Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) MATI 2014

E nafea ia faaite noa i te mana‘o haapae?

E nafea ia faaite noa i te mana‘o haapae?

“O te taata i hinaaro i te pee mai ia ’u, e faarue oia ia ’na iho.”—MAT. 16:24.

1. Mea nafea Iesu i te faaiteraa i te hoê hi‘oraa tia roa o te mana‘o haapae?

A ORA ’I Iesu i te fenua, ua faaite oia i te hoê hi‘oraa tia roa o te mana‘o haapae. Ua tuu noa oia i te hiti i to ’na iho mau hinaaro e maitai no te rave i to te Atua hinaaro. (Ioa. 5:30) Ma te vai taiva ore e tae roa ’tu i te pohe i nia i te pou haamauiuiraa, ua faaite noa o ’na e aita e otia to to ’na mana‘o haapae.—Phil. 2:8.

2. E nafea tatou e faaite ai i te mana‘o haapae, e no te aha e na reira ’i?

2 Ei pǐpǐ a Iesu, e mea tia ia faaite atoa tatou i te hoê mana‘o haapae. Eaha te reira? O te tuuraa ïa i te hiti i to tatou iho mau hinaaro no te tauturu ia vetahi ê. Mea taa ê roa te reira i te miimii. (Mat. 16:24) E tauturu mai te mana‘o miimii ore ia haapao na mua i to vetahi ê mau mana‘o e hinaaro. (Phil. 2:3, 4) Ua haapii o Iesu e mea faufaa roa te hoê mana‘o haapae i roto i ta tatou haamoriraa. E itehia hoi te mau pǐpǐ mau a Iesu i to ratou here o te turai atoa ra ia ratou ia rave i te mau haapaeraa. (Ioa. 13:34, 35) A haamana‘o atoa na i te mau haamaitairaa ta tatou e fana‘o ra ei melo o te fetii taeae i te ao nei o te faaite ra i te mana‘o haapae!

3. Na te aha e haafifi ia tatou ia faaite i te mana‘o haapae?

 3 Te vai ra te hoê enemi o te haafifi mǎrû noa ra ia tatou ia faaite i te mana‘o haapae. Tera enemi, o to tatou ïa mau hinaaro miimii. A haamana‘o na ia Adamu raua Eva. Ua faaite Eva i te hinaaro miimii e riro mai mai te Atua ra te huru e ta ’na tane i te hinaaro miimii e faaoaoa ia Eva. (Gen. 3:5, 6) I muri iho i te haafariu-ê-raa ia Adamu e o Eva i te haamoriraa mau, ua tamau noa te Diabolo i te turai i te taata ia faaite i te miimii. Ua na reira atoa oia a tamata ’i ia Iesu. (Mat. 4:1-9) I teie mahana, ua tia ia Satani ia turai i te taata e rave rahi ia faaite i te miimii. E haapao maitai ana‘e, e nehenehe hoi tatou e peehia i tera huru feruriraa.—Eph. 2:2.

4. (a) E nehenehe anei tatou e faaore i teie nei â i te mau hinaaro miimii? A faataa. (b) Eaha te mau uiraa te hi‘opoahia?

4 E nehenehe te miimii e faaauhia i te tutae auri. E nehenehe te hoê auri vaiiho-noa-hia mai tera e haamata i te tutae auri mai. Mea atâta te reira ia ore tatou e haapao, e nehenehe hoi te tutae auri e haapau e e faaino roa i te hoê paturaa tei hamanihia e te auri. No tatou atoa, eita ta tatou e nehenehe e faaore i teie nei â i to tatou huru taata tia ore e te mau hinaaro miimii. E mea tia râ ia vai ara tatou i te mau fifi ta te reira e faatupu e ia tamau i te aro i tera mau hinaaro. (Kor. 1, 9:26, 27) E nafea ia ite e te faaite ra tatou i te tahi huru miimii? E e nafea ia faaite atu â i te mana‘o haapae?

A FAAOHIPA I TE BIBILIA NO TE HI‘OPOA IA OE

5. (a) No te aha e au ai te Bibilia i te hoê hi‘o? (A hi‘o i te hoho‘a matamua.) (b) Eaha ta tatou e ore e rave a hi‘opoa ’i ia tatou iho?

5 Mai te hoê hi‘o ta tatou e faaohipa no te hi‘opoa i to tatou huru rapaeau, e nehenehe atoa tatou e faaohipa i te Bibilia no te hi‘opoa i to tatou aau e no te faaafaro i te tahi huru au ore. (A taio i te Iakobo 1:22-25.) E tauturu noa mai râ te hoê hi‘o ia haamaitai i to tatou huru rapaeau ia faaohipa maitai tatou i te reira. Ei hi‘oraa, ia hi‘o oioi tatou ia tatou i roto i te hoê hi‘o, eita paha tatou e haapao i te tahi repo iti ite-maitai-hia. Aore ra ia hi‘o tatou na te hiti atu, e ite paha tatou i te hoho‘a o te tahi atu taata. Oia atoa, no te faaohipa i te Bibilia no te ite i te tahi huru au ore mai te miimii, eiaha tatou e taio haavitiviti noa i te Bibilia aore ra e faaohipa i te reira no te ite i ta te tahi atu mau hape.

6. E nafea tatou e “tamau maite” ai i roto i te ture tia roa?

6 A feruri na, e nehenehe tatou e tamau i te taio i te Parau a te Atua, peneia‘e i te mau mahana atoa, e e ore â e ite e te faaite ra tatou i te tahi huru miimii. E nafea ïa? A feruri na. Ia au i ta Iakobo hi‘oraa o te hi‘o, e ere te fifi i te oreraa te taata e hi‘o maitai. Ua papai o Iakobo e ‘te hi‘o ra tera taata ia ’na iho.’ I ǒ nei, ua faaohipa Iakobo i te hoê ta‘o Heleni o hi‘opoa aore ra haapao maitai te auraa. Eaha ïa te fifi? Ua na ô â Iakobo: “E haere atura [oia], aramoe [aore ra moe] noa ihora to ’na huru ia ’na iho i reira.” Ua haere o ’na ma te ore e tâu‘a i ta ’na i ite. No te taata ra e manuïa, eita noa o ’na e ‘hi‘o i roto i te ture tia roa,’ e “tamau maite” râ o ’na i te na reira. Eita oia e vaiiho i te ture tia roa o te Parau a te Atua i muri, e pee râ oia i tera mau haapiiraa. Hoê â mana‘o atoa to Iesu i to ’na parauraa: “Ia mau maite outou i ta ’u parau, e pǐpǐ mau ia outou na ’u i reira.”—Ioa. 8:31.

7. E nafea tatou e faaohipa ’i i te Bibilia no te ite e te faaite rii ra tatou i te miimii?

7 No te ite e te faaite rii ra anei oe i te miimii, e mea tia ia taio maite na mua i te  Parau a te Atua. E tauturu te reira ia oe ia ite eaha te mau tuhaa e haapao. A rave atoa râ i te mau maimiraa no te faahohonu atu â. Mea papu ana‘e te hoê aamu Bibilia i roto i to oe feruriraa, a uiui: ‘E nafea vau i roto i tera tupuraa? E haa anei au ma te tia?’ Te mea faufaa roa ’tu â, i muri a‘e i te feruri-maite-raa i ta oe i taio, a tutava i te faaohipa i te reira. (Mat. 7:24, 25) E hi‘o ana‘e e nafea e nehenehe ai e faaohipa i te mau aamu o te arii Saula e te aposetolo Petero no te tauturu ia tatou ia faaite noa i te hoê mana‘o haapae.

A HAAPII MAI I TE HI‘ORAA O TE ARII SAULA

8. Mai te aha te huru o Saula a arii mai ai oia, e mea nafea oia i te faaiteraa i te reira?

8 E nehenehe te miimii e tinai i te mana‘o haapae. Ta te hi‘oraa ïa o te arii o Iseraela ra o Saula e faaite ra. A arii mai ai o Saula, mea haehaa oia. (Sam. 1, 9:21) Aita oia i hinaaro e faautua i te mau Iseraela o tei vahavaha i ta ’na faatereraa. E nehenehe ta ’na e paturu i to ’na tiaraa no ǒ mai i te Atua ra, aita râ o ’na i na reira. (Sam. 1, 10:27) Ua farii te arii Saula i te aratairaa a te varua o te Atua ma te aro atu i te mau ati Amona a upootia ’tu ai. I muri a‘e, ua horoa oia ma te haehaa i te hanahana o te re ia Iehova.—Sam. 1, 11:6, 11-13.

9. Mea nafea Saula i te faatupuraa i te mana‘o miimii?

9 I muri iho, ua vaiiho o Saula i te mana‘o miimii e te teoteo ia rahi mai mai te tutae auri. A upootia ’i oia i nia i te ati Amona, ua haapao na mua o ’na i to ’na iho mau hinaaro eiaha râ to Iehova. Aita o Saula i faaore i te tao‘a mai ta te Atua i faaue atu, ua nounou râ i te reira. E ma te teoteo, ua faatia o Saula i te hoê tapao no ’na iho. (Sam. 1, 15:3, 9, 12) I to te peropheta Samuela parauraa ia ’na e ua riri o Iehova, tamata a‘era o Saula i te imi i te otoheraa ma te faahiti i te faaueraa a te Atua ta ’na i auraro e ma te pari ia vetahi ê no ta ’na hape. (Sam. 1, 15:16-21) No to ’na teoteo, mea faufaa a‘e no Saula to ’na roo i te faaoaoaraa i te Atua. (Sam. 1, 15:30) E nafea e faaohipa ’i i te hi‘oraa o Saula mai te hoê hi‘o no te tauturu ia tatou ia faaite noa i te hoê mana‘o haapae?

10, 11. (a) Eaha ta te hi‘oraa o Saula e haapii mai no nia i te faaite-noa-raa i te hoê mana‘o haapae? (b) E nafea ia ore e pee i te hi‘oraa ino o Saula?

10 Eaha te haapii mai i te hi‘oraa o Saula? A tahi, e ere no te mea i faaite na tatou i te hoê mana‘o haapae e e na reira noa iho â tatou. (Tim. 1, 4:10) A haamana‘o e ua rave Saula i te mea maitai e ua fana‘o oia i te farii maitai a te Atua. Ua tinai râ oia i to ’na mau hinaaro miimii o tei rahi roa mai. I te pae hopea, aita Iehova i farii faahou ia Saula no to ’na faaroo ore.

11 Te piti, eiaha tatou e haapao noa i te mau mea ta tatou e rave maitai ra a tâu‘a ore atu ai i te mau tuhaa te titauhia ia haamaitai. Mai te huru ra ïa e e te hipahipa nei tatou i to tatou ahu apî i mua i te hi‘o ma te ore e haapao i te repo i nia to tatou hoho‘a. Eita paha tatou e riro roa mai mai ia Saula. E mea tia râ ia tutava tatou i te tinai i te tahi noa ’tu hinaaro e pee ai tatou i te hoê â haerea ino. Ia farii tatou i te a‘oraa, eiaha e imi i te otoheraa, e mana‘o e e ere i te hapa rahi aore ra e faahape i te tahi atu. Mea maitai a‘e râ ia pee i te a‘oraa, i te riroraa mai ia Saula.—A taio i te Salamo 141:5.

12. E nafea te mana‘o haapae e tauturu mai ai mai te peu e ua rave tatou i te hoê hara ino mau?

12 Eaha râ ia rave tatou i te hoê hara ino mau? Ua haafaufaa noa o Saula i to ’na roo, aita râ o ’na i tâu‘a i to ’na maitai pae varua. I te tahi a‘e pae, maoti te mana‘o  haapae, eita tatou e haama i te ani i te tauturu hinaarohia. (Mas. 28:13; Iak. 5:14-16) Ei hi‘oraa, i te 12raa o to ’na matahiti, ua haamata te hoê taeae i te mataitai i te hoho‘a faufau. E ua hi‘o huna noa o ’na i te reira hau atu i te ahuru matahiti i te maoro. Te na ô ra oia: “Mea fifi roa no ’u ia fa‘i i ta ’u vahine e i te mau matahiapo i te ohipa o ta ’u i rave noa na. I teie nei ua fa‘i au i te reira, ua mâmâ roa mai au. Ua inoino te tahi o to ’u mau hoa a tatarahia ’i to ’u tiaraa ei tavini tauturu, mai te huru ra e ua haavare au ia ratou. Tera râ, ua ite au e ua oaoa ’tu â Iehova i ta ’u taviniraa i teie nei i te taime a mataitai noa ’i au i te hoho‘a faufau. O to ’na mana‘o te mea faufaa a‘e.”

UA ARO PETERO I TE MAU HINAARO MIIMII

13, 14. Mea nafea Petero i te faaiteraa i te mau hinaaro miimii?

13 Ua faaite te aposetolo Petero i te hoê mana‘o haapae a haapiihia ’i oia e Iesu. (Luka 5:3-11) Tera râ, e mea tia ia aro oia i to ’na mau hinaaro miimii. Ei hi‘oraa, ua riri oia i to te aposetolo Iakobo e Ioane hinaaroraa i te hoê tiaraa i pihaiiho ia Iesu i roto i te Basileia o te Atua. Ua mana‘o paha o Petero e no ’na tera mau parahiraa, ua parau a‘ena hoi Iesu e e hopoia taa ê ta ’na. (Mat. 16:18, 19) Noa ’tu râ, ua faaara o Iesu ia Iakobo raua Ioane, oia atoa ia Petero e te toea o te mau aposetolo, i te hinaaro miimii e “faahepo” i to ratou mau taeae.—Mar. 10:35-45.

14 Aita râ te aroraa a Petero i oti a tamata ’i Iesu i te faaafaro i to ’na huru feruriraa. I muri a‘e, ua parau Iesu i ta ’na mau aposetolo e e faarue ratou ia ’na no te hoê taime poto. Ua faahaehaa a‘era o Petero i te tahi atu e ua faateitei oia ia ’na iho ma te haapapu e o ’na ana‘e te vai taiva ore. (Mat. 26:31-33) Ua tiaturi oia ia ’na iho. Ua hape mau. I tera noa iho â po, aita oia i faaite i te hoê mana‘o haapae. No te paruru ia ’na iho, ua huna Petero ia Iesu e toru taime.—Mat. 26:69-75.

15. No te aha e hi‘oraa faaitoito mau ai te oraraa o Petero?

 15 Noa ’tu tera mau fifi e hape, e hi‘oraa faaitoito mau te oraraa o Petero. Maoti ta ’na mau tutavaraa e te tauturu a te varua mo‘a a te Atua, ua tia ia Petero ia taui i tera huru to ’na e ia faaite i te hitahita ore e te here haapae. (Gal. 5:22, 23) Ua faaruru o ’na i te mau tamataraa u‘ana a‘e i ta ’na i hema i na mua ’‘e. Ua faaite o ’na i te haehaa a a‘o ai te aposetolo Paulo ia ’na i mua i te taata. (Gal. 2:11-14) Aita Petero i inoino e i mana‘o e ua ino roa to ’na roo i te a‘oraa ’tu Paulo ia ’na. Ua faaite noa Petero i to ’na here ia Paulo. (Pet. 2, 3:15) E tauturu mai te hi‘oraa o Petero ia tatou ia faaite noa i te hoê mana‘o haapae.

Ua aha o Petero a a‘ohia ’i oia? E na reira atoa anei tatou? (A hi‘o i te paratarafa 15)

16. E nafea ia faaite i te mana‘o haapae i roto i te mau tupuraa fifi?

16 A feruri na e nafea oe i roto i te mau tupuraa fifi. Ua oaoa Petero e te mau aposetolo a tapeahia ’i e a huihia ’i ratou no ta ratou pororaa. ‘Ua mana‘ohia hoi e e au ia ratou te hamani-ino-raa no to Iesu i‘oa.’ (Ohi. 5:41) E nehenehe atoa oe e hi‘o i te hamani-ino-raa ei ravea no te pee i te hi‘oraa o Iesu e o Petero ma te faaite i te mana‘o haapae. (A taio i te Petero 1, 2:20, 21.) E tauturu atoa tera huru feruriraa ia oe ia a‘o te mau matahiapo ia oe. A pee i te hi‘oraa o Petero, eiaha e riri.—Koh. 7:9.

17, 18. (a) Eaha paha te ui no nia i ta tatou mau fa pae varua? (b) Eaha te rave ia ite tatou e te vai ra te tahi miimii i roto i to tatou aau?

17 E faufaa-atoa-hia oe i te hi‘oraa o Petero a feruri ai i te mau fa pae varua. E nehenehe atoa oe e faaite i te hoê mana‘o haapae i roto i tera tuhaa. A vai ara râ eiaha te reira ia riro ei ravea no te imi i te tiaraa. A uiui ïa: ‘No te aha vau e hinaaro ai e tavini atu â ia Iehova? Ia itehia mai au? Ia noaa mai te tahi tiaraa, mai ia Iakobo e Ioane a ani ai raua i te tiaraa ia Iesu?’

18 Ia ite oe e te vai ra te tahi miimii i roto i to aau, a ani i ta Iehova tauturu no te faaafaro i to oe huru feruriraa e huru aau. E a tutava i te haapao na mua i to Iehova hanahana eiaha râ to oe. (Sal. 86:11) E tapi atoa i te mau fa o te ore e huti i te ara-maite-raa i nia ia oe. Ei hi‘oraa, e nehenehe oe e faaite atu â i te tahi mau huru maitatai ta te varua e faatupu o ta oe e mana‘o e mea fifi no oe. E mai te peu e te faaineine maitai ra oe i ta oe mau putuputuraa ma te ore râ e tâu‘a i te atuaturaa i te Piha a te Basileia, e nehenehe oe e haamau ei fa e faaohipa i te a‘oraa i roto i te Roma 12:16.—A taio.

19. Eaha te rave no te ore e paruparu no ta tatou e ite i roto i te hi‘o o te Parau a te Atua?

19 A hi‘o maitai ai ia oe iho i roto i te hi‘o o te Parau a te Atua, e ite paha oe i te tahi mau huru au ore mai te miimii. E nehenehe oe e paruparu. A feruri ïa i te hi‘oraa a Iakobo no nia i te taata tei manuïa. Aita o Iakobo i faataa e ua faaafaro oioi anei tera taata i te mau fifi ta ’na i ite aore ra ua nehenehe anei ta ’na e faaafaro i te mau hape atoa. Ua parau râ o Iakobo e te ‘hi‘o ra te taata i roto i te ture ma te tamau maite.’ (Iak. 1:25) Ua haamana‘o oia eaha ta ’na i ite i roto i te hi‘o e ua tutava noa oia i te haamaitai ia ’na iho. Eiaha e haafaufaa ore ia oe e a tapea i te hoê mana‘o tano noa no nia i to oe mau huru tia ore. (A taio i te Koheleta 7:20.) A tamau i te hi‘o i roto i te ture tia roa e a faaitoito i te faaite noa i te hoê mana‘o haapae. Te hinaaro ra Iehova e tauturu ia oe mai ta ’na i na reira i nia i to oe mau taeae e mea tia ore atoa hoi ratou, ia nehenehe atoa ratou e fana‘o i ta te Atua farii maitai e haamaitairaa.