Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Atete 2014

Eaha te tuhaa a te vahine i roto i ta Iehova opuaraa?

Eaha te tuhaa a te vahine i roto i ta Iehova opuaraa?

“E pǔpǔ rahi te vahine e faaite ra i te parau apî oaoa.”—SAL. 68:11, TRADUCTION DU MONDE NOUVEAU.

1, 2. (a) Eaha te mau ô ta Iehova i horoa na Adamu? (b) No te aha Iehova i horoa ’i i te hoê vahine na Adamu? (A hi‘o i te hoho‘a matamua.)

E OPUARAA iho â ta Iehova a hamani ai i te fenua. ‘Ua hamani oia i te reira ia taatahia.’ (Isa. 45:18) Mea tia roa te taata matamua ra o Adamu a poietehia ’i oia. Ua horoa Iehova i te ô i Edene na ’na, te hoê nohoraa nehenehe e te mau raau e rave rahi e te mau animara faahiahia. Ua toe râ te tahi mea. Ua ite o Iehova i te reira e ua parau: “E ere ïa i te mea maitai ia parahi noa Adamu oia ana‘e ra; e hamani au i te tahi tauturu au na ’na.” Ua tuu Iehova ia Adamu i roto i te hoê taoto hohonu e ua rave hoê o to ’na aoao e ua hamani i te reira “ei vahine.” I to Adamu araraa mai, ua oaoa oia i te ite i ta ’na vahine! Ua parau oia: “E ivi teie no to ’u nei ivi, e i‘o hoi no to ’u nei i‘o: e parauhia oia e, e vahine, no te mea, no roto oia i te taata i te noaaraa mai.”—Gen. 2:18-23.

2 E ô teie vahine no ǒ mai i te Atua ra. Ua riro o ’na ei tauturu tia roa na Adamu. Ua horoa-atoa-hia ia ’na te fana‘oraa taa ê e fanau i te tamarii. Te parau ra te Bibilia: “Ua mairi ihora Adamu i to te vahine ra i‘oa, o Eva, no te mea, e riro  oia ei metua vahine no te taata ora atoa.” (Gen. 3:20) E faaî Adamu raua Eva i te fenua i te taata tia roa. E fana‘o to tatou metua matamua e ta ratou tamarii i te haamaitairaa taa ê e faariro i te fenua taatoa ei paradaiso e e haapao i te mau animara.—Gen. 1:27, 28.

3. (a) No te fana‘o i te farii maitai a te Atua, eaha te titauhia ia rave Adamu raua Eva, e eaha tei tupu? (b) Eaha te mau uiraa ta tatou e hi‘opoa mai?

3 No te fana‘o i te farii maitai a te Atua, e mea titauhia ia faaroo Adamu raua Eva ia Iehova e ia farii i to ’na mana faatere. (Gen. 2:15-17) Ma te na reira noa e nehenehe ai raua e rave i te mau mea atoa ta te Atua i opua no raua. Ma te peapea, aita Adamu raua Eva i faaroo ia Iehova. Ua faaroo râ raua ia Satani e ua hara i te Atua. (Gen. 3:1-6; Apo. 12:9) Eaha te faahopearaa o to raua faaroo ore i nia i te mau vahine? Ua aha vetahi mau vahine taiva ore i tahito ra? No te aha e nehenehe ai e parau e e “pǔpǔ rahi” te mau vahine Kerisetiano i teie mahana?—Sal. 68:11.

TE FAAHOPEARAA O TE FAAROO ORE

4. No Iehova, na vai e amo i te hopoia no te hara a Adamu raua Eva?

4 Ua tiai Iehova ia faataa Adamu no te aha oia i faaroo ore ai. Eaha ta ’na otoheraa niu ore? “Na te vahine ta oe i ho mai ei apiti no ’u ra, i horoa mai i to taua raau ra, amu ihora vau.” (Gen. 3:12) Aita Adamu i tatarahapa i ta ’na i rave. Ua tamata oia i te faahapa ia Eva, oia atoa râ ia Iehova o tei poiete i ta ’na vahine. Ua hara raua toopiti. No Iehova râ, na Adamu e amo i te hopoia no ta raua faaotiraa. No reira te Bibilia e parau ai e “no te taata hoê ra [Adamu] i ô mai ai te ino i te ao nei, e no te ino hoi te pohe.”—Roma 5:12.

5. Eaha tei tupu i te faatereraa te taata ia ratou iho?

5 Ua turai Satani ia Adamu raua Eva ia tiaturi e aita raua e hinaaro ra ia Iehova ei Faatere no raua. E hiti mai ïa teie uiraa: No vai te tiaraa e faatere i te huitaata? No te pahono i teie uiraa, ua vaiiho Iehova i te taata ia faatere ia ratou iho no te hoê area taime. Eaha te faahopearaa? Ua faatupu te taata i te hoê ati i muri iho i te tahi. I na hanere matahiti i mairi, fatata 100 000 000 taata tei pohe i roto i te mau tama‘i. Mai ta te Bibilia e parau ra, “e ere hoi tei taua taata e haere ra i te haapao i to ’na taahiraa.” (Ier. 10:23) No reira te mau Kerisetiano mau e farii ai ia Iehova ei Faatere no ratou.—A taio i te Maseli 3:5, 6.

6. I te fenua e rave rahi, mai te aha te huru o te taata i nia i te mau vahine e te mau tamahine?

6 Te mauiui nei te mau tane e te mau vahine i roto i teie ao e faaterehia ra e Satani. (Koh. 8:9; Ioa. 1, 5:19) O te vahine râ tei faaruru i te tahi o te mau ohipa ino  hairiiri roa ’‘e. Ei hi‘oraa, na te ao atoa, ua hamani-ino-hia 1 vahine i nia e 3 e ta ratou iho tane. Oia atoa, i roto i te tahi mau ta‘ere, mea au a‘e na te taata te tamaroa. No te aha? No te mea ia paari mai ratou, e nehenehe ratou e haapao i to ratou mau metua e e fanau i te tamarii o te amo i te i‘oa o to ratou utuafare. I te tahi mau vahi, te haafaufaa-ore-hia ra te mau tamahine. E haamarua ïa te mau metua i teie mau tamarii tamahine hou ratou a fanauhia ’i.

Aita roa ’tu Iehova e au ra i te mau hamani-ino-raa ravehia i nia i te mau vahine

7. Mea maitai anei te haamataraa ta te Atua i horoa i te tane e te vahine? A faataa.

7 Aita roa ’tu Iehova e au ra i te mau hamani-ino-raa ravehia i nia i te mau vahine. E haerea tia e te tura to ’na i nia ia ratou. Aita Iehova i hamani ia Eva ia riro oia ei tavini no Adamu. Mea tia roa oia e e rave rahi huru maitatai to ’na. E riro ïa oia ei tauturu au na ta ’na tane. Teie te tahi tumu i parau ai te Bibilia e i muri a‘e i to te Atua faaotiraa i ta ’na ohipa poieteraa, ua “hi‘o a‘era te Atua i te mau mea atoa ta ’na i hamani, e inaha, e mea maitai roa.” (Gen. 1:31) Oia mau, e haamataraa maitai mau â to Adamu raua Eva.

TE MAU VAHINE TA IEHOVA I TURU

8. (a) Eaha te haerea o te rahiraa o te taata? (b) I te roaraa o te tau, o vai ta Iehova i tauturu e i turu?

8 I muri a‘e i te orureraa hau i te ô i Edene, ua tamau te taata i te faaroo ore ia Iehova. I te mau matahiti i mahemo, ua ino roa ’tu â te haerea o te taata. Mea papu, teie te ‘anotau ati rahi’ ta te Bibilia e tohu ra. (Tim. 2, 3:1-5) Noa ’tu te ino o vetahi, i vai na iho â te mau tane e vahine o tei faaroo i te mau ture a te Atua e o tei farii ia ’na ei Faatere no ratou. Ua tiaturi ratou ia Iehova e ua tauturu e ua turu oia ia ratou.—A taio i te Salamo 71:5.

Hoê â rahiraa vahine e tane tei ora mai i te diluvi

9. Ehia taata tei ora mai i te diluvi, e no te aha?

9 I te tau o Noa, ua haamou Iehova i te feia ino i roto i te diluvi e mea iti roa te feia tei ora mai. Mai te peu e te ora noa ra te mau taeae e tuahine o Noa i tera taime, ua pohe atoa ratou i roto i te diluvi. (Gen. 5:30) Teie râ, hoê â rahiraa vahine e tane tei ora mai i te diluvi. Te vai ra o Noa e ta ’na vahine, ta raua na tamaiti e toru e ta ratou mau vahine. Ua ora mai ratou no te mea ua faaroo ratou ia Iehova e ua rave i to ’na hinaaro. No roto mai te mau taata atoa e ora ra i teie mahana i na taata e vau ta te Atua i tauturu e i paruru.—Gen. 7:7; Pet. 1, 3:20.

10. No te aha Iehova i tauturu ai e i paruru ai i te mau vahine a te mau tane taiva ore?

10 Tau matahiti i muri a‘e, ua fana‘o atoa te mau vahine a te mau patereareha taiva ore i te tauturu e i te paruru a te Atua. Aita ratou i amuamu i to ratou oraraa e ua haamaitai Iehova ia ratou. (Iuda 16) Hoê o na vahine, o Sara ïa. A anihia ’i oia ia faarue i to ’na oraraa fana‘o i Ura no te ora i raro a‘e i te mau fare  ie, aita oia i amuamu. Ua ‘faaroo oia ia Aberahama ma te parau ia ’na e e fatu.’ (Pet. 1, 3:6) A hi‘o atoa na ia Rebeka, te vahine a Isaaka. E ô faahiahia mau oia no ǒ mai ia Iehova ra. Te parau ra te Bibilia: “E vahine hinaaro oia na [Isaaka]; e maitai noa a‘era Isaaka i muri a‘e i te poheraa o tana metua vahine.” (Gen. 24:67) I teie mahana, e haamaitairaa rahi no te nunaa o Iehova ia fana‘o e rave rahi vahine taiva ore mai ia Sara e Rebeka.

I teie mahana, e rave rahi vahine taiva ore mai ia Sara e Rebeka i roto i te nunaa o Iehova

11. Mea nafea e piti vahine faafanau Iseraela i te faaiteraa i te itoito?

11 A faatîtî-noa-hia ’i te mau Iseraela i Aiphiti, ua rahi roa mai ratou e ua riro mai ei nunaa rahi. Ua faaue Pharao ia haapohehia te mau aiû tamaroa Iseraela atoa i te fanauraa. E au ra e na e piti vahine Iseraela te hopoia e haapao i te mau vahine faafanau. O Sipera e o Pua to raua i‘oa. Mea itoito mau teie na vahine faafanau no te mea ua mǎta‘u rahi a‘e raua ia Iehova i ia Pharao e ua patoi i te pee i ta Pharao faaueraa e haapohe i te mau aiû tamaroa. E ua haamaitai Iehova ia raua i muri a‘e ia fana‘o raua i to raua iho utuafare.—Exo. 1:15-21.

12. Eaha te mea faahiahia no nia ia Debora e ia Iaela?

12 I te tau o te mau tavana i Iseraela, ua faatoroa te Atua i te hoê vahine o Debora te i‘oa ei peropheta. Ua faaitoito Debora i te tavana Baraka e ua tauturu i te mau Iseraela ia tiamâ mai i to ratou mau enemi. Ua tohu oia e e ere na Baraka e fana‘o i te hanahana o te upootiaraa i nia i to Kanaana, na te hoê râ vahine. Ua pau teie mau enemi a haapohe ai Iaela, te hoê vahine e ere i te hoê Iseraela, i te raatira o te nuu Kanaana ra o Sisera.—Tav. 4:4-9, 17-22.

13. Eaha ta te Bibilia e parau ra no nia ia Abigaila?

13 A hi‘o atoa na i te vahine taiva ore ra o Abigaila o tei ora fatata 1 100 matahiti hou te Mesia. Te parau ra te Bibilia e e feruriraa maitai to ’na, area ta ’na tane o Nabala, e taata faufaa ore ïa e te maamaa mai te auraa o to ’na i‘oa. (Sam. 1, 25:2, 3, 25) I te mea e ua paruru Davida i to Nabala mau taata, ua tono Davida i muri a‘e i to ’na iho mau taata e ani ia ’na i te maa e te tahi atu mau taihaa. Ua ‘avau atu o Nabala ia ratou’ e aita oia i horoa ’tu i ta ratou i ani. Ua riri roa o Davida i opua ’i oia i te faautua ia Nabala e to ’na mau taata. I muri a‘e râ i to ’na faarooraa i ta Nabala i rave, ua rave Abigaila i te maa e te tahi mau ô na Davida. E no ta ’na ohipa î i te paari, aita Davida i haapohe ia Nabala. (Sam. 1, 25:8-18) Ua parau Davida ia Abigaila i muri iho: “Ia haamaitaihia te Atua o Iseraela ra o Iehova, o tei tono mai ia oe i teie nei mahana i farerei mai ai oe ia ’u.” (Sam. 1, 25:32) I muri a‘e i te poheraa o Nabala, ua faaipoipo  o Davida ia Abigaila.—Sam. 1, 25:37-42.

Mea rahi te vahine Kerisetiano e haa ra i roto i te ohipa paturaa e ati a‘e te ao

14. Ua apiti te mau tamahine a Saluma i teihea ohipa, e e nafea te mau vahine Kerisetiano e rave ai i te hoê â ohipa i teie mahana?

14 A haamou ai to Babulonia ia Ierusalema e i to ’na hiero i te matahiti 607 hou te Mesia, e rave rahi tane, vahine e tamarii o tei pohe. I 455 hou te Mesia, ua hamani-faahou-hia te patu o Ierusalema i raro a‘e i te aratairaa a Nehemia. I rotopu i te rave ohipa e rave rahi o tei turu i teie ohipa paturaa, te itehia ra te mau tamahine a Saluma. E ‘tavana to ratou metua tane o te hoê pae Ierusalema.’ (Neh. 3:12) Ua oaoa râ te mau tamahine a Saluma i te rave i te ohipa haehaa. Te haamana‘o maira te reira i te vahine Kerisetiano e rave rahi e haa ra i teie mahana i roto i te ohipa paturaa e ati a‘e te ao!

TE MAU VAHINE O TEI MǍTA‘U I TE ATUA I TE TAU O IESU

15. Eaha te fana‘oraa taa ê ta Iehova i horoa ia Maria?

15 Ua horoa Iehova i te mau vahine te mau fana‘oraa taa ê i roto i ta ’na taviniraa. Hoê o na vahine, o te paretenia ïa o Maria te i‘oa. Ua momo‘ahia oia ia Iosepha a hapû mai ai o ’na maoti te varua mo‘a o Iehova. No te aha Iehova i maiti ai ia Maria ei metua vahine no Iesu? Aita e hape e e huru maitatai faufaa mau to ’na no te aupuru i ta ’na tamaiti tia roa. E fana‘oraa taa ê mau â te riroraa ei metua vahine no te taata rahi roa ’‘e i ora a‘enei i te fenua nei!—Mat. 1:18-25.

16. Eaha to Iesu huru i nia i te mau vahine? A faataa.

16 Mea maitai roa o Iesu i nia i te mau vahine. A hi‘o na i te vahine “hoê a‘era ahuru e piti tiahapa i te matahiti i te poheraa i te tapahi.” Ua tapea oia i te ahu o Iesu ia ora mai oia. Ua riri anei Iesu ia ’na? Aita. Ua faaite oia i te hamani maitai e ua parau: “E tau tamahine, i ora oe i to faaroo; a haere ma te hau, e ma te ora i to ma‘i.”—Mar. 5:25-34.

17. Eaha tei tupu i te mahana o te Penetekose 33?

17 A ratere ai Iesu e ta ’na mau aposetolo, e vahine tei haapao i to ratou mau hinaaro. (Luka 8:1-3) I te mahana o te Penetekose 33, ua fana‘o na 120 tane e vahine i te varua o te Atua ma te hoê ravea taa ê. (A taio i te Ohipa 2:1-4.) E rave rahi matahiti hou tera tupuraa, ua parau Iehova: “E ninii atu ai au i tau varua i nia i te taata atoa; e tohu hoi ta outou mau tamarii tamaroa e te mau tamahine; . . . e ninii atu vau i tau varua i nia i te mau tavini tane, e i nia i te mau tavini vahine.” (Ioe. 2:28, 29) Ua haapapu teie semeio i te mahana o te Penetekose e ua farii Iehova i teie mau tane e vahine o tei riro mai ei ‘Iseraela o te Atua.’ (Gal. 3:28; 6:15, 16) O na tamahine e maha a Philipa haapii evanelia te tahi o te mau vahine o tei poro i te senekele matamua.—Ohi. 21:8, 9.

 “E PǓPǓ RAHI” TE MAU VAHINE

18, 19. (a) Eaha te fana‘oraa taa ê ta te Atua i horoa i te mau tane e vahine? (b) Mea nafea te papai salamo i te faataaraa i te mau vahine e faaite ra i te parau apî oaoa?

18 I te pae hopea o te mau matahiti 1800, ua anaanatae mau te tahi mau tane e vahine i te parau mau Bibilia. Ua haamata ratou i te poro i te poroi a Iesu e ua apiti i te tupuraa o ta ’na parau tohu: “E parau-haere-hia te evanelia o te basileia nei e ati noa ’‘e teie nei ao, ia ite te mau fenua atoa: o te hopea ihora ïa i reira ra.”—Mat. 24:14.

E vahine te rahiraa i roto i te taviniraa taime taatoa

19 Ua rahi roa mai te pǔpǔ iti Feia haapii Bibilia. I teie mahana, fatata e 8 000 000 a‘e Ite no Iehova ratou. Taa ê atu ia ratou, ua hau atu i te 11 000 000 taata o tei haere mai i te Oroa haamana‘oraa i te poheraa o Iesu. E vahine te rahiraa o ratou. Oia atoa, ua hau atu i te 1 000 000 Ite i roto i te taviniraa taime taatoa. I te fenua e rave rahi, e vahine te rahiraa. Ua horoa Iehova i te mau vahine te fana‘oraa taa ê e tia no ’na. Ua tupu maite ïa te mau parau a te papai salamo: “Te horoa ra Iehova i te faaueraa; e pǔpǔ rahi te vahine e faaite ra i te parau apî oaoa.”—Sal. 68:11MN.

E “pǔpǔ rahi” iho â te mau vahine e poro ra i te parau apî oaoa (A hi‘o i na paratarafa 18, 19)

TE MAU HAAMAITAIRAA RAHI NO TE MAU VAHINE O TE MǍTA‘U I TE ATUA

20. Eaha te mau tumu parau maitai e hi‘opoa i te haamoriraa utuafare aore ra i ta tatou iho haapiiraa?

20 Eita e nehenehe e tauaparau i ǒ nei no nia i te mau vahine taiva ore atoa o tei faataahia i roto i te Bibilia. E nehenehe râ e taio i to ratou aamu i roto i te Parau a te Atua e i roto i ta tatou mau papai. E feruriruri ana‘e i te hi‘oraa o Ruta e to ’na haapao maitai. (Ruta 1:16, 17) E faufaa-atoa-hia tatou i te hi‘opoa i te hi‘oraa o te arii vahine ra o Esetera. I ta tatou haamoriraa utuafare, e nehenehe tatou e hi‘opoa i ta raua e i ta te tahi atu mau vahine i rave. E mai te peu e e feia taa noa tatou, e na reira ana‘e ïa i ta tatou iho haapiiraa.

21. Mea nafea te mau vahine haapao maitai i te faaiteraa i to ratou taiva ore ia Iehova?

21 Mea papu maitai e ua haamaitai Iehova i te ohipa pororaa a te mau vahine taiva ore, i roto atoa i te mau tamataraa fifi mau. Ei hi‘oraa, i te tau o te faaheporaa Nazi e te faatereraa Communiste, ua tauturu Iehova i te mau vahine haapao maitai ia vai taiva ore noa ia ’na. E rave rahi o tei mauiui. E ua haapohe-atoa-hia vetahi no to ratou auraro i te Atua. (Ohi. 5:29) Mai teie mau vahine taiva ore, ua maiti te mau vahine Kerisetiano e te tahi atu i teie mahana i te Atua ei Faatere no ratou. Ua parau Iehova ia ratou, mai ta ’na i parau i te mau Iseraela i tahito: “Eiaha e mǎta‘u; o vau hoi to oe tauturu.”—Isa. 41:10-13.

22. Eaha te mau fana‘oraa taa ê no a muri a‘e ta tatou e tiai ru nei?

22 I a muri a‘e, e faaohipahia te mau tane e te mau vahine o te mǎta‘u i te Atua no te tauturu i na mirioni taata o te faatiahia mai. E haapii atu ïa ratou i teie mau taata o vai o Iehova e eaha ta ’na mau opuaraa faahiahia no te huitaata. E apiti atoa ratou i te faariroraa i te fenua taatoa ei paradaiso. A tiai ai râ, ia haafaufaa tatou pauroa i te fana‘oraa taa ê e tavini ia Iehova “ma te aau hoê.”—Zeph. 3:9.