Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) TIUNU 2014

E nafea ia tauturu i te hoa haamori tei faataa?

E nafea ia tauturu i te hoa haamori tei faataa?

Mea matau-roa-hia te faataaraa. Ua matau paha oe i te tahi taata i roto i teie tupuraa. Ia au i te hoê maimiraa i Poronia, teie te pǔpǔ taata te faataa pinepine nei: taata e 30 matahiti e mai te toru e tae atu i te ono matahiti faaipoiporaa. E ere râ o ratou ana‘e.

Ia au i te hoê pu i Paniora, o te afaraa o te mau taata faaipoipo i Europa te faataa. Hoê â huru i te tahi atu mau fenua navai ore.

HURU AAU TUATI ORE

Eaha tei tupu? Ia au i te hoê taata a‘o aravihi i te pae faaipoiporaa i Europa Hitia o te râ, e faaite te faataaraa i tei tupu a‘ena: ua mutu te taairaa e ua faataa ê na hoa faaipoipo. Mea mauiui mau te reira. I reira ïa e itehia ’i te mau huru aau puai mau mai te riri, te tatarahapa, te inoino, te hepohepo e te haama. I te tahi taime, e hinaaro te taata tei faataa e haapohe ia ’na. Ia haamanahia te faataaraa e te tiripuna, e moemoe e e paruparu o ’na a uiui atu ai: ‘O vai ra ïa vau i teie nei? Eaha te faufaa ia ora vau?’

Te faataa nei Ewa i to ’na huru aau a tau matahiti i teie nei: “I muri iho i to ’u faataaraa, ua haama mau vau a faahiti ai to ’u feia tapiri aore ra hoa ohipa ia ’u mai te hoê vahine o tei faataa. Ua faaruehia mai au e na tamarii nainai e piti e e mea tia ia riro vau ei mama e ei papa no raua.” * I tavini na Adam ei matahiapo faaturahia 12 matahiti i te maoro. Te parau nei oia: “Aita vau i faatura rahi faahou ia ’u iho e i te tahi taime, ua riri roa vau e ua hinaaro vau e faaatea ê mai ia ’u i te mau taata atoa.”

TE MAITAI-FAAHOU-RAA MAI

No to ratou ahoaho no te a muri a‘e, mea fifi no vetahi ia maitai faahou mai noa ’tu e e rave rahi matahiti ratou i te faataaraa. E mana‘o paha ratou e aita te tahi atu e tâu‘a ra ia ratou. Hau atu â, ia au i te hoê papai vea, e mea tia “ia taui ratou i ta ratou i matau i te rave e ia haapii i te faaruru i te mau fifi.”

Te haamana‘o ra Stanisław: “I to mâua ta ’u vahine faataaraa, aita o ’na i hinaaro ia ite au i ta ’u na tamahine iti e piti. Mana‘o ihora vau i muri iho e aita e taata e tâu‘a faahou maira ia ’u e ua faarue atoa mai Iehova ia ’u. Aita vau i hinaaro faahou e ora. I muri a‘e râ, ua taa ia ’u e mea hape to ’u mana‘o.” Aita atoa Wanda,  tei faataa i ta ’na tane, i papu i to ’na a muri a‘e: “I mana‘o na vau e e faaea oioi te taata, oia atoa to ’u mau hoa haamori, i te tâu‘a mai ia ’u e i ta ’u mau tamarii. Te ite nei râ vau i teie nei e ua aupuru noa mai te mau taeae ia matou e ua tauturu ratou ia ’u a faaitoito ai au i te haapii i ta ’u mau tamarii ia riro ei tavini a Iehova.”

Ia au i teie mau parau, te ite nei oe e no vetahi, e ô noa mai te mau mana‘o toaruaru i muri a‘e i te faataaraa. E mana‘o paha ratou e mea faufaa ore mau ratou e aita e faufaa ia tâu‘a ia ratou. E faaino atoa paha ïa ratou i te feia e haaati ra ia ratou a mana‘o atu ai e mea toetoe e mea ino te amuiraa. Te faaite nei râ te mau hi‘oraa mai ia Stanisław e Wanda e e taa i te feia tei faataa e ua haapao to ratou mau taeae e tuahine ia ratou. Inaha, ua horoa te mau hoa Kerisetiano i te tauturu taa ê noa ’tu e aita te reira i itehia i te omuaraa.

TE MANA‘O MOEMOE E TE MANA‘O E AITA E TÂU‘AHIA RA

A haamana‘o e noa ’tu ta tatou mau tutavaraa atoa, te vai ra te taime e moemoe iho â to tatou mau hoa haamori tei faataa. E mana‘o ratou, te mau tuahine iho â râ, e mea iti roa te tâu‘a ra ia ratou. Te fa‘i ra Alicja: “A vau matahiti vau i te faataaraa i teie nei. I te tahi taime, e faahaehaa noa vau ia ’u e e hinaaro vau e faaatea ê mai ia ’u a ta‘i noa ’tu ai e a faahapa noa ’i ia ’u iho.”

E pinepine te taata tei faataa i te ite i te mau huru aau faahitihia i ǒ nei. Te faaue nei râ te Bibilia ia ore e faataa ê mai ia tatou. Aita ana‘e, te patoi ra ïa tatou i “te mau paari atoa.” (Mas. 18:1) E haerea paari ia ore e imi noa i te tauturu e te tamahanahanaraa a te hoê taata mero ê. Eita ïa te mana‘o faahinaaro tano ore e ô mai.

E tauiui noa paha te huru aau o to tatou mau hoa haamori tei faataa mai i to ratou apiti. E haapeapea paha ratou no te a muri a‘e, e moemoe aore ra e mana‘o e aita ratou e tâu‘ahia ra. E haamana‘o ana‘e e mai tera iho â e e ere i te mea ohie. Ia pee ïa tatou i te hi‘oraa o Iehova ma te turu i taua mau taeae e tuahine ra ma te taiva ore. (Sal. 55:22; Pet. 1, 5:6, 7) Mea papu e e oaoa ratou i te tauturu ta tatou e horoa ’tu. E e ite ratou i roto i te amuiraa te tauturu a te mau hoa mau!—Mas. 17:17; 18:24.

^ par. 6 Ua tauihia te tahi mau i‘oa.