Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) NOVEMA 2013

E te mau matahiapo, a pee i na Tiai mamoe Rahi a‘e

E te mau matahiapo, a pee i na Tiai mamoe Rahi a‘e

“I pohe atoa hoi te Mesia iho no outou; e ua vaiiho hoi i te haapaoraa na outou, ia pee outou i to ’na taahiraa avae.”—PET. 1, 2:21.

1, 2. (a) Eaha te tupu ia aupuru-maitai-hia te mamoe? (b) No te aha te taata e rave rahi i te tau o Iesu i au ai i te mamoe aore e tiai?

E MAITAI mai te mau mamoe e tiai î i te here ana‘e ta ratou. Ia au i te hoê buka no nia i te faaamuraa mamoe, eita e navai ia faatamaa noa te tiai mamoe i te nǎnǎ. Mea faufaa râ ia aupuru oia i te mamoe taitahi. E oraora maitai ïa te nǎnǎ taatoa. Aita ana‘e, e paruparu e e ma‘ihia ratou.

2 E maitai atoa te amuiraa taatoa ia haapao e ia aupuru te tiai Kerisetiano i te mamoe taitahi a te Atua. A haamana‘o na e ua aroha Iesu i te nahoa no te mea “ua purara ratou e ua faarue-taue-hia, mai te mamoe tiai ore.” (Mat. 9:36) No te aha mai tera ’i ratou? No te ino, te etaeta e te haavare o te feia i haapii i te ture a te Atua i te nunaa. Aita tera mau aratai i here e i aupuru i te nunaa, ua tuu atu râ i te “hopoia teimaha” i nia i to ratou tapono.—Mat. 23:4.

3. Ia haamana‘o te mau matahiapo i te aha a haapao ai i te mamoe?

3 E hopoia rahi ta te mau matahiapo i teie mahana. Na Iehova e na Iesu te mamoe ta ratou e haapao ra. ‘Ua hoo hia te mamoe i te hoo rahi’ ta Iesu, “te tiai mamoe maitai,” i aufau e to ’na iho “toto tao‘a.” (Ioa. 10:11; Kor. 1, 6:20, Te Bibilia Mo’a V.C.J.S., 1976; Pet. 1, 1:18, 19) No to ’na here rahi i te mamoe i horoa ’i o ’na i to ’na ora no ratou. E mea tia ia haamana‘o noa te mau matahiapo e o Iesu Mesia, “te tiai mamoe rahi,” to ratou tiaau. E hopoia ïa ta ratou i mua ia ’na.—Heb. 13:20.

4. Eaha ta tatou e hi‘opoa mai?

4 E nafea ïa te mau matahiapo e haapao ai i te  mamoe? Te faaitoitohia ra te mau melo o te amuiraa ‘ia faaroo i to ratou mau aratai.’ I te tahi a‘e pae, te faauehia ra te mau matahiapo eiaha ia “faahepo i nia iho i te tufaa a te Atua.” (Heb. 13:17; a taio i te Petero 1, 5:2, 3.) E nafea ïa te mau matahiapo e aratai ai ma te faahepo ore i te nǎnǎ a faaea noa ’i i roto i te mau otia o to ratou tiaraa horoahia mai e te Atua?

“EI ROTO RATOU I TANA OUMA IA HOPOI”

5. Eaha ta te Isaia 40:11 e haapii maira no nia ia Iehova?

5 Ua parau te peropheta Isaia no nia ia Iehova: “E faaamu oia i ta ’na nǎnǎ mai te tiai mamoe ra; e haaputu oia i te mau fanau‘a rii i roto i tana rima, e ei roto ratou i tana ouma ia hopoi; e aratai rii maite oia i te mau maiaa faaote pinia ra.” (Isa. 40:11) Te faataa ra teie irava e nafea Iehova e haapao ai i te mau hinaaro o te mau melo o te amuiraa tei paruparu aore ra o te hema ohie. Mai te hoê tiai tei ite i te hinaaro taa ê o te mamoe taitahi e o te tauturu oioi atu, ua ite Iehova i te mau hinaaro o te Kerisetiano taitahi e te oaoa nei oia i te tauturu atu. Mai te hoê tiai o te tuu i te hoê pinia mamoe i roto i to ’na tufetu ahu, e tamahanahana e e haapao roa ’tu â Iehova ia tatou a faaruru ai tatou i te fifi rahi. O ’na hoi “te tumu o te aroha.”—Kor. 2, 1:3, 4.

6. E nafea te hoê matahiapo e pee ai i te hi‘oraa o Iehova?

6 E hi‘oraa faahiahia mau â Iehova no te hoê tiai mamoe pae varua! Mai ia Iehova, ia haapao maite oia i te mau hinaaro o te mau mamoe e tia ’i. Ia ite o ’na eaha te mau fifi ta ratou e faaruru ra, e taa ia ’na afea e e nafea ia faaitoito e ia tauturu atu. (Mas. 27:23) Mea faufaa ïa ia faataa o ’na i te taime no te tauaparau e to ’na mau hoa haamori. Ma te ore e faaô ia ’na i roto i to ratou oraraa, e haapao o ’na i ta ’na e ite ra e e faaroo ra i roto i te amuiraa a rave atu ai i te taime no te ‘tauturu i te feia paruparu’ ma te here.—Ohi. 20:35; Tes. 1, 4:11.

7. (a) I te tau o Ezekiela e Ieremia, ua haapao-maitai-hia anei ta te Atua mau mamoe? A faataa. (b) Eaha te haapiiraa e huti mai a faautua ’i Iehova i te mau tiai mamoe pae varua taiva?

7 A hi‘o na i te haerea o te mau tiai ta te Atua i faautua i te tau o Ezekiela e Ieremia. Ua na reira Iehova no te mea aita ratou i haapao maite i ta ’na mau mamoe. Aita ana‘e e taata no te haapao i te mau mamoe, e haru-ohie-noa-hia ratou e e purara. Ua faaamu teie mau tiai ia ratou iho, eiaha râ i te mau mamoe o ta ratou i rave ino. (Ezk. 34:7-10; Ier. 23:1) Ua faautua te Atua i te mau tia faatere o te Amuiraa faaroo Kerisetiano no te hoê â tumu. Te haapapu atoa râ te reira i te faufaaraa ia haapao maitai e ia here i ta Iehova nǎnǎ.

UA HOROA IESU I TE HI‘ORAA

8. E nafea te mau matahiapo e pee ai i te hi‘oraa maitai roa o Iesu a horoa ’i i te a‘oraa?

8 No te huru tia ore o te taata, eita paha vetahi i roto i te amuiraa e taa oioi i ta Iehova e titau ra ia ratou. Ua rave paha ratou i te tahi mea o te ore e tu ra i te a‘oraa Bibilia aore ra o te faaite ra e aitâ ratou i riro atura ei Kerisetiano feruriraa paari. Ia aha te mau matahiapo? E mea tia ia pee ratou i te faaoromai o Iesu. E pinepine hoi ta ’na mau pǐpǐ i te mârô no te ite o vai te rahi a‘e i roto i te Basileia. Ua tamau râ Iesu i te haapii e i te horoa ’tu i te a‘oraa î i te here no  nia i te haehaa. (Luka 9:46-48; 22:24-27) Ma te horoi i to ratou avae, ua faaite oia eaha te haehaa. Te hoê ïa huru maitai e titauhia ia faaite te mau matahiapo.—A taio i te Ioane 13:12-15; Pet. 1, 2:21.

9. Eaha te huru feruriraa ta Iesu i faaitoito i ta ’na mau pǐpǐ ia faaite?

9 Mea taa ê to Iesu mana‘o o te hoê tiai i to Iakobo e Ioane. Ua hinaaro na aposetolo i te hoê tiaraa teitei i roto i te Basileia. Ua faaafaro râ Iesu i to raua huru feruriraa ma te parau: “Ua ite outou e, te faahepo nei te hui mana o te Etene ia ratou, e te feia rarahi ra te mana ra ïa i nia iho ia ratou. Eita râ e tia ia na reira i roto ia outou; o te hinaaro râ i te faarahi i roto ia outou na, ia riro ïa oia ei tavini no outou e tia ’i.” (Mat. 20:25, 26) E mea tia ia patoi te mau aposetolo i te hinaaro e “faahepo” aore ra e faatere i to ratou mau hoa.

10. (a) No Iesu, e nafea te mau matahiapo e haapao ai i te nǎnǎ? (b) Eaha te hi‘oraa ta Paulo i vaiiho mai?

10 Te hinaaro nei Iesu ia pee te mau matahiapo i to ’na hi‘oraa a haapao ai ratou i te nǎnǎ. Ia ineine ratou i te tavini, eiaha râ i te faatere, i to ratou mau hoa Kerisetiano e tia ’i. Ta te aposetolo Paulo ïa i rave ma te haehaa. Ua na ô oia i te mau matahiapo o te amuiraa i Ephesia: “Ua ite outou i te huru o to ’u parahiraa i ǒ outou nei, mai te mahana matamua mai â a tipae mai ai au i Asia nei ra, i te haamoriraa i te Fatu ma te haehaa.” Ua hinaaro Paulo ia tauturu tera mau matahiapo ia vetahi ê ma te aau tae e te haehaa. Ua parau oia: “Aita e mea toe ia ’u i te faaite atu ia outou na, e ia na reira atoa outou i te rave i te ohipa, e e tauturu atu hoi outou i te feia paruparu e tia ’i.” (Ohi. 20:18, 19, 35) Ua faaite Paulo i to Korinetia e e ere o ’na i te fatu o to ratou faaroo. E tauturu haehaa râ no to ratou oaoa. (Kor. 2, 1:24) E hi‘oraa maitai Paulo o te haehaa e te itoito no te mau matahiapo i teie mahana.

‘A TAPEA MAITE I TE PARAU MAU’

11, 12. E nafea te hoê matahiapo e nehenehe ai e tauturu i te hoê taeae ia rave i te hoê faaotiraa?

11 E mea tia ia ‘tapea maite te hoê matahiapo i te parau mau i haapiihia ’tu ia ’na.’ (Tito 1:9) E na reira râ o ’na “ma te aau mǎrû.” (Gal. 6:1) Ei hi‘oraa, eita te hoê tiai mamoe maitai e faahepo i te hoê taeae ia pee i te tahi haerea. E tauturu râ o ’na ia ’na ia rave i te mau faaotiraa niuhia i nia i to ’na here ia Iehova e i to ’na hinaaro i ta ’na Parau. E nafea? Ma te faataa ’tu i te tahi mau a‘oraa Bibilia aore ra i te tahi tumu parau i roto i ta tatou mau papai. Ma te faaitoito atu ia feruri e nafea te faaotiraa ta ’na e rave e ohipa ’i i nia i to ’na mau taairaa e o Iehova. Ma te haamana‘o atu i te faufaaraa ia imi i ta te Atua aratairaa na roto i te pure hou a rave ai i te hoê faaotiraa. (Mas. 3:5, 6) Ia oti, e vaiiho te matahiapo ia ’na ia rave i ta ’na iho faaotiraa.—Roma 14:1-4.

12 Ia niuhia te mau aratairaa a te mau tiaau Kerisetiano i nia noa i te mau Papai. Mea faufaa roa ïa ia faaohipa maitai e ia turu ratou i te Bibilia. Ma te na reira, eita te mau matahiapo e faaohipa i to ratou tiaraa ma te tano ore. E ere na ratou te mamoe. Na te melo taitahi o te amuiraa e amo i ta ’na iho hopoia i mua ia Iehova e Iesu no te mau faaotiraa ta ’na e rave.—Gal. 6:5, 7, 8.

 HI‘ORAA NO TE NǍNǍ

E tauturu te mau matahiapo i to ratou utuafare ia faaineine ia ratou no te taviniraa (A hi‘o i te paratarafa 13)

13, 14. Ei hi‘oraa te hoê matahiapo no te nǎnǎ i roto i teihea mau tuhaa?

13 I muri a‘e i te a‘oraa i te mau matahiapo ia ore e ‘faahepo i nia iho’ i te amuiraa, ua faaue te aposetolo Petero ia ratou ia riro ei “aveia” aore ra hi‘oraa no te nǎnǎ. (Pet. 1, 5:3) E nafea ïa? A hi‘o na i na huru maitatai e titauhia ra i te hoê taeae e hinaaro ra e tavini ei matahiapo. A tahi, ia riro o ’na ei taeae “haapao maitai.” Te auraa ïa e e taa maitai ia ’na te mau aratairaa Bibilia e ua ite o ’na e nafea ia faaohipa i te reira i roto i to ’na iho oraraa. Te piti, ia riro o ’na ei taeae o te “a‘o maitai i to ’na iho utuafare ma te tura.” E utuafare ana‘e ta ’na, e mea tia ia riro o ’na ei tane faaipoipo e metua tane hi‘oraa maitai. No te aha? Aita ana‘e o ’na i “ite i te a‘o i to ’na iho utuafare, eaha e tia ’i ia ’na ia tiai i te ekalesia [aore ra amuiraa] o te Atua?” (Tim. 1, 3:1, 2, 4, 5) E tiaturi te mau melo o te amuiraa i te mau matahiapo e faaite ra i tera na huru maitatai.

14 Mai ia Iesu, e horoa ’toa te mau matahiapo i te hi‘oraa maitai i roto i te pororaa. E tuhaa faufaa te pororaa i te parau apî maitai o te Basileia i roto i to Iesu oraraa i te fenua nei. Ua faaite o ’na i ta ’na mau pǐpǐ e nafea ia rave i tera ohipa. (Mar. 1:38; Luka 8:1) I teie mahana, mea mahanahana mau â ia poro e te mau matahiapo e ia ite i to ratou itoito rahi no teie ohipa faaoraraa e e nafea ratou e haapii ai ia vetahi ê! Te faaohipa nei te mau matahiapo i to ratou taime e itoito no te poro i te parau apî maitai noa ’tu e e porotarama î maitai ta ratou. Te turai ra te reira i te amuiraa ia faaite i te hoê â itoito rahi. E horoa atoa te mau matahiapo i te hi‘oraa maitai ma te faaineine e te apiti i te mau putuputuraa e ma te tamâ e te atuatu i te Piha a te Basileia.—Eph. 5:15, 16; a taio i te Hebera 13:7.

E horoa te mau tiaau i te hi‘oraa i roto i te pororaa (A hi‘o i te paratarafa 14)

“E TAUTURU ATU I TEI PARUPARU”

15. Eaha te tahi mau tumu e haere ai te mau matahiapo e hi‘o i te mau Kerisetiano no te faaitoito ia ratou?

15 E tauturu oioi te hoê tiai maitai i te mamoe tei pepe aore ra tei ma‘ihia. Oia atoa, e tauturu oioi te mau matahiapo i te melo o te amuiraa e mauiui ra aore ra e hinaaro ra i te a‘oraa e te faaitoitoraa. E hinaaro paha te Kerisetiano ruhiruhia e tei ma‘ihia i te tauturu no to ratou mau hinaaro o te mau mahana atoa. Mea faufaa atoa râ ia fana‘o ratou i te faaitoitoraa e te tamahanahanaraa a te Bibilia. (Tes. 1, 5:14) Te faaruru nei paha te feia apî o te amuiraa i te fifi mai te  aroraa i “te mau hinaaro o te apîraa.” (Tim. 2, 2:22) E tauturu te mau matahiapo i te mau melo atoa o te amuiraa ma te faanaho i te hoê farereiraa no te faaitoito atu. E taa ïa ia ratou te mau fifi o to ratou mau taeae a faaitoito atu ai maoti te mau a‘oraa Bibilia tano maitai. Ia haapao-oioi-hia te reira, e faatitiaifaro-oioi-hia e rave rahi fifi.

16. Ia aha te mau matahiapo ia fifi roa mai te hoê melo o te amuiraa?

16 Ia aha te mau matahiapo ia fifi roa mai te hoê melo o te amuiraa a ino atu ai to ’na mau taairaa e o Iehova? Ua parau te taata papai Bibilia o Iakobo: “Te pohe ra anei te hoê o outou i te ma‘i? e tii oia i te mau peresibutero o te ekalesia ra [aore ra matahiapo o te amuiraa], e na ratou e pure ia ’na, ma te faatahinu ia ’na i te mono‘i i te i‘oa o te Fatu ra [Iehova]. E e ora taua ma‘i ra i te pure faaroo, e na te Fatu oia e faatia i nia; e i rave na oia i te hara ra, e faaorehia ta ’na hara.” (Iak. 5:14, 15) E haere oioi te mau matahiapo e tauturu i te hoê Kerisetiano tei ‘ma‘ihia’ i te pae varua noa ’tu aita o ’na i haere mai e hi‘o ia ratou. Mea faufaa ia pure te mau matahiapo no to ratou mau taeae e i pihai iho ia ratou, oia atoa ia tauturu ia ratou i te mau taime fifi. Mea na reira ratou e riro ai ei tiai maitai o te faaitoito i te tahi atu ia tamau i te tavini ia Iehova ma te oaoa.—A taio i te Isaia 32:1, 2.

17. Eaha te itehia ia pee te mau matahiapo i “te tiai mamoe rahi”?

17 Te tutava nei te mau tiai Kerisetiano i te pee i te “tiai mamoe rahi” ra o Iesu Mesia i roto i te mau mea atoa ta ratou e rave ra i roto i te faanahonahoraa a Iehova. E tauturu teie mau taeae haapao maitai i te nǎnǎ ia puai mai i te pae varua e ia tavini i te Atua ma te taiva ore. Te mauruuru mau nei tatou i to tatou mau tiai mamoe î i te here e i to tatou Tiai mamoe otahi ra o Iehova.