mea maitai a‘e no ’u ia vaiiho i ta ’u tamahine ia faaite mai i to ’na huru aau hou a a‘o ai ia ’na. Ua oaoa roa vau i te na reiraraa! A tahi ra vau e taa ’i i te huru aau o ta ’u tamahine. A oti ai o ’na i te paraparau, ua ite au e mea ohie a‘e ia paraparau ia ’na ma te here. E te mea maere, ua farii maitai o ’na i ta ’u a‘oraa. Ua  faaite mai o ’na i to ’na hinaaro e taui.” A tauaparau pinepine e ta outou mau tamarii. E ite ïa outou i to ratou mau mana‘o e huru aau. I muri a‘e, e ani mai iho â ratou i to outou mana‘o a rave ai i te mau faaotiraa. *

IA FAAAMU OUTOU I TA OUTOU TAMARII

10, 11. E nafea e tauturu ai i ta outou tamarii ia faaea i roto i te parau mau?

10 Ua ite te hoê tiai maitai e e nehenehe te mamoe e moe. E haamata paha te tahi mamoe i te amu i te aihere tei atea rii i te nǎnǎ. E atea mǎrû noa oia i te nǎnǎ a atea ê roa ’tu ai. E nehenehe atoa te reira e tupu i nia i ta tatou tamarii. E nehenehe ratou e haamata mǎrû noa i te faarue i te parau mau peneia‘e no te amuimuiraa ino aore ra te faaanaanataeraa atâta. (Mas. 13:20) E nafea ia ore te reira ia tupu?

11 A haapii ai i ta outou tamarii, eaha te rave ia ite outou i te tahi mau tuhaa i reira e titauhia ’i ia haamaitai mai ratou? A tauturu atu, eiaha e tiai! A tauturu atoa ia ratou ia faaite atu â i to ratou mau huru maitatai. (Pet. 2, 1:5-8) E taime maitai roa te haamoriraa utuafare no te na reira. Ua faataa mai Ta tatou taviniraa i te Basileia no Atopa 2008: “Te faaitoitohia ra te mau upoo utuafare ia amo i ta ratou hopoia i mua ia Iehova ia papu ia ratou e te ravehia ra te hoê porotarama haapiiraa Bibilia utuafare tamau e te au.” Te faaohipa ra anei outou i teie taime no te haapao i ta outou mau tamarii mai te tiai mamoe? Ia papu ia outou e te oaoa mau nei ta outou tamarii i te mau tutavaraa ta outou e rave ra no te tauturu ia ratou.—Luka 11:28; Phil. 1:10.

A faaamu maitai ia ratou (A hi‘o i na paratarafa 10-12)

12. (a) Mea nafea te feia apî i te faufaaraahia i te haamoriraa utuafare tamau? (A hi‘o atoa i te tumu parau tarenihia “ Mea au na ratou.”) (b) Mea nafea outou i te faufaaraahia i te haamoriraa utuafare?

12 Ua faufaahia te hoê taurearea o Carissa te i‘oa e to ’na utuafare i ta ratou porotarama haamoriraa utuafare. Te na ô ra o ’na: “Mea au roa na ’u ia parahi amui matou a paraparau atu ai. E riro te reira ei taime maitai mau te ore e moe. E pee iho â to ’u papa i ta matou porotarama haamoriraa utuafare. Mea faaitoito mau ia ite ia ’na ia rave maite i te reira e e hinaaro atoa vau e na reira. E tumu maitai atu â ïa  ta ’u no te faatura ia ’na ei papa, oia atoa i ta ’na aratairaa i te pae varua.” Te na ô ra te hoê tuahine apî a‘e o Brittney te i‘oa: “Ua piri atu â vau i to ’u na metua maoti te haamoriraa utuafare. Ua faaite mai te reira e e hinaaro raua e faaroo i to ’u mau fifi e te haapeapea nei raua no ’u. Ua tauturu mai te reira ia riro ei utuafare auhoê e te paari.” Te fa matamua a te mau metua, o te haapiiraa ïa i ta ratou tamarii ia here ia Iehova. E o te haamoriraa utuafare te tahi ravea maitai a‘e no te na reira. *

IA ARATAI OUTOU I TA OUTOU TAMARII

13. Eaha te turai i te hoê tamarii ia tavini ia Iehova?

13 E faaohipa te hoê tiai mamoe maitai i te hoê raau no te aratai e te paruru i ta ’na nǎnǎ. Ta ’na fa matamua, o te aratairaa ïa i ta ’na mau mamoe i “te amuraa maitai.” (Ezk. 34:13, 14) Hoê â atoa hopoia ta outou ei metua. E hinaaro outou e aratai i ta outou tamarii ia tavini ia Iehova. E hinaaro outou ia mana‘o atoa ta outou tamarii mai te fatu salamo o tei papai: “Mea au na ’u te rave i to oe hinaaro, e tau Atua; te vai nei hoi ta oe ture tei roto i to ’u nei aau.” (Sal. 40:8) Tera ana‘e te mana‘o o ta outou tamarii, e hinaaro ratou e pûpû i to ratou ora ia Iehova e e bapetizo. No te rave i teie faaotiraa, e mea tia ia taa maitai ia ratou eaha te titauhia ra e ia hinaaro mau ratou e tavini ia Iehova.

14, 15. (a) Eaha te fa a te mau metua? (b) No te aha paha te hoê taurearea e feaa ’i no nia i te parau mau?

14 Peneia‘e aita te taairaa o ta outou mau tamarii e o Iehova i maitai atu â. Aita atoa paha ratou i papu e o te parau mau iho â ta te mau Ite no Iehova e tiaturi ra. Eaha te rave? A faaitoito i te haaferuri i ta outou mau tamarii e i te tauturu atu ia here ia Iehova ma te aau atoa. A haapii atu ia haafaufaa i te mau mea atoa ta Iehova i rave no ratou. (Apo. 4:11) E ia ineine ratou, e nehenehe ratou e faaoti e tavini ia Iehova.

A faaitoito i te haaferuri i ta outou mau tamarii e i te tauturu atu ia here ia Iehova ma te aau atoa

15 Mai te peu e e au ra e te feaa ra ta outou mau tamarii no nia i te parau mau, a faaoromai e a tutava i te aratai ia ratou. A tauturu ia ratou ia taa e o te taviniraa ia Iehova te huru oraraa maitai roa ’‘e e te horoa mai i te mau haamaitairaa mure ore. A faaitoito atoa i te imi i te tumu mau e feaa ’i ratou. Ei hi‘oraa, te patoi mau ra anei iho â ta outou tamaiti i ta te Bibilia e parau ra aore ra te mǎta‘u noa ra o ’na i te poro i te tahi atu mau tamarii? Te feaa mau ra anei iho â ta outou tamahine e mea î i te paari ta te Atua mau faaueraa aore ra te moemoe noa ra o ’na no te mea ua tuuhia o ’na i te hiti?

A aratai ia ratou (A hi‘o i na paratarafa 13-18)

16, 17. E nafea te mau metua e nehenehe ai e tauturu i ta ratou tamarii ia faatupu i to ratou iho mau taairaa e o Iehova?

16 E nafea ia tauturu i ta outou mau tamarii ia papu e tei roto ratou i te parau mau? Ua tia i te metua e rave rahi ia tauturu i ta ratou tamarii ma te tuu atu i teie mau uiraa: “Mea ohie anei no oe ia riro ei Kerisetiano aore ra mea fifi? I to oe mana‘o, eaha te mau maitai ia riro ei Kerisetiano? Eaha te mau fifi? Eaha to oe  mana‘o i te mau maitai ta tatou e fana‘o ra i teie nei e e fana‘o i muri a‘e? Mea rahi a‘e anei te reira ia faaauhia i te mau fifi?” A tuu atu i teie mau uiraa ma te faaohipa i ta outou iho mau parau. A paraparau ma te haavare ore, te mǎrû e te au. Eiaha râ mai te huru ra e te faahapa ra outou ia ratou. E nehenehe atoa e tauaparau i nia i te Mareko 10:29, 30. E hinaaro paha vetahi feia apî e papai i roto e piti tapura i te mau maitai ia riro ei Kerisetiano e i te mau fifi. E tauturu te reira ia outou e i ta outou mau tamarii ia ite eaha te mau fifi ta ratou e faaruru ra e e nafea ia faaafaro i te reira. I te mea e mea faufaa ia haapii i te buka Bibilia haapii e te buka Te here o te Atuae te taata e anaanatae ra i te parau mau, e ere anei ïa i te mea faufaa roa ’tu â ia na reira e ta outou iho mau tamarii? Te na reira ra anei outou?

E te mau metua, a riro ei tiai mamoe maitai e a aratai mǎrû noa i ta outou mau tamarii

17 A paari mai ai ratou, na ta outou iho mau tamarii e faaoti e tavini ia Iehova aore ra eita. E ere no te mea ua faaoti outou e tavini ia Iehova e e na reira atoa ratou. Mea faufaa ia faatupu ta outou mau tamarii i to ratou iho taairaa e o Iehova. (Mas. 3:1, 2) E nafea mai te peu e te fifi ra ta outou tamarii i te haafatata ’tu i te Atua? A faaitoito ia ’na ia hi‘opoa i ta ’na mau tiaturiraa e ia uiui: ‘Nafea vau e ite ai e te vai mau ra te Atua? Nafea vau e ite ai e te tâu‘a ra Iehova ia ’u? Te tiaturi mau ra anei au e e maitaihia vau i te faaroo i ta te Atua mau faaueraa?’ E te mau metua, a riro ei tiai mamoe maitai e a aratai mǎrû noa i ta outou mau tamarii. A tauturu ia ratou ia papu e o te taviniraa ia Iehova te huru oraraa maitai roa ’‘e. *Roma 12:2.

18. E nafea te mau metua e nehenehe ai e pee i te hi‘oraa o Iehova, te Tiai mamoe Rahi?

18 E hinaaro te mau Kerisetiano mau atoa e pee i te hi‘oraa o te Tiai mamoe Rahi ra o Iehova. (Eph. 5:1; Pet. 1, 2:25) Mea faufaa roa ia matau maitai te mau metua i ta ratou nǎnǎ, oia hoi ta ratou mau tamarii here. Mea faufaa roa ia aratai te mau metua i ta ratou tamarii ia nehenehe ratou e fana‘o i te mau haamaitairaa mure ore ta te Atua e fafau ra. A rave i tei nehenehe no te haapao i ta outou mau tamarii mai te tiai mamoe e no te haapii ia ratou ia here ia Iehova!

^ par. 9 No te tahi atu mau mana‘o tauturu, a hi‘o i Te Pare Tiairaa o te 1 no Tetepa 2008, api 29-31.

^ par. 12 No te ite atu â, a hi‘o i te tumu parau “E te mau utuafare Kerisetiano, ‘ia vai ineine â’ outou” i roto i Te Pare Tiairaa o te 1 no Me 2011, i raro a‘e i te upoo parau iti “Ia tamau te arui haamoriraa utuafare.”

^ par. 17 No te ite atu â, a hi‘o i Te Pare Tiairaa o te 1 no Fepuare 2012, api 18-21 (Farani).