Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) ME 2014

 HAAMANA‘ORAA NO TAHITO RA

“Mea rahi roa te ohipa ootiraa e rave”

“Mea rahi roa te ohipa ootiraa e rave”

Ua tae George Young i Rio de Janeiro i Mati 1923

TEI te matahiti 1923 tatou. Ua î te piha rahi faata‘iraa upaupa e hautiraa taata ora i São Paulo! Te faaroo ra anei oe i te reo papu o George Young? Te hurihia ra ta ’na oreroraa parau, hoê pereota i muri i te tahi, na roto i te reo Potiti. Te faaroo maite ra na 585 taata o tei tae mai. Te patahia ra te mau irava Bibilia na roto i te reo Potiti i nia i te paruai. A oti ai, ua operehia hoê hanere buka rairai E ore roa ’tu te mau mirioni taata e ora ra i teie nei e pohe! na roto i te reo Potiti, Beretane, Heremani e Italia. Mea au mau te oreroraa parau! Oioi tera parau i te parare. E piti po i muri a‘e, ua î atoa te piha no te tahi atu oreroraa parau! Na te aha râ i aratai i teie mau tupuraa?

I 1867, ua faarue o Sarah Bellona Ferguson e to ’na utuafare i te fenua Marite no te ora i Beresilia. I 1899, ua taa ia Sarah e ua itea ia ’na te parau mau i muri a‘e i to ’na taioraa i te tahi mau papai Bibilia ta to ’na teina i hapono mai mai Marite mai. No te mea mea au na ’na ia taio, ua ani o ’na ia hapono-noa-hia ’tu Te Pare Tiairaa reo Beretane. No to ’na oaoa rahi i te poroi Bibilia, ua papai oia ia taeae Russell ma te faataa ia ’na iho mai te “haapapuraa mau e noa ’tu te atea o te taata e putapû iho â ratou.”

E nehenehe anei te feia ora e paraparau i tei pohe? (Potiti)

Ua faaitoito noa o Sarah Ferguson i te faaite i te parau mau Bibilia ia vetahi ê. E pinepine râ o ’na i te feruri e na vai e tauturu atu â ia ’na, i to ’na utuafare e i te mau taata maitai atoa i Beresilia. I 1912, ua faaara ’tu te Betela i Brooklyn ia ’na e e haere atu te tahi atu taata i São Paulo e na tausani api parau Teihea te feia pohe? na roto i te reo Potiti. I 1915, ua parau o ’na e ua maere noa oia i te taio e i tiaturi na te Feia haapii Bibilia e rave rahi e fatata ratou i te haere i nia i te ra‘i. Ma te faaite i to ’na mana‘o, ua papai oia: “E nafea ïa i Beresilia e i Marite Apatoa? . . . Ia  hi‘o oe i te rahi o Marite Apatoa, oioi oe i te taa e mea rahi roa te ohipa ootiraa e rave.” Mea papu, mea rahi â te ohipa ootiraa e rave!

I 1920, ua haere e vau ihitai Beresilia apî i te tahi mau putuputuraa a te amuiraa i te oire no New York a tataîhia ’i to ratou pahi tama‘i. A ho‘i ai i Rio de Janeiro, ua faaite ratou i te tiaturiraa Bibilia o ta ratou i haapii mai. Aita i maoro, i Mati 1923, ua tae atu o George Young ei pererina, aore ra tiaau ratere, i Rio de Janeiro. Ua ite oia i te feia tei faaite i te anaanatae. Ua faanaho oia ia hurihia e rave rahi papai na roto i te reo Potiti. Oioi tera taeae i te haere i São Paulo, te hoê oire fatata e 600 000 taata i tera taime. Ua horoa o ’na i te oreroraa parau e ua opere i te buka iti Mirioni, mai tei faahitihia i roto i te omuaraa. I te mea e o ’na ana‘e, ua faaohipa o ’na i te vahi faataahia no te mau parau faatianianiraa i roto i te vea no te titau manihini i te taata i te mau oreroraa parau no te taatoaraa. O te mau titau-manihini-raa matamua ïa tei faaohipa i te i‘oa o te Taatiraa a te Feia haapii Bibilia nunaa rau i Beresilia.

Ua patahia te mau irava Bibilia i nia i te hoê paruai a horoa ’i te taeae Young i ta ’na mau oreroraa parau

Te na ô ra te hoê parau faataa no nia ia Beresilia i roto i Te Pare Tiairaa o te 15 no Titema 1923: “Ua haamata noa te ohipa pororaa i ǒ i te 1 no Tiunu e aita e papai i tera taime. Mea faahiahia mau râ mea nafea te Fatu i te haamaitairaa i tera ohipa.” Ia au i te parau faataa, ia taiohia na oreroraa parau e piti ta te taeae Young i horoa i São Paulo, e 21 oreroraa parau ta ’na i horoa mai te 1 no Tiunu e tae atu i te 30 no Tetepa. E 3 600 taata tei haere e faaroo ia ’na. Ua parare mǎrû atoa te poroi o te Basileia i Rio de Janeiro. I roto tau ava‘e noa, ua hau atu e 7 000 o ta tatou mau papai na roto i te reo Potiti tei operehia! Hau atu â, ua haamata Te Pare Tiairaa na roto i te reo Potiti e te vea no Novema-Titema 1923.

Sarah Bellona Ferguson, o ’na te taata matamua i Beresilia tei ani ia hapono-noa-hia ’tu ia ’na ra Te Pare Tiairaa reo Beretane

Ua haere te taeae Young e farerei ia Sarah Ferguson. Teie ta Te Pare Tiairaa e faatia ra: “Ua haere mai te tuahine i roto i te piha faafaaearaa. Aita o ’na i paraparau oioi. Ma te tapea i te rima o te taeae Young e ma te hi‘o ia ’na, ua parau o ’na: ‘E pererina mau anei oe?’” Aita i maoro, ua bapetizohia oia e te tahi o ta ’na mau tamarii. A hi‘o na, ua tiai o ’na e 25 matahiti ia bapetizohia oia! Ia au i Te Pare Tiairaa o te 1 no Atete 1924, e 50 taata tei bapetizohia i Beresilia, i Rio de Janeiro te rahiraa.

Eaha ’tura ïa no Beresilia e Marite Apatoa fatata e 90 matahiti i muri a‘e? Ua hau atu i te 760 000 Ite no Iehova te poro ra i te parau apî maitai i Beresilia. E te faaroo ra te taata na Marite Apatoa i te poroi o te Basileia na roto i te reo Potiti, Paniora e te tahi atu mau reo no ǒ. Ua tano iho â Sarah Ferguson i 1915, ‘Mea rahi roa te ohipa ootiraa tei titauhia ia rave.’—Haamana‘oraa no tahito ra no Beresilia mai.