Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2014

‘A ite i te maitai o Iehova’

‘A ite i te maitai o Iehova’

E nehenehe te mau fifi e haapeapea roa ia tatou, e haaparuparu mai e e ohipa i nia i to tatou mana‘o i te oraraa. Ua faaruru te arii o Iseraela i tahito ra o Davida e rave rahi fifi. Eaha ta ’na i rave i tera mau taime? I roto i te hoê salamo putapû mau, te pahono ra Davida: “Ua pii hua vau ia Iehova; ua tiaoro hua vau i ta ’u ra aniraa ia Iehova. Ua ninii noa ’tu vau i tau mana‘o i mua i tana aro; ua faaite au ia ’na i to ’u ati. I te ati roa ra [vau] i roto ia ’u nei ra, te ite ra oe i to ’u haerea i reira.” Oia mau, ma te haehaa, ua pure Davida i te Atua no te tauturu ia ’na.—Sal. 142:1-3.

A fifihia ’i, ua pure noa Davida ia Iehova ma te haehaa ia tauturu ia ’na

I roto i te tahi atu salamo, ua himene Davida: “Hoê a ’u mea hinaaro ia Iehova ra, e o ta ’u ïa e titau hua nei; ia parahi â vau i roto i te fare o Iehova e hope roa ’‘e o ’u pue mahana, ia ite vau i te maitai o Iehova, e ia ui maite au i roto i to ’na nao [aore ra hiero].” (Sal. 27:4) Na roto i te reo Hebera, o “te hi‘oraa ma te mauruuru e te oaoa” te auraa o te parau hurihia i ǒ nei ei “ui maite.” E ere Davida i te ati Levi. Teie râ, a feruri na ia ’na e tia ra i rapaeau i te aua mo‘a i pihaiiho i te pu o te haamoriraa mau. No to ’na mauruuru rahi, ua hinaaro Davida e faaea i reira no te toea o to ’na oraraa no te ‘ite i te maitai o Iehova.’

Te auraa o te ta‘o Hebera hurihia i roto i te Salamo 27:4 ei “maitai,” o te hoê ïa mea au mau aore ra te hoê huru au mau. Ua hi‘o noa Davida i ta te Atua i faanaho no te haamoriraa ma te mauruuru. E ui ana‘e ïa, ‘Hoê â anei huru aau to ’u i to Davida?’

HI‘O I TE MAU FAANAHORAA A TE ATUA MA TE MAURUURU

I teie mahana, aita te mau faanahoraa a Iehova no te haafatata ’tu ia ’na i taaihia i te hoê vahi mau. Ua taaihia râ te reira i te hiero rahi pae varua o te Atua, oia hoi te faanahoraa mo‘a o te haamoriraa mau. * Ia hi‘o tatou i teie faanahoraa ma te mauruuru, ‘e ite atoa tatou i te maitai o Iehova.’

A hi‘o na i te fata veo o te mau tusia taauahi i mua noa mai i te hiero. (Exo. 38:1, 2; 40:6) I faahoho‘a na tera fata i to te Atua hinaaro e farii i to Iesu ora ei tusia. (Heb. 10:5-10) A feruri na i te auraa no tatou! Ua papai te aposetolo Paulo e i enemi na tatou no te Atua. Maoti râ te pohe o ta ’Na Tamaiti i faafaitehia ’i tatou ia ’Na. (Roma 5:10) Ma te faatupu i te faaroo i te toto o Iesu tei niniihia, e nehenehe tatou e riro ei hoa no te Atua a fana‘o atu ai i ta ’na farii maitai e to ’na tiaturi. E ite ïa tatou i te auhoaraa piri e o Iehova.—Sal. 25:14.

E ite tatou i ‘te anotau haumǎrû no ǒ mai ia Iehova ra’ no te mea ua “paraihia,” aore ra ua tumâhia, ta tatou mau hara. (Ohi. 3:19) Hoê â to tatou huru tupuraa i to te hoê taata mau auri faautuahia i te pohe. Ua tatarahapa râ o ’na i ta ’na i rave i mutaa iho e ua taui roa. A ite ai i te reira, tumâ a‘era te hoê haava hamani maitai i te mau mea ino ta tera taata i rave e faaore a‘era i ta ’na utua pohe. Ua topa te hau o tera taata e ua oaoa roa o ’na! Mai tera haava, e faaite Iehova i ta ’na farii maitai i te feia e tatarahapa ra a faaore atu ai i te utua pohe.

A OAOA I ROTO I TE HAAMORIRAA MAU

Eaha te mau tuhaa o te haamoriraa mau ta Davida i ite i te fare o Iehova? Te haaputuputuraa o to ’na mau hoa Iseraela e rave rahi roa, te taioraa e te faataaraa o te Ture i mua i te taatoaraa, te tutuiraa i te mea no‘ano‘a e te taviniraa mo‘a a te  mau tahu‘a e ati Levi. (Exo. 30:34-38; Num. 3:5-8; Deut. 31:9-12) E tuatiraa to teie mau tuhaa o te haamoriraa mau i Iseraela i teie tau.

Mai i tahito ra, ‘mea maitai e mea popou noâ no te mau taeae ia parahi ma te au maite!’ (Sal. 133:1) Te rahi noa ’tura to tatou “hui taeae” na te ao. (Pet. 1, 2:17) E taiohia e e faataahia te Parau a te Atua i ta tatou mau putuputuraa. Maoti ta ’na faanahonahoraa, e rave rahi haapiiraa ta Iehova e horoa nei. Mea rahi roa atoa te maa pae varua tei piahia no ta tatou iho haapiiraa e no te utuafare. Ua parau te hoê melo o te Tino aratai e ua ite o ’na i te mau haamaitairaa e te mauruuru pae varua ma te feruri maite i te Parau a te Atua e i to ’na auraa e ma te imi i te paari e te ite. Oia mau, ‘e riro te ite ei mea maitai no tatou.’—Mas. 2:10.

I te mau mahana atoa, te faatae nei te mau tavini a Iehova ia ’na ra i te mau pure ta ’na e farii. E au te reira i te mea hau‘a no‘ano‘a no ’na. (Sal. 141:2) Auê tatou i te oaoa i te ite e te au nei Iehova ia haafatata ’tu tatou ia ’na na roto i te pure haehaa!

Ua pure Mose: “Ia vai mai â te here o to matou nei Atua, o Iehova, i nia ia matou nei; e te ohipa a to matou nei rima e haamau oe.” (Sal. 90:17) E haamaitai Iehova i ta tatou taviniraa ia poro tatou ma te itoito rahi. (Mal. 3:10) Ua tauturu paha tatou ia vetahi ia haapii i te parau mau. Peneia‘e e rave rahi matahiti tatou i te faaitoito-noa-raa i te poro noa ’tu te tâu‘a ore, te ma‘i, te mauiui aore ra te hamani-ino-raa. (Tes. 1, 2:2) Aita anei râ tatou i ite i “te maitai o Iehova” a taa ’tu ai e te oaoa rahi nei to tatou Metua i te ra‘i i ta tatou mau tutavaraa?

Ua himene Davida: “O Iehova, o ta ’u ïa tufaa e ta ’u au‘a, o oe tei haapao mai i to ’u nei kelero [aore ra ta ’u tuhaa]. Ua mairi a‘enei to ’u kelero i te vahi maitai.” (Sal. 16:5, 6) Ua oaoa Davida i ta ’na “tufaa,” oia hoi i te fana‘o i te taairaa maitai e o Iehova e i te tavini ia ’na. Mai ia Davida, te faaruru nei paha tatou i te fifi. Mea rahi râ te haamaitairaa pae varua ta tatou e fana‘o nei, e ere anei? E tamau ana‘e ïa i te oaoa i roto i te haamoriraa mau e i te hi‘o noa ma te mauruuru i te hiero pae varua o Iehova.

^ par. 6 A hi‘o i Te Pare Tiairaa o te 1 no Tiurai 1996, api 14-24.