Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2014

E nafea Iehova e haafatata mai ai ia tatou?

E nafea Iehova e haafatata mai ai ia tatou?

“E haafatata ’tu i te Atua, e na ’na e haafatata mai ia outou.”—IAK. 4:8.

1. Eaha te hinaaro o te taata e o vai te nehenehe e haamâha i te reira?

E HINAARO te taata atoa e piri atu â i te tahi atu taata. E oaoa tatou i te fana‘o i te utuafare e te hoa o te here mau ra ia tatou, o te haafaufaa maira e o te taa maira. Te taairaa piri roa râ e titauhia ia faatupu, o te taairaa ïa e to tatou Atua poiete ra o Iehova.—Koh. 12:1.

2. Eaha ta Iehova e fafau maira, e no te aha aita ’i te taata e rave rahi e tiaturi ra i teie parau fafau?

2 Te titau manihini nei Iehova ia tatou ia riro ei hoa no ’na. Te fafau ra oia e ia haafatata ’tu tatou ia ’na e haafatata atoa mai oia ia tatou. (Iak. 4:8) Ua oaoa tatou i te ite i te reira. E rave rahi râ taata o te mana‘o ra e e ere i te mea tano ia tiaturi e te hinaaro ra te Atua e haafatata ia ratou. Te mana‘o ra hoi ratou e eita e au ia ratou ia faatupu i te hoê taairaa e o ’na aore ra mea atea roa o ’na. E nehenehe mau anei e haafatata ’tu ia Iehova?

3. Eaha te tiaturi no nia ia Iehova?

 3 E nehenehe iho â e ite o vai Iehova no te mea ‘aita oia i atea ê atu’ i te feia e hinaaro ra e ite ia ’na. (A taio i te Ohipa 17:26, 27; Salamo 145:18.) Te hinaaro nei Iehova e farii ia tatou ei hoa piri no ’na noa ’tu e e taata tia ore tatou. (Isa. 41:8; 55:6) No ta ’na iho i ite, ua parau te fatu salamo no nia ia Iehova: “E tei faaroo i te pure ra, e tae atoa mai te taata atoa ia oe ra. E ao to te taata i haapaohia e oe, e ua faafatatahia mai.” (Sal. 65:2, 4) E hi‘o ana‘e i teie nei i roto i te Bibilia, mea nafea te arii Asa no Iuda i te haafatataraa ’tu i te Atua e mea nafea te Atua i te haafatata-atoa-raa ia Asa.

A HAAPII MAI I TE HOÊ HI‘ORAA NO TAHITO RA

4. Eaha te hi‘oraa ta te arii Asa i vaiiho no te nunaa o Iuda?

4 E taata itoito rahi o Asa no te haamoriraa mau. E peu matauhia te pâi‘a e te haamori idolo a arii mai ai oia. Ua auraro oia ia Iehova ma te faaore i teie mau ohipa ino. (Arii 1, 15:9-13) I te mea hoi e ua haafatata ’tu Asa ia Iehova e ua faaroo i ta ’Na mau ture, ua nehenehe ia ’na ia parau i te nunaa ia “imi i te Atua no to ratou hui tupuna ia Iehova, e [ia] haapao hoi i te ture e te mau parau atoa.” Ua haamaitai Iehova i na ahuru matahiti matamua o te faatereraa a Asa ma te horoa i te hau mau. Ua ite Asa e no ǒ mai teie hau ia Iehova ra, e ua parau oia i te nunaa: “Ua imi tatou i horoa mai ai oia i te hau no tatou e ati noa ’‘e.” (Par. 2, 14:1-7) Eaha tei tupu i muri iho?

5. I roto i teihea tupuraa i haapapu ai Asa e ua tiaturi oia i te Atua, e eaha te faahopearaa?

5 A feruri na e o oe te arii Asa. Te aratai ra Zera ati Kusa 1 000 000 tane e e 300 pereoo tama‘i no te aro i to oe nunaa. (Par. 2, 14:8-10) Fatata te tataipitiraa ïa o te rahiraa faehau e vai ra i roto i ta oe nuu. E nafea oe? E ani anei oe no te aha te Atua i ore ai i tapea i te reira? E tiaturi anei oe i to oe iho paari aore ra e tiaturi oe ia Iehova no te paruru ia oe? Ua faaite papu o Asa e e taairaa piri roa to ’na e o Iehova e ua tiaturi maite oia ia ’Na. Ua pii Asa: “E tauturu mai ia matou, e to matou Atua, e Iehova; te tiaturi nei hoi matou i nia ia oe.” Mea nafea te Atua i te pahonoraa ia ’na? Ua pau ihora to Kusa ia Iehova. Aita hoê a‘e enemi i ora mai.—Par. 2, 14:11-13.

E mea tia ia tavini i te Atua ma te aau taatoa no te haafatata ’tu ia ’na

6. E nafea tatou e pee ai i to Asa hi‘oraa?

6 Mea nafea o Asa i te tiaturi-papu-raa e e paruru e e aratai te Atua ia ’na? Te parau ra te Bibilia e “e parau tia ta Asa i te aro o Iehova” e ‘ua tia to ’na aau ia Iehova.’ (Arii 1, 15:11, 14) E mea tia ia tavini atoa tatou i te Atua ma te aau taatoa ia nehenehe tatou e haafatata ’tu ia ’na i teie nei â e a muri a‘e. Te mauruuru nei tatou i ta Iehova i rave no te haafatata ia  tatou ia ’na ra e i ta ’na tauturu ia nehenehe tatou e faatupu i te hoê taairaa piri e o ’na. E hi‘o ana‘e e piti ravea ta te Atua e faaohipa ra no te na reira.

TE FAAOHIPA RA IEHOVA I TE HOO IA HAAFATATA ’TU TATOU IA ’NA

7. (a) Eaha ta Iehova i rave ia haafatata ’tu tatou ia ’na? (b) Eaha te ravea rahi roa ’‘e a te Atua ia haafatata ’tu tatou ia ’na?

7 Ua faaite Iehova i to ’na here i te taata i to ’na poieteraa i te hoê fenua nehenehe mau ei nohoraa no tatou. E te tamau noa ra oia i te faaite i to ’na here ma te horoa mai i te aho ora i te mahana taitahi. (Ohi. 17:28; Apo. 4:11) Te mea faufaa ’tu â, te haapao nei oia i to tatou mau hinaaro pae varua. (Luka 12:42) Te haapapu atoa maira oia e na ’na e faaroo ra i ta tatou pure. (Ioa. 1, 5:14) Te ravea rahi roa ’‘e râ a Iehova no te haafatata ia tatou ia ’na ra e no te faaite i to ’na here ia tatou, o te hoo ïa. (A taio i te Ioane 1, 4:9, 10, 19.) Ua tono Iehova i ta ’na iho Tamaiti ia horoa o ’na i to ’na ora no tatou. Maoti noa teie tusia e nehenehe ai tatou e tiaturi e ora e a muri noa ’tu ei taata tia roa.—Ioa. 3:16.

Te haapapu maira Iehova e na ’na e faaroo ra i ta tatou pure

8, 9. Eaha te tuhaa a Iesu i roto i te opuaraa a Iehova?

8 Ua opua Iehova i te hoo no te maitai o te taata atoa, tae noa ’tu te feia o tei ora hou te hoo a aufauhia ’i. Mea nafea ïa? No Iehova, mai te huru ra e ua aufau-a‘ena-hia te hoo a tohu ai oia no nia i to tatou Faaora. Ua ite hoi oia e e tupu iho â ta ’na i opua no te huitaata. (Gen. 3:15) E hanere matahiti i muri a‘e, ua haamauruuru te aposetolo Paulo ia Iehova no te tiamâraa itehia maoti te hoo aufauhia e te Mesia ra ia Iesu. Ua faataa o Paulo e ‘ua faaore te Atua i te mau hara i ravehia i mutaa ihora.’ (Roma 3:21-26) Eita ïa e nehenehe e haafatata ’tu i te Atua aita ana‘e Iesu.

Ua aufauhia te hoo, eiaha no te mea e au ia tatou te reira, no te mea râ ua here rahi mau Iehova e Iesu ia tatou

9 E fana‘o te feia haehaa i te hoê taairaa piri roa e o Iehova maoti noa ia Iesu. Te parau ra te Bibilia: “Ua faarahi . . . te Atua i to ’na aroha ia tatou nei, i te mea te vai taata hara noa nei â tatou, i pohe ai te Mesia no tatou nei.” (Roma 5:6-8) Ua aufauhia te hoo, eiaha no te mea e au ia tatou te reira, no te mea râ ua here rahi mau Iehova e Iesu ia tatou. Ua parau Iesu: “E ore roa te taata e tae mai ia ’u nei, maori râ ia faatae mai te Metua o tei tono mai ia ’u nei ia ’na.” Ua parau atoa oia: “Aore roa e taata e tae i te Metua ra, maori râ ei ia ’u.” (Ioa. 6:44; 14:6) Maoti te varua mo‘a, te faatae aore ra te haafatata nei Iehova i te taata ia ’na ra maoti Iesu. E te tauturu ra oia ia ratou ia faatupu i te hoê taairaa maitai e o ’Na ia nehenehe ratou e fana‘o i te ora mure ore. (A taio i te Iuda 20, 21.) E hi‘o ana‘e i teie nei i te piti o te ravea ta te Atua e faaohipa ra ia haafatata ’tu tatou ia ’na.

 TE FAAOHIPA RA IEHOVA I TE BIBILIA IA HAAFATATA ’TU TATOU IA ’NA

10. E nafea te Bibilia e tauturu mai ai ia haafatata ’tu â i te Atua?

10 Tae roa mai i teie nei i roto i teie tumu parau, ua faaohipa tatou 14 buka Bibilia. Ma te faaohipa i to ’na varua mo‘a, ua faaurua Iehova i te papairaa o te Bibilia ia haafatata ’tu tatou ia ’na. Aita ana‘e te Bibilia, e nafea tatou e ite ai e e nehenehe ta tatou e haafatata ’tu i to tatou Atua poiete? Aita ana‘e te reira, e nafea tatou e haapii ai no nia i te hoo e i ta Iesu e rave ra no te tauturu mai ia haafatata ’tu ia Iehova? I roto i te Bibilia tatou e haapii ai i te huru faahiahia mau o Iehova e ta ’na opuaraa no te huitaata. Ei hi‘oraa, i roto i te Exodo 34:6, 7, te faataa ra Iehova ia ’na iho mai te “Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ’tu te ui; e te faaore i te parau-tia ore, e te hara, e te ino.” O vai te ore e hinaaro e haafatata ’tu i te hoê Atua mai teie? Ua ite Iehova e ia haapii atu â tatou no nia ia ’na, e papu atu â ia tatou e te vai mau ra o ’na e e piri atu â tatou ia ’na.

Ua faanaho Iehova ia papaihia te Bibilia ma te mau parau ohie ia taa

11. No te aha mea faufaa ’i ia haapii no nia ia Iehova? (A hi‘o i te hoho‘a matamua.)

11 Te parau ra te omuaraa o te buka E haafatata ’tu ia Iehova e a riro mai ai te hoê taata ei hoa piri no tatou, e matau atu â tatou ia ’na e e faahiahia i mua i to ’na mau huru maitatai. No reira, no te fana‘o i te hoê taairaa piri roa e te Atua, e titauhia ia haapii tatou o vai mau oia ma te hi‘opoa i to ’na mau huru maitatai i roto i te Bibilia. Te oaoa nei tatou e ua faanaho Iehova ia papaihia te Bibilia ma te mau parau ohie ia taa.

12. No te aha Iehova i faaohipa ’i i te mau taata no te papai i te Bibilia?

12 E nehenehe ta Iehova e faaohipa i te mau melahi no te papai i te Bibilia. Te hinaaro rahi nei ratou e ite o vai tatou e eaha ta tatou e rave ra. (Pet. 1, 1:12) E nehenehe ta ratou e papai ma te tia roa i ta Iehova poroi no te huitaata. E ere râ te mau melahi mai te mau taata. Aita roa ’tu ratou i ite a‘enei i te mau huru aau, hinaaro e paruparu mai to tatou. Ua ite Iehova e mea taa ê mau te mau melahi ia tatou. No reira oia i maiti ai ma te paari i te mau taata no te papai i te Bibilia. Ia taio tatou no nia i te mau inoino, feaaraa, mǎta‘u e hape o te feia papai Bibilia e te tahi atu, e taa ia tatou to ratou mauiui. E ia taio tatou no nia i to ratou mau taime oaoa, e taa ia tatou to ratou oaoa. Mai te peropheta Elia, “mai ia tatou atoa te huru” o te feia papai Bibilia.—Iak. 5:17.

E nafea oe e haafatata ’tu â ’i ia Iehova a hi‘o ai i to ’na huru i nia ia Iona e Petero? (A hi‘o i na paratarafa 13, 15)

13. Eaha to oe huru aau a taio ai i te pure a Iona?

 13 Ei hi‘oraa, ua horoa te Atua ia Iona te hoê hopoia faufaa mau, tera râ, ua horo ê oia. Ahani e na te hoê melahi i papai i to Iona aamu, eita ta ’na e nehenehe e faataa roa i to Iona mau huru aau. Mea maitai a‘e ïa ia maiti Iehova ia Iona no te papai i to ’na iho aamu, oia atoa i ta ’na pure i te Atua i roto i te hohonu o te moana. Ua parau Iona: “A tarapape [aore ra ahoaho] ai tau varua i roto ia ’u ra, ua mana‘o ihora vau ia Iehova.”—Iona 1:3, 10; 2:1-9.

14. No te aha e taa ’i ia oe ta Isaia i papai no nia ia ’na iho?

14 E itehia te tahi atu hi‘oraa i roto i ta Isaia i papai no nia ia ’na iho. I to te hoê orama no nia i te hanahana o Iehova tautururaa ia ’na ia taa e e taata hara mau oia, ua parau oia: “Auê hoi au nei e! ua mamû iho nei au; e taata vaha viivii hoi au; e tei rotopu hoi au i te mau taata vaha viivii atoa i te parahiraa: ua hi‘o hoi tau mata nei i te arii, ia Iehova sabaota.” (Isa. 6:5) Eita roa ’tu ta te hoê melahi e nehenehe e parau i te reira no nia ia ’na iho, o Isaia râ, oia ïa e ua na reira iho â o ’na. I te mea e e taata tia ore tatou mai ia Isaia, e nehenehe tatou e taa eaha to ’na huru aau.

15, 16. (a) No te aha tatou e taa ’i i te mau huru aau o te tahi atu mau taata? A faataa. (b) Eaha te tauturu ia tatou ia haafatata ’tu â ia Iehova?

15 Eita ta te melahi e nehenehe e parau no ’na iho mai ia Iakoba, oia hoi “e ore roa vau nei e au i te mau hamani-maitai-raa mai.” Aore ra mai ia Petero o tei faataa ia ’na iho mai te  hoê “taata hara.” (Gen. 32:10; Luka 5:8) Eita te mau melahi e “mǎta‘u” mai te mau pǐpǐ a Iesu i te tahi taime. Eita atoa ratou e hinaaro i te itoito no te poro i te parau apî oaoa a hamani-ino-hia ’i ratou mai ia Paulo e te tahi atu. (Ioa. 6:19; Tes. 1, 2:2) No te aha? No te mea mea tia roa te mau melahi i roto i te mau tuhaa atoa e e mea puai a‘e ratou i te taata. Mai te feia o ta Iehova i faaohipa no te papai i te Bibilia, e taata tia ore atoa tatou. E nehenehe ïa tatou e taa i to ratou mau huru aau. Ia taio tatou i ta ratou i papai, e nehenehe tatou “e oaoa atoa i te feia e oaoa ra, e oto atoa hoi i te feia e oto ra.”—Roma 12:15.

16 Ma te feruri maite i to Iehova huru i nia i ta ’na mau tavini taiva ore i tahito ra, e ite tatou e rave rahi ohipa faahiahia no nia i to tatou Atua. E ite mai tatou e ua haafatata ’tu oia i te taata tia ore ma te mǎrû e te here. E piri ’tu â tatou ia Iehova a ite maitai ai tatou o vai o ’na e a here roa ’i ia ’na.—A taio i te Salamo 25:14.

Ma te feruri maite i to Iehova huru i nia i ta ’na mau tavini taiva ore i tahito ra, e ite tatou e rave rahi ohipa faahiahia no nia i to tatou Atua

A FAATUPU I TE HOÊ TAAIRAA E TE ATUA O TE ORE ROA E MUTU

17. (a) Eaha te a‘oraa maitai ta Azaria i horoa ia Asa? (b) Mea nafea Asa i te tâu‘a-ore-raa i te a‘oraa a Azaria, e eaha te faahopearaa?

17 Eaha ’tu â te haapii mai no nia i te arii Asa? I muri a‘e i to ’na upootiaraa i nia i te nuu Kusa, ua horoa ’tu te peropheta Azaria i te a‘oraa î i te paari. Ua parau oia: “Ei pihaiiho Iehova ia outou, outou i ati mai ia ’na ra; ia imi outou ia ’na, e itea ïa oia e outou: ia faarue râ outou ia ’na, e faarue atoa oia ia outou.” (Par. 2, 15:1, 2) I muri a‘e râ, aita o Asa i pee i teie a‘oraa maitai. I to te arii o te basileia apatoerau o Iseraela aroraa ia Iuda, ua mǎta‘u Asa. Aita oia i ani i te tauturu a Iehova, ua faaau râ o ’na i te faufaa e to Arama o te ore hoi e haamori ia Iehova. Ua parau Iehova ia ’na: “E parau maamaa ta oe i tena ra: e teie nei, ei tama‘i â ta oe.” Tera iho â tei tupu. (Par. 2, 16:1-9) Eaha te haapiiraa e huti mai?

18, 19. (a) Eaha te rave e ere ana‘e to tatou taairaa e o Iehova i te mea piri roa mai i na mua ’‘e? (b) E nafea tatou e tamau ai i te haafatata ’tu â ia Iehova?

18 Eiaha roa ’tu tatou e faaatea ê mai ia Iehova. Mai te peu e e ere to tatou taairaa e o ’na i te mea piri roa mai i na mua ’‘e, e rave oioi ana‘e i ta Hosea 12:6 e parau ra: “E fariu oe i to oe ra Atua: e haapao i te aroha hamani maitai ra e te parau au, e ati tamau maite i to oe ra Atua.” Ma te feruriruri i te hoo e ma te haapii maite i te Bibilia, e nehenehe tatou e haafatata ’tu â ia Iehova.—A taio i te Deuteronomi 13:4.

19 Ua papai te fatu salamo: “E mea maitai râ ia ’u ia haafatata ’tu i te Atua.” (Sal. 73:28) Mea maitai no tatou taitahi atoa. E haamau ana‘e ei fa e tamau noa i te haapii i te mau mea apî no nia ia Iehova. Ma te na reira, e rahi roa ’tu â to tatou here ia ’na. E ia haafatata ’tu â tatou ia ’na, e haafatata ’tu â Iehova ia tatou i teie nei â e a muri noa ’tu!