Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIUNU 2014

Uiraa a te feia taio

Uiraa a te feia taio

E nehenehe anei ta te mau Kerisetiano e tanina i to ratou feia pohe?

Aita te mau Papai e patoi ra ia taninahia te hoê taata pohe.

Te faatia ra te mau aamu Bibilia e ua taninahia te mau tino aore ra ivi o te mau taata tei pohe. (Ios. 7:25; Par. 2, 34:4, 5) I faaite na paha te reira e aita e au i teie mau taata ia hunahia ratou. E ere râ tera noa te auraa.

Ta tatou ïa e ite ra i roto i te aamu o te poheraa o te arii Saula e ta ’na na tamaiti e toru a aro ai ratou i to Philiseti. O Ionatana hoê o na tamaiti, te hoa maitai o Davida o tei turu ia ’na ma te taiva ore. I to te mau Iseraela itoito e ora ra i Iabesa-gileada faarooraa i tei tupu, ua haere ratou e tii i na tino e maha, ua tutui i te auahi e ua tanu atura i te mau ivi. I muri iho, ua haapopou Davida i tera mau Iseraela no ta ratou i rave.—Sam. 1, 31:2, 8-13; Sam. 2, 2:4-6.

Te tiaturiraa Bibilia no tei pohe, o te tia-faahou-raa ïa. Oia hoi e faaho‘i mai te Atua i te taata i te ora. Taninahia aore ra aita, e nehenehe ta Iehova e faaho‘i mai i te taata pohe i te ora e te hoê tino apî. Ei hi‘oraa, ua faaue te arii Nebukanesa ia taue i na Hebera taiva ore e toru i roto i te umu auahi. Aita ratou i mǎta‘u e eita te Atua e nehenehe e faaho‘i mai ia ratou i te ora ia pohe noa ’tu ratou i te auahi. (Dan. 3:16-18) Hoê â atoa no te mau tavini taiva ore a Iehova o tei pohe i roto i te mau aua haavîraa Nazi e ua taninahia to ratou tino. Te vai atoa ra te mau tavini taiva ore a te Atua o tei pohe i roto i te mau paainaraa aore ra i roto i te tahi mau tupuraa aita to ratou tino i itehia. Mea papu e e faatia-faahou-hia ratou.—Apo. 20:13.

Eita e titauhia ia amui faahou mai Iehova i te mero atoa o te hoê tino taata no te faaho‘i mai ia ’na i te ora. O ta tatou ïa e taa ra a faatia faahou ai te Atua i te mau Kerisetiano faatavaihia i te ora i te ra‘i. O to mau taata noa iho â ratou. Teie râ, mai ia Iesu o tei “faatiahia ei tino varua,” e faatia-atoa-hia ratou ei tino varua. Eita ratou e haere i nia i te ra‘i e to ratou tino taata.—Kor. 1, 15:42-53; Ioa. 1, 3:2.

Aita to tatou tiaturiraa i te tia-faahou-raa i niuhia i nia i te mea e ravehia i nia i te hoê tino pohe, i nia râ i to tatou tiaturi i te puai e te hinaaro o te Atua e faatupu i ta ’na mau parau fafau. (Ohi. 24:15) Aita paha tatou e taa roa ra mea nafea te Atua i te faatupuraa i te semeio o te tia-faahou-raa i tahito ra aore ra e nafea oia e na reira ’i a muri a‘e. E tiaturi ana‘e râ ia Iehova. Ma te faatia faahou mai ia Iesu, ua “faaite hua” mai Iehova e e nehenehe ta ’na e na reira.—Ohi. 17:31; Luka 24:2, 3.

Mea maitai ia haapao te mau Kerisetiano i tei matauhia i te rave i to ratou fenua, i te mana‘o o te taata e i te mau titauraa i te pae o te ture. (Kor. 2, 6:3, 4) Na te taata taitahi ïa aore ra na te utuafare e faaoti e e taninahia anei te tino o te hoê taata pohe aore ra eita.