Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) NOVEMA 2013

 HAAMANA‘ORAA NO TAHITO RA

“E au vau i te hoê honu e to ’na fare i nia i to ’na tua”

“E au vau i te hoê honu e to ’na fare i nia i to ’na tua”

I TE hoê pororaa taa ê e iva mahana i Atete/Tetepa 1929, ua hau atu i te 10 000 taata poro tei purara na Marite atoa. Ua vaiiho atu ratou e 250 000 buka e buka rairai. Tau tausani pionie i rotopu i teie mau taata poro i te Basileia. Ua tataitoru te numera o te mau pionie mai 1927 e tae atu i 1929. Auê ïa maraaraa faahiahia! Ua faaite te Bulletin * e “mea maere mau” te reira.

I te hopea o 1929, ua topa roa te faanavairaa faufaa. I te Mahana piti 29 no Atopa 1929, ua topa roa te faito o te moni hoo i te Pu moni no New York. Arepurepu roa a‘enei te faanavairaa faufaa na te ao. E tausani fare moni tei topatari. Ua faaea te mau fare faaapu i te ohipa. Ua opani te mau fare tapihaa rarahi. E mirioni taata tei ere i ta ratou ohipa. I 1933, ua haruhia 1 000 fare i te mahana hoê i Marite.

Eaha ta te mau tavini taime taatoa i rave i taua taime fifi ra? Mea rahi te pionie tei faanaho i to ratou pereoo ei vahi nohoraa aore ra tei hamani i te fare tavere. Mea tamoni ore te reira e aita e titauhia ia aufau i te tute. E nehenehe ïa ratou e tamau i ta ratou taviniraa ma te faaiti roa mai i te mau haamâu‘araa. * E tairururaa mataeinaa ana‘e, e riro te hoê fare tavere ei piha hotera tamoni ore. I 1934, ua faaite te Bulletin e nafea ia hamani e ia faanaho i te hoê nohoraa nainai e te au maitai. E itehia i roto: te hoê faahaereraa pape, te hoê umu, te hoê ro‘i e te ravea ia vai mahanahana noa te nohoraa.

Ua hamani te mau taata poro aravihi na te ao i to ratou fare tavere. Ua haamana‘o Victor Blackwell: “Aita to Noa e aravihi no te patu i te hoê pahi e aita to ’u e aravihi no te patu i te hoê fare tavere.” Ua na reira râ o ’na.

Pereoo faanahohia ei vahi nohoraa o te afaihia i te tahi atu pae o te anavai i te tau ûa rahi i Initia

E pereoo to Avery e Lovenia Bristow tei faanahohia ei fare. Ua na ô Avery, “E au vau i te hoê honu e to ’na fare i nia i to ’na tua.” Ua tavini raua ei pionie na muri ia Harvey e Anne Conrow. E fare tavere to raua ua tapiripirihia te papie tâhia i nia i te papai. E topa noa tera mau papie a taverehia ’i te fare. Ua haamana‘o Avery, “Aita e taata i ite a‘enei i te hoê tavere mai tera e tae roa mai i teie nei!” Ua faataa râ Avery i teie utuafare e piti tamaroa mai te “utuafare oaoa roa ’‘e tei ore i itehia a‘enei.” Ua papai Harvey Conrow, “Aita roa ’tu matou i ere i te hoê noa ’‘e mea, e aita matou i haapeapea i roto i te taviniraa a Iehova e i raro a‘e i to ’na haapao maitai î i te here.” Ua haere na melo e maha o te utuafare Conrow i te Haapiiraa no Gileada e ua tonohia i Peru ei mitionare.

E pionie atoa te utuafare Battaino. I to Giusto e Vincenza iteraa e e tamariihia raua, ua tataî raua i to raua pereoo Ford A no 1929 ei vahi nohoraa “tei au i te hotera,” ia faaauhia i te mau fare ie ta  raua i faaohipa na. E ta raua tamahine iti, ua tamau â raua i te poro i te taata Italia i Marite.

Mea rahi te taata tei faaroo i te parau apî maitai. Aita râ te feia veve e te feia aita ta ratou e ohipa e nehenehe e horoa noa mai i te tahi moni no te mau papai Bibilia. E horoa mai ïa ratou i te tahi taihaa. Ua tapura e piti pionie e 64 huru taihaa taa ê ta te feia i anaanatae i te parau mau i horoa ’tu. E au ra e te taiohia ra te tapura o te hoê fare toa.

Ua farerei Fred Anderson i te hoê taata faaapu tei horoa ’tu i te titia mata o to ’na mama no te rave i te hoê anairaa buka. I to muri iho fare faaapu, ua anaanatae te hoê taata i ta tatou mau papai. Ua parau râ o ’na, “Aita ta ’u e titia mata no te taio.” Maoti râ te titia mata o to ’na taata tapiri, e nehenehe ta ’na e taio i te mau buka e ua oaoa roa o ’na i te horoa i te moni no te reira.

Ua tuu Herbert Abbott i roto i to ’na pereoo i te hoê afata no te tuu i te moa. Ia fana‘o o ’na e toru aore ra e maha moa a poro ai, e haere o ’na i te matete i muri iho no te hoo atu ia ratou. E maoti te moni e noaa mai, e faaî o ’na i to ’na pereoo i te mori. Ua papai o ’na, “Ua ite anei mâua i te mau taime aita e moni faahou? E! Aita râ te reira i tapea ia mâua. E mori ana‘e to roto i te pereoo, e tere mâua ma te tuu i to mâua faaroo e tiaturi ia Iehova ra.”

Na te tiaturi ia Iehova e te faaotiraa papu i tauturu i to te Atua nunaa ia faaruru i tera mau matahiti fifi. I te hoê mahana ûa rahi, e taime noa to Maxwell e Emmy Lewis no te horo i rapaeau i to raua fare tavere a topa mai ai te hoê tumu raau i nia iho. Afa ’tura te fare tavere. Ua papai Maxwell, “E fifi iti noa te reira e aita roa ’tu mâua i mana‘o noa ’‘e e vaiiho i tera taviniraa. Mea rahi te ohipa, e ua hinaaro mâua e rave i te reira.” Ma te mǎta‘u ore e maoti te tauturu a te mau hoa î i te here, ua hamani faahou Maxwell e Emmy i to raua fare tavere.

Ua faaite noa e mirioni Ite no Iehova itoito rahi i te huru feruriraa haapae a faaruru ai i te fifi. Mai teie mau pionie matamua, ua faaoti papu tatou e poro noa e tae roa i te taime e parau ai Iehova ua oti.

^ par. 3 Ta tatou taviniraa i te Basileia i teie nei.

^ par. 5 I tera taime, aita e ohipa ta te rahiraa o te mau pionie. I fana‘o na ratou i te mau papai Bibilia mâmâ. E no te amo i ta ratou mau haamâu‘araa, i faaohipa na ratou i te moni tei horoahia mai a vaiiho ai i te mau papai.