Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2014

A oaoa i te faaipoiporaa o te Arenio!

A oaoa i te faaipoiporaa o te Arenio!

“E oaoa tatou, e ia rahi atu â te oaoa, . . . ua tae hoi i te faaipoiporaa a te Arenio.”—APO. 19:7.

1, 2. (a) To vai faaipoiporaa te faatupu i te oaoa rahi i te ra‘i? (b) Eaha te mau uiraa e hi‘opoahia?

E TITAUHIA te taime no te faaineine i te hoê faaipoiporaa. E hi‘opoa mai râ tatou i te hoê faaipoiporaa taa ê mau, to te hoê Arii. A fatata e 2 000 matahiti te reira i te faaineine-noa-raahia. Te piri roa maira te taime e tahoêhia ’i te tane faaipoipo i ta ’na vahine. Fatata te upaupa oaoa mau i te ta‘i i roto i te aorai o te Arii e te mau reo i te ra‘i i te himene: “Haleluia: tei te Fatu ra tei te Atua Puai hope ra te hau. E oaoa tatou, e ia rahi atu â te oaoa, e e haamaitai hoi ia ’na: ua tae hoi i te faaipoiporaa a te Arenio, e ua faanehenehe ta ’na vahine ia ’na iho.”—Apo. 19:6, 7.

2 E oaoa rahi te itehia i te ra‘i a faaipoipo ai “te Arenio,” oia hoi o Iesu Mesia. (Ioa. 1:29) Eaha to ’na ahu no te faaipoiporaa? O vai ta ’na vahine? Mea nafea o ’na i te faaineineraahia no te faaipoiporaa? Afea te reira e tupu ai? E oaoa to te ra‘i i tera faaipoiporaa. E oaoa atoa anei râ te feia e tiaturi ra e ora e a muri noa ’tu i nia i te fenua? A tiai ru ai i te pahonoraa, e hi‘opoa ana‘e i teie mau uiraa ma te hi‘opoa â i te Salamo 45.

 MEA NO‘ANO‘A TO ’NA AHU

3, 4. (a) Eaha tei parauhia no nia i te ahu o te Tane faaipoipo, e eaha te faaoaoa ’tu â ia ’na? (b) O vai ‘te mau tamahine no te hui arii’ e “te arii vahine” o te oaoa atoa ra e te Tane faaipoipo?

3 A taio i te Salamo 45:8, 9. E oomo te Tane faaipoipo, Iesu Mesia, i to ’na ahu faaipoiporaa hanahana e au i te hoê arii. E hau‘ahia i nia i to ’na ahu te “mea no‘ano‘a i hau ê,” mai te mura e te kade. I Iseraela, i ravehia na na mea e piti no te hamani i te mono‘i mo‘a faatahinuraa.—Exo. 30:23-25.

4 A piri mai ai to ’na faaipoiporaa, e oaoa ’tu â te Tane faaipoipo no te upaupa i te ra‘i e ta‘i ra i roto i to ’na aorai. E oaoa atoa “te arii vahine,” oia hoi te tuhaa i te ra‘i o te faanahonahoraa a te Atua. Tei roto atoa ‘te mau tamahine no te hui arii,’ oia hoi te mau melahi mo‘a. Mea faahiahia mau ia faaroo i te mau reo i te ra‘i ia parau: “E oaoa tatou, e ia rahi atu â te oaoa, . . . ua tae hoi i te faaipoiporaa a te Arenio.”

TE FAAINEINEHIA RA TE VAHINE FAAIPOIPO

5. O vai “te vahine a te Arenio”?

5 A taio i te Salamo 45:10, 11. * Ua ite tatou o vai te Tane faaipoipo. Teie râ, o vai ta ’na vahine? Te faahoho‘a ra o ’na i te pǔpǔ o na 144 000 Kerisetiano faatavaihia. O Iesu Mesia te upoo o teie amuiraa faatavaihia. (A taio i te Ephesia 5:23, 24.) E faatere atoa ratou i roto i te Basileia Mesia. (Luka 12:32) “E pee” teie mau Kerisetiano faatavaihia i te varua “i te Arenio i to ’na atoa ra mau haerea.” (Apo. 14:1-4) E riro ratou ei “vahine a te Arenio” e e ora ratou ia ’na ra i to ’na nohoraa i te ra‘i.—Apo. 21:9; Ioa. 14:2, 3.

6. No te aha tei faatavaihia i faahitihia ’i mai “te tamahine a te arii,” e no te aha i parauhia ’i ia ratou ia ‘haamoe i to ratou mau taata’?

6 Ua faahitihia te vahine faaipoipo mai “tera ra tamahine,” oia atoa râ mai “te tamahine a te arii.” (Sal. 45:13) O vai tera “arii”? Ua faariro Iehova i te mau Kerisetiano faatavaihia ei “tamarii” na ’na. (Roma 8:15-17) I te mea e e riro ratou ei vahine faaipoipo i te ra‘i, ua parauhia i tei faatavaihia ia ‘haamoe i to ratou mau taata e te utuafare o to ratou metua.’ E mea tia ia haamau ratou i to ratou aau “i te mau mea i nia ra, eiaha i to teie nei ao.”—Kol. 3:1-4.

7. (a) Mea nafea te Mesia i te faaineineraa i te vahine ta ’na e faaipoipo atu? (b) E nafea te vahine e hi‘o ai i te tane ta ’na e faaipoipo atu?

7 I te roaraa o te tau, ua faaineine te Mesia i te vahine ta ’na e faaipoipo atu i te ra‘i. Ua faataa te aposetolo Paulo e ua aroha te Mesia “i te ekalesia [aore ra amuiraa], e ua horoa ia ’na iho ei taui. Ia haamaitai e ia tamâ oia ia ’na, i te horoiraa pape, e te parau i a‘ohia ra, ia tuu oia ia ’na i mua i tana aro, ei ekalesia hinuhinu, ma te porao ore, e te miomio ore, e te mau mea atoa mai te reira te huru: ia mo‘a râ, e te ino ore.” (Eph. 5:25-27) Ua parau Paulo i te mau Kerisetiano faatavaihia i Korinetia i tahito: “Te mana‘ona‘o nei au ia outou i te mana‘ona‘o Atua; ua momo‘ahia outou e au i te tane hoê, ia pûpû atu vau ia outou ei paretenia viivii ore i te Mesia ra.” (Kor. 2, 11:2) Te au nei te Arii ra o Iesu Mesia i te “maitai,” aore ra nehenehe, pae varua o te vahine ta ’na e faaipoipo atu. E te farii nei te vahine faaipoipo ia ’na mai to ’na fatu e te tipapa nei i mua ia ’na mai ta ’na tane.

E ‘ARATAIHIA TE VAHINE I TE ARII RA’

8. No te aha mea tano ai ia faataa i te vahine faaipoipo ei mea nehenehe mau?

8 A taio i te Salamo 45:13, 14. Te faaitehia ra e mea nehenehe mau te vahine  no to ’na faaipoiporaa e te Arii. I roto i te Apokalupo 21:2, ua faaauhia te vahine faaipoipo i te hoê oire anaana mau, Ierusalema apî, e ua ‘faanehenehehia o ’na no ta ’na tane.’ ‘No ǒ mai to ’na anaana i te Atua ra’ e ua au te reira i “te ofai maitai roa ra, mai te ofai isepe ateate mai te kerehe ra.” (Apo. 21:10, 11) Te faataa ra te buka o te Apokalupo ma te faahiahia i te nehenehe o Ierusalema apî. (Apo. 21:18-21) No reira iho â ïa te fatu salamo e faataa ’i e mea nehenehe mau te vahine faaipoipo! Inaha, te tupu ra te faaipoiporaa o te Arii i nia i te ra‘i.

9. E arataihia te vahine faaipoipo i teihea arii, e eaha te ahu ta ’na e oomo?

9 E arataihia te vahine i ta ’na ra Tane faaipoipo, oia hoi te Arii Mesia. Ua faaineine te Arii i ta ’na vahine ma te ‘tamâ ia ’na i te pape maoti te parau i a‘ohia.’ Mea “mo‘a” te vahine faaipoipo e “te ino ore.” (Eph. 5:26, 27) E mea tia ia oomo atoa ta ’na vahine i te ahu e tano no tera tupuraa. O ta ’na iho â i rave! Inaha, “ua faaunaunahia to ’na ahu i te auro” e “e arataihia oia i te arii ra ma te ahu unauna rahi.” No te faaipoiporaa o te Arenio, ua horoahia i te vahine “te ahu hua teatea e te anaana: e taua ahu hua ra, o te parau-tia ïa a te feia mo‘a.”—Apo. 19:8.

UA TAE TE TAIME FAAIPOIPORAA

10. Afea te faaipoiporaa o te Arenio e tupu ai?

10 A taio i te Apokalupo 19:7. Afea te faaipoiporaa o te Arenio e tupu ai? Noa ’tu e “ua faanehenehe ta ’na vahine ia ’na iho” no te faaipoiporaa, aita te mau irava i muri mai e faataa ra i te faaipoiporaa. Te faataa nei râ ma te taa maitai i te tuhaa hopea o te ati rahi. (Apo. 19:11-21) Te auraa anei ïa e e tupu te faaipoiporaa hou te upootiaraa hopea o te Arii? E ere. Aita te mau orama i roto i te Apokalupo i papaihia ia au i te taime e tupu ai ratou. I roto i te Salamo 45, e tatua na mua te Arii Iesu Mesia i ta ’na ‘o‘e a upootia atu ai i nia i to ’na mau enemi. I muri iho noa te faaipoiporaa e tupu ai.

11. A faataa na i ta Iesu e rave no te upootia i te tama‘i.

11 Ua ite râ tatou eaha te mau tupuraa e itehia te tahi i muri i te tahi. E haamouhia na mua te “vahine faaturi rahi,” o Babulonia rahi, oia hoi te hau emepera o te haapaoraa hape. (Apo. 17:1, 5, 16, 17; 19:1, 2) I muri iho, e haamou te Mesia i te toea o te ao ino a Satani i nia i te fenua i Aramagedo, “te tama‘i i taua mahana rahi o te Atua Puai hope ra.” (Apo. 16:14-16; 19:19-21) Ia oti, e upootia roa te Arii Aito i te tama‘i ma te tuu ia Satani e ta ’na mau demoni i roto i te abuso. Tei roto ïa ratou i te ohipa-ore-raa mai te pohe ra te huru.—Apo. 20:1-3.

12, 13. (a) Afea te faaipoiporaa o te Arenio e tupu ai? (b) I te ra‘i, o vai te oaoa i te faaipoiporaa o te Arenio?

12 Mai te ariiraa mai te Mesia, e faatiahia te mau Kerisetiano faatavaihia o te faaoti nei i ta ratou hororaa i te fenua no te ora i nia i te ra‘i. I muri noa ’‘e i te haamouraa o Babulonia rahi, e haaputu Iesu ia ’na ra te toea o te mau melo o te pǔpǔ o te vahine faaipoipo. (Tes. 1, 4:16, 17) Tei te ra‘i râ te mau melo atoa o te “vahine faaipoipo” hou te tama‘i o Aramagedo. E ia oti tera tama‘i, e nehenehe te faaipoiporaa o te Arenio e tupu. Auê ïa tupuraa oaoa mau! Te na ô ra te Apokalupo 19:9: “E ao to tei parauhia e haere mai i te amuraa rui faaipoiporaa a te Arenio.” E oaoa na 144 000 melo o te pǔpǔ o te vahine. E e oaoa ’tu â te Arii e tei ia ’na ra to ’na mau arii apiti no te ‘amu e te inu i ta ’na ra amuraa maa, ei auraa parau, i to ’na ra basileia.’  (Luka 22:18, 28-30) E ere râ o ratou ana‘e te oaoa i te faaipoiporaa o te Arenio.

13 Mai tei faahitihia na, e himene amui te mau melahi: “E oaoa tatou, e ia rahi atu â te oaoa [o Iehova], e e haamaitai hoi ia ’na: ua tae hoi i te faaipoiporaa a te Arenio, e ua faanehenehe ta ’na vahine ia ’na iho.” (Apo. 19:6, 7) Teie râ, e oaoa atoa anei te mau tavini a Iehova i nia i te fenua?

“ARATAIHIA RATOU MA TE POPOU E TE OAOA”

14. O vai te mau “hoa paretenia” o te vahine faaipoipo tei faahitihia i roto i te Salamo 45?

14 A taio i te Salamo 45:12, 14, 15. Ua tohu te peropheta Zekaria e i te anotau hopea, e oaoa te mau taata na te ao atoa i te tavini ia Iehova e te toea o te feia faatavaihia. Ua papai o ’na: “Ia tae i taua mau mahana ra, e haru mai ai na taata tino ahuru no roto i te mau parau atoa o te mau fenua ra, i te hiti ahu o te hoê ati Iuda ta ratou e haru, a na ô atu ai, E haere atoa matou i ǒ na: ite a‘enei matou e, tei ia outou te Atua.” (Zek. 8:23) I roto i te Salamo 45:12, te faahitihia ra na “taata tino ahuru” mai “te tamahine a Turia” e “te feia tao‘a.” Te horoa ra ratou i te mau ô na te feia faatavaihia. Te haa nei ratou no te turu i tei faatavaihia e no te fana‘o i ta ratou tauturu no te tavini ia Iehova. Mai 1935, e mirioni taata ta te toea i ‘aratai i te parau-tia.’ Oia hoi e mirioni taata tei haapii i te parau mau no nia ia Iehova. (Dan. 12:3) Ua riro teie na “tino taata ahuru” ei hoa taiva ore o te mau Kerisetiano faatavaihia. Ua tamâ atoa ratou i to ratou oraraa i te haamoriraa hape. No reira ratou e parauhia ’i te mau  “hoa paretenia.” Ua pûpû ratou ia ratou iho ia Iehova e ua faaite e e tavini taiva ore ratou a te Arii Iesu Mesia.

15. Mea nafea te mau “hoa paretenia” i haa amui ai e te toea o te pǔpǔ o te vahine?

15 Te mauruuru mau nei te toea o te pǔpǔ o te vahine i te tauturu rahi a teie mau “hoa paretenia” i roto i te pororaa i “te evanelia o te basileia” na te mau fenua atoa. (Mat. 24:14) E ere noa te varua e te vahine faaipoipo te parau nei: “E haere mai.” E na reira atoa râ te feia e faaroo ra. (Apo. 22:17) Oia mau, ua faaroo te mau “mamoe ê atu” i te mau melo faatavaihia ia parau “E haere mai.” Amui a‘era ratou i te vahine faaipoipo ma te parau i te mau taata na te ao: “E haere mai.”—Ioa. 10:16.

16. Eaha te fana‘oraa taa ê ta Iehova i horoa i te mau mamoe ê atu?

16 Te here ra te toea o te feia faatavaihia i to ratou mau hoa o te mau mamoe ê atu. E te oaoa nei ratou i te fana‘oraa taa ê ta Iehova i horoa i to ratou mau hoa ia oaoa atoa i te faaipoiporaa o te Arenio. Ua tohuhia e e ‘arataihia teie mau hoa paretenia ma te popou e te oaoa.’ Oia mau, o te utuafare taatoa o Iehova te oaoa a tupu ai te faaipoiporaa o te Arenio i nia i te ra‘i. Ia au i te Apokalupo, ‘te tia noa ra te feia rahi roa i mua i te terono e i te Arenio.’ Te pûpû nei ratou i te taviniraa mo‘a ia Iehova i roto i te aua i te fenua o ta ’na hiero pae varua.—Apo. 7:9, 15.

E oaoa te mau “hoa paretenia” o te vahine faaipoipo i te faaipoiporaa o te Arenio (A hi‘o i te paratarafa 16)

“E MONOHIA MAI TO MAU METUA RA I TO TAMARII”

17, 18. (a) E nafea te faaipoiporaa o te Arenio e haamaitai ai i te taata i roto i te ao apî? (b) I te roaraa o na Faatereraa tausani matahiti, e riro te Mesia ei metua no vai ma?

17 A taio i te Salamo 45:16. E oaoa atoa te mau “hoa paretenia” o te vahine faaipoipo a te Mesia a ite ai i te mau haamaitairaa o te faaipoiporaa i roto i te ao apî. A faatere ai i te fenua, e faaho‘i mai te Arii Iesu Mesia i te ora i to ’na mau metua tupuna i te fenua nei. E riro ïa ratou ei “tamarii” na ’na. (Ioa. 5:25-29; Heb. 11:35) E ‘faaarii o ’na vetahi o ratou i te mau fenua atoa nei.’ E faatoroa atoa o ’na i te tahi mau matahiapo taiva ore o teie mahana no te aratai i te feia e ora i roto i te ao apî.—Isa. 32:1.

18 I te roaraa o ta ’na Faatereraa tausani matahiti, e riro te Mesia ei metua no vetahi ê atoa. E ora hoi te taata e a muri noa ’tu ia faatupu ratou i te faaroo i te tusia taraehara o Iesu. (Ioa. 3:16) E riro ïa o ’na no ratou ei “Metua no te ui a muri atu.”—Isa. 9:6, 7.

‘E FAAITE ANA‘E I TO ’NA I‘OA’

19, 20. Eaha te auraa o te mau tupuraa i roto i te Salamo 45 no te mau Kerisetiano mau atoa i teie mahana?

19 A taio i te Salamo 45:17. * No te mau Kerisetiano atoa te mau tupuraa i roto i te Salamo 45. Te oaoa mau nei te toea o te feia faatavaihia i te fenua i te ite e fatata ratou i te tahoêhia i nia i te ra‘i i to ratou mau taeae e i ta ratou Tane faaipoipo. Te hinaaro nei te mau mamoe ê atu e auraro atu â i to ratou Arii hanahana. E te mauruuru nei ratou i te fana‘oraa taa ê e riro ei hoa o te toea o te mau melo o te vahine faaipoipo i nia i te fenua. I muri iho i to raua faaipoiporaa, e haamaitai te Mesia e to ’na mau arii apiti i te huitaata mai tei ore i mana‘ohia a‘enei.—Apo. 7:17; 21:1-4.

20 A tiai noa ’i ia tupu “te parau maitai” no nia i te Arii Mesia, aita anei tatou e hinaaro ra ‘e faaite i to ’na i‘oa’? (Sal. 45:1) E ‘haamaitai ana‘e i te Arii e a muri noa ’tu.’

^ par. 5 Salamo 45:10, 11: “E faaroo mai, e tera ra tamahine; e haamana‘o, e fariu mai i to tari‘a; e haamoe atu i to oe ra mau taata e te utuafare o to metua ra; ei reira e riro ai te aau o te arii i to oe ra maitai: oia to oe Fatu; e haamori â oe ia ’na [“tipapa oe i mua ia ’na,” Traduction du monde nouveau].”

^ par. 19 Salamo 45:17 (Traduction du monde nouveau): “E hinaaro vau e faaite i to i‘oa i te mau u‘i atoa no a muri a‘e. No reira te mau taata e arue ai ia oe e a muri noa ’tu.”