TE TAUAHI ra te hoê vahine ivi veve i ta ’na tamaiti otahi. Ua maere roa o ’na i te mea e maa taime na mua ’tu, ua rave o ’na i te tino pohe o ta ’na tamaiti i roto i to ’na rima ma te here. I teie nei, te hi‘o nei teie mama i ta ’na tamaiti tei ora faahou mai. Auê o ’na i te oaoa a ite ai i to ’na mata ataata! Parau a‘era ta ’na manihini: “Inaha, ua ora to tamaiti.”

Fatata e 3 000 matahiti teie faatia-faahou-raa putapû mau i te tupuraa. E nehenehe oe e taio i te reira i roto i Te mau arii 1 pene 17. Te manihini, o te peropheta a te Atua ïa o Elia. E te mama? O te hoê vahine ivi ïa, aita i faaitehia te i‘oa, i ora na i te oire o Zarephate. Hoê teie o te mau tupuraa tei haapuai mau i to ’na faaroo. E haapiiraa faufaa mau ta tatou e huti mai no nia ia ’na.

UA ITEA IA ELIA TE HOÊ VAHINE IVI TEI FAAITE I TE FAAROO

Ua faaoti Iehova e eita te ûa e topa i nia i te tuhaa fenua o Ahaba, te arii ino o Iseraela, no te hoê tau roa. I muri a‘e i to Elia faaiteraa i te paurâ, ua faatapuni Iehova ia ’na ia Ahaba e ua faaamu i te peropheta i te pane e te i‘o puaa ma te faaohipa i te mau oreba. Parau a‘era Iehova ia Elia: “A tia, e e haere i Zarephate i Sidona, a parahi ai i reira; ua parauhia e au te tahi vahine ivi i reira na ’na e faaamu ia oe.”—Arii 1, 17:1-9.

A tapae ai i Zarephate, ite a‘era Elia i te hoê vahine ivi veve e ohi haere ra i te vahie. O ’na paha ïa te vahine te faaamu i te peropheta. E nafea ra hoi, mea veve roa hoi o ’na? Noa ’tu e ua taiâ rii paha Elia, parau a‘era o ’na i te vahine: “A hopoi mai na i te hoê maa pape i roto i te farii, ia inu vau.” A na reira ’i te vahine, parau faahou a‘era Elia: “Hopoi atoa mai i te tahi maa pane.” (Arii 1, 17:10, 11) Aita e fifi no teie vahine ia horoa  maa pape na teie taata ta ’na i ore i matau. No te horoa râ i te maa, mea taa ê ïa.

Ua parau atu te vahine ivi: “Te ora ra to Atua o Iehova, aita roa a ’u e maa ama, maori râ te hoê maa faraoa hoê rima e î tei roto i te hue, e te hoê maa hinu i roto i te farii; e inaha, te ohi haere nei au i te maa vahie, a haere ai au i roto a tunu ai na mâua o tau tamaiti, a amu ai mâua, a pohe atu ai.” (Arii 1, 17:12) E feruri ana‘e eaha ta ta ’na mau parau e faaite ra.

Ua taa i te vahine ivi e e Iseraela Elia o te mǎta‘u i te Atua. Ta ta ’na ïa mau parau e faaite ra a na ô ai: “Te ora ra to Atua o Iehova.” E au ra e ua ite rii o ’na no nia i te Atua o Iseraela, aita râ o ’na i parau “to ’u Atua” no Iehova. I ora na oia i Zarephate, te hoê oire Phoinikia i Sidona. I haamori na paha te mau taata i Zarephate ia Baala. Noa ’tu râ, ua ite Iehova i te tahi mea maitai i roto i teie vahine ivi.

I ora na teie vahine ivi veve no Zarephate i rotopu i te feia haamori idolo. Noa ’tu râ, ua faatupu o ’na i te faaroo. Ua tono Iehova ia Elia i Zarephate no te maitai o tera vahine e o te peropheta. E nehenehe tatou e huti mai i te hoê haapiiraa faufaa.

E ere o te feia atoa no Zarephate i te mea ino. Ma te tono ia Elia i te vahine ivi ra, ua faaite Iehova e te ite nei oia i te feia aau maitai o tei ore â i tavini ia ’na. Inaha, ‘te ite nei te Atua i tei mǎta‘u ia ’na e i tei rave i te parau-tia i te mau fenua atoa.’—Ohi. 10:35.

Ehia taata i roto i ta oe tuhaa fenua tei au i te vahine ivi no Zarephate? Peneia‘e te hinaaro nei ratou i te hoê huru oraraa maitai a‘e noa ’tu e ua haaatihia ratou i te taata o te haapaoraa hape. Aita paha ratou i ite o vai o Iehova aore ra mea iti roa. Te hinaaro nei ïa ratou i te tauturu no te farii i te haamoriraa viivii ore. Te imi e te tauturu ra anei oe i taua mau taata ra?

‘E MATA NA I TE HAMANI I TE HOÊ MAA ITI NA ’U’

A hi‘o na i ta Elia i ani i te vahine ivi ia rave. No parau noa ’tura teie vahine e hoê noa maa ta ’na e nehenehe e tunu no raua ta ’na tamaiti a pohe atu ai. Eaha râ ta Elia i parau? “Eiaha e mǎta‘u; e haere râ oe e na reira ta oe i parau ra: e mata na râ i te hamani i te hoê vahi [aore ra maa] iti na ’u, a hopoi mai ai ia ’u nei, a hamani ai i ta oe e ta to tamaiti. Te na ô maira hoi te Atua o Iseraela a Iehova, E ore te hue faraoa e iti, e ore hoi e pau te farii hinu, e tae noa ’tu i te mahana e hopoi mai ai Iehova i te ûa i te fenua nei.”—Arii 1, 17:11-14.

E parau paha vetahi: ‘E horoa i ta mâua maa hopea? Te hauti maira paha oe!’ Aita râ te vahine ivi i na reira. Noa ’tu e mea iti roa to ’na ite no nia ia Iehova, ua tiaturi o ’na ia Elia e ua rave i ta ’na i ani. Ua tamatahia to ’na faaroo e ua rave o ’na i te hoê faaotiraa î i te paari.

No to ’na faaroo i te Atua o Elia, ua ora mai te vahine ivi e ta ’na tamaiti

Aita te Atua i faarue i teie vahine ivi veve. Mai ta Elia i parau, ua faanavai Iehova i te maa ia nehenehe Elia, te vahine ivi e ta ’na tamaiti e tamaa a hope roa ’i te tau paurâ. “Aore hoi taua hue faraoa ra i iti, aore hoi te farii hinu i pau, ta Iehova hoi i parau mai, i te vaha o Elia.” (Arii 1, 17:16;  18:1) Mai te peu e aita teie vahine i na reira, e pau na maa hinu e faraoa ota a tunu ai o ’na i ta raua maa iti. Ua haa râ o ’na ma te faaroo, ua tiaturi o ’na ia Iehova e ua faatamaa na mua ia Elia.

Teie te tahi haapiiraa e huti mai: E haamaitai te Atua i te feia o te faatupu i te faaroo. Ia na reira oe i mua i te tamataraa, e tauturu mai Iehova. E riro o ’na ei Atua horoa, Paruru e Hoa no te tauturu ia oe ia faaruru i te fifi.—Exo. 3:13-15.

I 1898, ua huti mai Te Pare Tiairaa (parauhia na Le Phare de la Tour de Sion) i teie haapiiraa no nia i te aamu o te vahine ivi: “Mai te peu e e faaroo rahi to ’na no te auraro, e fana‘o o ’na i te tauturu a te Fatu na roto i te peropheta. Ia ore, e imihia paha te tahi atu vahine ivi o te faatupu i te faaroo. Hoê â huru no tatou. I roto i to tatou nei oraraa, te tamata nei te Fatu i to tatou faaroo. Ia faatupu tatou i te faaroo, e haamaitaihia tatou. Ia ore, e ere tatou i te haamaitairaa.”

I mua i te fifi taa maitai, e imi ana‘e i te aratairaa a te Atua i roto i te Bibilia e i ta tatou mau papai Bibilia. Ia oti, e haa ana‘e ia au i te aratairaa a Iehova noa ’tu e mea fifi paha ia farii i te reira. E haamaitaihia iho â tatou ia haa tatou ia au i teie parau paari: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ’na i to oe atoa ra mau haerea; e na ’na e faaite ia oe i to oe ra mau haerea.”—Mas. 3:5, 6.

‘I HAERE MAI ANEI OE IA POHE TAU TAMAITI?’

Ua tamata-faahou-hia te faaroo o teie vahine ivi. Te faatia ra te Bibilia: “E i muri a‘e i te reira, roohia ihora te tamaiti a taua vahine ra, te vahine utuafare, i te pohe i te ma‘i: e ma‘i rahi to ’na, aita ’tura e aho i toe i roto ia ’na.” Ua oto roa teie mama. Ma te imi i te tumu o teie ati, ua parau o ’na ia Elia: “Eaha ta ’u ia oe, e te taata no te Atua na? I haere mai anei oe e faaite i ta ’u nei hara, e ia pohe hoi tau tamaiti?” (Arii 1, 17:17, 18) Eaha ta teie mau parau mauiui mau e faaite ra?

Ua haamana‘o anei teie vahine i te hoê hara i hauti ai to ’na mana‘o haava? Ua mana‘o anei o ’na e ua faautua te Atua ia ’na ma te haapohe i ta ’na tamaiti e no reira te Atua i tono ai ia Elia? Aita te Bibilia e faaite ra. Teie râ te mea papu: Aita te vahine ivi i faahapa i te Atua i te tahi noa ’‘e mea tano ore.

Ua pohe te tamaiti a teie vahine ivi e te mana‘o ra o ’na e o te peropheta te tumu e heva ’i oia. A ite ai i te reira, ua huru ê roa paha Elia. I muri a‘e i te amoraa i te tino pohe o te tamaiti i roto i te piha i nia, pii a‘era Elia: “E tau Atua, e Iehova e, ua hopoi mai hoi oe i te ino i te vahine ivi ta ’u e parahi nei i pohe ai ta ’na tamaiti?” Aita te peropheta i hinaaro ia faainohia te i‘oa o te Atua ia vaiiho o ’Na i teie vahine maitai e te farii maitai ia mauiui atu â. Taparu ihora Elia: “E tau Atua, e Iehova e, teie ta ’u parau ia oe, e faaho‘i mai oe i . . . teie nei tamaiti.”—Arii 1, 17:20, 21.

“INAHA, UA ORA TO TAMAITI”

Ua faaroo Iehova i te pure a Elia. Ua faatamaa te vahine ivi i te peropheta e ua faatupu o ’na i te faaroo. Aita te Atua i faaora i te ma‘i o ta ’na tamaiti. Ua ite hoi o ’na e e nehenehe ta ’na e faaho‘i mai ia ’na i te ora. Te faatia-faahou-raa matamua ïa teie ta te Bibilia e faahiti ra. E e horoa te reira i te tiaturiraa i te mau u‘i a muri atu. I to Elia taparuraa ia ’na, faaho‘i a‘era Iehova i te tamaiti i te ora. A feruri na i te oaoa o te vahine ivi a parau ai Elia: “Inaha, ua ora to tamaiti.” Na ô a‘era teie vahine ivi ia Elia: “O te mea teie i ite ai au e, e taata oe no te Atua, e tei roto te parau mau a Iehova i to vaha.”—Arii 1, 17:22-24.

Tera noa ta Te mau arii 1 pene 17 e parau ra no nia i teie vahine. I te mea râ e mea maitai te mau parau a Iesu no nia ia ’na, ua riro mai paha o ’na ei tavini a Iehova. (Luka 4:25, 26) Te haapii maira to ’na aamu e e haamaitai te Atua i te feia e tauturu ra i ta ’na mau tavini. (Mat. 25:34-40) Oia atoa e te aupuru ra te Atua i te feia e vai taiva ore ia ’na noa ’tu te mau fifi ino mau. (Mat. 6:25-34) Te haapapu atoa maira teie aamu e te vai ra ia Iehova te hinaaro e te puai no te faaho‘i mai i tei pohe i te ora. (Ohi. 24:15) E ere anei teie i te mau tumu maitai no te haamana‘o i te vahine ivi no Zarephate?