Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) NOVEMA 2013

Ta ’na raau, o te taviniraa ïa i te Atua!

Ta ’na raau, o te taviniraa ïa i te Atua!

I Kenya, ua titau-manihini-hia e piti pionie ia tomo i roto i te hoê fare. Ua maere roa raua i te iteraa i te hoê taata nainai e tarava ra i nia i te ro‘i. Mea nainai roa to ’na ouma e mea poto to ’na mau rima. Ua ataata o ’na a faaite ai raua i te parau fafau a te Atua e e ‘ou‘au‘a noa te pirioi mai te aili.’—Isa. 35:6.

Ua itea i na pionie e ua fanauhia Onesmus e te hoê ma‘i e fatifati hanoa te ivi a tano ai. I te mea e aita e rapaauraa e ora ’i i tera ma‘i, ua mana‘o Onesmus e e mauiui noa o ’na e e faaea noa o ’na i roto i te hoê parahiraa turairai.

Ua farii Onesmus i te hoê haapiiraa Bibilia. Aita râ to ’na mama i faatia ia ’na ia haere i te mau putuputuraa ma te haaferuri ia ’na e e nehenehe o ’na e pepe e e mauiui atu â. Ua haruharu ïa te mau taeae i te mau oreroraa parau i te mau putuputuraa e ua faaroo Onesmus i te reira i te fare. I muri a‘e e pae ava‘e haapiiraa, ua faaoti Onesmus e haere i te mau putuputuraa noa ’tu e mea atâta no ’na.

Ua mauiui atu â anei Onesmus a haere ai i te mau putuputuraa? Aita roa ’tu. Te haamana‘o ra o ’na: “E au ra e ua iti mai to ’u mauiui i te mau putuputuraa.” No ’na, ua maitai mai o ’na no to ’na tiaturiraa apî. Ua oaoa roa te mama o Onesmus a ite ai e ua maitai mai o ’na e ua farii atoa i te hoê haapiiraa Bibilia. Ua parau o ’na, “Te raau a ta ’u tamaiti, o te taviniraa ïa i te Atua.”

Aita i maoro, ua riro mai Onesmus ei taata poro bapetizo-ore-hia. I muri a‘e, ua bapetizohia ’tura o ’na e e tavini tauturu o ’na i teie nei. Noa ’tu e eita ta ’na e nehenehe e faaohipa i to ’na na avae e hoê o to ’na na rima, ua hinaaro Onesmus e rave i tei tia ia ’na i roto i te taviniraa a Iehova. Ua hinaaro o ’na e riro ei pionie tauturu, ua feaa râ. Ua ite hoi o ’na e e titauhia te taata no te turai i to ’na parahiraa. A faaite ai o ’na i to ’na mau hoa Kerisetiano i ta ’na tapitapiraa, ua parau ratou e e tauturu ratou ia ’na. Ta ratou iho â i rave e ua riro mai Onesmus ei pionie tauturu.

Ua hinaaro Onesmus e riro ei pionie tamau, ua feaa atoa râ. Ua faaitoito râ te hoê irava mahana ia ’na. O te Salamo 34:8 ïa: “A tamata na ia ite i te maitai o Iehova!” Ua feruri maite Onesmus i tera irava e ua faaoti e riro ei pionie tamau. I teie nei, te poro nei oia e maha mahana i te hebedoma e mea rahi ta ’na piahi Bibilia e haere maitai ra i mua i te pae varua. I 2010, ua apiti o ’na i te Haapiiraa no te mau pionie. Te taeae i haapii ia ’na i ǒ, o te hoê ïa o na pionie e piti tei poro ia ’na. Auê o ’na i te oaoa e!

Fatata e 40 matahiti to Onesmus i teie nei e ua pohe to ’na na metua. Te haapao nei râ te mau taeae e tuahine o ta ’na amuiraa i to ’na mau hinaaro i te mau mahana atoa. Te oaoa mau nei o ’na i te mau haamaitairaa atoa ta ’na e fana‘o nei e te tiai ru nei oia i te mahana ‘e ore te taata e parau e, Ua paruparu vau i te ma‘i.’—Isa. 33:24.