Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Me 2014

Eaha te mea tia ia “parau atu i te taata atoa”?

Eaha te mea tia ia “parau atu i te taata atoa”?

“Ei parau mǎrû maitai ana‘e â ta outou, . . . ia ite outou i te mea tia ia parau atu i te taata atoa.”—KOL. 4:6.

1, 2. (a) A faatia na i te hi‘oraa e faaite ra i te faufaaraa ia tuu i te mau uiraa tano maitai. (A hi‘o i te hoho‘a matamua.) (b) No te aha eiaha ’i tatou e mǎta‘u i te tauaparau no nia i te mau tumu parau fifi?

A TAUAPARAU ai no nia i te Bibilia e ta ’na tane e ere i te Ite no Iehova, ua taa i te hoê tuahine e te tiaturi ra oia i te Toru tahi ma te ore paha e ite eaha ta te ekalesia e haapii ra no nia i te reira. Ma te faatura, ua ani atu to tatou tuahine: “Te tiaturi ra anei oe e e Atua te Atua, e Atua Iesu e e Atua te varua mo‘a e e ere ratou e toru Atua, hoê noa râ?” Pahono a‘era ta ’na tane ma te maere: “Aita, aita vau e tiaturi ra i te reira!” Tauaparau a‘era raua ma te au mau no nia i te Atua, o vai mau ra oia.

2 Eaha te haapiiraa e huti mai? Mea faufaa roa ia tuu i te mau uiraa tano maitai ma te faatura. Eiaha atoa tatou e mǎta‘u i te tauaparau no nia i te mau tumu parau fifi mai te Toru tahi, te po auahi aore ra te vai-mau-raa o te hoê Atua poiete. Ia turui tatou i nia ia Iehova e i te faaineineraa ta ’na e horoa maira, e nehenehe tatou e haapii i te taata ma te haaputapû i to ratou aau. (Kol. 4:6) E hi‘o ana‘e i te tahi  mau ravea no te haapii atu ma te aravihi atu â. (1) Ma te tuu i te mau uiraa ia faaite mai te taata i to ’na mana‘o. (2) Ma te haaferuri i nia i ta te mau Papai e parau ra. (3) Ma te faaohipa i te mau faahoho‘araa no te haamatara i te mana‘o.

TUU I TE MAU UIRAA IA FAAITE MAI TE TAATA I TO ’NA MANA‘O

3, 4. No te aha mea faufaa ’i ia faaohipa i te mau uiraa no te ite eaha ta te hoê taata e tiaturi ra? A faataa.

3 E tauturu mai te mau uiraa ia ite eaha ta te taata e tiaturi ra. No te aha mea faufaa ’i te reira? Te na ô ra te Maseli 18:13: “O tei parau vave mai aitâ i faaitehia ’tu, ua faaite oia e maamaa to ’na, e au ia ’na te vahavaha.” Mea faufaa ïa ia ite na mua i ta te taata e tiaturi mau ra. Ia ore, e tamata tatou i te faaite e mea hape te tahi mana‘o a taa ’tu ai e aita o ’na e tiaturi ra i te reira. E mâu‘a noa ïa te taime.—Kor. 1, 9:26.

4 Ei hi‘oraa, e tauaparau paha tatou i nia i te po auahi e te hoê taata. Te tiaturi nei vetahi e e vahi teie i reira e haamauiuihia ’i te feia ino i roto i te auahi ura. E nehenehe tatou e parau atu: “Mea taa ê to te tahi e te tahi mana‘o no nia i te po auahi, e nehenehe anei au e ite eaha to oe mana‘o?” I muri iho i te faarooraa ia ’na, e nehenehe tatou e tauturu atu ia taa i ta te Bibilia e haapii ra.

5. E nafea te mau uiraa e tauturu mai ai ia ite no te aha te hoê taata e mana‘o ai mai tera?

5 E tauturu atoa mai te mau uiraa tuuhia ma te faatura ia ite no te aha te hoê taata e mana‘o ai mai tera. Ei hi‘oraa, e nafea tatou a farerei ai i te hoê taata i roto i te pororaa o te parau e aita o ’na e tiaturi ra i te Atua? E mana‘o paha tatou e aita o ’na e tiaturi ra e ua poietehia tatou. (Sal. 10:4) Te vai nei râ te taata o te ore e tiaturi faahou ra i te Atua no te mauiui rahi ta ratou e ite ra aore ra e faaruru ra. Mea fifi no ratou ia tiaturi e e nehenehe te hoê Atua poiete î i te here e vaiiho i tera mauiui. No reira, ia parau mai te hoê taata, “Aita vau e tiaturi ra i te Atua,” e nehenehe tatou e ui atu, “Ua mana‘o noa anei oe mai tera?” Ia parau mai o ’na aita, e nehenehe e ani atu ia ’na e e ohipa anei tei tupu i feaa ’i o ’na e te vai mau ra te Atua. Maoti ta ’na pahonoraa e ite ai tatou eaha te ravea maitai a‘e no te tauturu ia ’na.—A taio i te Maseli 20:5.

6. Eaha te rave i muri iho i te tuuraa ’tu i te hoê uiraa?

6 I muri iho i te tuuraa ’tu i te hoê uiraa, mea faufaa roa ia faaroo i ta te taata pahonoraa e ia faaite atu e te faatura ra tatou i to ’na mana‘o. Ei hi‘oraa, no te tahi ati, e parau paha o ’na e aita o ’na e tiaturi roa ra e te vai ra te hoê Atua poiete î i te here. E parau ana‘e ïa ia ’na e e ere i te mea ino ia uiui no nia i te tumu tatou e mauiui ai. (Hab. 1:2, 3) E e faataa ana‘e e nafea tatou e ite ai e te vai ra iho â te Atua. Ma te faaite i te faaoromai e te here, e hinaaro paha tera taata e ite atu â. *

HAAFERURI I NIA I TA TE MAU PAPAI E PARAU RA

Eaha te tauturu mai ia aravihi atu â i roto i ta tatou taviniraa? (A hi‘o i te paratarafa 7)

7. No te aravihi atu â i roto i te taviniraa, eaha te mea tia ia rave tatou?

7 O te Bibilia ta tatou mauhaa faufaa roa ’‘e i roto i te taviniraa. E tauturu mai te reira ia ‘ineine maitai no te rave i te mau ohipa maitatai atoa.’ (Tim. 2, 3:16, 17, Te Faufaa Api) No te aravihi atu â i  roto i te taviniraa, eiaha tatou e taio noa ’tu e rave rahi irava. E haaferuri ana‘e râ i te taata i nia i te mau irava a faataa ’tu ai i te reira. (A taio i te Ohipa 17:2, 3.) E rave ana‘e e toru tupuraa.

8, 9. (a) Eaha te tahi ravea no te haaferuri i te hoê taata o te tiaturi ra e mea aifaito Iesu e te Atua? (b) Mea nafea oe i te haaferuriraa i te taata i nia i teie tumu parau?

8 Tupuraa 1: A poro ai, e farerei tatou i te hoê taata o te tiaturi ra e mea aifaito Iesu e te Atua. Eaha te irava e faaohipa no te haaferuri i tera taata? E nehenehe tatou e ani ia ’na ia taio mai i ta Iesu mau parau i roto i te Ioane 6:38: “I pou mai nei hoi au mai te ra‘i mai e haapao i to tei tono mai ia ’u nei hinaaro, eiaha to ’u iho hinaaro.” Ia oti, e ui ana‘e ia ’na: “Mai te peu e o Iesu te Atua, o vai tei tono mai ia ’na mai te ra‘i mai? E ere anei Tei tono ia Iesu i te mea rahi a‘e ia ’na? Inaha, o te taata o te tono i te tahi atu te mea rahi a‘e, e ere anei?”

9 E nehenehe atoa e taio i te Philipi 2:9 i reira te aposetolo Paulo e faataa ’i i ta te Atua i rave i muri a‘e i te poheraa e te tia-faahou-raa o Iesu. Te na ô ra te irava e ua ‘faateitei roa te Atua ia Iesu e ua horoa i te i‘oa i hau ê roa i te mau i‘oa atoa nei no ’na.’ No te haaferuri i te taata i nia i tera irava, e nehenehe e ui atu: “Mai te peu e mea aifaito Iesu e te Atua hou to ’na poheraa, e i muri a‘e ua faateitei roa te Atua ia ’na, tei nia ’‘e ïa Iesu i te Atua? Tera râ, e nafea te hoê e nehenehe ai e riro ei mea rahi a‘e i te Atua?” Maoti tera huru haaferuriraa, e hinaaro paha te taata aau haavare ore o te faatura ra i te Parau a te Atua e ite atu â.—Ohi. 17:11.

10. (a) E nafea tatou e nehenehe ai e haaferuri i te hoê taata e tiaturi ra i te po auahi? (b) Mea nafea oe i te haaferuriraa i te taata i nia i teie tumu parau?

10 Tupuraa 2: Mea fifi no te hoê taata ia tiaturi e eita te feia ino e haamauiuihia e a muri noa ’tu i roto i te po auahi. Te tiaturi ra paha o ’na i te po auahi no te mea te hinaaro ra oia ia faautuahia te feia ino no ta ratou i rave. E nafea ïa ia haaferuri ia ’na? E haapapu ana‘e na mua e e faautuahia iho â te feia ino. (Tes. 2, 1:9) Ia oti, e faataio ana‘e ia ’na te Genese 2:16, 17 o te faaite ra e o te pohe te utua o te hara. E faataa ana‘e e no te hara a Adamu, e taata hara tatou pauroa. (Roma 5:12) E parau atoa paha tatou e aita roa te Atua i faahiti i te hoê faautuaraa i roto i te po auahi. I reira, e  nehenehe e taio i te Genese 3:19. I roto i tera irava, ua parau te Atua ia Adamu e e ho‘i o ’na i te repo no te hara ta ’na i rave. E nehenehe tatou e ui ia ’na: “Mea tano anei ia parau te Atua ia Adamu e e ho‘i o ’na i te repo mai te peu e e haere o ’na i roto i te po auahi?” E tauturu tera huru uiraa i te taata aau haavare ore ia feruri i nia i te reira.

11. (a) Eaha te tahi ravea no te haaferuri i te hoê taata e tiaturi ra e e ora noâ te varua o te hoê taata pohe? (b) Mea nafea oe i te haaferuriraa i te taata i nia i teie tumu parau?

11 Tupuraa 3: A poro ai, e farerei tatou i te hoê taata e tiaturi ra e e ora noâ te varua o te hoê taata pohe. E ohipa tera mana‘o i nia i to ’na maramaramaraa i te Bibilia. Ei hi‘oraa, ia hi‘opoa tatou i te Salamo 146:4, e mana‘o paha tera taata e te faataa ra teie irava i te tiaturiraa o te hoê varua pohe ore. (A taio.) E nafea ïa e haaferuri ai ia ’na? Eiaha e rave i te tahi atu irava, e huti ana‘e râ i te ara-maite-raa i nia i te pereota o te Salamo 146:4 o te parau ra e “mou roa ’tura ta ’na i opua.” E e ui ana‘e: “Mai te peu e mea pohe ore te varua, eita ta ’na mau opuaraa e to ’na mau mana‘o e mou, e ere anei?” E pahono mai iho â o ’na e e. E parau atu ïa tatou e mai te peu e e mou ta ’na mau opuaraa e to ’na mau mana‘o, e haapapu te reira e eita te varua e ora noa a pohe ai tera taata. Eaha ïa te varua i faahitihia i ǒ nei? O te puai ora o te hoê taata.—Gen. 2:7.

FAAOHIPA I TE MAU FAAHOHO‘ARAA NO TE HAAMATARA I TE MANA‘O

12. No te aha Iesu i faaohipa ’i i te mau faahoho‘araa?

12 Ua faaohipa Iesu i te mau parabole, aore ra faahoho‘araa, a poro ai. (A taio i te Mataio 13:34, 35.) Ua tauturu teie mau faahoho‘araa ia faaite e e aau haavare ore anei to te taata e faaroo ra ia ’na e te hinaaro mau ra anei ratou e tavini ia Iehova. (Mat. 13:10-15) Ua faaohipa atoa Iesu i te mau faahoho‘araa ia haamana‘o e ia au mai te taata i ta ’na i haapii atu. E nafea e faaohipa ’i i te mau faahoho‘araa a poro ai?

13. Eaha te faahoho‘araa ta oe e nehenehe e faaohipa no te haapii atu e mea rahi a‘e te Atua ia Iesu?

13 Mea maitai a‘e ia faaohipa i te mau faahoho‘araa ohie ia taa. Ei hi‘oraa, ia hinaaro tatou e haapii atu e mea rahi a‘e te Atua ia Iesu, e tamata ana‘e i teie faahoho‘araa: A tahi, e faahiti ana‘e e ua faaau te Atua e o Iesu atoa i to raua taairaa i to te hoê Metua e te hoê Tamaiti. (Luka 3:21, 22; Ioa. 14:28) I muri iho, e ui ana‘e: “I teie nei, eaha te taairaa utuafare ta oe e faaohipa no te faaite e mea aifaito e piti taata?” E rave mai paha o ’na i te hi‘oraa o te mau taeae aore ra te mau maehaa. E na ô atu ïa tatou: “Mea maitai tera faahoho‘araa, mea ohie roa ia taa. No te aha ïa Iesu, te Orometua rahi, i ore ai i faaohipa i te hoê â faahoho‘araa? Ua parau râ o ’na e e Metua te Atua no ’na. Ma te na reira, ua faaite Iesu e mea paari a‘e e mea puai a‘e te Atua ia ’na.”

14. Eaha te faahoho‘araa e faaite ra e eita te Atua e faaohipa i te Diabolo no te haamauiui i te taata i roto i te po auahi?

14 Teie te tahi atu hi‘oraa. Te tiaturi ra vetahi e te faaohipa ra te Atua ia Satani no te haamauiui i te taata i roto i te po auahi. E nafea e tauturu ai i te hoê metua ia ite e mea tano ore tera mana‘o? E ui ana‘e: “Eaha ta oe e rave ia riro ta oe tamarii ei tamarii faaroo ore e ia rave  noa o ’na i te ohipa ino?” E parau mai iho â te metua e e tama‘i e e tauturu noa o ’na ia ’na ia faaea i te rave i te mea ino. (Mas. 22:15) E nehenehe ïa tatou e ui atu: “E ia ite oe e na te hoê taata ino e turai ra ia ’na ia na reira?” E riri iho â tera metua i tera taata. I reira ïa tatou e haamatara ’i i te mana‘o ma te ui atu: “A ite ai e e taata ino te turai ra i ta oe tamarii ia rave i te mau mea ino, e ani anei oe i tera taata ia haamauiui i ta oe tamarii?” E pahono mai iho â o ’na eita. O Satani te turai ra i te taata ia rave i te mau mea ino. Eita ïa te Atua e faaohipa ia Satani no te haamauiui ia ratou.

E VAI FAITO NOA

15, 16. (a) No te aha eiaha ’i e maere e eita te taata atoa e farii i te poroi o te Basileia? (b) E titauhia anei ia riro ei taata haapii faahiahia no te haapii atu ma te aravihi? A faataa. (A hi‘o atoa i te tumu parau tarenihia “ Tauturu no te ite eaha te parau.”)

15 Noa ’tu e e tuu tatou i te mau uiraa tano maitai, e haaferuri atu ma te au e e faaohipa i te mau faahoho‘araa maitai, e ere te taata atoa te farii i te poroi o te Basileia. (Mat. 10:11-14) Tau taata noa tei farii i ta Iesu mau haapiiraa noa ’tu e o ’na te Orometua rahi roa ’‘e i ora a‘enei i nia i te fenua!—Ioa. 6:66; 7:45-48.

16 Noa ’tu e e ere tatou i te taata haapii faahiahia, peneia‘e mea aravihi tatou i roto i te pororaa. (A taio i te Ohipa 4:13.) Te haapapu maira te Bibilia e e farii “te feia i haapaohia no te ora mure ore” i te parau apî maitai. (Ohi. 13:48) Ia vai faito noa ïa tatou. E mea tia ia faaitoito tatou i te haapii maitai a‘e i te taata. Eiaha râ tatou ia haaparuparu ia ore ratou e farii i te parau apî maitai. Ma te turui i nia ia Iehova e i te faaineineraa ta ’na e horoa maira, e riro tatou ei taata o te haapii maitai a‘e i te tahi atu. E faufaahia tatou e te feia atoa e faaroo mai. (Tim. 1, 4:16) E nehenehe Iehova e tauturu mai ia ‘ite i te mea tia ia parau atu i te taata atoa.’ I to muri nei tumu parau, e haapii mai tatou e nafea ia aravihi atu â i roto i ta tatou taviniraa ma te pee i tei parauhia te Ture auro.

^ par. 6 A hi‘o i Te Pare Tiairaa reo Farani o te 1 no Atopa 2009, “Est-il possible de devenir croyant?”