Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2014

A arue i te Mesia, te Arii hanahana!

A arue i te Mesia, te Arii hanahana!

‘E ma to mana, a horo ma te maitai [aore ra upootia].’—SAL. 45:4.

1, 2. No te aha e anaanatae ai i te Salamo 45?

TE HORO nei te hoê arii hanahana i nia i to ’na puaahorofenua no te parau mau e te parau-tia e no te haapau i to ’na mau enemi. Ia oti ta ’na upootiaraa hopea i nia ia ratou, e faaipoipo oia i te hoê vahine nehenehe mau. E haamana‘o e e arue ïa te mau u‘i atoa ia ’na. Tera te tumu parau o te Salamo 45.

2 E ere te Salamo 45 i te hoê noa aamu faahiahia mau e te hoê faahopearaa oaoa mau. E auraa atoa râ to teie mau tupuraa no tatou. Ua taaihia te reira i to tatou nei oraraa e i to tatou a muri a‘e. Ma te haapao maite, e hi‘opoa ana‘e i tera salamo.

“TE Î NEI TAU AAU I TE PARAU MAITAI”

3, 4. (a) Eaha “te parau maitai,” e e nafea te reira e ohipa ’i i nia i to tatou aau? (b) E nafea tatou ‘e parau ai no nia i te hoê arii,’ e e nafea to tatou arero e riro ai mai te peni?

3 A taio i te Salamo 45:1. Ua putapû te aau o te fatu salamo i “te parau maitai” no nia i te hoê arii. No te reira atoa to ’na aau i “î” ai i te oaoa rahi e to ’na arero i riro ai mai “te peni o te hoê taata papai” aravihi.

 4 E no tatou ïa? E putapû to tatou aau i te parau apî maitai o te Basileia Mesia. E parau maitai te reira o tei riro ei mea maitai atu â i 1914. Mai reira mai, tei nia teie poroi i te hoê Basileia mau o te faatere nei i nia i te ra‘i, eiaha faahou râ no nia i te hoê Basileia no a muri a‘e. Tera te “evanelia o te basileia” ta tatou e poro nei “e ati noa ’‘e teie nei ao, ia ite te mau fenua atoa.” (Mat. 24:14) Ua “î” anei to tatou aau i te oaoa no te poroi o te Basileia? E poro anei tatou i te evanelia o te Basileia ma te itoito? Mai te fatu salamo, ‘te parau nei tatou no nia i te hoê arii,’ to tatou Arii o Iesu Mesia. Te faaite nei tatou e o ’na tei faateronohia ei Arii i te ra‘i o te Basileia Mesia. Hau atu â, te parau nei tatou i te taatoaraa, oia atoa i te feia faatere, ia auraro i to ’na Basileia. (Sal. 2:1, 2, 4-12) E e riro to tatou arero mai “te peni o te hoê taata papai” aravihi ma te faaohipa ’tu â i te Bibilia a poro ai.

Te poro nei tatou i te parau apî maitai no nia i to tatou Arii ra o Iesu Mesia ma te oaoa

‘UA MANII TE AU MAITAI I NIA I TE UTU O TE ARII’

5. (a) No te aha e parauhia ’i e mea “nehenehe” Iesu? (b) Mea nafea ‘te au maitai i manii ai i nia i to te Arii utu,’ e e nafea tatou e pee ai i to ’na hi‘oraa?

5 A taio i te Salamo 45:2. * Mea iti roa ta te mau Papai e parau nei no nia i te huru rapaeau o Iesu. Aita râ e hape e ei taata tia roa, mea “nehenehe” oia. No ǒ mai râ to ’na nehenehe i to ’na taiva ore e hapa ore ia Iehova. Hau atu â, ua faaohipa Iesu i te mau parau “maitatai rahi” a poro ai i te poroi o te Basileia. (Luka 4:22; Ioa. 7:46) Te faaitoito ra anei tatou iho i te pee i to ’na hi‘oraa a poro ai e i te faaohipa i te mau parau e putapû ai te taata?—Kol. 4:6.

6. Mea nafea Iehova i “tamau” ai i te haamaitai ia Iesu?

6 Ua pûpû Iesu ia ’na iho ma to ’na aau atoa i to ’na Metua. Ua haamaitai ïa Iehova ia ’na a tavini ai oia i te fenua e i muri a‘e i te horoaraa i to ’na ora ei tusia. Ua papai te aposetolo Paulo: “E no te mea oia [Iesu] i itea mai te taata nei i te huru, ua faahaehaa oia ia ’na iho, i te haapao-maite-raa e tae noa ’tura i te pohe.” Ua faataa â Paulo: “I faateitei roa ’tu ai te Atua ia ’na, e ua horoa hoi i te i‘oa i hau ê roa i te mau i‘oa atoa nei no ’na; ia tuu te mau turi atoa i raro, to te ra‘i, to nia i te fenua e to raro a‘e i te fenua, i te i‘oa o Iesu ra; e ia fa‘i te mau vaha atoa, e o Iesu Mesia te Fatu, e hanahana ’tu te Atua Metua.” (Phil. 2:8-11) Ua “tamau” Iehova i te haamaitai ia Iesu ma te faatia faahou mai ia ’na no te pohe ore.—Roma 6:9.

UA HAU Ê TE ARII I TO ’NA MAU “HOA”

7. Mea nafea te Atua i te faatavairaa ia Iesu hau ê atu i to ’na mau “hoa”?

7 A taio i te Salamo 45:6, 7. Ua hinaaro mau Iesu i te parau-tia e ua riri mau i te mau mea atoa o te faaino i to ’na Metua. No reira Iehova i faatavai ai ia ’na ei Arii o te Basileia Mesia. Ua faatavaihia o ’na i “te mono‘i ra i te oaoa” hau ê atu i to ’na mau “hoa,” oia hoi te mau arii o  Iuda o te opu o Davida. Mea nafea? A tahi, na Iehova iho i faatavai ia Iesu. Te piti, ua faatavaihia oia e Iehova ei Arii e Tahu‘a rahi. (Sal. 2:2; Heb. 5:5, 6) Te toru, ua faatavaihia oia i te varua mo‘a. E te maha, tei te ra‘i to ’na Basileia, eiaha i nia i te fenua.

8. (a) No te aha e nehenehe ai e parau e e tiaraa to Iesu no te faatere? (b) No te aha e papu ai e e basileia parau-tia to ’na?

8 Ua faatoroa Iehova i ta ’na Tamaiti ei Arii Mesia i nia i te ra‘i i 1914. ‘E sepeta parau-tia te sepeta o to ’na basileia.’ Mea papu ïa e e faatere o ’na ma te parau-tia e te tia. E tiaraa to Iesu no te faatere, na Iehova hoi i faaarii ia ’na. Hau roa ’tu â, e vai â to ’na terono “e a muri noa ’tu.” Aita anei oe e oaoa ra i te tavini ia Iehova i raro a‘e i te faatereraa a te Arii ta ’na i maiti?

‘E TATUA TE ARII I TA ’NA ‘O‘E’

9, 10. (a) Afea te Mesia i te tatuaraa i ta ’na ‘o‘e, e mea nafea oia i te faaohipa-oioi-raa i te reira? (b) E nafea te Mesia e faaohipa faahou ai i ta ’na ‘o‘e?

9 A taio i te Salamo 45:3. E parau Iehova i te Arii ia ‘tatua i ta ’na ‘o‘e i to ’na humaha.’ Te faatia ra ïa oia ia Iesu ia haere e aro e e haava i te feia atoa o te patoi i te mana arii o te Atua. (Sal. 110:2) Ua faahitihia te Mesia mai “tei puai ra.” E Arii Aito hoi oia o te ore roa ’tu e pau. Ua tatua o ’na i ta ’na ‘o‘e i 1914 e ua upootia i nia ia Satani e ta ’na mau demoni ta ’na i huri i nia i te fenua.—Apo. 12:7-9.

10 O te omuaraa noa tera o te upootiaraa a te Arii Aito. E haere roa râ o ’na i te hopea. (Apo. 6:2) Ua faaoti Iehova e haava i te mau tuhaa atoa o te ao a Satani e e tuu ia Satani e ta ’na mau demoni i roto i te abuso. E haamouhia na mua Babulonia rahi, te hau emepera o te haapaoraa hape. E faaohipa ïa Iehova i te mau tia poritita no te haamou i teie “faaturi” ino. (Apo. 17:16, 17) Ia oti, e haamou te Arii Aito i te mau faatereraa atoa o te ao a Satani. I reira te Mesia, o te faahiti-atoa-hia mai ‘te melahi o te abuso,’ e faahope roa ’i i ta ’na aroraa ma te tuu ia Satani e ta ’na mau demoni i roto i te abuso. (Apo. 9:1, 11; 20:1-3) E hi‘o ana‘e mea nafea te Salamo 45 e tohu ai i teie mau tupuraa faahiahia mau.

E ARO TE ARII NO TE PATURU I TE “PARAU MAU”

11. E nafea te Mesia e aro ai no te paturu i te “parau mau”?

11 A taio i te Salamo 45:4. Aita te Arii Aito e aro ra no te fana‘o i te mau tuhaa fenua aore ra no te faatîtî i te taata. E fa maitai râ ta ’na. Te aro nei o ’na no te “faatupu i te parau mau, e te mǎrû, e te parau-tia.” Te parau mau hau ê te titauhia ia paturu, o to Iehova ïa mana arii. Ua patoi Satani i to Iehova tiaraa e faatere a orure hau ai ia ’Na. Mai reira mai, ua na reira atoa te mau demoni e te mau taata. Teie te taime no te Arii ta Iehova i maiti no te aro e te faaite roa ’tu i te parau mau no nia i te mana arii o Iehova.

12. E nafea te Arii e aro ai no te paturu i te haehaa?

12 Te aro atoa ra te Arii no te paturu i te “mǎrû,” aore ra haehaa. Ei Tamaiti fanau tahi a te Atua, mea haehaa mau o ’na e ua auraro noa o ’na i te mana arii o to ’na Metua. (Isa. 50:4, 5; Ioa. 5:19) E mea tia ia pee te mau tavini taiva ore atoa a te Arii i to ’na hi‘oraa e ia auraro ma te haehaa i to Iehova mana arii i roto i te mau tuhaa atoa. O te feia ana‘e o te na reira te ora i roto i te ao apî ta te Atua i fafau.—Zek. 14:16, 17.

13. E nafea te Mesia e aro ai no te paturu i te “parau-tia”?

 13 Te aro atoa ra te Mesia no te paturu i te “parau-tia,” i ta te Atua parau-tia. Oia hoi i ta Iehova mau ture aveia no nia i te mea maitai e te mea ino. (Roma 3:21; Deut. 32:4) Ua tohu Isaia no nia i te Arii ra o Iesu Mesia: “E parahi mai te hoê arii ma te hau parau-tia.” (Isa. 32:1) A faatere ai Iesu, e haamau oia i “te ra‘i apî e te fenua apî” i reira ‘e vai mau ai te parau-tia.’ (Pet. 2, 3:13) E titauhia ïa i te feia atoa o te parahi i roto i tera ao apî ia pee i ta Iehova mau ture aveia.—Isa. 11:1-5.

E FAATUPU TE ARII I “TE MAU MEA RIARIA”

14. E nafea te rima atau o te Mesia e faatupu ai i “te mau mea riaria”?

14 E ‘o‘e ta te Arii i to ’na humaha a haere ai oia e aro. (Sal. 45:3) E rave râ oia i ta ’na ‘o‘e no te faaohipa i te reira. Ua tohu te fatu salamo e e faatupu ‘to ’Na rima atau i te mau mea riaria.’ (Sal. 45:4) E faatupu Iesu Mesia i “te mau mea riaria” i nia i to ’na mau enemi a haamou ai ia ratou i Aramagedo. Aita tatou i ite e nafea o ’na e haamou ai i te ao a Satani. E riaria roa râ te mau taata o tei ore i pee i te faaararaa a te Atua e auraro i te faatereraa a te Arii. (A taio i te Salamo 2:11, 12.) I roto i ta ’na parau tohu no nia i te mau mahana hopea, ua parau Iesu e e ‘tarapape te aau o te taata i te mǎta‘u e te mana‘oraa i taua mau mea e fatata i te tupu i te ao nei; e pau hoi te mau mea o te ra‘i ra i te ueuehia.’ Ua na ô â oia: “Ei reira ratou e ite ai i te Tamaiti a te taata i te haerea mai na nia i te ata ma te mana e te hanahana rahi.”—Luka 21:26, 27.

15, 16. O vai ma to roto i te mau nuu o te pee i te Mesia i roto i te aroraa?

15 Te faaite ra te buka o te Apokalupo i te taeraa mai o te Arii “ma te mana e te hanahana rahi” no te faatupu i te haavaraa. Te na ô ra te Apokalupo: “Ite atura hoi au i te ra‘i i te vetearaahia, e inaha, e puaahorofenua teatea, e o tei parahi i nia ihora, ua parauhia oia, e Haapao mau ta ’na e Te Parau mau, e haava oia, e te tama‘i hoi i te tama‘i ma te parau-tia ra. E ua pee maira te mau papaupea [aore ra nuu] o te ra‘i ra ia ’na i nia i te puaahorofenua teatea ra, ma te ahu hua teatea, e te viivii ore i te ahuraa. E e ‘o‘e ooi tei na roto mai i ta ’na vaha, ei tairiraa na ’na i te mau fenua ra; e e tavana oia i nia iho ia ratou ma te sepeta auri ra: e na ’na e taataahi i te neneiraa uaina ra o te hoturaa rahi o te riri o te Atua Puai hope.”—Apo. 19:11, 14, 15.

16 O vai to roto i te mau nuu o te pee i te Mesia i roto i te aroraa? A faaohipa ’i oia i ta ’na ‘o‘e no te taime matamua no te huri ia Satani e ta ’na mau demoni i nia i te fenua, ua apeehia Iesu e “ta ’na mau melahi.” (Apo. 12:7-9) Te auraa ïa e i te tama‘i i Aramagedo, tei roto atoa te mau melahi mo‘a i te mau nuu a te Mesia. O vai ma ’tu â? Ua fafau Iesu i to ’na mau taeae faatavaihia: “E te riro ia ’na te re ra, e te tapea i ta ’u parau e tae noa ’tu i te hopea ra, e horoa ’tu vau i te mana no ’na i nia iho i te mau fenua: e e tavana oia i nia iho ia ratou ma te sepeta auri ra; e e huahua roa ratou mai te au‘a a te potera ra; mai tei tuuhia mai e tau Metua ia ’u nei ra.” (Apo. 2:26, 27) E taio-atoa-hia ïa i roto i te mau nuu i te ra‘i a te Mesia to ’na mau taeae faatavaihia o tei faatiahia i nia i te ra‘i. E pee to ’na mau arii apiti faatavaihia ia ’na a faatupu ai o  ’na i “te mau mea riaria” ma te aratai i te mau nunaa e te hoê sepeta auri.

E UPOOTIA ROA TE ARII

17. (a) Te faahoho‘a ra te puaahorofenua teatea i reira te Mesia e parahi ai i te aha? (b) Te faahoho‘a ra te ‘o‘e e te fana i te aha?

17 A taio i te Salamo 45:5. Te parahi ra te Arii i nia i te hoê puaahorofenua teatea. Te faahoho‘a ra te reira i te hoê tama‘i parau-tia i te aro o Iehova e o tei fariihia e ana. (Apo. 6:2; 19:11) Taa ê atu i te ‘o‘e, e fana atoa ta ’na. Te taio nei tatou: “Ua hi‘o atura vau, e inaha e puaahorofenua teatea e e fana ta tei parahi i nia ihora, e e korona tei horoahia mai no ’na: haere atura oia ma te haapau [aore ra upootia] atu, e ia pau atu â.” Te faahoho‘a ra te ‘o‘e e te fana i te mau ravea ta te Mesia e faaohipa no te haamou i to ’na mau enemi.

E piihia te mau manu no te tamâ i te fenua (A hi‘o i te paratarafa 18)

18. E nafea “te mau ohe” a te Mesia e riro ai ei mea “ooi”?

18 Ma te mau parau pehepehe, ua tohu te fatu salamo no nia i te Arii: “E mairi te mau taata i raro ia oe ra! e ooi te mau ohe na oe ra i te aau o te mau enemi o te arii ra.” E ati te itehia na te ao atoa. Te faaite ra te parau tohu a Ieremia: “E o tei pohe ia Iehova ra ia tae i te reira ra anotau, e riro ïa mai te hopea mai o te fenua, e tae noa ’tu i te tahi hopea o te fenua.” (Ier. 25:33) Te na ô ra te tahi atu parau tohu tei taaihia: “Ua hi‘o atura vau i te hoê melahi i te tiaraa i roto i te mahana ra, ua pii hua maira tana reo i te mau manu atoa e maue i roto i te reva nei, na ô maira, A maue mai, e haaputuputu outou i te amuraa rui a te Atua rahi ra; ia amu outou i te tino o te mau arii ra, e te tino o te mau tapena ra, e te tino o te feia mana ra, e te puaahorofenua ra, e to tei parahi i nia ihora, e te tino o te mau taata atoa ra, to te tiamâ, e to te tavini, to te taata rii, e to te feia rarahi.”—Apo. 19:17, 18.

19. E nafea te Mesia e upootia roa ’i?

19 I muri iho i te haamouraa i te ao ino a Satani, e horo te Arii hanahana ra o Iesu Mesia no te upootia. (Sal. 45:4) E upootia roa o ’na ma te tuu ia Satani e ta ’na mau demoni i roto i te abuso no te roaraa o te Faatereraa tausani matahiti. (Apo. 20:2, 3) I te mea e tei roto Satani e ta ’na mau demoni i te ohipa-ore-raa mai te pohe ra te huru, e tiamâ ïa te taata i to ’na mana. E nehenehe ïa ratou e ora ei tavini auraro a to ratou Arii hanahana. Hou râ te fenua e riro ai ei paradaiso, e oaoa te taata e to ratou Arii e na 144 000 no te tahi atu tumu. E hi‘opoahia tera tupuraa oaoa i to muri nei tumu parau.

^ par. 5 Salamo 45:2 (44:3, Te Bibilia Mo’a V.C.J.S., 1976): “E nehenehe oe, o oe tei hau i te nehenehe i rotopu i te tamarii a te taata nei. Ua manii hoi te au maitai i nia i to pue utu; I haamaitai ai te Atua ia oe e a muri noa’tu.”