Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Fepuare 2014

Iehova, to tatou Atua horoa e Paruru

Iehova, to tatou Atua horoa e Paruru

“No te mea, te hinaaro maira oia ia ’u, e faaora vau ia ’na; e faateitei au ia ’na i nia, no te mea te haapao ra oia i to ’u nei i‘oa.”—SAL. 91:14.

1, 2. Te ite nei tatou i teihea mau taa-ê-raa i roto i te oraraa utuafare e te ravea i haapii mai ai tatou i te parau mau?

O IEHOVA te tumu o te oraraa utuafare. (Eph. 3:14, 15) Noa ’tu râ e e melo tatou o te hoê â utuafare, mea taa ê iho â to te tahi e te tahi huru, oia atoa te tupuraa. Ua paari paha oe e to oe na metua. Ua pohe paha to vetahi mau metua no te ma‘i aore ra no te tahi atu ati. Area vetahi ê, aitâ ratou i ite atura o vai to ratou metua.

2 I rotopu i to Iehova utuafare e haamori ra ia ’na, mea taa ê to te tahi e te tahi iteraa mai i te parau mau. Peneia‘e ua paari oe i roto i te parau mau e ua haapii tamau atu to mau metua i te mau aratairaa a Iehova. (Deut. 6:6, 7) Aore ra ua haapii paha oe i te parau mau mai e tausani taata, oia hoi maoti te ohipa pororaa a te tahi atu mau tavini a Iehova.—Roma 10:13-15; Tim. 1, 2:3, 4.

3. Eaha te mea e taai ra ia tatou pauroa?

3 Noa ’tu râ te mau taa-ê-raa i faahitihia ’tu, te mauiui nei tatou paatoa i te mau faahopearaa o te faaroo ore o Adamu. E taata tia ore tatou pauroa o te hara e te pohe. (Roma 5:12) Noa ’tu râ, ei tavini taiva ore a Iehova, e nehenehe tatou e  pii ia ’na ‘to tatou Metua.’ Ia au i te Isaia 64:8, i parau na te nunaa maitihia o te Atua i tahito ra: “E Iehova, o oe to matou metua.” Ua omua atoa Iesu i ta ’na pure tuiroo ma te parau: “E to matou Metua i te ao r[a], ia raa to oe i‘oa.”—Mat. 6:9.

4, 5. Eaha ta tatou e hi‘opoa mai no te here roa ’tu â i to tatou Metua i te ra‘i ra o Iehova?

4 E aupuru e e paruru to tatou Metua i te ra‘i i te feia e tiaoro ra i to ’na i‘oa ma te faaroo. Ia au i te fatu salamo, te parau ra Iehova: “No te mea, te hinaaro maira oia [te hoê tavini taiva ore] ia ’u, e faaora vau ia ’na; e faateitei au ia ’na i nia, no te mea te haapao ra oia i to ’u nei i‘oa.” (Sal. 91:14) Ma te here, e faaora e e paruru te Atua ra o Iehova i to ’na nunaa i to ratou mau enemi. Eita ïa ratou e haamouhia.

5 No te here roa ’tu â i to tatou Metua i te ra‘i, e hi‘opoa ana‘e e toru tuhaa faufaa: (1) O to tatou Metua to tatou Atua horoa. (2) O Iehova to tatou Paruru. (3) O te Atua to tatou Hoa rahi. A hi‘opoa ’i i teie mau tuhaa, e feruri maite ana‘e i to tatou taairaa e te Atua. Oia atoa i te ravea e faahanahana ’i ia ’na ei Metua no tatou e i te mau haamaitairaa ta ’na e fafau ra i te feia o te haafatata ’tu ia ’na.—Iak. 4:8.

E ATUA HOROA IEHOVA

6. Eaha te tahi ravea e faaite ai Iehova e o ’na te horoa mai i ‘te mau mea maitatai’?

6 Ua papai te pǐpǐ Iakobo: “Te mau mea maitatai i ho-mai-hia mai, e te mau mea tia roa e maitai roa ’i, no nia ïa, mai nia mai ïa i te Metua o te maramarama.” (Iak. 1:17) E ô faahiahia mau te ora no ǒ mai ia Iehova ra. (Sal. 36:9) E faaohipa ana‘e i to tatou oraraa no te rave i to ’na hinaaro. E fana‘o ïa tatou i te mau haamaitairaa rahi i teie nei â e i te ora mure ore i roto i te ao apî. (Mal. 3:10; Pet. 2, 3:13) E nafea râ i te mea hoi e te faaruru nei tatou i te mau faahopearaa o te faaroo ore o Adamu?

7. Ua aha te Atua ia nehenehe tatou e faatupu i te taairaa piri e o ’na?

7 E Atua horoa Iehova i roto i te tuhaa e rave rahi roa. Ei hi‘oraa, no to ’na aroha hamani maitai, ua faaora mai oia ia tatou. Oia mau, no Adamu i riro ai tatou paatoa ei taata hara e te tia ore. (Roma 3:23) No to Iehova râ here, ua horoa mai o ’na i te hoê ravea e faatupu ai tatou i te taairaa piri e o ’na. Ua papai te aposetolo Ioane: “Ua itea to te Atua aroha ia tatou nei, o te Atua i tono mai i ta ’na Tamaiti fanau tahi i te ao nei, ia ora tatou ia ’na. O te aroha mau teie, e ere râ e na tatou i aroha ’tu i te Atua, oia râ tei aroha mai ia tatou nei, e ua tono mai i ta ’na Tamaiti ei taraehara i ta tatou nei hara.”—Ioa. 1, 4:9, 10.

8, 9. I te tau o Aberahama e Isaaka, mea nafea Iehova i te faaiteraa e e Atua horoa o ’na? (A hi‘o i te hoho‘a matamua.)

8 I te area matahiti 1893 hou te Mesia, ua faaite atea te hoê tupuraa e nafea Iehova e horoa ’i ma te here i te ora mure ore i te huitaata faaroo. Te faataa ra te Hebera 11:17-19: “No te faaroo i pûpû ai Aberahama ia Isaaka, a tamatahia ’i oia ra; e te taata i noaa ia ’na te parau i parauhia maira, ua pûpû ïa i ta ’na tamaiti fanau tahi, no ’na te parau i parauhia ra e, Ei ia Isaaka to oe ra huaai e noaa ’i. I parau hoi oia e, e tiâ i te Atua ia faatia faahou mai ia ’na mai te pohe maira; e mai te mea hoi e mai te pohe maira te noaa-faahou-raa ia ’na.” Mea ohie ia ite i te taairaa. Ua pûpû Iehova i ta ’na Tamaiti ra o Iesu Mesia no te faaora i te huitaata.—A taio i te Ioane 3:16, 36.

 9 Mea papu e ua oaoa Isaaka e eita o ’na e pohe ei tusia! Aita e ore e ua mauruuru atoa o ’na i te Atua i te horoaraa mai i te hoê mamoe oni i pihaiiho noa mai no te mono ia ’na. (Gen. 22:10-13) No reira tera vahi i parauhia ’i “Iehova-Irae,” oia hoi “E horoa Iehova” na roto i te reo Hebera.—Gen. 22:14.

RAVEA NO TE FAAFAITE I TE ATUA

10, 11. O vai na mua tei rave i “te toroa faafaite,” e ua nafea ratou?

10 E mauruuru tatou i ta Iesu Mesia i rave a feruri ai mea nafea Iehova i te faaiteraa e e Atua horoa o ’Na. Ua papai Paulo: “Te parau nei matou e, i pohe te hoê no te taata atoa, e pohe to te taata atoa i reira; e i pohe hoi oia no te taata atoa, ia ore te feia e ora ra ia haapao faahou ia ratou iho i te oraraa nei, ia haapao râ ia ’na, tei pohe e tei tia faahou no ratou.”—Kor. 2, 5:14, 15.

11 No to ratou here i te Atua e te mauruuru no te fana‘oraa taa ê e tavini ia ’na, ua farii te mau Kerisetiano matamua i “te toroa faafaite” ma te oaoa. Ua poro ratou e ua faariro i te taata ei pǐpǐ. Ua tia ïa i te feia aau haavare ore ia fana‘o i te hau e te Atua, ia riro ei hoa no ’na e i te pae hopea ei tamarii pae varua na ’na. I teie mahana, te na reira atoa nei te mau tavini faatavaihia a Iehova. Maoti ta ratou e rave nei ei vea na te Atua e te Mesia i tia ’i i te taata aau farii e tano ia haafatata ’tu ia Iehova e ia tavini ia ’na.—A taio i te Korinetia 2, 5:18-20; Ioa. 6:44; Ohi. 13:48.

12, 13. E nafea ia faaite i to tatou mauruuru no te mau mea atoa ta Iehova i horoa mai?

12 No to ratou mauruuru rahi ia Iehova ei Atua horoa, te poro nei te mau mamoe ê atu e te mau Kerisetiano faatavaihia. A poro ai, e faaohipa tatou i te Bibilia, te tahi atu ô faahiahia no ǒ mai i te Atua ra. (Tim. 2, 3:16, 17) Ma te faaohipa maitai i te reira i roto i ta tatou taviniraa, e nehenehe vetahi e fana‘o atoa i te ora mure ore. No te tauturu ia tatou, te horoa atoa nei Iehova i te tahi atu ô: te varua mo‘a. (Zek. 4:6; Luka 11:13) Ia au i ta tatou mau buka matahiti (Annuaire des Témoins de Jéhovah), mea faahiahia mau te mau faahopearaa. E fana‘oraa taa ê mau â ia apiti i teie ohipa no te arue i to tatou Metua e Atua horoa!

13 No te mau mea atoa ta te Atua i horoa mai, e uiui ana‘e: ‘Te rave ra anei au i tei tia ia ’u i roto i te taviniraa no te faaite i to ’u mauruuru ia Iehova? E nafea vau e nehenehe ai e riro ei taata poro aravihi a‘e?’ No te faaite i to tatou mauruuru no te mau ô ta Iehova i horoa mai, e haapao ana‘e i te mau ohipa taaihia i te Basileia na mua roa. E horoa mai ïa Iehova i ta tatou e hinaaro mau ra. (Mat. 6:25-33) No to te Atua here, e hinaaro iho â tatou e rave i tei nehenehe no te faaoaoa i to ’na aau.—Mas. 27:11.

14. Mea nafea Iehova i te riroraa ei faaora no to ’na nunaa?

14 Ua himene Davida: “E ati e te veve to ’u, te mana‘o maira râ Iehova ia ’u. O oe tau tauturu e tau ora.” (Sal. 40:17) E rave rahi taime to Iehova riroraa ei faaora no to ’na nunaa ei pǔpǔ, i te taime iho â râ a hamani-ino-hia ’i e a tapapahia ’i ratou e to ratou mau enemi. Te mauruuru mau nei tatou i te Atua no ta ’na tauturu e no te mau ô pae varua atoa ta ’na e horoa noa mai nei!

E PARURU IEHOVA

15. A faataa na mea nafea te hoê metua tane î i te here i te parururaa i ta ’na tamarii.

15 Eita noa te hoê metua tane î i te here  e horoa i ta ta ’na tamarii e hinaaro ra. E paruru e e faaora atoa râ o ’na ia ratou a faaruru ai i te fifi atâta. Te haamana‘o nei te hoê taeae i te tahi tupuraa taa maitai i to ’na tamariiraa. Te ho‘i ra raua to ’na papa i te fare i muri a‘e i te pororaa. No te ûa puai râ i tera poipoi, ua tahe puai te anavai e na reira hoi raua ia haere. Hoê noa ravea: e ou‘a i nia i te mau ofai no te tapae i te tahi atu paeau. Ua na mua ’tu o ’na i to ’na papa. Aita râ o ’na i mau i nia i te hoê ofai e topa a‘era. Fatata o ’na i te paremo a haru oioi ai to ’na papa ia ’na. Ua mauruuru mau teie tamaiti i to ’na papa i te faaoraraa ia ’na! E faaora atoa to tatou Metua i te ra‘i ia tatou i te mau fifi atâta o teie nei ao ino e i to ’na faatere ra o Satani. O Iehova iho â te paruru maitai roa ’‘e.—Mat. 6:13; Ioa. 1, 5:19.

16, 17. Mea nafea Iehova i te tautururaa e te parururaa i te mau Iseraela a aro ai ratou ia Amaleka?

16 I 1513 hou te Mesia, ua paruru Iehova i te mau Iseraela ma te here. Ua faaora o ’na ia ratou i te faatîtîraa i Aiphiti e ua paruru semeio ia ratou a na roto ai i te miti Uteute. I muri iho, i to ratou haereraa i te mou‘a Sinai na te medebara, ua tapae te nunaa i Rephidima.

17 No te parau tohu o te Genese 3:15, peneia‘e ua hinaaro mau Satani e aro i te mau Iseraela, e au ra hoi e aita ratou i paruruhia. O ta ’na iho â i rave na roto i te mau ati Amaleka, e enemi hoi o te nunaa o te Atua. (Num. 24:20) A hi‘o na i ta Iehova i rave na roto i na tane taiva ore e maha ra o Iosua, Mose, Aarona e Hura. A aro ai Iosua ia Amaleka, tei nia Mose, Aarona e Hura i te hoê mou‘a tapiri. A hopoi ai Mose i to ’na na rima i nia, mea  puai a‘e te mau Iseraela. A teimaha ’i te reira, na Aarona e Hura i turu i to ’na na rima. Maoti te tauturu e te paruru a Iehova, “pau ihora Amaleka e to ’na atoa ra mau taata ia Iosua.” (Exo. 17:8-13) Faatia a‘era Mose i te hoê fata i reira e ua tuu i te i‘oa ‘Iehova-Nisi.’ Teie te auraa na roto i te reo Hebera, “O Iehova to ’u haapuraa.”—A taio i te Exodo 17:14, 15.

FAAORAHIA I TE MAU ARORAA A SATANI

18, 19. E nafea te Atua e paruru ai i ta ’na mau tavini i teie mahana?

18 E paruru Iehova i te feia e here e e faaroo ra ia ’na. Mai te mau Iseraela i Rephidima, e imi tatou i ta Iehova parururaa i mua i te enemi. Ua tauturu pinepine Iehova ia tatou ei pǔpǔ e ua faaora mai i te mau aroraa a te Diabolo. A feruri na ehia taime to ’na parururaa i to tatou mau taeae tei tapeahia no to ratou tiaraa amui ore Kerisetiano. Mai i te tau Nazi i Heremani e i te tahi atu mau fenua i te mau matahiti 1930 e i te omuaraa o te mau matahiti 1940. E taio e e feruri maite ana‘e i to ratou mau aamu, oia atoa i te mau faatiaraa i roto i te buka matahiti (Annuaire). E tiaturi atu â ïa tatou ia Iehova ei haapuraa no tatou.—Sal. 91:2.

E nehenehe Iehova e faaohipa i to tatou mau hoa haamori no te tauturu mai ia vai taiva ore i te tau fifi (A hi‘o i na paratarafa 18-20)

19 Na roto i ta Iehova faanahonahoraa e i ta tatou mau papai, te fana‘o nei tatou i te mau haamana‘oraa î i te here o te paruru ia tatou. E ua paruru mai iho â teie mau haamana‘oraa i teie mau matahiti i mairi. Te rahi noa ’tura te peu faufau e te hoho‘a faufau i roto i teie nei ao. Ua horoa mai râ Iehova i te mau haamana‘oraa ru e faufaa ia ara tatou i te mau fifi atâta i te pae morare. Ei hi‘oraa, ua horoa mai o ’na i te a‘oraa no nia i te mau amuimuiraa ino i nia i te mau reni faahoaraa i nia i te Internet. *Kor. 1, 15:33.

20. Eaha te parururaa e te aratairaa ta tatou e fana‘o nei i roto i te amuiraa?

20 E nafea e faaite ai e e feia ‘haapiihia tatou e Iehova’? Ma te pee maite i ta ’na mau faaueraa. (Isa. 54:13) E haapuraa ta tatou mau amuiraa e ite ai tatou i te aratairaa e te parururaa. I reira hoi te mau taeae taiva ore e tavini ra ei matahiapo e horoa ’i i te tauturu e te a‘oraa Bibilia. (Gal. 6:1) Te faaohipa nei Iehova i teie mau ‘taata horoahia mai’ no te aupuru ia tatou. (Eph. 4:7, 8) Ia aha ïa? E auraro e e faaroo ana‘e ia ratou, e haamaitai mai ïa te Atua.—Heb. 13:17.

21. (a) Ia faaoti papu tatou i te rave i te aha? (b) Eaha ta tatou e hi‘opoa i to muri nei tumu parau?

21 E faaoti papu ana‘e e pee i te aratairaa a te varua mo‘a e e farii i te aratairaa a to tatou Metua i te ra‘i. E feruri maite atoa ana‘e i te oraraa o ta ’na Tamaiti ra o Iesu Mesia a faaitoito atu ai i te pee i to ’na hi‘oraa faito ore. No to ’na faaroo e tae roa ’tu i te pohe, ua fana‘o Iesu i te hoê haamaitairaa rahi mau. (Phil. 2:5-11) Mai ia ’na, e haamaitai-atoa-hia tatou a tiaturi ai ia Iehova ma to tatou aau atoa. (Mas. 3:5, 6) E turui noa ana‘e ïa i nia ia Iehova mai te Atua horoa e mai te Paruru o te ore e nehenehe e faaauhia. Auê tatou i te oaoa i te fana‘oraa taa ê e tavini ia ’na! E here atu â tatou ia ’na a feruri maite ai e nafea to tatou Metua e aupuru mai ai ma te riro ei Hoa rahi no tatou. Ta tatou ïa e hi‘opoa i to muri nei tumu parau.

^ par. 19 E itehia te tahi o taua mau haamana‘oraa ra i roto i te tumu parau no nia i te faaohipa-maitai-raa i te Internet o Te Pare Tiairaa reo Farani o te 15 no Atete 2011, api 3-5. Oia atoa i roto i na tumu parau “A ara i te mau marei a te Diabolo!” e “A patoi e a ape i te mau herepata a Satani!” o Te Pare Tiairaa o te 1 no Atete 2012, api 23-32.